Xoossaa Qaalaappe Tamaarite

Geeshsha Maxaafay Sinttanaabaa Yootii?

Ha huuphe yohoy neeni oychidoba gidana danddayiya oyshatu zaaruwaa qonccissees; qassi he zaarota Geeshsha Maxaafan awan demmana danddayiyaakko yootees. Yihoowa Markkati he zaarota nenaara tobbanau ufayttoosona.

1. Geeshsha Maxaafaa hiraagati issi hanotaara gayttida ubbabaa yootiyoonaa?

Sintta wodiyan hanana ubbabaa kasetidi yootana danddayiyay Ubbaa Danddayiya Xoossaa xalaala. (Amo. 3:7) Leemisuwau, i Masiyaa woy Kiristtoosa geetettiya asi yaanaagaa daro wodiyaappe kase doommidi yootiis. Masee ammanettida Abrahaama zeretta gidana. I azazettiya asaa naati harggennan polo deˈuwaa deˈiyo anjjuwaa zaarettidi demmanaadan oottiya kawo gidana. (Doo. 22:18; Isi. 53:4, 5) Qaalaa gelido he Masee Beetaliheemen yelettana.—Mikiyaasa 5:2 nabbaba.

Mase gididaagee Yesuusa. Masee geelaˈeeppe yelettanaagaanne karettanaagaa, laappun xeetaappe dariya layttaa kasetidi Geeshsha Maxaafay yootiis. I darotu nagarau ba shemppuwaa aatti immana; qassi duretu duufuwan moogettana. (Isi.7:14; 53:3, 9, 12) I hariyaa toggidi Yerusalaame gelanaagaanne a 30 biran atti immanaagaa Geeshsha Maxaafay ichashu xeetaappe dariya layttaa kasetidi yootiis. Ha ubbabay polettiis.—Zakkaariyaasa 9:9; 11:12 nabbaba.

2. Xoossay issibay haniyo gallassaa kasetidi yootii?

Geeshsha Maxaafay Masee yaana layttaa ichashu xeetu layttaappe dariya wodiyaa kasetidi yootiis. I yaana gakkanaashin deˈiya wodee layttatu saaminttaa qoodan, giishin issi ‘saaminttay’ (NW) laappun laytta gidido wodiyaa qoodan odettiis. He saaminttatu qooday 7 bolli 62 gujjin, muleera 69 layttatu saamintta. Hegee 483 laytta. He layttati doommidoy awudee? Geeshsha Maxaafay yootiyoogaadan he layttatu qooday doommidoy, Xoossaa ashkkaraa Nahimee Yerusalaame biidi, katamaa zaarettidi keexxiyoogaa doommido wode. He layttay 455 K.K. gidiyoogaa Parssetu taarikee bessees. (Nah. 2:1-5) Hegaappe 483 layttay aadhi simmin, 29 M.Ln he keerettida wodiyan Yesuusi Mase gididi xammaqettiis.—Daaneela 9:25 nabbaba.

  3. Geeshsha Maxaafaa hiraagay polettiiddi deˈii?

Yesuusi nu wodiyan hanana keehippe gitabaa kasetidi yootiis. I ba hiraagan Xoossaa siiqiya asaassi saˈa yuushuwan woppaa demissana, Xoossaa Kawotettaa mishiraachuwaa yootiis. He Kawotettay haˈˈi deˈiya iita siraataa muleera xayssana.—Maatiyoosa 24:14, 21, 22 nabbaba.

Geeshsha Maxaafaa hiraagati ha siraataa wurssetta wodiyan hanana ubbabaa qonccissoosona. Wogotettan xoqqasaa gakkido ha wodiyan qoppiyoogaappe dumma hanotan, asaa naati saˈaa mooranaagaa Geeshsha Maxaafay kasetidi yootiis. Olaa, koshaa, biittaa qaattaanne wurssiya harggiyaa malabati unˈˈissiyoogee gujji gujji baana. (Luq. 21:11; Ajj. 11:18) Kandduwaa maaray moorettana. Yesuusa kaalliyaageeti ha metiya wodetun Xoossaa Kawotettaa mishiraachuwaa asa ubbau sabbakana.—Maatiyoosa 24:3, 7, 8; 2 Ximootiyoosa 3:1-5 nabbaba.

4. Asaa naati sinttappe waananee?

Ubbaa Danddayiya Xoossay ammanettida asaa naatuyyo loˈˈobaa giigissi wottiis. Masee, Yesuus Kiristtoosi doorettidaageetuura saluwan uttidi saˈaa haarana. Eti shaˈu layttaa Kawotettan haarana. Hayqqidaageeti denddin, merinaa deˈoy bessiyoogeeta giidi etau pirddanau hanotay injjetana. Hegaa bollikka, he wode deˈiya ubbaa Xoossaa Kawotettay pattana. Harggeenne hayqoy xayana.—Ajjuutaa 5:10; 20:6, 12; 21:4, 5 nabbaba.

Gujo qofaa demmanau, ha misiliyan deˈiya maxaafaa sinttaa 23-25nne 197-201 xeella. Tumuppe Geeshsha Maxaafay Tamaarissiyoy Aybee?