Wurssettay Mati Mati Biyo Wode Yihoowan Ammanettite
Wurssettay Mati Mati Biyo Wode Yihoowan Ammanettite
“GODAN [“Yihoowan,” NW] merinau ammanetta.”—ISI. 26:4.
1. Xoossau oottiyaageetunne alamiyaa asaa giddon ayba dummatetti deˈii?
MIILOONIYAN qoodettiya asay oonan woy aybin ammanettana koshshiyaakko erenna alamiyan deˈoos; hegee eti darotoo qohettido woy hidootaa qanxxido gishshataassa gidana danddayees. Yihoowau oottiyaageetu hanotay hegaappe keehi dumma! Xoossaa aadhida eratettaa goˈettiyoogan, eti ha alamiyan woy “halaqatun” ammanettiyoogaappe aadhiyaabaa eroosona. (Maz. 146:3) Yihooway banttana siiqiyoogaanne i ba qaalaa ubbatoo poliyoogaa eti eriyo gishshau, bantta deˈuwaanne sintta wodiyaa xeelliyaagan an ammanettoosona.—Roo. 3:4; 8:38, 39.
2. Xoossay ammanettiyaagaa gidiyoogaa xeelliyaagan Yaasu woygidee?
2 Yaasu, Xoossay ammanettiyaagaa gidiyoogaa beni wode yootiis. I ba deˈuwaa wurssettaa heeran, ba mala Israaˈeelatuyyo hagaadan giis: “GODAI intte Xoossai intteyyo immana giido lo77o ubbaappe issibinne attibeennaagaa intte ubbai intte wozanaaninne shemppuwan ereeta. I intteyyo immana giidobaappe issibinne attennan, ubbai polettiis.”—Yaa. 23:14.
3. Xoossaa sunttay abaa ay qonccissii?
3 Yihooway baassi oottiyaageeta siiqiyoogaa xallaassa gidennan, ubbaappekka aaruwan ba sunttaa gishshau ba gelido qaalaa polees. (Kes. 3:14; 1 Sam. 12:22) J. B. Rozerhami birshshido, Zi Imfasayzd Baybl giyo maxaafay doomettan Xoossaa sunttaa xeelliyaagan hagaadan giis: “[Hegee], Xoossay merettiya ay hanotaadan, metuwaadan woy koshshiya allaalliyaadankka gidin ba hanotaa giigissana danddayiyo, aaro kehatettaa qonccissiya hidoota . . . [Hegee] hidoota, . . . qonccisso, hassayisso, geppa. He Sunttau Xoossay ubbatookka ammanettees; I he sunttan mule yeellatenna.”
4. (a) Isiyaasa 26:4y nuuni waatanaadan zorii? (b) Ha huuphe yohuwan ay pilgganee?
4 ‘Taani Yihoowan muleera ammanettana danddayiyoogaa keenaa a loytta eriyaanaa? Xoossay ubbaappe wolqqaama gidiyoogaa eriyoogan, sintta wodiyaa ammanettada naagiyaanaa?’ yaagidi inttena oychite. Isiyaasa 26:4y, “GODAN [“Yihoowan,” NW] merinau ammanetta; aissi giikko, GODAI Xoossai merinaa Zaallaa” yaagees. Beni wode issi issitoo oottidoogaadan, Xoossay ha wodiyan asaa deˈuwan kelttiyaa gelidi, maalaalissiyaabaa oottennaagee tuma. SHin i “merinaa Zaallaa” gidiyoogaadan, “merinau” an ammanettana danddayoos. Ammanettiya nu Xoossay ha wodiyan baayyo goynniya ammanettidaageeta waatidi maaddii? Heezzu ogeta ane beˈoos: Nuuni paaciyaa xoonanau a maaduwaa koyiyo wode minttettees, asay siyanau koyenna wodenne yedetay gakkiyo wode nuna maaddees, qassi unˈˈissiya darobay gakkiyo wode minttettees. Ha allaalleta pilggiyo wode, intte Yihoowan ammanettiyoogaa waatidi minttana danddayiyaakko qoppite.
Iitabaa Oottanau Paacettiyo Wode Xoossan Ammanettite
5. Xoossan ammanettiyoogaara gayttidaagan nuuni keehi paacettana danddayiyoy awudee?
5 Yihooway Gannatiyaa ehaanau woy hayqqidaageeta denttanau gelido qaalaa ammanana koshshees; hegeeti nuuni yeemuwan naagiyoobata. SHin i kessido kandduwaa maaraa kaallana koshshiyaakkonne kuuyiyo wode an ammanettiyoogee, qassi a ogiyaanne a maaraa kaalliyoogee bessiyaabanne keehi ufayttanaadan oottiyaaba gidiyoogaa ammaniyoogee keehi metiyaaba gidana danddayees. Kawuwaa Solomoni hagaadan zoriis: “Ne polo wozanan GODAA ammanetta; ne akeekan zemppoppa. Neeni oottiyo ooso ubban a sinttaya; i nena likke ogiyaa kaalettana.” (Lee. 3:5, 6) Ne “ooso” qassi “ogiyaa” giya qaalata akeekite. Ee, nu Kiristtaane hidootaara gayttidaba xallan gidennan, nu kumetta deˈuwan woy oosuwan Xoossan ammanttiyoogaa qonccissana koshshees. Paacee gakkiyo wode hegaadan ammanettiyoogaa waatidi bessana danddayiyoo?
6. Nuuni iita qofaappe haakkanau murttidoogaa waati minttana danddayiyoo?
6 Iitabaappe haakkiyoogee qofan doommees. (Roome 8:5; Efisoona 2:3 nabbaba.) Yaatin, iita qofaappe haakkanau intte murttidoogaa waati minttana danddayeetii? Ha ichashu ogeta beˈite: 1. Woosan Xoossaa maaduwaa koyite. (Maa. 6:9, 13) 2. Geeshsha Maxaafay yootiyo, Yihoowa zoriyaa siyennan ixxidaageetunne siyidaageetu leemisuwaa wotti dentti qoppite. Eta wurssettay ayba gididaakko hassayite. * (1 Qor. 10:8-11) 3. Nagaray inttenanne intte siiqiyoogeeta qofan qohiyo hanotaa yererite. 4. Au oottiyaageetuppe issoy deexo nagaraa oottiyo wode Xoossau aybi siyettiyaakko qoppite. (Mazamure 78:40, 41 nabbaba.) 5. Yihoowau ammanettidi oottiya issi uray, asi diyoosan gidin asi baynnasan, iitabaa ixxiyoogaanne suurebaa oottiyoogaa beˈiyo wode, Yihooway keehippe ufayttiyoogaa qoppite. (Maz. 15:1, 2; Lee. 27:11) Inttekka Yihoowan ammanettiyoogaa bessana danddayeeta.
Asay Siyanau Koyenna Wodenne Yedetay Gakkiyo Wode Xoossan Ammanettite
7. Ermmaasa ayba paacee gakkidee, issi issitoo au aybi siyettidee?
7 Nu ishatuppe daroti keehi metiya moottan haggaazoosona. Hananabaa yootiya Ermmaasi hegaa mala moottan, giishin bashshay gakkana haniyo, metoy kumido Yihudaa biittan oottiis. I azazettidi Xoossaa pirddaa kiitaa yootido gishshau, Yihoowan ammanettiyo hanotan galla galla a paacee gakkiis. Issi wode ayyo ammanettidi xaafiya Baarukikka xalalidoogaa yootiis. (Erm. 45:2, 3) Ermmaasi hidootaa qanxxidee? Issi wode ikka unˈˈettiis. I, “Taani yelettido gallassai qanggettidaagaa gido!” yaagiis. “Taani metonne azzano be7anaunne laittaa ubbaa yeellataidda wurssanau, aissi ta aayee uluwaappe kiyidanaashsha?” yaagiis.—Erm. 20:14, 15, 18.
8, 9. Ermmaasa 17:7, 8nne Mazamure 1:1-3 maaraadan, nuuni ubbatoo loˈˈo ayfiyaa ayfanau ay oottana koshshii?
8 Gidikkokka, Ermmaasi hidootaa qanxxibeenna. I ubbatoo Yihoowan ammanettiis. Hegaappe denddidaagan, ha ammanettidi hananabaa yootiyaagee, Ermmaasa 17:7, 8n deˈiya, hagaadan giya Yihoowa qaalay polettiyoogaa beˈiis: “GODAN ammanettiya asi, i ammanettiyoi GODAA gidiyo asi anjjettidaagaa. I haattaa lanqqiyan tokettidi, ba xaphuwaa goggiya haattau yeddida mittaa mala. Awaa suuluwaassikka i yayyenna. Aissi giikko, he mittaa haittai irxxi irxxashin de7ees. Irai bukkenna laittankka hirggenna; aifiyaa aifiyoogaakka dabarssenna.”
9 Ermmaasi “haattaa lanqqiyan” tokettida, woy haattaa ushshiyo, ayfiyaa ayfiya dalqqidalqqiya mittaadan ‘ayfiyaa ayfiyoogaa mule dabarssibeenna.’ A qilliicciya iita asatu sugettaa eqettiis. I deˈuwau koshshiya “haattaa” Pulttuwaa baxuuxiis; qassi Yihooway au yootiyo ubbabaa wozanan wottiis. (Mazamure 1:1-3 nabbaba; Erm. 20:9) Ermmaasi nuuyyo, ubba qassi waayissiya moottan Xoossau oottiyaageetuyyo ayba loˈˈo leemisoo! Intte hanotay hegaa mala gidikko, ‘a sunttaa’ haratuyyo yootiyo wode intte genccanaadan maaddiya, Yihoowan ubbatoo keehippe ammanettite.—Ibr. 13:15.
10. Nuuni ayba anjjo demmidoo, nuna woygiya oyshata oychana koshshii?
10 Ha wurssetta gallassatun nu bolli gakkiyaabata genccanau ayyaanaaban maaddiya daro loˈˈobaa Yihooway immiis. I immidobatuppe issoy, wodiyaappe wodiyan daro qaalan suure birshshettiiddi deˈiya Xoossaa Qaalaa kumettaa. I ‘ammanettida wozannaama ashkkaraa’ baggaara koshshiya wodiyan giigida ayyaanaa qumay kumi palahanaadan oottiis. Gubaaˈiyaaninne gita shiiqotun, nuugaa mala ammanoy deˈiyo, maaddiya daro laggetakka immiis. Ha giigissotun loytti goˈetteetii? Hegaadan oottiyaageeti ubbay “wozanan ufaittidi yexxana.” SHin Xoossay yootiyoogaa siyanau koyennaageeti “wozanan azzanidi waassana. Qassi [eta] ayyaanai meqqido gishshau, [eti] zilaalidi yeekkana.”—Isi. 65:13, 14.
Unˈˈissiyaabay Deˈishin Xoossan Ammanettite
11, 12. Alamiyaa metuwaara gayttidaagan, tumuppe aadhida eratetta ogee awugee?
11 Kasetidi odettidaagaadan, asaa naata gujji gujji biya diˈuwaa mala metoy gakkees. (Maa. 24:6-8; Ajj. 12:12) Diˈoy diˈˈiyo wode, xoqqiyaasaa woxxiyoogee meeze gididaba. Hegaara issi mala hanotan, alamiyaa metoy dari dari biyo wode, miilooniyan qoodettiya asay xoqqa soho milatiya, miishshaa, polotikaa woy haymaanoote dirijjitiyaa, hegaadankka saynisiyaanne tekinolojiyaa baqati attiyoosa oottanau koyees. SHin hegeetuppe issoynne ashshiyaaba gidenna. (Erm. 17:5, 6) Hara baggaara, Yihoowayyo oottiyaageetuyyo baqati attiyo ammanttiya, ‘merinaa Zaallay’ deˈees. (Isi. 26:4) Mazamuraawee, “[Yihoowa] xalaalai ta wogga zaallaanne tana ashshiyaagaa” yaagiis. (Mazamure 62:6-9 nabbaba.) Ha Zaallaa waatidi nuuyyo baqati attiyoosa oottana danddayiyoo?
12 Asaa eraappe darotoo keehi dummatiya a Qaalaa kaalliyo wode, nuuni Yihoowa baxuuxoos. (Maz. 73:23, 24) Leemisuwau, asaa eraa kaalliyaageeti hagaadan gaana danddayoosona: ‘Deˈoy hanni xalla gidiyo gishshau, an loytta goˈetta.’ ‘Loˈˈo ooso koya.’ ‘Daro miishshaa shiishsha.’ ‘Beˈidobaa ubbaa shamma.’ ‘Alamiyan ubbasaa yuuya beˈa.’ Hara baggaara, Xoossaa aadhida eratettay, “Ha sa7aa mehiyan maadettiyaageeti muleera maadettennabaadan hanona. Aissi giikko, ha sa7aa merai attiyaagaa” yaagiya zoriyaara moggees. (1 Qor. 7:31) Hegaadankka, nuuni ubbatoo Kawotettaa kaseyidi, keehi ammanttiyaasan, “saluwan miishsha” dagayanaadan Yesuusi zoriis.—Maa. 6:19, 20.
13. Koyro Yohaannisa 2:15-17 hassayiyoogan, nuna woygidi oychana koshshii?
13 ‘Ha saˈaanne saˈan deˈiyaabaa’ intte xeelliyo hanotay intte Xoossan kumetta hanotan ammanettiyoogaa bessii? (1 Yoh. 2:15-17) Ayyaanaaban demmido duretettaanne Kawotettaa oosuwaa oottanau demmido maataa alamee shiishshiyoobaappe keehi xoqqu oottidi xeelleetii? (Pili. 3:8) Intte “aifee payya” gididi deˈanaadan baaxeteetii? (Maa. 6:22) Xoossay intte aawatetti siyettennaageeta gidanaadan, ubba qassi intte maadoy koshshiyo so asay deˈiyaaba gidikko hegaadan oottanaadan koyennaagee tuma. (1 Xim. 5:8) Hegaappe dumma hanotan, bau oottiyaageeti xayana haniya Seexaanaa alamiyan gidennan, kumetta hanotan banan ammanettanaadan koyees.—Ibr. 13:5.
14-16. Issoti issoti ‘payya ayfee’ deˈiyoogeeta gidiyoogaaninne Kawotettaa oosuwaa ubbatoo kaseyiyoogan waani goˈettidonaa?
14 Heezzu naati deˈiyo Richarddanne Ruti leemisuwaa beˈite. Richarddi hagaadan giis: “Taani Yihoowayyo darobaa oottana danddayiyoogaa ta wozanay loyttidi erees. Ta deˈoy ishalo; shin Xoossau palahidabaappe immiyoogaa malabaa oottaas. He allaalliyaa xeelliyaagan woossidinne hanotaa yuushshi qoppi simmidi, nuuni deˈiyo biittay ikkonoomiyaara gayttidaagan keehi metootiiddi deˈiyaaba gidikkonne, saaminttan oyddu gallassaa, giishin kaseegaappe guuttaa oottanau oosuwaa alaafiyaa oychanaadan taanne Ruta maayida. Alaafee hegaa maayin, agina gakkennan hegaadan oottiyoogaa doommaas.” Ha wodiyan Richarddayyo aybi siyettii?
15 I hagaadan giis: “Taani xeetaappe 20 kushe kaseegaappe guuxxiya damoozaa demmays; shin ta soo asaara wodiyaa aattanaunne ta naata loohissanau haˈˈi laytta giddon 50 gujo gallassaa demmaas. Taani haggaazuwan aattiyo saatee dakko dariis; Geeshsha Maxaafaa xannaˈissiyo asaa qooday heezzu kushe gidiis; qassi gubaaˈiyan kaseegaappe aaruwan oottays. Taani kaseegaappe daro wodiyaa son naata xeelliyo gishshau, Ruta issi issitoo kaafiya aqinye gidana danddayaasu. Danddayettida keenan hegaadan deˈanau murttaas.”
16 Eta naatuppe issinniyaa etaara issippe deˈiyo, Royinne Petiina kumetta wodiyaa haggaazanau bantta oosuwaa kaseegaappe guutta saatiyaa oottoosona. Royi yaagiis: “Saaminttaa giddon taani heezzu gallassaa oottays; Petiina qassi naaˈˈu gallassaa oottausu. Hegaa bolli, gita keettaappe kiyidi maara oyqqanau metenna guutta keettaa gelida. Naaˈˈu naata yelanaappe kase aqinye gididi oottido gishshau, aqinye gidanau koyiyoogaa mule aggi erokko. Hegaa gishshau, nu naati gitati simmin, zaarettidikka kumetta wodiyaa haggaaziyoogaa doommida. Nuuni demmido anjjuwaara ay keena miishshaynne laggetana danddayenna.”
“Xoossaa Sarotettai” Intte Wozanaa Naago
17. Deˈoy ammanttennaagaa gidiyoogaara gayttidaagan, Geeshsha Maxaafay nena waati minttettidee?
17 Qoppennan gayttiyaabaynne “wodee” oottiyoobay nu ubbaa bolli gakkiyo gishshau, wontto hananabaa erokko. (Era. 9:11) SHin wontto hananabaa erennaagee, Xoossaara mata dabbotay baynnaageeti darotoo hirggiyoogaadan, nu garssa sarotettay xayanaadan oottana koshshenna. (Maa. 6:34) Kiitettida PHauloosi hagaadan giis: “Xoossaa intte woossiyo woosa ubban a keehi galatiiddi, inttena koshshiyaabaa ubbau woossiteppe attin, issibaukka hirggoppite. Qassi asa eratettaa ubbaappe aadhdhiya Xoossaa sarotettai intte wozanaanne intte qofaa . . . naagana.”—Pili. 4:6, 7.
18, 19. Xoossay nuna minttettiyoy ayba ogiyaanee? Leemisuwaa yoota.
18 Metoy gakkiyo daro ishatinne michoti garssa woppaanne sarotettaa Yihoowappe demmidosona. Issi michiyaa hagaadan gaasu: “Issi dottoree taani akkamuwau suuttaa goˈettanaadan zaaretti zaarettidi yashissiis. Tana beˈido payduwan, ‘Suuttaa ekkennan neeni paxin beˈana’ yaagees. He wodenne hara wodetun ta wozanan Yihoowakko woossays; yaatada a sarotettaa demmays. Hegaappe simmin keehi minnays. Ta suuttay paca gidiyo gishshau daafuriyaaba gidikkonne, ta kuushshaa xeelliyaagan Geeshsha Maxaafaappe qoncce zaaruwaa immana danddayaas.”
19 Issi issitoo, minttettiya nu mala Kiristtaanetu woy koshshiya wodiyan giigida ayyaanaa qumaa baggara Xoossay koshshiya maaduwaa immees. Issi ishay woy michiyaa, “Ha qofay taassi keehi koshshiyaaba. Hagee xaafettidoy taassa!” giishin intte siyennan aggekketa. Ee, nu hanotay woy nuussi koshshiyaabay ayba gidikkokka, nuuni an ammanettiyaaba gidikko Yihooway ba siiquwaa bessees. Qassi nuuni a “dorssata”; nuuni a sunttan xeegettanaadan oottiis.—Maz. 100:3; Yoh. 10:16; Oos. 15:14, 17.
20. Seexaanaa alamee xayiyo wode, Yihoowassi oottiyaageeti woppu giidi saro deˈanay aybissee?
20 Keehi matattida ‘Yihoowa hanqquwaa gallassan,’ Seexaanaa alamiyan asay ammanettiyo ubbabay xayana. Worqqay, biraynne hara alˈˈobay mule ashshana danddayenna. (Sof. 1:18; Lee. 11:4) Baqati attanasay “merinaa Zaallaa” xalla. (Isi. 26:4) Yaatiyo gishshau, Yihoowa xillotettaa ogiyan azazettidi simerettiyoogan, siyanau koyenna woy yedetaa gattiya asay deˈishinkka Kawotettaa kiitaa yootiyoogan, qassi nuna unˈˈissiya ubbabaa an wottiyoogan kumetta hanotan an ammanettiyoogaa bessiyaageeta gidoos. Nuuni hegaadan oottiyoode, tumuppe “woppu giidi saro de7ana; metuwaa hirggaappekka shemppana.”—Lee. 1:33.
[Tohossa qofaa]
Qonccissana Danddayay?
• Iitabaa oottanau paacettiyo wode Xoossan ammanettana danddayiyoy ayba ogiyaanee?
• Asay siyanau koyenna wodenne yedetay gakkiyo wode Xoossan ammanettana danddayiyoy ayba ogiyaanee?
• Unˈˈissiyaabay deˈishin Xoossan ammanettana danddayiyoy ayba ogiyaanee?
[Oyshata]
[Sinttaa 15n deʼiya misiliyaa qonccissuwaa]
Xoossay kessido maaraa naagiyoogee ufayttanaadan oottees
[Sinttaa 17n deʼiya misiliyaa qonccissuwaa]
Yihooway “merinaa Zaallaa”