1, 2. Nu deꞌuwan issibaa halchchiyo wode, nuna Medhdhidaagee yootiyoobaa siyiyoogee loꞌꞌo giyoy aybissee? (Doomettan deꞌiya misileta xeella.)

 NEENI yelaga gidikko, sinttanaabaa daro zoriyaa siyennan aggakka. Asttamaareti, zoriyaageeti woy harati neeni xoqqa timirttiyaa tamaarada daro damoozaa demissiya ooso oyqqanaadan nena minttettennan waayi aggana. SHin, Yihooway neeni hegaappe dumma ogiyaa kaallanaadan zorees. Neeni timirttiyaa wurssa simmada deꞌossi koshshiyaabaa demmana mala minna tamaaranaadan I koyees. (Qol. 3:23) SHin, ne kaseyana bessiyaabaa kuuyiyo wode, ha wurssetta wodiyan I nuuyyo halchchidobaanne qoppidobaa bessiya maaraa neeni kaallana mala I minttettees.—Maa. 24:14.

² Yihooway ubbabaa eriyoogaa hassaya. I sinttappe aybi hananaakko erees; qassi ha alamee xayiyo wodee ay keena matattidaakko I loytti erees. (Isi. 46:10; Maa. 24:3, 36) I nena ufayssiyaabaanne ufayssennabaa erees. Yaatiyo gishshawu, asa zoree ay keena loꞌꞌo milatikkonne, Xoossaa Qaalaa kaallana xayikko, hegee mule eratetta gidenna.—Lee. 19:21.

3, 4. Iita zoriyaa kaallidoogee Addaamanne Hewaano, qassi eta zerettaa waati qohidee?

³ Iita zoree daro wodiyaa takkiis. Asaa iita zoriyaa koyro zoriday Seexaanaa. Hewaananne I azinay bantta sheniyaadan deꞌikko, ufayttana giidi I eta zoriis. (Doo. 3:1-6) SHin Seexaanaa qofay I ba xallaa siiqiyoogaa bessiyaaba. Addaameenne Hewaana, qassi sinttappe eta zerettay Yihoowayyo goynniyoogaa aggidi, baayyo haarettanaadaaninne goynnanaadan I koyiis. SHin I etawu ay oottidee? Etawu deꞌiya ubbabaa, hegeekka issuwaa issuwaassi, loꞌꞌiya ataakiltte sohuwaanne merinawu deꞌana danddayiya wottiyoobi baynna asatettaa etassi immiday Yihoowa.

⁴ Addaameenne Hewaana azazettennan ixxidi, Xoossaappe haakkidoogee azzanttiyaaba. Neeni eriyoogaadan, eta gakkidabay keehi azzanttiyaaba. Mittaappe duxxida ciishshaadan, eti loddan loddan cimidi hayqqidosona. Nagaraa qanggettay eta naatakka qohiis. (Roo. 5:12) Gidikkonne, daro asay haꞌꞌikka Xoossawu haarettanawu koyenna. Eti bantta shenedan deꞌanawu koyoosona. (Efi. 2:1-3) Yihoowa eqettiya ‘aadhdhida eratettay’ hada gidiyoogaa gakkidabay bessees.—Lee. 21:30.

5. Xoossay asan ammanettidobay aybee, qassi I yaatidoogee bessiyaabee?

⁵ SHin, daro yelagata gujjin, Yihooway bana issi issi asay koyanaagaanne baayyo haggaazanaagaa erees. (Maz. 103:17, 18; 110:3) I hegeeta keehi nashshees! Neeni hegeetuppe issoy? Yaatikko, neeni ufayttanaadan keehi maaddiya daro “lo77obaa” Xoossaappe demmaydda deꞌiyoogee erettidaagaa. (Mazamure 103:5 nabbaba; Lee. 10:22) Hegeetuppe oyddata nuuni beꞌana. Eti ayyaanaabaa qumaa, loꞌꞌo laggeta, maaddiya halchchuwaanne tumu laꞌatettaa.

6. Ayyaanaaban neessi koshshiyaabaa neeni koyana bessiyoy aybissee, qassi Yihooway neeyyo ay giigissii?

⁶ Mehiyawu doꞌawu ayyaanaabaa, hegeekka banttana Medhdhidaagaa eranawu koshshay baawa. SHin nuussi deꞌees. (Maa. 4:4) Neeni Xoossay yootiyoobaa nashshada siyiyo wode, akeekaa, aadhdhida eratettaanne ufayssaa demmaasa. Yesuusi, “Bantta ayyaanan hiyyeesa gididoogaa eriyaageeti anjjettidaageeta” yaagiis. (Maa. 5:3) Xoossay ba Qaalaa baggaaranne ‘ammanettida wozannaama ashkkaraa’ goꞌettidi I giigissiyo gidi palahiya ayyaanaabaa qumaa baggaara neessi ayyaanaaban koshshiyaabaa kunttees. (Maa. 24:45) Ayyaanaaban dumma dumma daro quman nuuni keehi ufayttoos!—Isi. 65:13, 14.

7. Xoossay giigissiyo ayyaanaabaa qumaa miyoogawu amarida goꞌꞌati aybee?

⁷ Xoossay giigissiyo ayyaanaabaa qumay neeyyo aadhdhida eratettaanne adussi qoppiyoogaa immana; hegeeti nena daro ogiyan naagana danddayoosona. (Leemiso 2:10-14 nabbaba.) Leemisuwawu, he eeshshati Medhdhidaagee baa giyoogaa mala worddo timirtteta neeni akeekanaadan maaddoosona. Hegeeti miishshaynne aqoy ufayssaa demmanawu keehi koshshiyaaba giyo wordduwaappe nena naagoosona. Qassi eti neeni iita amuwaanne nena qohiya eeshshaa akeekanaadaaninne eqettanaadan maaddoosona. Yaatiyo gishshawu, Xoossay immiyo aadhdhida eratettaanne adussi qoppiyoogaa ubbatoo koyanne xoqqu ootta xeella! He alꞌꞌo eeshshata neeni demmiyo wode, Yihooway nena siiqiyoogaanne aybippenne aadhdhiyaabaa neessi amottiyoogaa nena gakkidabaappe neeni erana.—Maz. 34:8; Isi. 48:17, 18.

8. Neeni haꞌꞌi Xoossaakko shiiqana koshshiyoy aybissee, qassi hegee nena sinttappe waati maaddanee?

⁸ Mata wode, Seexaanaa alamee ubbay xayana; qassi nuna naaganay Yihoowa xalla.  Kaallidi maanabawu nuuni akko xeellana wodee yaana! (Imb. 3:2, 12-19) Ee, ha wodee neeni saluwan deꞌiya ne Aawaakko shiiqiyoonne kaseegaappe aaruwan an ammanettiyo wode. (2 PHe. 2:9, 10) Neeni yaatikko, ne yuushuwan aybi hanikkokka, “Taani ubbaton GODAI ta sinttan de7iyoogaa hassayais. I taappe ushachcha baggaara de7iyo gishshau, taani yeeqikke” yaagida, Daawitaagaadan neeyyo siyettana.—Maz. 16:8.

9. (a) Yohaannisa 6:44y yootiyoogaadan, Yihooway waati? (b) Hara Yihoowa Markkatuura gayttiyoogee dumma gidiyoy aybiinee?

⁹ Yihooway wozanaa suure asata tumu goynuwawu ehiidi, eta ayyaanaaban ba soo asaa oottiyoogan eta baakko shiishshees. (Yohaannisa 6:44 nabbaba.) Neeni tuman deꞌenna uraara koyro gayttiyo wode, neeni abaa eriyoobay aybee? A sunttaappenne A meraappe harabaa neeni eriyoobi waayi daana. Neeni Yihoowa eriyaanne siiqiya uraara koyro gayttiyo wode hanotay hegaa mala gidenna. Diccido hanotan, biittan, qommuwan woy wogan neeppe I dummatikkonne, intte issoy issuwaabaa darobaa ereeta!

10, 11. Yihoowa asaa issuwaa oottiyaabay aybee, qassi hegee nuna waati goꞌꞌii?

¹⁰ Leemisuwawu, intte issoy issuwaa qaalaa, hegeekka tumaa “geeshsha” qaalaa sohuwaara akeekeeta. (Sof. 3:9) Hegaa giyoogee intte naaꞌꞌaykka Xoossan ammaneeta, issi mala kandduwaa maaraa kaalleeta, qassi sinttanaabawu intte hidootay issi mala giyoogaa. Qassi, issi uran ammanettanaadaaninne A ammananaadan oottiya, abaa erana koshshiyo waannabati hegeeta. Hegeeti loꞌꞌonne mino dabbotettaa medhdhanaadankka maaddoosona.

¹¹ Neeni Yihoowawu goynniyo wode, keehi loꞌꞌo laggeta demmaas gaana danddayaasa. Neeni etaara gayttaychchana xayikkonne, kumetta saꞌan neeyyo laggeti deꞌoosona! Ha alꞌꞌo imotaa Yihoowa asaappe hari ooni demmidee?

12. Neeni ayyaanaaban halchchana danddayiyo loꞌꞌobay aybee?

¹² Eranchchaa 11:9–12:1 nabbaba. Neeni ayyaanaabaa halchchada A polanawu  baaxetiyo issibi woy unddennabi deꞌii? Neeni galla galla Geeshsha Maxaafaa nabbabanawu baaxetennan waaya aggana. Woy qassi neeni kaseegaappe loytta haasayanawunne tamaarissanawu baaxetana danddayaasa. Hanotay ay gidikkonne, neeni kaseegaappe loyttidobaa akeekiyo wode, woy harati hegaa akeekidi nena galatiyo wode, neeyyo aybi siyettii? Neeni ufayttennan waaya aggana. Qassi neeni keehi ufayttana bessees; ayssi giikko, neeni Yesuusa leemisuwaa kaallada ne koyiyoobaappe Xoossay koyiyoobaa sinttayaasa.—Maz. 40:8; Lee. 27:11.

13. Alamiyaabaa halchchiyoogaappe Xoossawu haggaaziyoogee loꞌꞌo gidiyoy aybiinee?

¹³ Neeni Yihoowawu haggaaziyoogaa ubbatoo ne qofan wottiyo wode, nena ufayssiyaanne ne deꞌuwan maaddiya ooso oottaasa. Kiitettida PHawuloosi, “Qaaxxennan minnidi eqqite. Intte daafurai Godaa baggaara mela gidennaagaa eridi, ubba wode Godaa oosuwaa azallennan oottite” yaagiis. (1 Qor. 15:58) SHin, duretiyoogaanne hayttatiyoogaa mala alamiyaabaa halchchiyo wode, asay tumu ufayssaa demmenna. Etawu ushachchikkonne, hada gididabadan etawu siyettees. (Luq. 9:25) Nuuni Kawuwaa Solomona hanotaappe hegaa tamaaroos.—Roo. 15:4.

14. Solomoni ufayttanawu mali beꞌidobaappe neeni ay tamaarana danddayay?

¹⁴ Hanno gakkanawu deꞌida asaappe keehi durenne keehi wolqqaama asa gidida Solomoni issibaa mali beꞌiis. I, “Ane taayyo gita ufaissaa immiyaabi aibakko, qassi de7iyo de7uwaa giddonkka lo77obi aibakko be7ana” yaagiis. (Era. 2:1-10) I keettata keexxiis, ataakiltte sohotanne uttidi shemppiyo sohota giigissiisinne ba koyido ubbabaa oottiis. Hegaappe simmin awu aybi siyettidee? Woppu giidee? Ufayttidee? Nuuni malana koshshenna. Solomoni ba oottido ubbabaa hassayidi hagaadan giis: “Hegaa ubbaa ootta simmada taani akeekiyo wode, . . . ubbaikka hada gidiyoogaa be7aas. . . . Go77iyaabi aibinne baawa.” (Era. 2:11) Hegee keehi wolqqaama timirtte! Neeni hegaa wozanan wottuutee?

15. Mazamure 32:8n qonccidaagaadan, ammanoy koshshiyoy aybissee, qassi hegee waati maaddii?

¹⁵ Issi issi asay ba deꞌuwan oottido balabaappenne hegaa gaasuwan gakkida waayiyaappe tamaarees. Ne bolli hegaa malabay gakkanaadan Yihooway koyenna. Neeni I yootiyoobaa siyanaadaaninne ayyo azazettanaadan koyees. Yaatanawu ammanuwaa koshshees; shin neeni ne ammanuwaa gaasuwan dooridoban mule zilꞌꞌettakka. Ee, “A sunttaa gishshawu neeni bessido siiquwaa” Yihooway mule dogenna. (Ibr. 6:10, NW) Yaatiyo gishshawu, ammanuwan mino gidanawu baaxeta; ayssi giikko, saluwan deꞌiya ne Aaway neessi aybippenne loꞌꞌobaa amottiyoogaa neeni akeekana.—Mazamure 32:8 nabbaba.

16. Nuuni laꞌatettaa xoqqu ootti xeellana koshshiyoynne hegaa akeekan goꞌettana koshshiyoy aybissee?

¹⁶ PHawuloosi, “Godaa Ayyaanai de7iyoosan ailletetti baawa” yaagiis. (2 Qor. 3:17) Ee, Yihooway laꞌatettaa siiqees; qassi neenikka hegaa siiqanaadan oottiis. SHin, he laꞌatettay nena naagana mala neeni akeekan hegaa goꞌettanaadan I koyees. Pornograafiyaa beꞌiya woy shaaramuxiya, daafaban yeggiya ispporttiyaa oottiya, woy jallissiyaabaa goꞌettiyaanne ushshaa likkiyaappe aattidi uyiya yelagata neeni erennan waaya aggana. Eti guutta wodiyawu ufayttana danddayiyoogee qoncce. SHin he meezeti darotoo asay hargganaadaaninne hayqqanaadan oottoosona, qassi eti amale gidoosona. (Gal. 6:7, 8) Hegaa malabaa oottiya yelagati laꞌa gididabadan qoppana danddayikkonne, laꞌa gidokkona.—Tii. 3:3.

17, 18. (a) Xoossawu azazettiyoogee waati laꞌa kessii? (b) Addaamessinne Hewaanissi koyro deꞌiya laꞌatettay ha wodiyaa asaa laꞌatettaappe dariyoy ayba ogiyaanee?

 ¹⁷ Gidoppe attin, Geeshsha Maxaafay yootiyo maarata kaalliyoogaa gaasuwan sahettida aappun asa eray? Yihoowawu azazettiyoogee nuuni payya gidanaadaaninne laꞌa gidanaadan oottiyoogee qoncce. (Maz. 19:7-11) Qassi neeni Xoossay kessido wottiyoobi baynna higgetussinne maaratussi azazettiyoogan ne laꞌatettaa akeekan goꞌettiyo wode, neeni aawatettay imettiyo asa gidiyoogaa Xoossawukka nena yelidaageetussikka bessaasa. Geeshsha Maxaafay, “Xoossaa naati ailletettaappe kiyido bonchcho kessaa” yaagiyo, wottiyoobi baynna laꞌatettaa, Xoossay baayyo ammanettidi haggaaziyaageetuyyo wurssettan immanawu halchchiis.—Roo. 8:21.

¹⁸ Addaameenne Hewaana he laꞌatettaa amarida wodiyawu beꞌidosona. Edene ataakiltte sohuwan, Xoossay eta laꞌatettaa digganawu immido azazoti aappunee? Issuwaa xalla. Eti issi mittaa ayfiyaa maana bessenna. (Doo. 2:9, 17) He issi azazoy Xoossay meqettaa iita gidiyoogaa woy huqqunniyoogaa bessiyaaba gaada neeni qoppay? CHii, gidenna! Asay kessidi harati eranaadaaninne azazettanaadan giddiyo zawi baynna higgetuura hegaa geeddarssa.

19. Yihoowaynne Yesuusi nuuni laꞌa kiyanaadan maaddiyaabaa ay tamaarissiyoonaa?

¹⁹ Yihooway nuna oyqqiyo ogiyan keehi aadhdhida eranchcha. I nuuyyo zawi baynna higgiyaa immiyoogaappe, nuuni siiquwaa higgiyaa kaallanaadan nuna danddayan tamaarissees. Nuuni Xoossay kessido maaraadan deꞌanaadaaninne iitabaa ixxanaadan I koyees. (Roo. 12:9) A Naꞌay, Yesuusi deriyaa bolli tamaarissido timirttiyan, asay iitabaa aybissi oottiyaakko akeekanaadan nuna maaddiis. (Maa. 5:27, 28) Xoossaa Kawotettaa Kawo gidida Kiristtoosi nuuni xillotettaanne nagaraa wottiyoobi baynna ogiyan aagaadan xeellanaadan nuna ooratta alamiyan ubbatoo tamaarissana. (Ibr. 1:9) I nuuni asatettaaninne qofan wottiyoobi baynna asa gidanaadankka oottana. Nuuni iitabaa oottanawu paacettenna wodeenne nagaraa gaasuwan nuuni waayettenna wodee ay mala gidanaakko qoppa. He wode, neeni Yihooway qaalaa gelido ‘bonchcho kessa’ kiyana woy laꞌa kiyana.

20. (a) Yihooway ba laꞌatettaa waati goꞌettii? (b) Neeni A leemisuwaa waata kaallana danddayay?

²⁰ Ooratta alamiyankka nu laꞌatettawu zaway deꞌana. Ayba ogiyan? Nuuni Xoossaa siiqiyoogeenne harata siiqiyoogee nuna ubbatoo denttettana koshshees. Siiqoy denttettin nuuni Yihoowa leemisuwaa kaalloos. Yihoowa laꞌatettawu zawi baynnaba gidikkonne, I nuna oyqqiyo ogiyaa gujjin, I oottiyo ubbabaa siiquwan oottees. (1 Yoh. 4:7, 8) Yaatiyo gishshawu, nuuni tumuppe laꞌa kiyana danddayiyoy Xoossaa milatiyo wode xallaana giyoogee bessiyaaba.

21. (a) Yihoowa xeelliyaagan Daawitayyo aybi siyettidee? (b) Nuuni kaalliya huuphe yohuwan ay xannaꞌanee?

²¹ Yihooway neeyyo immido loꞌꞌoba ubbaa neeni nashshay? I ayyaanaabaa qumaa, loꞌꞌo laggeta, maaddiya halchchuwaa, sinttappe demmana wottiyoobi baynna laꞌatettaanne hara maalaalissiya daro imotata neeyyo immiis. (Maz. 103:5) Woossiyo wode hagaadan giida Daawitaagaadan neeyyo siyettennan waayi aggana: “Neeni tana de7o ogiyaa bessaasa. Taani ne achchan de7in, ta ufaissai polettees; ne ushachcha baggaara ufaissai merinau de7ees.” (Maz. 16:11) Kaalliya huuphe yohuwan Mazamure 16n deꞌiya ayyaanaaban alꞌꞌo gidida hara amaridabaa xannaꞌana. Hegee neeni aybippenne aadhdhiya deꞌuwaa waata demmana danddayiyaakko akeekanaadan nena maaddana.