Xoossaa Qaalaappe Tamaara

 Nuuni Yesuusa Hayquwaa Ayba Ogiyan Hassayana Koshshii?

Ha huuphe yohoy neeni oychidoba gidana danddayiya oyshatu zaaruwaa qonccissees; qassi he zaarota Geeshsha Maxaafan awan demmana danddayiyaakko yootees. Yihoowa Markkati he zaarota nenaara tobbanau ufayttoosona.

1. Yesuusa hayquwaa ayba ogiyan hassayana koshshii?

Yesuusi bana kaalliyaageeti oyttaanne woyniyaa goˈettidi, leemiso gidida kahuwan ba hayquwaa hassayanaadan yootiis. Oyttay Yesuusa ashuwaa leemiso, qassi woynee a suuttaa leemiso.—Luqaasa 22:19, 20 nabbaba.

Yesuusi goˈettido oyttay irshshoy baynnaagaa. Geeshsha Maxaafan irshshoy darotoo nagarau malaata. Yaatiyo gishshau, oyttay polo gidida Yesuusa ashuwau bessiya leemiso. Yesuusi, Muuse Higgiyan shiishshiyo mehiyaa yarshshoy attanaadan oottida ba ashuwaa yarshshiis. (Ibr. 10:5, 9, 10) Woynee nu nagaraa gishshau yarshsho gididi gukkida Yesuusa alˈˈo suuttau leemiso.—1 PHeexiroosa 1:19; 2:24; 3:18 nabbaba.

2. Nuuni Yesuusa hayquwaa hassayiyo baalaa awude bonchana koshshii?

Yesuusi Niisane 14n Paasika gallassi hayqqiis. Ayhudatu gallassay doommiyoy away wulliyo wode. Yesuusi hayqqanaappe kase qammi, ba kiittidoogeetuura Paasikka baalaa kahuwaa mi simmidi, ba hayquwaa hassayanaadan ooratta kahuwaa giigissiis.—Luqaasa 22:14, 15 nabbaba.

Ha wodiyan Xoossaa asay hassayiyoy, Xoossay Yesuusa baggaara saˈaa asaa ubbaa nagaraappenne hayquwaappe naxa kessanau giigissidobaa. (Kes. 12:5-7, 13, 17) Paasikay layttan issitoo bonchettidoogaadan, Yesuusa hayquwaa Hassayiyo Baalaykka, Geeshsha Maxaafaa aginaa qoodan Niisane 14n away wulli simmin layttan issitoo bonchettees.—Yohaannisa 1:29 nabbaba.

  3. Oyttaappenne woyniyaappe ekkana bessiyoogeeti oonee?

Yesuusi woyniyaa bana kaalliyaageetussi immido wode, “Hagee burccukkoi . . . ooratta maachchaa” yaagiis. (1 Qor. 11:25) Ooratta maachay, Xoossay Israaˈeelati ayyo minttidi azazettikko a asa gidanaagaa qaalaa gelido, Muuse Higgiyaa maachaa sohuwan eqqiis. (Kes. 19:5, 6) Gidikkokka, Israaˈeelati Xoossaa qaalau azazettibookkona. Yaatiyo gishshau, Yihooway ooratta maachaa wottiis.—Ermmaasa 31:31 nabbaba.

Yihooway ooratta maachan guutta asattu baggaara daroti anjjettiyo ogiyaa giigissiis. He maachaa maacettidaageeti guutta, eti 144,000 xalaala. Eta baggaara, ubba deriyaappe miilooniyan qoodettiyaageti gannate saˈan merinaa deˈuwaa anjjuwaa demmana. Ooratta maachaa maacettidaageetuppe amaridaageeti ha wodiyan saˈan Yihoowayyo oottiiddi deˈoosona. Burccukkoy “ooratta maachchaa” malaatiyo gishshau, oyttaanne woyniyaa ekkana bessiyaageeti hegeetu xalaala.—Luqaasa 12:32; Ajjuutaa 14:1, 3 nabbaba.

4. Yesuusa Hayquwaa Hassayiyo Baalay nuna goˈˈiyoy ayba ogiyaanee?

Layttan layttan bonchiyo Yesuusa hayquwaa Hassayiyo Baalay zawi baynna Yihoowa siiquwaa nuuni keehippe nashshanaadan oottees. I ba Naˈay nu nagaraa gishshau hayqqanaadan kiittiis. Yaatiyo gishshau, nuuni he Baalaa bonchiyo wode, Yesuusa hayquwan nuuni demmiyo goˈaa wotti dentti qoppana koshshees. Yihoowaynne Yesuusi nuuyyo oottidobaa nashshiyoogaa waatidi bessana danddayiyaakko nuuni qoppana koshshees.—Yohaannisa 3:16; 2 Qoronttoosa 5:14, 15 nabbaba.

Gujo qonccissuwaa demmanau, Yihoowa Markkati attamissido ha maxaafaa sinttaa 206-208 xeella. Tumuppe Geeshsha Maxaafay Tamaarissiyoy Aybee?