ISRAAˈEELAN Eyin Gedi giyoosan, Maxine Abbawu arggo bagga gaxaa matan, 1970n, biittaa bookkidi xannaˈiyaageeti xuugettida xaatta maxaafay duuxeretti attidaagaa demmidosona. Eti issi Ayhuda woosa keettay moogettidosaa bookkiiddi hegaa demmidosona; he woosa keettay geella usuppuntta xeetu layttaa M.Ln he moottay xayiyo wode xuugettennan aggenna. He xaatta maxaafaa hanotay hegee nabbabettennaadan oottiis; haray atto A moorennan xaattaa birshshanawukka danddayettibeenna. Ubba ginan bessiya 3-D iskkaaning giyo hiillaa wolqqan, he xaatta maxaafan deˈiyaabaa beˈana danddayettiis. Dijital Imejing softwer giyo ooratta eraa goˈettidi, an xaafettidabaa nabbabana danddayoos.

Yaatin hegan aybi qonccidee? He xaatta maxaafay Geeshsha Maxaafa. He duuxeretti attidaban Wogaabaa maxaafaa doomettan deˈiya amarida xiqiseti deˈoosona. He xiqisetun Ibraawetto oyddu pitaletun xaafettida Xoossaa sunttay deˈees. Hegee koyro xeetu layttaa M.L. baggaa heerappe oyddantto xeetu layttaa M.L. gakkanaassi deˈiya wodiyan xaafettidaba milatees; kushiyan xaafettida, Kumranen beettida xuufetuppe simmin, Ibraawetto Geeshsha Maxaafaa xuufetu ubbaappe hegee keehi gamˈˈidaagaa. Gil Zohar giyo eranchchay Ze Jerusalem Post giyo gaazeexan hagaadan xaafiis: “Wogaabaa maxaafaappe duuxerettidi attida, Eyin Gedin beettidaagaa nuuni nabbabanaappe kase, Naaˈˈantto Beeta Maqidasiyaa wode xaafettida, 2,000-layttaa-gamˈˈida, Maxine Abbaa Xaatta Maxaafatuppenne giddo wodiyan, 10tta xeetu layttaa M.Ln xaafettida Alepo Kodekisiyaappe gidduwan shaˈa gidiya layttay aadhdhiis.” Eranchchati yootiyoogaadan, ha xaatta maxaafan xaafettidabay Masooreti xaafido Torah (Higgee) “shaˈu layttaa giddon aynne laamettibeennaagaanne wotti yeggi xaafidaageetu balay qofaa laammibeennaagaa” bessees.