Daawita—I Yayyibeenna Gaasuwaa

Daawita—I Yayyibeenna Gaasuwaa

Intte Naata Tamaarissite

Daawita—I Yayyibeenna Gaasuwaa

NEENI yayya eray?— a Nuuppe daroti issi issitoo yayyoos. Neeni yayyiyo wode ay oottana danddayay?— Neeppe dariyaanne mino uraakko shiiqaasa. Ne aayyiyaa woy ne aaway nena maaddana danddayoosona. Maaduwau ookko shiiqana koshshiyaakko Daawitappe darobaa tamaarana danddayoos. I hagaadan mazamuriyaa yexxiis: “Taani Xoossan ammanettais; taani . . . Xoossan ammanettaisinne yayyikke.”—Mazamure 56:3, 4.

Daawiti yayyenna mala ooppe tamaariis gaada qoppay? Bana yelidaageetuppe tamaaridee?— Etappe tamaaridoogee sirissenna. A aaway, ammanettida Isseyi, Xoossay hidootido “Sarotettaa Halaqaa,” Yesuus Kiristtoosassi mayzza aawa. (Isiyaasa 9:6; 11:1-3, 10) Isseya aaway—Daawita aawaa aaway—Yoobeeda. Geeshsha Maxaafan deꞌiya issi maxaafay Yoobeeda aaye sunttan xeegettees. Neeni i sunttaa eray?— I sunttay Uruto; a ammanettida maccaasa; i azinay Booꞌeeza.—Uruto 4:21, 22.

Urutanne Booꞌeezi hayqqidoy, Daawiti yelettanaappe daro layttaappe kase. Neeni Booꞌeeza aayee woykko Daawita mayzza aayee sunttaa erennan aggakka. A deꞌidoy Yarkko katamaana gidishin, xomoosanau yaa biida Israaꞌeelati attanaadan maaddaasu. Yarkko gimbbee kunddiyo wode, ba keettaa maskkootiyan zoꞌo wodoruwaa qachanaadan odettida azazuwaa naagada ba soo asay attanaadan oottaasu. I sunttay oonee?— I sunttay Raaꞌaabo; a Yihoowassi goynniyaaro gidaasu; qassi Kiristtaaneti i xalatettaa kaallana bessiyo leemiso.—Yaasa 2:1-21; 6:22-25; Ibraawe 11:30, 31.

Daawita aawaynne aayyiyaa Yihoowassi ammanettida ha ashkkaratubaa ubbabaa a tamaarissidoogaa erana danddayoos. Aybissi giikko, yelidaageeti hegaa malabaa bantta naata tamaarissanaadan azazettidosona. (Zaarettido Wogaa 6:4-9) Xoossay kiittin hananabaa yootiya Sameeli Isseya naatuppe wurssettay, Daawiti sinttappe Israaꞌeela biittan kawo gidanaadan dooranau kiitettido wodee gakkiis.—1 Sameela 16:4-13.

Issi gallassi, Isseyi Xoossaa morkketu, Pilisxxeematuura olettiya ba heezzu ishanttussi qumaa efaanaadan Daawita kiittiis. Daawiti yaa gakkidi, olaa salppiyaakko woxxidi biis; yaatidi gita bitaniyaa Gooliyaadi “de7⁠o Xoossaa olanchchata” naassishin siyiis. Gooliyaadaara olettanau ubbaykka yayyiis. He bitaniyaara olettanau baana koyiyoogaa siyidi, Kawuwaa Saa7⁠ooli Daawita xeesissiis. SHin Saaꞌooli Daawita beꞌidi: “Neeni na7a” yaagiis.

Daawiti bantta soo dorssata gaammoy woy beere giyo doꞌay oyqqiyo wode, eta doonaappe wotti ekkidi he doꞌata woridoogaa Saaꞌoolassi yootiis. Daawiti, Gooliyaadikka “etappe issuwaadan hanana” yaagiis. Saaꞌooli zaaridi: “Ba; Xoossai nenaara gido” yaagiis. Daawiti muyla shucha ichashata ekkidi, ba qarcciitan yeggiis; ba yambbarshshaa oyqqidi, he gita bitaniyaara olettanau biis. Gooliyaadi issi guutta naꞌay yiyaagaa beꞌidi, “Haaya; taani ne ashuwaa saluwaa [kafotussi] . . . immana” yaagiis. Daawiti zaaridi: “Taani . . . GODAA sunttan . . . ne bolli yais” yaagiis; qassi: “Taani nena shocana” yaagiis.

Hegaappe Daawiti Gooliyaadakko woxxiis; ba qarcciitaappe issi shuchaa ekkiis; ekkidi yambbarshshan wottiis; hegaappe yambbaridi Gooliyaada somꞌꞌuwaa caddiis. He gita bitanee hayqqidoogaa Pilisxxeemati beꞌidi, yayyidi baqatidosona. Israaꞌeelati eta yedettidi he olan xoonidosona. Hayyanaa intte soo asaara issippe 1 Sameela 17:12-54n deꞌiya taarikiyaa kumettaa nabbaba.

Naꞌa gidiyoogaappe denddidaagan, Xoossaa azazuwaa polanau issi issitoo neeni yayyana danddayaasa. Ermmaasi naꞌa gidiyo gishshau, koyro yayyiis; shin Xoossay a: “Etau yayyoppa. . . . Taani . . . nenaara issippe de7ana” yaagiis. Ermmaasi xalidi, Xoossay azazidoogaadan sabbakiis. Daawitaagaadaaninne Ermmaasaagaadan Yihoowan ammanettiyaaba gidikko, neenikka yayyennaadan maaddiyaabaa akeekaasa.—Ermaasa 1:6-8.

[Tohossa qofata]

a Ha huuphe yohuwaa ne naatuura nabbabiyaaba gidikko, (—) ha malaatay neeni takki gaada eta oychanaadan hassayissanaassa.

Oyshata:

Gooliyaadi Xoossaa olanchata naassido wode, Daawiti ay oottidee?

Daawiti Gooliyaada waati xoonidee?

Nuuni ha wodiyan yayyennaadan maaddiyaabaa waatidi akeekana danddayiyoo?