Yesuusa—Kaallana Bessiyo Polo Leemisuwaa

UFAYTTIYA loꞌꞌo asa gidanau koyay? Nuuni hegaadan waani hanana danddayiyaakko kiitettida PHeexiroosi qonccissiis. I: “Kiristtoosi intteyyo waayettiis; intte a kaallana mala, intteyyo leemiso gidiis” yaagidi xaafiis. (1 PHeexiroosi 2:21) Yesuus Kiristtoosi deꞌido dumma deꞌuwaappe, nuuni darobaa tamaarana danddayoos. Yesuusabaa tamaariyoogaaninne nu deꞌuwan a leemisuwaa kaalliyoogan, ufayttiya loꞌꞌo asa gidana danddayoos. Ha gita asi qonccissido eeshshatuppe amaridaageeta loytti akeekidi, a leemisuwaappe nuuni waani goꞌettana danddayiyaakko ane beꞌoos.

Yesuusi bessiyaagaadan deꞌiis. Yesuusi “zin77ada shemppa ekkiyoosikka tau baawa” yaagidaba gidikkonne, i malakusedan deꞌibeenna; woy harati hegaadan deꞌana mala minttettibeenna. (Maatiyoosa 8:20) I imatuwau shoobettidi biis. (Luqaasa 5:29) I koyro polido maalaalissiyaabay, giishin bullachan haattaa ayfe woyne eessau laammidoogee i asaara issippe deꞌiyoogaa ixxennaagaa woy malakuse mala gidennaagaa bessees. (Yohaannisa 2:1-11) Gidikkokka, Yesuusi xoqqu oottidi xeelliyoobay aybakko qonccissiis. I: “Ta qumai tana kiittidaagee koyiyoobaa oottanaagaanne a oosuwaa polanaagaa” yaagiis.—Yohaannisa 4:34.

❑ Ne deꞌuwan ayyaanaabaanne harabaa bessiyaagaadan waatada oottana danddayiyaakko qoppa eray?

Yesuusi shiiqanau deexxiyaagaa gidenna. Yesuusi asaa dosiyaagaanne shiiqanau deexxennaagaa gidiyoogaa Geeshsha Maxaafay yootees. Asay metootidinne deexo oyshaa akko ekkidi yiyo wode hanqqettenna. Issi wode asay corattidi aara biishin, 12 layttaa keehippe sahettida issi maccaasiyaa, ba metuwaappe woppaa demmanau qoppada a maayuwaa bochaasu. A oottidobaa harati bessennabadan xeelliyaaba gidikkonne, i o kehatettan: “Ta na7⁠ee, nena ne ammanoi pattiis” yaagiis. (Marqqoosa 5:25-34) Nuna koyenna giidi yayyennan, naatikka Yesuusakko ufayssan shiiqoosona. (Marqqoosa 10:13-16) I ba erissiyo ashkkaratuppe aybanne qottennaaninne eta siiquwan haasayissiyoogan erettees. Eti akko shiiqanau mammottokkona.—Marqqoosa 6:30-32.

❑ Harati neekko shiiqanau neeni deexxenna asee?

I asau azzaniyaagaanne qarettiyaagaa. Yesuusau deꞌiya keehi loꞌꞌo eeshshatuppe issoy, hara asaa gakkiya metuwaa ba metodan xeellidi eta maaddiyaabaa oottiyoogaa. Ba ishay Alaꞌꞌaazri hayqqin Mayraama yeekkiyoogaa Yesuusi beꞌido wode, “ba wozanan daro mishettiis;” qassi “afuxxiis” yaagidi kiitettida Yohaannisi yootiis. Yesuusi he keettaa asaa ay keena keehippe siiqiyaakko, woyganddee baynnan qonccissido hanotaappe hegan deꞌiya asay akeekana danddayiis. I ba laggiyaa hayquwaappe denttido wode, keehippe qarettiyoogee qoncciis!—Yohaannisa 11:33-44.

 Hara wode qassi, asan gayttennan deꞌanaadan oottiya, iita inchirchan keehippe sahettiya issi bitanee Yesuusa: “Godau, neeni koyikko, tana pattanau danddayaasa” yaagidi woossin, Yesuusi: “Ba kushiyaa yeddidi, a bochchidi, ‘Taani koyais; paxa’” yaagidi keehippe ufayssiya ogiyan zaariis. (Maatiyoosa 8:2, 3) Yesuusi asaa pattidoy coo hiraagay polettanaadan giidi gidenna. I eta afuttaa quccanau koyiis. I oottido ubbabay ubbatoo hassayettiya: “Asi intteyyo oottanau intte dosiyoogaadan; haraukka hegaadan oottite” yaagidi yootido qofaa i kaallidoogaa bessees.—Luqaasa 6:31.

❑ Neeni haratussi qarettiyoogee ne oosuwan qonccii?

Yesuusi asaa metuwaa ereesinne akeekees. I balabaa ootti erenna asa gidikkonne, harati polo gidanaadan mule naagenna woy haratuppe dariyiyoogaa bessanau otoruwan aynne oottibeenna; akeeki baynnabaakka ootti erenna. “Kataman issi nagaranchcha” gidiyoogaadan erettiya mishiriyaa ba ammanuwaanne galataa Yesuusa tohuwaa ba afuttan laagottiyoogan bessaasu. Yesuusa imatuwaa mokkida bitanee i bolli pirddidi, a hegaadan oottanaadan Yesuusi paqqadidoogan garamettiis. Yesuusi i ashkketettaa akeekidi, he mishiriyo i nagaraa gishshau pirddibeenna. Hegaappe, i: “Nena ne ammanoi ashshiis; saruwan ba” yaagiis. Yesuusi siiquwan oyqqido hanotay, he mishiriyaa ba kase deꞌuwaa maaraa muleera aggaaganaadan oottennan aggenna.—Luqaasa 7:37-50.

❑ Neeni harata galatanau eesotiyaanne pirddanau ellellenna asee?

I asaa asaappe shaakkennanne bonchiya asa. Geella issi mala eeshshaynne so asaara dabbotay deꞌiyo gishshau gidennan aggenna, Yesuusi ba erissiyo ashkkaraa Yohaannisa keehippe dosees. a Gidikkonne, a haratuppe shaakkidi xeellibeenna woy hara erissiyo ashkkaratuppe au dummabaa oottibeenna. (Yohaannisa 13:23) Yohaannisinne a ishay Yaaqoobi Xoossaa Kawotettan xoqqa maataa immanaadan a oychido wode, Yesuusi: “Taappe ushachcha baggaaranne haddirssa baggaara uttanaageeta dooranau taayyo maati baawa” yaagidi zaariis.—Marqqoosa 10:35-40.

Yesuusi ubbatoo harata bonchiis. I he wode deꞌiya asaadan harata coo ixxibeenna. Leemisuwau, he wode macca asaa attuma asaappe guutti xeelliyoogee meeze gididaba. SHin Yesuusi macca asaa bonchuwan oyqqiis. I Mase gidiyoogaa koyro qoncciyan  yootidoy, Ayhuda asay karidi sarotenna, Ayhuda gidenna, Samaare biittaa maccaaseessa. (Yohaannisa 4:7-26) Qassi Yesuusi hayquwaappe denddidoogaa macca asay kasetidi markkattanaadan oottiyoogan eta bonchiis.—Maatiyoosa 28:9, 10.

❑ Hara sheeshsha, dumma mattuma, dumma qaalaa haasayiya asa woy hara zare gidida asa shaakkennan xeellay?

So oosuwaa maara poliis. Yesuusa dichida aaway Yooseefi hayqqidoy, Yesuusi yelagatettan deꞌishin gidennan aggenna. Yesuusi anaaxetetta oosuwaa oottidi, ba aayyiyo, ba kaalo ishanttanne michentta maaddidaba milatees. (Marqqoosa 6:3) I hayqqiyo saatee matattido wode, ba aayeeyyo a erissiyo ashkkaraa Yohaannisi koshshiyaabaa kunttanaadan hadaraa immiis.—Yohaannisa 19:26, 27.

❑ Intte soo asau koshshiyaabaa kunttiyoogan Yesuusa leemisuwaa kaallay?

Yesuusi tumu lagge. Yesuusi keehippe loꞌꞌo lagge. Waanidi? Yesuusi ba laggeti baliyoogaa gaasoyidi, ubba zaarettidi kaseegaadan baliyo wodekka eta ixxibeenna. I erissiyo ashkkarati ubba wode i koyiyoogaadan oottibookkona. Gidikkonne, i eta iita asadan qoppiyoogaappe eta loꞌꞌo eeshshaa xeelliyoogan, etau lagge gidiyoogaa qonccissiis. (Marqqoosa 9:33-35; Luqaasa 22:24-27) Ba qofaa ekkanaadan eta wolqqanttiyoogaappe, banttau siyettiyaabaa qonccissanaadan eta minttettiis.—Maatiyoosa 16:13-15.

Ha ubbaappe aadhiyay, Yesuusi ba laggeta siiqidoogaa. Ay keenaa siiqidee? I: “Ba shemppuwaa ba laggiyaayyo aattidi immiyoogaappe aadhdhiya siiqoi ooyyookka baawa” yaagiis. (Yohaannisa 15:13) Issi uri ba shemppuwaappe aadhiyaabaa ba laggetuyyo immanau danddayii?

❑ Harati nena hanqqetissiyo woy yiilloyiyo wodekka eta lagge gidada deꞌay?

I xalanne mino. Haymaanoote misiliyan asay a wolqqi baynna uradan qonccissiyoogaappe Yesuusi keehi dumma. Wonggeliyaa maxaafati i minonne wolqqaama gidiyoogaa qonccissoosona. Yesuusi beeta maqidasiyan zalꞌꞌiyaageeta eti zalꞌꞌiyoobaara naaꞌꞌutoo yedettiis. (Marqqoosa 11:15-17; Yohaannisa 2:14-17) Asay “Naazireeta Yesuusa” oyqqanau yiido wode, i xalatettan bana gidiyoogaa erissanaunne ba erissiyo ashkkarata qohuwaappe teqqanau he asatukko shiiqidi, “Taani a gidiyoogaa intteyyo yootaas; simmi intte tana koyiyaabaa gidikko, hageeta yeddite” yaagidi minttidi yootiis. (Yohaannisa 18:4-9) Yesuusi oyqettidonne metoy a bolli gakkido wode, PHenxxeniyaa PHilaaxoosi: “Bitaniyaa hagaa be7⁠ite” yaagidoogee garamissiyaaba gidenna.—Yohaannisa 19:4, 5.

❑ Neeni oottana bessiyoobaa xalatettaaninne mino hanotan oottay?

Ha eeshshatinne hara maalaalissiya eeshshati, Yesuusi nuuyyo kaallana bessiyo polo leemiso gidanaadan oottoosona. Nu eeshshay aagaa mala gidanaadan oottiyaaba gidikko, nuuni ufayttiya loꞌꞌo asa gidana. Kiitettida PHeexiroosi Kiristtaaneti Yesuusa leemisuwaa kaallanaadan minttettidoy hegaassa. Neeyyo danddayettida keenan Yesuusa leemisuwaa loyttada kaallanau baaxetay?

Kaallana Bessiyo Leemiso Xalla Gidenna

SHin Yesuusi kaallana bessiyo leemisoppekka keehi aadhees. I: “Ogee, tumainne de7⁠oi tana; ta baggaarappe attin, ooninne ta Aawaakko baanau danddayenna” yaagiis. (Yohaannisa 14:6) Xoossaakko shiiqanaadan Xoossaabaa tumaa erissidoogaappekka haray, ammanettidaageeti deꞌuwaa demmanaadan Yesuusi ogiyaa dooyiis.—Yohaannisa 3:16.

Yesuusi saꞌaa yiido gaasotuppe issuwaa gidida hegaabaa yootiiddi: “Asa Na7ai, asaayyo  oottanaunne daro asaa wozanau ta shemppuwaa immanau yiidoogaappe attin, asi tau oottanau yabeikke” yaagiis. (Maatiyoosa 20:28) Yesuusi ba deꞌuwaa yarshshiyoogan, asaa naati merinau deꞌana danddayiyo ogiyaa giigissiis. He giigissuwaappe goꞌettanau nuuni huuphe xekkan ay oottana bessii? Yesuusi: “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7⁠o” yaagidi qonccissiis.—Yohaannisa 17:3.

Ee, Yesuusabaa eraa demmiyoogee, a leemisuwaa kaalliyoogeenne a wozuwan ammaniyoogee merinaa deꞌuwaa demmanau koshshiyaaba. Hegaa mala erau kane gidida Geeshsha Maxaafaa neeni xannaꞌanaadaaninne Yesuusi deꞌidoogaadan, Geeshsha Maxaafay yootiyoogaattuwaa deꞌanau baaxetanaadan minttettoos. b

Leemiso gidiya Yesuusa deꞌoy nuuni ay mala asa gidana koshshiyaakko tamaarissees. I yarshsho gididi hayqqidoogee nuna nagaraappenne a waagaa, hayquwaappe naxa kessana danddayees. (Roome 6:23) Yesuus Kiristtoosa baggaara demmiyo keehippe gita goꞌꞌay baynnaakko nu hanotay ay keena azzanttiyaaba gidaneeshin! Deꞌuwan gakkiya issi issibatinne metoti saꞌan deꞌida asa ubbaappe aadhiya, Yesuus Kiristtoosa leemisuwaa neeni eranaunne kaallanau oottiyo baaxiyaa digganaadan mule paqqadoppa.

[Tohossa qofata]

[Sinttaa 7n diya misiliyaa]

Neeyyo danddayettida keenan Yesuusa leemisuwaa loyttada kaallanau baaxetay?

◼ Yesuusi asaappe asaa shaakkennaagaanne ubbaa bonchiyaagaa

◼ I wurssettay gakkanaashin tumu lagge gididi deꞌiis

◼ I xala

[Sinttaa 5n deꞌiya misiliyaa]

Yesuusi bessiyaagaadan deꞌiis . . .

shiiqanau deexxennaagaa . . .

qarettiyaagaa