1, 2. Yihooway nuuyyo waati kehii?

 YIHOOWAY keha Xoossa. Nuuyyo deꞌiya ubbabaa I immiis. Saꞌan deꞌiya alꞌꞌoba ubbay aagaa; qassi I hegaa deꞌuwawu koshshiyaabaa kunttanawu goꞌettees. (Maz. 104:13-15; Hag. 2:8) Yihooway he alꞌꞌobata ba asawu koshshiyaabaa kunttanawu maalaaliya ogiyan waati goꞌettidaakko bessiya darobaa Geeshsha Maxaafay yootees.

² Israaꞌeelati bazzuwan deꞌiyo wode Yihooway etawu 40 layttawu mannaanne haattaa immiis. (Kes. 16:35) Hegaappe denddidaagan, ‘etawu koshshiyaabaappe issibaynne xayibeenna.’ (Nah. 9:20, 21) Yihooway hananabaa yootiya Elssaaꞌa baggaara, ammanettida amꞌꞌee zaytee maalaaliya hanotan daranaadan oottiis. Xoossay immido imotan A ba acuwaa qanxxada, baayyoonne ba attuma naatuyyo gidiya miishshaa demmaasu. (2 Kaw. 4:1-7) Yihooway maaddin, Yesuusi maalaalissiya ogiyan asaa qumaa miziis; ubba qassi koshshiyo wode miishshaa demmanaadan oottiis.—Maa. 15:35-38; 17:27.

3. Ha huuphe yohuwan ay xannaꞌanee?

³ Saꞌan deꞌiya meretatussi koshshiyaabaa kunttana danddayiyo  zawi baynna aqoy Yihoowayyo deꞌees. SHin, I ba ashkkarati banttawu deꞌiya aquwaa ba dirijjitiyaa maaddanawu goꞌettanaadan shoobbees. (Kes. 36:3-7; Leemiso 3:9 nabbaba.) Yihooway nuuni nuussi deꞌiya alꞌꞌobaa zaarettidi ayyo immanaadan koyiyoy aybissee? Yihoowa ashkkarati beni wode A oosuwaa waati maaddidonaa? Ha wodiyan immiyo miishshaa dirijjitee waati goꞌettii? Ha oyshatu zaaruwaa ha huuphe yohuwan pilggana.

4. Nuuni Yihoowa oosuwaa kaafiyo wode waatiyoogaa bessiyoo?

⁴ Nuuni Yihoowa siiqiyoonne nashshiyo gishshawu ayyo immoos. Yihooway nuuyyo oottido ubbabaa qoppiyo wode keehi ufayttoos. Kawuwaa Daawiti beeta maqidasiyaa keexxanawu aybi koshshiyaakko yootidobaa nuunikka maayoos. Nuussi deꞌiya ubbabay Yihoowappe ekkidobanne nuuni assi immiyo aybinne I nuussi immidoba gidiyoogaa Daawiti yootiis.—1 Hanidabaa Odiya 29:11-14 nabbaba.

5. Uuzettennan immiyoogee nu goynuwawu keehi koshshiyoogaa Geeshsha Maxaafay waati qonccissii?

⁵ Immiyoogee Yihoowawu goynniyoogaakka erissiyaaba. Ajjuutan, kiitettida Yohaannisi Yihoowa ashkkarati saluwan hagaadan giyoogaa siyiis: “Nu Godau Xoossau, neeni bonchchuwaa, sabaanne wolqqaa ekkanau bessaasa. Aissi giikko, ubbabaa neeni medhdhadasa; qassi ubbabaikka neeni koyidoogaadan haniisinne de7iis.” (Ajj. 4:11) Nuussi deꞌiyaabaappe aaro loꞌꞌobaa Yihoowayyo immiyoogan bonchchuwaanne sabaa ubbaa I ekkanawu bessees giyoogan maayikkii? Israaꞌeelati layttan layttan heezzutoo baalaa bonchchanawu Yihoowa sinttan beettanaadan Yihooway Muuse baggaara azaziis. He baalatun eti goynniyo wode, Israaꞌeelati “GODAA sintti yiiddi, mela kushe” yookkona. (Zaa. 16:16) Hegaadan ha wodiyan, nuuni uuzettennan immiyoogan nashshiyoogeenne Yihoowa dirijjitiyawu saꞌaa baggay oottiyo oosuwaa maaddiyoogee nu goynuwawu keehi koshshiyaaba.

6. Immiyoogee nuussi loꞌꞌo gidiyoy aybissee? (Doomettan deꞌiya misiliyaa xeella.)

⁶ Immiyoogee nuussi loꞌꞌo. Coo ekkiyoogaappe kehatettan immiyoogee nu payyatettawu loꞌꞌo. (Leemiso 29:21 nabbaba.) Aawaynne aayyiyaa awu immido guutta miishshaappe etassi imotaa immiya issi naꞌaa qoppana danddayoos. Aawaynne aayyiyaa he imotaa keehi nashshoosona! Bantta son deꞌiya issi yelaga aqinyee son koshshiyaaban maaddanawu amarida miishshaa ba aawaassinne aayeessi immana danddayees. Aawaynne aayyiyaa naꞌi immees giidi naagana xayikkonne, keha gidiyoogee eti awu oottido ubbabaa nashshiyoogaa bessiyaaba gidiyo gishshawu he imotaa ekkana danddayoosona. Hegaadankka, nuuni nuuyyo deꞌiya alꞌꞌobaappe immiyoogee nuussi loꞌꞌo gidiyoogaa Yihooway erees.

7, 8. (a) Yihoowa asay beni wode keexxanawu immiyoogan waani leemiso gidii? (b) Yihoowa asay beni wode A oosuwaa maaddanawu immiyoogan waani leemiso gidii?

⁷ Issi uri ba aquwaappe immiyoogee Geeshsha Maxaafay loytti yootiyooba. Issi issi hanotan, Yihoowa asay keexxiyoobawu immiis. Leemisuwawu, Xoossaa dunkkaaniyaa giigissanawu Israaꞌeelati immanaadan Muusee minttettiis. Guyyeppe, beeta maqidasiyaa keexxanawu Kawuwaa Daawiti asay immanaadan minttettiis. (Kes. 35:5; 1 Odi. 29:5-9) Kawuwaa Yoꞌaasha wode, shiiqida miishshaa Yihoowa beeta maqidasiyaa giigissanawu qeeseti goꞌettidosona. (2 Kaw. 12:4, 5) Namisaa gaasuwan maadoy koshshiyo  ishantti deꞌiyoogaa koyro xeetu layttaa Kiristtaane gubaaꞌee akeekidi, eti “huuphiyan huuphiyan bantta wolqqaa keenaa miishshaa peeridi, Yihudan de7iya bantta ishanttussi maaduwaa yeddanau qofaa qachchidosona.”—Oos. 11:27-30.

⁸ Hara hanotan, Yihoowa asay oosuwan aawatettay deꞌiyoogeeta maaddanawu miishshaa immees. Muuse Higgiyan, hara zaretuugaadan Leewatussi laatay imettenna. Israaꞌeelati etayyo asirataa immoosona, hegee Leewati Xoossaa dunkkaaniyaa oosuwan xeelaa wottanaadan maaddees. (Qoo. 18:21) Hegaadan, guyyeppe Yesuusinne I kiittidoogeeti maccaasati “banttassi de7iyaagaappe” kehatettan immidoban goꞌettidosona.—Luq. 8:1-3.

9. Beni wode imotay awuppe beettidee?

⁹ He imotay dumma dumma sohuwaappe beettidoogee qoncce. Israaꞌeelati bazzuwan Xoossaa dunkkaaniyaa giigissanawu immiyo wode, eti Gibxxeppe ehiidobaa immennan aggokkona. (Kes. 3:21, 22; 35:22-24) Koyro xeetu layttan, issi issi Kiristtaaneti bantta aquwaa, hegeekka gadiyaa woy keettaa bayzzidi miishshaa kiitettidaageetuyyo ehiidosona. Kiitettidaageeti he miishshaa maadoy koshshiyoogeetuyyo immidosona. (Oos. 4:34, 35) Harati qassi miishshaa dagayidi oosuwaa maaddanawu ubbatoo immoosona. (1 Qor. 16:2) Hegaa gishshawu, dureekka hiyyeesaykka ubbay immiis.—Luq. 21:1-4.

10, 11. (a) Beni wode deꞌida keha gididi Yihoowawu oottidaageetuppe ay tamaarana danddayiyoo? (b) Kawotettaabaa oosuwaa maaddiyo ne maataa xeelliyaagan neeyyo aybi siyettii?

¹⁰ Ha wodiyan, nuunikka halchchido issibawu miishshaa immanaadan oyshettana danddayoos. Leemisuwawu, intte gubaaꞌee oorattaa SHiiquwaa Addaraashaa keexxanawu halchchidee? Woy qassi intte SHiiquwaa Addaraashaa bottokonana koshshii? Nu macara biiruwaanne gita shiiquwaa shiiqiyo sohuwaa bottokonanawu, woy meretay gattido daafabaa gaasuwan qohettida ishantta maaddanawu miishshaa koshshiyoogaa akeekana danddayoos. Waanna biiruwaaninne kumetta saꞌan deꞌiya macara biirotun oottiyaageeta maaddanawukka miishshaa immoos. Nu immiyo miishshay misoonaaweta, dumma aqinyetanne woradaa oosuwaa oottiyaageeta maaddees. Intte gubaaꞌee kumetta saꞌan deꞌiya ishantta maaddiya, Gita SHiiquwaa Addaraashaanne SHiiquwaa Addaraashaa keexxiyoogawu miishshaa immanawukka qaalaa gelidoogee qoncce.

¹¹ Yihooway ha wurssetta wodiyan oottiiddi deꞌiyo oosuwaa nuuni ubbay maaddana danddayoos. Imettiya imotaappe dariya baggay odettenna. Nuuni miishshaa SHiiquwaa Addaraashan deꞌiya saaxiniyan yeggana woy Interneettiyan jw.org saytiyaa baggaara immana danddayoos. Nuuni immiyo guutta miishshay aynne maaddenna giidi qoppana danddayoos. SHin, ha wodiyan nuuyyo deꞌiya miishshaappe dariya baggay amaridaageeti immido daro miishshaa gidennan, daroti immido guutta miishshaa. Nu ishantti, keehi guutta miishshay deꞌiyoogeetikka gidin, beni Maqidooniyan deꞌiya Kiristtaanetu leemisuwaa kaalloosona. Eti “hiyyeesa,” shin immanawu woossidi, kehatettan immidosona.—2 Qor. 8:1-4.

12. Dirijjitee imettida miishshaa maara goꞌettanawu ay keena baaxetii?

¹² Bolla Gididi Heemmiyaagee dirijjitiyaa miishshaa goꞌettiyoogan ammanettidaagaanne wozannaama. (Maa. 24:45) Bolla Gididi Heemmiyaagaa yarati loꞌꞌobaa kuuyanawu woossoosona, qassi eti miishshaa waati goꞌettanaakko loyttidi halchchoosona. (Luq. 14:28) Beni wode, imettiya miishshaa  kaalliya ammanettiyaageeti he miishshaa Yihoowa goyno xallawu goꞌettanaadan kaalloosona. Leemisuwawu, Iziri Parsse kawoy immidobaa ekkidi Yerusalaame simmiis; I efiido worqqay, biraynne harabay ha wodiyan 100 miiloone Amarkka doolaariyaappe darees. Iziri he miishshay Yihoowawu imettidabadan xeelliis. Hegaa gishshawu, eti iita biittaa kanttidi biyo wode he miishshaa naaganaadan etawu qoncce kaaletuwaa immiis. (Izi. 8:24-34) Kiitettida PHawuloosi Yihudan deꞌiya qohettida ishantta maaddanawu miishshaa shiishshiis. I he miishshaa efiyaageetussi ‘Godaa sintta xalaalan loꞌꞌobaa oottiyaageeta gidennan, asa sinttankka loꞌꞌobaa oottanaadan’ yootiis. (2 Qoronttoosa 8:18-21 nabbaba.) Ha wodiyan, nu dirijjitee Iziranne PHawuloosa leemisuwaa kaallees; qassi imettida miishshaa maara goꞌettees.

13. Dirijjitee mata wode issi issibaa laammidoy aybissee?

¹³ Issi keettaa asay demmiyo miishshaappe koshshiyaabawu kessiyo miishshay darennaadan issi issibaa laammana danddayees; woy qassi eti Yihoowa oosuwaa kaseegaappe aaruwan oottanawu waatidi sima deꞌo deꞌanaakkonne kaseegaappe guutta miishshaa kessanaakko qoppana danddayoosona. Yihoowa dirijjitiyaa hanotaykka hegaadaana. Mata wodeppe haa simmin, ufayssiya oorattabay oosettiiddi deꞌees. Issi issitoo, hegee demmiyo miishshaappe kessiyo miishshay daranaadan oottiis. Hegaa gishshawu, dirijjitee kaseegaadan miishshaa kessennan aggiyo ogiyaa koyees; qassi neeni kehatettan immiyo miishshaa loytti goꞌettidi danddayettida keenan darobaa oottanawu oosuwaa poxxees.

14-16. (a) Neeni immiyooban oosettiiddi deꞌiya issi issibay aybee? (b) Ha giigissidobaappe neeni ayba ogiyan goꞌettadii?

¹⁴ Yihoowawu daro layttawu haggaazidaageetuppe daroti ayyaanaaban darobay giigido hagaa mala wodiyaa mule beꞌi erokko yaagi haasayiyoogaa siyoos. Ane qoppa! Mata wode, jw.org sayteenne JW Brodkastingee doomettiis. Ooratta Alamiyaa Geeshsha Maxaafaa Birshshettay daro doonatun attamettiis. Qassi 2014/2015n, kumetta saꞌan 14 katamatun deꞌiya gita isttaadeemetuppe amaridaageetun “Kasetidi Xoossaa Kawotettaa Koyite!” giya daro biittaa ishantti issippe shiiqiyo heezzu gallassa gita shiiqoy giigiis. He shiiquwan shiiqidaageeti keehi ufayttidosona.

¹⁵ Nuuni Yihoowa dirijjitiyaappe keehi maaddiyaaba demmiyo gishshawu daroti hegaa nashshidosona. Leemisuwawu, JW  Brodkastingiyaa xeelliyaagan, Isiyan deꞌiya issi biittan haggaaziya azinaynne machchiyaa hagaadan giidosona: “Nuuni haggaaziyoy qeeri katamaana. Hegaa gishshawu, nuuni nurkka deꞌiyaabadan qoppoos; qassi Yihoowa oosoy ay keena aahokko sohuwaara dogoos. SHin, JW Brodkastingiyan deꞌiya dumma dumma prograameta beꞌosaara nuuni kumetta saꞌan deꞌiya ishanttu maabaraa yame gidiyoogaa hassayoos. He kataman deꞌiya ishanttinne michchontti JW Brodkastingiyan keehi ufayttoosona. Eti aginan aginan kiyiya prograamiyaa beꞌi simmidi, Bolla Gididi Heemmiyaagaa yaratuura keehi dabbotidabadan haasayiyoogaa nuuni darotoo siyoos. Eti Xoossaa dirijjitiyaa yame gidiyoogan haꞌꞌi awudeegaappenne aaruwan ceeqettoosona.”

¹⁶ Kumetta saꞌan, 2,500 gidiya SHiiquwaa Addaraashay keexettiiddi deꞌees; woy qassi keehi bottokonettees. Honddurasen deꞌiya issi gubaaꞌiyaa yarati bantta ooratta SHiiquwaa Addaraashaa goꞌettiyoogaa doommi simmidi hagaadan giidosona: “Nuuni nu heeran yeemottidoogaadan SHiiquwaa Addaraashaa demmanaadan maaddida, saluwaaninne saꞌan deꞌiya Yihoowa soo asaanne kumetta saꞌan deꞌiya maalaalissiya nu ishanttu maabaraa yame gididoogan keehi ufayttoos.” Daroti bantta doonan birshshettida Geeshsha Maxaafaanne hara xuufeta demmidi, qohettidaageeta maaddiyaageeti oottiyooban maadetti simmidi, woy asay dariyo sohuwaaninne bantta heeran dabaaban markkattiyoogee demissiyo ayfiyaa beꞌidi hegaadan nashshoosona.

17. Yihooway ba dirijjitiyaa ha wodiyan maaddiyoogaa nuuni waati eriyoo?

¹⁷ He ubba oosuwaa dosan imettiya miishsha xallaa goꞌettidi nuuni waati oottiyaakko hara asay akeekana danddayenna. Issi gita dirijjitiyaa alaafee nuuni xuufiyaa attamiyo pabirkkatuppe issuwaa beꞌiis. Oosettidaba ubbay miishsha demmanawu aybanne oottennan, bantta dosan oottiya asatun, dosan imettiya miishshan oosettidoogan I maalaalettiis. Nuuni oottidobay oottana danddayettennaba gidiyoogaa yootiis. He qofay nuunikka maayiyooba. Nuuni hegaa oottana danddayidoy Yihooway maaddido gishsha xallaassa gidiyoogaa eroos.—Iyy. 42:2.

18. (a) Nuuni Kawotettaabaa oosuwaa maaddanawu immiyo wode demmiyo anjjoy aybee? (b) Nuuni nu naatinne oorattati immanaadan waati loohissana danddayiyoo?

¹⁸ Yihooway ha wodiyan oosettiya gita oosuwaa maaddiyo maataa nuussi immidi nuna bonchchiis. Nuuni Kawotettaabaa oosuwaa maaddanawu immiyo wode, I nuna anjjanaagaa odiis. (Mil. 3:10) Kehatettan immiya uri duretanaagaakka Yihooway yootiis. (Leemiso 11:24, 25 nabbaba.) Qassi “ekkiyaagaappe immiyaagee anjjettidaagaa” gidiyo gishshawu, immiyoogee ufayssaa demissees. (Oos. 20:35) Waati immana danddayiyaakkonne waati daro anjjuwaa demmana danddayiyaakko nu naatanne oorattata nuuni haasayiyoobaaninne oottiyooban loohissiyo maatay nuuyyo deꞌees.

19. Ha huuphe yohoy nena waati minttettidee?

¹⁹ Nuussi deꞌiya ubbabaa Yihoowappe ekkida. Ayyo zaarettidi immiyoogee nuuni A siiqiyoogaanne I nuussi oottido ubbabaa nashshiyoogaa bessees. (1 Odi. 29:17) Beeta maqidasee keexettiyo wode, “Asai ba sheniyan ba kumetta wozanan GODAAYYO immido gishshau ufaittiis.” (1 Odi. 29:9) Hegaadankka nuuni Yihoowa kushiyaappe ekkidobaa ayyo zaarettidi immiyoogan ubbatoo ufayttiyaageeta gidoos.