Ayyaana Alamiyan Deˈiyay Oonee?

Awurooppaa biittan, issi cima maccaasiyaa woossaydda goˈettiyo shuuyettida gozddaa oyqqa woosa keettaa gelada, Mayraami misiliyaa sinttan gulbbatada goynnausu. Afirkkaa biittan, issi so asay bonchettida bantta dabbuwaa makkaanaa matan ushshaa gussees. Amarkkaa biittatun, issi yelagay bana naagiya kiitancha giidi ammaniyoogaara gayttanau qoppidi, xoomeesinne wotti denttidi qoppees. Isiyaa biittan, issi qeesee mayzzatu ayyaanau yarshsho shiishshanau, alleeqettida woraqataappe merettidabaa xuuggees.

HA UBBA asati issi mala gididoy aybiinee? Eti ubbay, gayttana danddayiyoonne asaa naata eta deˈuwan daroppe qohana woy maaddana danddayiya, qoppana danddayiya deˈon deˈiyaabati ayyaana alamiyan deˈiyoogaa ammanoosona. Hegaadan ammaniyoogee oorattaba woykko garamissiyaaba gidenna. Garamissiyaabay, ayyaana alamiyan deˈiyaageeta xeelliyaagan issoy issuwaappe dummatiya daro qofay deˈiyoogaa.

Isilaamati issi Xoossau, Allahau goynnoosona. * Kiristtaane giyo ammanuwaa kaalliyaageeti Xoossaa Aawaa, Xoossaa Naˈaanne Xoossaa Xillo Ayyaanaa geetettiya heezzati issi Xoossa woykko Sillaase yaagoosona. Hinddu haymaanootiyaa kaalliyaageeti shaˈaappe dariya, attuma woy macca xoossati deˈiyoogaa ammanoosona. Hara asati, ayyaanati issi issi doˈan, mittan, shuchaaninne shaafan shemppoosona yaagoosona. Harati qassi maxaafati, pilimetinne, televizhiine prograameti kiittanchatubaa, daydanttatubaa, moytilliyaabaa, azzaqibaa, attuma woy macca xoossatubaa qonccissiyoobay bantta qofaa mooranaadan oottoosona.

Xoossata xeelliyaagan issoy issuwaappe dummatiya daro qofay deˈiyoogaadan, eta haasayissana danddayiyo ogiyaa xeelliyaagankka issoy issuwaappe dummatiya daro qofay deˈees. Bessiyaagaadan qoppiyaaba gidikko, haasayissiyo ogeti ubbaykka likke gaana danddayokko. Ane hagaadan qoppite: Silkkiyan asa haasayissanaappe kase oona haasayissanaakko erana koshshees; qassi he uri deˈiyoogaanne nuna haasayissana koyiyoogaa ammanettana koshshees. Coo qofan medhido uraara haasayiyoogau waagi baawa. Hegaappe iitabay, cimmiya ura haasayissiyoogee daafa gattana danddayees.

Yaatin, ayyaana alamiyan deˈiyaageeti tumuppe oonee? Geeshsha Maxaafay he oyshaa zaariyoogaa xalla gidennan, oona haasayissana bessiyaakko, qassi ayba zaaro naagana danddayiyaakko yootees. Hagaappe kaallidi deˈiya qofata nabbaba. Geeshsha Maxaafay qonccissiyooban maalaalettana danddayaasa.

[Tohossa qofaa]