Kawotettaa Mishiraachuwaa Sabbakiiddi Deˈiyay Oonee?

“. . . sa7a ubban odettana.”—MAA. 24:14.

KAWOTETTAA mishiraachuwaa Yihoowa Markkati alame yuushuwan sabbakiiddi deˈoosona. Eti hegaa dumma dumma ogiyan oottoosona. Issi ogee  . . .

Yootiyoogaa. Yesuusinne i erissiyo ashkkarati oottidoogaadan, Yihoowa Markkati kawotettaa mishiraachuwaa yootanau asaakko boosona. (Luq. 8:1; 10:1) Eti asay banttakko yaanaadan naagokkona. Laappun miilooneppe dariya Yihoowa Markkati ubbay Xoossaa Kawotettaabaa asau yootoosona. Eti sooppe soo biidi, ogiyan, silkkiyaaninne hara ogiyan sabbakoosona. Zillaytti Yihoowa Markkati issi biiloonenne baggappe dariya saatiyaa he oosuwaa oottidosona.

Eti Xoossaa Kawotettaabaa xalla gidennan, ‘Yesuusi azazidobaa ubbaakka’ harata tamaarissoosona. (Maa. 28:20) Eti ubbatoo hosppun miilooneppe dariya Geeshsha Maxaafaa xinaateta xannaˈissosona.

Yihoowa Markkati alame yuushuwan 236 biittan sabbakoosona. Eti dumma dumma hanotaaninne wogan deˈiya ubba asau yootoosona. Eti gaxariyan, kataman, Amaazoone giyo woran, Saybeeriyaa giyosan deˈiya worattiyaasan, Afirkkan bazzottiya heeraaninne Himaaliyaa Deriyan deˈiyaageetussi sabbakoosona. He oosuwau etau miishshi qanxxettenna; Xoossaanne bantta shooruwaa siiqiyoogee denttettin, hegau eti bantta miishshaanne bantta wodiyaa goˈettoosona. Eti Kawotettaa mishiraachuwaa erissiyo hara ogee . . .

Xuufiyaa. Yihoowa Kawotettaa Erissiya Wochiyo Keelaa giya huuphe yohoy deˈiyo ha maxeetee ha wodiyan 185 qaalan, 42 miiloone gidiyaagee attamettees. Yihoowa Markkati attamissiyo, Xoossaa Kawotettaabaa erissiya Beegottite giyo maxeeteekka ha wodiyan 83 qaalan, 40 miiloone gidiyaagee attamettees.

Geeshsha Maxaafaa timirttiyaa qonccissiya maxaafati, brooshureti, traktteti, siidee/MP3nne dividee 540 gidiya qaalan deˈoosona. Yihoowa Markkati aadhida tammu laytta xallan hagaa malabaa 20 biilooneppe dariyaagaa giigissidi asau immidosona; hegee amakaayiyan saˈan deˈiya asau huuphiyan huuphiyan heezzay heezzay gakkees!

Yihoowa Markkati dumma dumma Geeshsha Maxaafaa birshshettatakka attamissidosona. Yihoowa Markkati birshshido, attamissidonne asaa gakkanaadan oottido Ooratta Alamiyaa Geeshsha Maxaafaa Xuufetu Birshshettay kumettay woy a shaahoy 96 qaalan deˈees. He maxaafay 166 miilooneppe dariyaagee asaa gakkiis. Yihoowa Markkati Kawotettaa mishiraachuwaa yootiyo hara ogee . . .

Gubaaˈe SHiiqota. Kawotettaa Addaraashan saaminttan saaminttan shiiqiyo shiiqoti haymaanoote siraata xalla gidennan, nuna  tamaarissanau giigidabata. Geeshsha Maxaafaa qofaa qonccissiya haasayay shiiqees; qassi Wochiyo Keelaa maxeetiyaanne hara xuufeta goˈettidi Geeshsha Maxaafaa xannaˈoos. He shiiqotun, Yihoowa Markkati mishiraachuwaa sabbakiyoogan qara gidanaadankka tamaaroosona.

Yihoowa Markkati saˈaa yuushuwan deˈiya 107,000ppe dariya gubaaˈetun issi mala xuufiyaa xannaˈoosona; hegee eta issippetettau maaddees. He shiiqotun oonikka shiiqana danddayees. Muxuwaatay shiiqenna. Yihoowa Markkati bantta sabbakiyoobaa oosuwan peeshshana xayikko, ha qonccidabatuppe augeenne maaddenna. Hegaa gishshau, eti asay mishiraachuwaa siyaanaadan oottiyo issi ogee . . .

Leemiso Gidiyoogaa. Eti harati banttana oyqqanaadan koyiyoogaadan harata oyqqanau banttau danddayettida ubbabaa oottiyoogan, Kiristtaane eeshshan leemiso gidanau baaxetoosona. (Maa. 7:12) Eti issi issitoo nagara oottiya, polo gidenna asa gidikkonne, mishiraachuwaa yootiyoogaa xalla gidennan, koshshiyo wode harata maaddiyoogan asa ubbaa wozanappe siiqanau koyoosona.

Yihoowa Markkati sabbakiyoogan alame kumettaa laammana giidi qoppokkona. Hegaappe, Yihooway koyiyoogaa keenaa he oosoy oosettiyoode, Yesuusi kasetidi yootidoogaadan wurssettay gakkana. Saˈaunne an deˈiya asau hegee ay ehaanee?

[Sinttaa 7n deʼiya misiliyaa qonccissuwaa]

Yihoowa Markkati alame yuushuwan mishiraachuwaa sabbakiiddi deˈoosona