Asa Ubbau Koshshiya Mishiraachuwaa
Asa Ubbau Koshshiya Mishiraachuwaa
“Wonggeliyaa mishiraachchoi . . . asaa ashshanau Xoossaappe yiya wolqqa.”—ROO. 1:16.
1, 2. Intte “kawotettaa wonggeliyaa mishiraachchuwaa” sabbakiyoy aybissee, aara gayttidaagan intte asau qonccissiyoobay aybee?
‘GALLA galla mishiraachuwaa yootiyoogee tana ufayssees.’ Intte hegaadan qoppi woy haasayi erennan aggekketa. Intte wozanappe oottiya Yihoowa Markka gidiyoogaadan ‘kawotettaa wonggeliyaa mishiraachuwaa’ sabbakiyoogee keehippe koshshiyoogaa ereeta. Nuuni hegaa oottiyoogaa xeelliyaagan Yesuusi kaseti yootidoogaa keehippe meezetido gishshau, intte loytti hassayana danddayeeta.—Maa. 24:14.
2 Intte “kawotettaa wonggeliyaa mishiraachchuwaa” sabbakiyoogan Yesuusi doommido oosuwaa ootteeta. (Luqaasa 4:43 nabbaba.) Intte qonccissiyo issi yohoy, Xoossay mata wode asaa naatu allaalliyan kelttiyaa gelanaagaa gidiyoogee qoncce. ‘Iita waayiyaa’ wode, i worddo haymaanootiyaa xayssana; qassi saˈaa iitatettaappe geeshshana. (Maa. 24:21) Sarotettaynne ufayssay deˈanaadan, Xoossaa Kawotettay zaarettidi saˈaa gannate oottanaagaa intte yootiyoogeekka qoncce. He ‘kawotettaa wonggeliyaa mishiraachoy,’ “Ha sa7an de7iya asai ubbai nenan anjjettana” yaagidi, Xoossay Abrahaamayyo kaseti yootido wonggeliyaa mishiraachuwaa shaaho.—Gal. 3:8.
3. Kiitettida PHauloosi Roome maxaafan mishiraachchuwaa giya qaalaa mintti qonccissiis gaana danddayiyoy aybissee?
3 Gidoshin, mishiraachuwaara gayttidaagan asau koshshiya waanna yoho gididabaa nuuni xaasayi xeellana koshshii? Koyro xaafettido Giriiketto doonan, kiitettida PHauloosi Roome Kiristtaanetuyyo xaafido dabddaabbiyan, ‘kawotettaa’ giya qaalaa issitoo xalla goˈettiis; shin ‘mishiraachuwaa’ giyaagaa 12too goˈettiis. (Roome 14:17 nabbaba.) PHauloosi he maxaafan zaaretti zaareti yootido mishiraachoy aybee? He mishiraachoy keehippe koshshiyaaba gididoy aybissee? Nu moottan deˈiya asaayyo “Xoossaa kawotettaa wonggeliyaa mishiraachchuwaa” sabbakiyo wode, hegaa nuuni hassayana koshshiyoy aybissee?—Mar. 1: 14; Roo. 15:16; 1 Tas. 2:2.
Roomen Deˈiyaageetussi Koshshidabaa
4. PHauloosi Roomen koyro qashettido wode, aybaa xeelliyaagan sabbakidee?
4 PHauloosi Roomen koyro qashettido wode qonccissidobay akeekana koshshiyaaba. Amarida Ayhudati a oychanau yiido wode, (1) ‘Xoossaa Kawotettaabaa sabbakiisinne (2) Yesuusabaa ammanana mala etayyo loyttidi yootiis.’ Hegaappe denddidaagan, “baggati PHauloosi giidoogaa ammanidosona; shin baggati ammanibookkona.” Hegaappe simmin, PHauloosi ‘baakko yiya ubbaa mokkidi, (1) Xoossaa kawotettaabaa sabbakiisnne (2) Godaa Yesuus Kiristtoosabaa tamaarissiis.’ (Oos. 28: 17, 23-31) PHauloosi Xoossaa Kawotettaabaa yootiyoogaa xoqqu oottidi xeellidoogee qoncce. SHin i qonccissido harabay aybee? Xoossaa Kawotettau humˈˈo gididabaa, giishin Xoossaa halchuwan Yesuusi oottiyoobaa.
5. PHauloosi Roome maxaafan yootido keehippe koshshiyaabay aybee?
5 Ubba asay Yesuusabaa erananne an ammanana koshshees. PHauloosi Roome maxaafan ha keehippe koshshiyaabaa yootiis. I, “Xoossai, taani a Na7aa wonggeliyaa mishiraachchuwaa yootiyoogan ta ayyaanan ayyo oottiyoogee markka” yaagidi, he maxaafaa doomettaa heeran xaafiis. I gujjidikka, “Wonggeliyaa mishiraachchoi tana yeellayenna; i ammaniya ubbaa, . . . ashshanau Xoossaappe yiya wolqqa” yaagiis. I “tamaarissido wonggeliyaadan, asaa wozanan geemmida qofaa Xoossai Yesuus Kiristtoosa baggaara” pirddiyo wodiyaabaakka guyyeppe yootiis. I, “Yerusalaameppe doommada, Iliwaariqoona giyo biittaa gakkanaassi yuuyada, Kiristtoosa wonggeliyaa mishiraachchuwaa wurssa yootaas” yaagiis. * (Roo. 1:9, 16; 2:16; 15:19) PHauloosi Roome Kiristtaanetuyyo Yesuus Kiristtoosabaa mintti yootidoy aybissa giidi qoppeetii?
6, 7. Roome gubaaˈee eqqidoy ayba ogiyaanee, qassi he gubaaˈiyan ay mala asati deˈiyoonaa?
6 Roome gubaaˈee waanidi eqqidaakko erokko. PHenxxaqosxxe gallassi 33 M.Ln, he baalau yiida Ayhudati woy Ayhudatettau laamettidaageeti Kiristtaane gididi Roome simmidonaashshaa? (Oos. 2:10) Woykko, Kiristtaane gidida zalˈˈanchatinne hara asati tumaa Roomen yootidonaashsha? Hanotay ayba gidikkokka, 56 M.L. heeran PHauloosi he maxaafaa xaafiyo wode, he gubaaˈee eqqoosappe gamˈˈiis. (Roo. 1:8) He gubaaˈiyan deˈiya asati ay mala hanotaappe yiidaageetee?
7 Etappe issoti issoti kase Ayhuda ammanuwaa kaalliya asata. PHauloosi Anddironiqoosanne Yuniyaasa “ta dabbo” giidi sarotaa kiittido gishshau, eti a dabbo Ayhudata gidennan aggokkona. Dunkkaaniyaa sikkiya Aqiilinne a machiyaa PHirisqqilakka kase Ayhuda ammanuwaa kaalliya asata. (Roo. 4:1; 9:3, 4; 16:3, 7; Oos. 18:2) SHin PHauloosi sarotaa kiittido daro ishatinne michoti Ayhuda gidenna asata gidennan aggokkona. Issoti issoti “Kawuwaa Qeesaara keettan de7iyaageeta” gidana; woykko Qeesaara aylletanne amarida maatay deˈiyoogeeta gidennan aggokkona.—Pili. 4:22; Roo. 1:6; 11:13.
8. Roomen deˈiya Kiristtaaneti ayba iita hanotan deˈidonaa?
8 Roomen deˈiya ubba Kiristtaaneti iita hanotan deˈidosona; nuunikka hegaa mala hanotan deˈoos. PHauloosi he hanotaa, “Asai ubbai nagaraa oottiis; ashshiya Xoossaappe haakkidosona” yaagidi qonccissiis. (Roo. 3:23) PHauloosi xaafido ubbati nagarancha gidiyoogaa akeekanaunne etau koshshidabaa demmanau Xoossay giigissidobaa ammanana koshshiis.
Nagarancha Gidiyoogaa Akeekiyoogaa
9. Mishiraachoy demissiyoobaa PHauloosi woygi yootidee?
9 PHauloosi Roome Kiristtaanetuyyo xaafido dabddaabbiyau doomettaa heeran, mishiraachuwaa siyiyoogee demissiyo ufayssiyaabaa hagaadan qonccissiis: “Wonggeliyaa mishiraachchoi tana yeellayenna; i ammaniya ubbaa, kasetidi Aihuda asaa qassi Aihuda gidenna asaa ashshanau Xoossaappe yiya wolqqa.” Ee, atotettay demmana danddayiyooba. SHin PHauloosi Imbbaaqooma 2:4ppe ekkidi xaafido, “Xilloi ammanuwan de7ana” yaagiya qaalaa maaraadan ammanuwaa koshshiis. (Roo. 1:16, 17; Gal. 3:11; Ibr. 10:38) Gidoppe attin, atotettau kaalettiya he mishiraachoy “asa ubbay nagaraa oottiis” giya qofaara waanidi gayttii?
10, 11. Roome 3:23n deˈiya qofay issi issi asatuyyo oorattaba gidennay, qassi haratuyyo oorattaba gidiyoy aybissee?
10 Issi uri atotettau kaalettiya ammanoy deˈiyoogaa gidanaappe kase, nagarancha gidiyoogaa akeekana bessees. Naatettaappe doommidi Xoossan ammaniyaanne Geeshsha Maxaafaa qofaara meezetida asatuyyo hegee oorattaba gidenna. (Eranchchaa 7:20 nabbaba.) Eti hegaa maayin maayana xayin, PHauloosi, “Asai ubbai nagaraa oottiis” yaagido wode, gaana koyidobaa amarida ogiyan eroosona. (Roo. 3:23) Gidikkokka, nuuni haggaaziyo wode, hegee woygiyoogaakko erenna daro asata demmana danddayoos.
11 Issi issi biittatun, daro asay nagaraa laattidi yelettidoogaa qoppikka erenna. Geella eti balabaa oottiyoogaa, loˈˈo gidenna eeshshay deˈiyoogeeta gidiyoogaa, qassi iitabaa oottana danddayiyoogaa akeekana danddayoosona. Qassi haratu hanotaykka etaagaa mala gidiyoogaa akeekoosona. SHin eti bantta hanotaa erikkokka, etinne hara asati aybissi hegaadan hanidaakko akeekokkona. Issi issi doonan, issi uraa nagarancha giikko, harati he uraa danobaa oottidabadan woy hegee xayikko higgiyaa menttidabadan qoppoosona. Hegaa mala heeran diccida uri, PHauloosi qonccissanau koyido ogiyan, nagarancha gidiyoogaa qoppennan aggana danddayees.
12. Ubbay nagarancha gidiyoogaa daroti ammanennay aybissee?
12 Kiristtaanetu biitta giyo biittatunkka, nagarancha gidiyoogaa daroti ammanokkona. Aybissi? Eti issi issitoo woosa keettaa biyaaba gidikkokka, Geeshsha Maxaafay yootiyo, Addaamenne Hewaani taarikiyaa haysedan qoppoosona. Qassi harati Xoossaara gayttidabaa siriyo hanotan diccidosona. Eti Xoossay deˈiyoogaa siroosona; yaatiyo gishshau Ubbaappe Bolla gididaagee asaa naatuyyo kandduwaa maaraa kessidoogaa akeekokkona; he maaraa kaallennaagee nagaray daranaadan oottiis. Hegaappe denddidaagan, eti PHauloosi, “ufaissan naagi uttidobaa demmennaaninne qassi Xoossi bainnan de7ideta” yaagido, koyro xeetu layttan deˈida asatu mala.—Efi. 2:12.
13, 14. (a) Xoossan ammanennaageetinne nagaraa oottiyaageeti gaasoyiyoobi baynnaadan oottiya issi naqaashay aybee? (b) Ammanennaagee daroti waananaadan oottidee?
13 Hegaa mala hanotan deˈidoogee, he wode gidin ha wodiyaankka, gaasoyiyooba gidana danddayennaagaa qonccissiya naaˈˈu naqaashaa, PHauloosi Roome Kiristtaanetuyyo xaafido dabddaabbiyan yootiis. Koyro naqaashay, merettidabay Medhidaagee deˈiyoogaa markkattiyoogaa qonccissees. (Roome 1:19, 20 nabbaba.) Hegee, PHauloosi Roomen deˈiiddi Ibraawetuyyo xaafido, “Keetta ubbaa keexxidaagee issi asa; shin ubbabaa keexxidaagee Xoossaa” yaagiya qofaara moggees. (Ibr. 3:4) He qonccissoy saluwaanne saˈaa Medhidaagee deˈiyoogaakka akeekissees.
14 Yaatiyo gishshau, PHauloosi Roome Kiristtaanetuyyo xaafido dabddaabbiyan, eeqau goynnida beni Israaˈeelata gujjin, ooninne ‘gaasoyiyoobi baynnaagaa’ mintti qonccissiis. Bantta asatettaa meretan goˈettana bessiyoogaappe dumma ogiyan, bessenna asho gaytotettaa poliya attuma asaanne macca asaa xeelliyaagankka hegaadan gaana danddayettees. (Roo. 1:22-27) PHauloosi he qofaa yootidi, “Aihudatikka Aihuda gidenna asatikka ubbai issippe nagaraappe garssan de7iyoogaa” qonccissiyoogan kuuyiis.—Roo. 3:9.
‘Markkattiyaabaa’
15. Zoriya wozanan goˈettiyaageeti oonee, hegee eti ay oottanaadan denttettidee?
15 Asay nagarancha gidiyoogaa erana bessiyo, qassi iita hanotaappe kiyiyo ogiyaa demmana koshshiyoy aybissakko, Roome maxaafay hara naqaashaa qonccissees. Xoossay beni Israaˈeelatuyyo immido higgiyaa xeelliyaagan PHauloosi, “Higgee de7ishin, nagara oottida ubbai higgiyan pirddettana” yaagidi xaafiis. (Roo. 2:12) Hara naqaashankka, i Xoossaa higgiyaa erenna asati darotoo “banttana zoriya wozanan higgee azaziyoogaa” oottiyoogaa qonccissiis. He asati bantta dabbotuura asho gaytotettaa polennay, asa worennaynne wuuqqennay aybissee? Hegee, etau zoriya wozanay deˈiyo gishshataassa gidiyoogaa PHauloosi yootiis.—Roome 2:14, 15 nabbaba.
16. Zoriya wozanay ubbatoo nagaraappe haakkanaadan oottees gaana danddayettennay aybissee?
16 SHin issi urau markkattiya zoriya wozanay deˈees giyoogee, he uri a kaaletuwaa kaallees giyoogaa gidennaagaa akeekennan aggekketa. Beni Israaˈeelatu hanotay hegaa bessees. Israaˈeelatuyyo Xoossay immido zoriya wozanay deˈees; qassi wuuqqennaadaaninne wodiraa laammennaadan teqqiya, Xoossay immido higgeekka deˈees; shin eti bantta zoriya wozanay yootiyoobaanne Yihoowa Higgiyaa darotoo kanttidosona. (Roo. 2:21-23) Eti keehi moorido gishshau, nagarancha gididosona; qassi Xoossaa maaraanne a sheniyaa polennan aggidosona. Hegee Medhidaagaara etau deˈiya dabbotaa keehippe mooriis.—Wog. 19:11; 20:10; Roo. 3:20.
17. Roome maxaafaappe demmiyo minttettiya qofay aybee?
17 Nuuni Roome maxaafaappe beˈidobay, nuna gujjin asaa naati Ubbaa Danddayiyaagaa sinttan deˈiyo hanotaa loytti qonccissiyaaba milatees. Gidikkokka, PHauloosi hegaa yootidi aggiigibeenna. Daawiti Mazamure 32:2n giidobaa ekkidi, PHauloosi hagaadan xaafiis: “Xoossai eta mooruwaa atto giidoogeetinne eta nagaraa kammidoogeeti anjjettidaageeta. Godai a nagaraa qoodenna asi anjjettidaagaa.” (Roo. 4:7, 8) Ee, Xoossay ba xillotettaa maaraa kanttennan nagaraa atto giyo ogiyaa giigissiis.
Nuuni Yootiyo Waanna Mishiraachoy Yesuusabaa
18, 19. (a) PHauloosi Roome maxaafan qonccissido mishiraachoy aybee? (b) Kawotettaa anjjuwaa demmanau nuuni ay akeekana bessii?
18 Intte, “Hegee tumuppe mishiraacho!” gaana danddayeeta. Ha qofay PHauloosi Roome maxaafan qonccissido mishiraachuwaa nuuni hassayanaadan oottees; hegee tumuppe mishiraacho. Qommoora beˈidoogaadan, PHauloosi, “Wonggeliyaa mishiraachchoi tana yeellayenna; i . . . asaa ashshanau Xoossaappe yiya wolqqa” yaagidi xaafiis.—Roo. 1: 15, 16.
19 He mishiraachoy polettiiddi deˈiya Xoossaa halchuwan Yesuusi oottiyoobaa waannayidi qonccissees. PHauloosi ba “tamaarissido wonggeliyaadan, asaa wozanan geemmida qofaa Xoossai Yesuus Kiristtoosa baggaara” pirddana gallassaa yeemottidi naagiis. (Roo. 2:16) I hegaadan giyoogan “Kiristtoosa kawotettaanne Xoossaa kawotettaa” woykko Xoossay he Kawotettaa baggaara oottanabaa guutti xeellibeenna. (Efi. 5:5) SHin PHauloosi, nuuni Xoossaa Kawotettay ehiyo anjjuwaa demmidi deˈanau, (1) Xoossaa xeelan nu nagarancha gidiyoogaanne (2) nu nagaray atto geetettanaadan Yesuus Kiristtoosan ammanana koshshiyoy aybissakko akeekana bessiyoogaa qonccissiis. Issi uri Xoossaa halchuwaara gayttida ha yohota eridi ammani ekkiyo wode, qassi hegee ayyo sinttappe demissiyoobaa akeekiyo wode i, “Ee, hegee tumuppe mishiraacho!” gaana danddayees.
20, 21. Nuuni haggaaziyo wode, Roome maxaafan qonccida mishiraachuwaa hassayana koshshiyoy aybissee, hegee ay demissii?
20 Nuuni haggaaziyo wode ha mishiraachuwaa loyttidi hassayana koshshees. PHauloosi Yesuusa xeelliyaagan qonccissanau, Isiyaasi, “Aani ammaniya ooninne yeellatenna” yaagidoogaa yootiis. (Roo. 10:11; Isi. 28:16) Geeshsha Maxaafay nagaraa xeelliyaagan yootiyoobaa amarida ogiyan eriyaageetuyyo, Yesuusaara gayttida waanna qofay oorattaba gidennan aggana danddayees. SHin haratuyyo he qofay muleera oorattaba; qassi eta wogan erettennaba woy eti ammanennaba. Hegaa mala asati Xoossaa ammaniyoogaanne Geeshsha Maxaafay yootiyoobaa ammanettiyoogaa doommiyo wode, Yesuusau deˈiya maataa nuuni etau qonccissana koshshees. Roome shemppo 5y he mishiraachuwaa waatidi qonccissiyaakko kaalliya huuphe yohoy yootees. He xinaatee haggaazuwan inttena keehippe maaddiyoogaa akeekana danddayeeta.
21 An “ammaniya ubbaa, . . . ashshanau Xoossaappe yiya wolqqa” gidida, Roome maxaafan darosan qonccida mishiraachuwaa ashkke asati akeekanaadan maaddiyoogee anjjo demissiyaaba. (Roo. 1:16) He anjjuwaappekka haray, PHauloosi Roome 10:15n, “Ufaissiya mishiraachchuwaa yootiyaageetu tohoti aiba lo77iyoonaa!” yaagidoogaadan haratikka giyoogaa akeekoos.—Isi. 52:7.
[Tohossa qofaa]
^ MENT. 5 Geeshsha Maxaafan hara maxaafatunkka hegaa mala qonccissoy deˈees.—Mar. 1:1; Oos. 5:42; 1 Qor. 9:12; Pili. 1:27.
Hassayay?
• Roome maxaafay qonccissiyo mishiraachoy aybee?
• Harati akeekanaadan nuuni maaddana koshshiyo yohoy aybee?
• ‘Kiristtoosa wonggeliyaa mishiraachoy’ nuuyyoonne haratuyyo anjjuwaa demissana danddayiyoy ayba ogiyaanee?
[Oyshata]
[Sinttaa 12n deʼiyaagaa qonccissuwaa]
Roome maxaafan qonccida mishiraachoy Xoossaa halchuwan Yesuusau deˈiya gita sohuwaa gujjees
[Sinttaa 13n deʼiya misiliyaa qonccissuwaa]
Nuuni ubbay wolqqaama pacaara, giishin nagaraara yelettida!
