Ha paydotun uddufun eeshshati odettidosona: “Geeshsha Ayyaanaa aifee, siiquwaa, ufaissaa, sarotettaa, danddayaa, kehatettaa, lo77otettaa, ammanuwaa, ashkketettaa, ba huuphiyaa naagiyoogaa.” SHin, Xoossaa ayyaanay nuuni bessanaadan maaddiyo eeshshati hageetu xalla gidokkona.

Hegaa waati eriyoo? Kiitettida PHawuloosi ayyaanaa ayfiyaa odanaappe kase hagaadan giis: “Asatettaa oosoi . . . shaaramuxiyoogaa, tunatettaa, yeellaa xayiyoogaa, Eeqau goinniyoogaa, bitiyoogaa, morkketettaa, palamaa, qanaatiyoogaa, hanqquwaa, bana xoqqissiyoogaa, ooyettiyoogaa, issoi issuwaappe shaahettiyoogaa, miqqainniyoogaa, woriyoogaa, mattottiyoogaa, yettanchcha kiyiyoogaanne hageeta milatiyaageeta.” (Gal. 5:19-21) PHawuloosi “hageeta milatiyaageeta” giidi kuuyidoogee ‘asatettaa oosuwaa’ ubbaa qonccissibeennaagaa bessees. (Qol. 3:5) I uddufun loꞌꞌo eeshshata odido wodekka hegaara issi malabaa yootiis. Paydo 23n I, “Hageeta milatiyaageeta diggiya higgee baawa” yaagiis. Hegaa gishshawu, geeshsha ayyaanaa maaduwan nuuni bessana danddayiyo loꞌꞌo eeshshata ubbaa PHawuloosi qonccissibeenna.

PHawuloosi Efisoona gubaaꞌiyawu yootido ayyaanaa ayfiyaanne pooꞌuwaa ayfiyaa geeddarssiyo wode nuuni hegaa akeekana: “Poo7oi lo77otettaa, xillotettaanne tumatettaa ubbaa aifees.” (Efi. 5:8, 9) Ee, ‘loꞌꞌotettay’ xillotettaaranne tumatettaara issippe ‘pooꞌuwaa ayfiyaa’ macara; qassikka hegee ‘geeshsha ayyaanaa ayfiyaa’ macara.

Hegaa bollikka, Ximootiyoosi usuppun loꞌꞌo eeshshata hegeetikka, “Xillotettaa, Xoossaa milatiyoogaa, ammanuwaa, siiquwaa, danddayaanne ashkketettaa [kaallanaadan]” PHawuloosi mintti yootiis. (1 Xim. 6:11) Hegeetuppe oyddati (ammanoy, siiqoy, danddayaynne ashkketettay) ‘geeshsha ayyaanaa ayfiyaa’ macarata geetettidosona. SHin Ximootiyoosi xillotettaanne Xoossaa milatiyoogaa mala hara eeshshata bessana koshshees; qassi he eeshshati awu deꞌanaadan geeshsha ayyaanaa maadoy koshshiyoogaa erees.—Qolasiyaasa 3:12⁠ranne 2 PHeexiroosa 1:5-7⁠ra gatta xeella.

Hegaa gishshawu, Galaatiyaa 5:22, 23y Kiristtaaneti bessana koshshiyo eeshshata ubbaa qonccissenna. ‘Geeshsha ayyaanaa ayfiyaa’ macaradan odettida uddufun eeshshata bessanaadan Xoossaa ayyaanay nuna maaddana danddayees. SHin nuuni ayyaanaaban kayma Kiristtaane gidanawu bessana koshshiyo hara daro eeshshati deꞌoosona; qassi nuuni “tumu xillotettaaninne geeshshatettan Xoossaa leemisuwan merettida ooratta asatettaa” maayana koshshees.—Efi. 4:24.