1. Aqo oyqqabeenna michchiyaa oona gelanaakko qoppiyo wode, A bana oychchana bessiyo amarida oyshati aybee?

UBBA Kiristtaanetikka wottiyoobi baynna ogiyan kaalettiya Yesuus Kiristtoosa aawatettaa garssan deˈoosona. Gidoppe attin, issi maccaasiyaa aqo oyqqiyo wode nagaranchcha gidida attuma asa aawatettaa garssan deˈawusu. Hegee ubbatoo metennaba gidenna. Yaatiyo gishshawu, A issi ishaa gelanawu qoppiyo wode hagaadan bana oychchana koshshees: ‘Ha ishay so asaa loytti kaalettiyaagaa gidanaagaa bessiyaabay aybee? Ba deˈuwan Yihoowawu haggaaziyoogaa kaseyii? Yaatana xayikko, nuuni aqo oyqqi simmin, I ayyaanaaban loytti kaalettiyaagaa gidana gaada taani qoppanaadan oottiyaabay aybee?’ Issi michchiyaa hagaadan gaadakka bana oychchana bessiyoogee qoncce: ‘Nu aqo deˈuwan ufayttanawu tawu deˈana koshshiya eeshshati aybee? Taani danddayanchchee, qassi kehee? Taayyo Yihoowaara mino dabbotay deˈii?’ (Era. 4:9, 12) Issi maccaasiyaa aqo oyqqanaappe kase loˈˈobaa kuuyikko, hegee I aqo deˈoy giiga gidanaadaaninne A ufayttanaadan maaddana danddayees.

2. Ha huuphe yohuwan ay pilgganee?

² Miilooniyan qoodettiya nu michchontti bantta azinawu azinawu haarettiyoogan loˈˈo leemiso gidoosona. Eta keehi galatoos! Ha ammanettida maccaasatuura Yihoowawu issippe haggaaziyoogan keehi ufayttoos! Ha huuphe yohuwan heezzu oyshatu zaaruwaa pilggana: (1) Machchota gakkana danddayiya amarida metoti aybee? (2) Machchiyaa ba azinawu haarettana koshshiyoy aybissee? (3) Kiristtaane azinatinne machchoti haarettiyoogaanne aawatettaa bonchchiyoogaa xeelliyaagan Yesuusappe, Abigaalippenne, Yesuusa aayee Mayraamippe ay tamaarana danddayiyoonaa?

3. Aqo oyqqida ubbaa metoy gakkiyoy aybissee?

³ Aqo deˈoy Xoossay immido wottiyoobi baynna imota; shin asay nagaranchcha. (1 Yoh. 1:8) Aqo oyqqidaageeti “bantta bolli waayiyaa ehaana” giidi, metoy eta gakkanaagaa Xoossaa Qaalay yootiyoy hegaassa. (1 Qor. 7:28) Machchiyo gakkana danddayiya amarida metota ane beˈoos.

4. Issi machchiyaa ba azinawu haarettiyoogee kawushshiyaaba gaada qoppana danddayiyoy aybissee?

⁴ Issi issitoo, issi machchiyaa ba diccido hanotaappe denddidaagan, ba azinawu haarettiyoogee kawushshiyaaba gaada qoppana danddayawusu. Amarkkan deˈiya Merisola hagaadan gaasu: “Taani diccido heeran, maccaasay ubbaban attumaasaara lagge gidana bessiyoogee muletoo odettees. Yihooway azinatussi aawatettaa immidoogaa, qassi machchoti azazettana koshshikkonne etassi bonchchoy bessiyoogaa yootidoogaakka taani erays. Gidoppe attin, ta azinaa aawatettaa ubbatoo bonchchiyoogee metiyaaba; ayssi giikko, alamiyaa asay taani hegaadan oottana koshshennaagaa yootees.”

5. Macca asaa xeelliyaagan issi issi attuma asawu deˈiya bala qofay aybee?

⁵ Gidikkonne, macca asay attuma asaappe keehi guuxxees giidi qoppiya uraa issi maccaasiyaa gelana danddayawusu. Tohossa Amarkkan deˈiya Ivon giyo michchiyaa hagaadan gaasu: “Taani diccido heeran, attuma asay mi simmin macca asay mees. Macca naati quma kattananne issi issibaa geeshshana bessees giidi asay qoppees; shin attuma naatussi eta aayyiyaanne eta michchontti kiitettoosona; qassi eti ‘son kawo’ gidiyoogee etawu odettees.” Isiyan deˈiya Yinglingo giyo michchiyaa hagaadan gaasu: “Macca asay gooba gidenna woy issibaa oottiyo eray etawu baawa giidi nu biittan asay haasayees. So ooso ubbaa oottiyay eta gidikkonne, bantta azinawu bantta qofaa yootanaadan etawu paqqadettenna.” Siiqennanne Geeshsha Maxaafay yootiyoobawu azazettenna azinay ba machcheeyyo deˈoy deexxanaadan, Yesuusa leemisuwaa A kaallennaadaaninne Yihoowa ufayssennaadan oottees.—Efi. 5:28, 29; 1 PHe. 3:7.

6. Machchoti Yihoowaara dabbotaa minttidi deˈanawu ay oottana koshshii?

⁶ Hagaappe kasetiya huuphe yohuwan beˈidoogaadan, issi azinay so asawu ayyaanaaban, qofaaninne asatettan koshshiyaabaa kunttanaadan Yihooway appe koyees. (1 Xim. 5:8) Gidikkonne, machchoti Xoossaa Qaalaa galla galla nabbabanawu, qassi hegaa wotti dentti qoppanawunne wozanappe Yihoowakko woossanawu wodiyaa bazzana koshshees. Hegee metiyaaba gidana danddayees. Machchotussi oosoy daro gidiyo gishshawu, hegeeta oottanawu wodeenne wolqqay banttawu baynnabadan qoppana danddayikkonne, hegawu wodiyaa bazziyoogee keehi koshshiyaaba. Aybissi? Nuuni ubbay Yihoowaara dabbotanaadaaninne he dabbotaa minttanaadan I koyiyo gishshataassa.—Oos. 17:27.

7. Machchiyaa ba aawatettaa polanawu metootennaadan oottiyaabay aybee?

⁷ Issi machchiyaa nagaranchcha gidida ba azinaassi haarettanawu baaxetana koshshiyoogee tuma. Gidikkonne, A haarettana koshshiyo gaasuwaa Geeshsha Maxaafay yootiyoy aybissakko akeekiyoonne ammaniyo wode, Yihooway iyyo immido aawatettaa polanawu metootukku.

8. Efisoona 5:22-24y yootiyoogaadan, machchiyaa ba azinawu haarettana koshshiyoy aybissee?

⁸ Issi machchiyaa ba azinawu haarettana koshshees; ayssi giikko A hegaadan oottanaadan Yihooway koyees. (Efisoona 5:22-24  nabbaba.) Saluwan deˈiya I Aaway O siiqiyoogaanne iyyo loˈˈo gidennaba oottanaadan oychchennaagaa A eriyo gishshawu an ammanettawusu.—Zaa. 6:24; 1 Yoh. 5:3.

9. Issi machchiyaa ba azinawu haarettiyoogan Yihoowawu azazettiyoogee waati maaddii?

⁹ Alamee machchoti Yihooway kessido maarata shenehoo gaanaadaaninne azinawu haarettiyoogaa kawushshiyaabadan xeellanaadan minttettees. Hegaadan oottanaadan minttettiyaageeti siiqiya nu Xoossaa erennaagee qoncce. Yihooway ba alˈˈo macca naata kawushshiyaabaa mule azazenna. Yihoowawu azazettanawu minna oottiya issi michchiyaa ba azinawu haarettiyoogan ba so asay sarotettan deˈanaadan oottawusu. (Maz. 119:165) Hegee onne I azinaa, qassi eta naata maaddees.

10. Kaarola yootidobaappe nuuni ay tamaarana danddayiyoo?

¹⁰ Nagaranchcha gidida ba azinawu haarettiya issi machchiyaa aawatettay deˈanaadan oottida Yihoowa siiqiyoogaanne bonchchiyoogaa bessawusu. Tohossa Amarkkan deˈiya Kaarola hagaadan gaasu: “Ta azinay balabaa oottanaagaa erays. Qassi I baliyo wode taani hegaa oyqqiyo ogee Yihoowaara ta dabbotido dabbotaa ay keena xoqqu ootta xeelliyaakko bessiyaaba gidiyoogaa erays. Yaatiyo gishshawu, saluwan deˈiya ta Aawaa ufayssanawu koyiyo gishshawu, ubbatoo haarettanawu baaxetays.”

11. Eniyeso giyo michchiyaa atto gaanaadan O maaddidabay aybee, qassi A yootidobaappe ay tamaarana danddayiyoo?

¹¹ Issi machchiyaa I azinay iyyo siyettiyaabaanne O unˈˈissiyaabaa aynne qoppennabadan iyyo siyettikko, A bonchchiyoogeenne awu haarettiyoogee metiyaaba gidana danddayees. SHin Eniyes giyo aqo oyqqida michchiyo hegaa malabay gakkin A waatidaakko beˈa. A hagaadan gaasu: “Taani uluwan lancciyaa oyqqennan agganawu baaxetays. Nuuni ubbay baliyoogaa taani hassayays. Taani Yihoowaagaadan coo atto gaanawu halchchaas. Taani atto giyo wode sarotettaa demmays.” (Maz. 86:5) Issi machchiyaa atto giyo wode, haarettiyoogee darotoo O metennaba gidana.

12. Geeshsha Maxaafay aybin leemiso gidiyaageetubaa yootii?

¹² Haarettiya uri laafa giidi issoti issoti qoppana danddayoosona. SHin hegee mulekka  tuma gidenna. Keehi xala gidikkonne, haarettiyoogan leemiso gidiya darotubaa Geeshsha Maxaafay yootees. Yesuusappe, Abigaalippenne Mayraamippe nuuni ay tamaarana danddayiyaakko beˈa.

13. Yesuusi Yihoowawu haarettiyoy aybissee? Qonccissa.

¹³ Yesuusi Yihoowawu haarettees; shin I hegaadan oottiyoy awu eratetti baynna woy eeyya gidiyo gishshataassa gidenna. Akeekanawu metennanne qoncce ogiyan tamaarissidoogee I keehi eranchcha gidiyoogaa bessees. (Yoh. 7:45, 46) Yesuusi keehi eranchcha gidiyoogaa Yihooway eriyo gishshawu, saluwaaninne saˈan deˈiya ubbabaa medhdhiyo wode Yesuusi banaara oottanaadan paqqadiis. (Lee. 8:30; Ibr. 1:2-4) Qassi Yihooway Yesuusa hayquwaappe dentti simmidi, ‘saluwaaninne saˈan maata ubbaa’ ayyo immiis. (Maa. 28:18) Yesuusawu daro eray deˈikkonne kaaletuwaa Yihoowa oychchees. Aybissi? I ba Aawaa siiqiyo gishshataassa.—Yoh. 14:31.

14. (a) Azinati Yihooway maccaasaa xeelliyo ogiyaappe ay tamaarana danddayiyoonaa? (b) Leemiso 31​n deˈiya qofaappe azinati ay tamaarana danddayiyoonaa?

¹⁴ Azinati tamaarana danddayiyoobaa. Yihooway machchiyaa ba azinawu haarettanaadan azazidoy maccaasaa attuma asaappe guutti xeelliyo gishshawu gidenna. Yihooway maccaasaynne attuma asay Yesuusaara haaranaadan dooriyoogan eta guutti xeellennaagaa bessiis. (Gal. 3:26-29) Yihooway ba Naˈaayyo maataa immiyoogan an ammanettiyoogaa bessiis. Hegaadankka, akeekanchcha azinay amarida aawatettaa machcheeyyo immiyoogan O ammanettiyoogaa bessana. Wozannaama machchiyaa oottiyoobata Geeshsha Maxaafay yootees. Leemisuwawu, son oosettiyaabaa kaallawusu, gadiyaa shammawusunne bayzzawusu, qassi minnada zalˈˈawusu. (Leemiso 31:15, 16, 18 nabbaba.) A ba qofaa yootana danddayenna ashkkara mala gidukku. SHin I azinay O ammanetteesinne A yootiyoobaa siyees. (Leemiso 31:11, 26, 27 nabbaba.) Issi attumaagee ba machchiyo hegaadan bonchchuwan oyqqiyo wode, A ayyo haarettiyoogan ufayttana.

15. Yesuusi oottidobaappe machchoti ay tamaarana danddayiyoonaa?

¹⁵ Machchoti tamaarana danddayiyoobaa. Yesuusi darobaa oottikkonne, Yihoowawu haarettiyoogaa kawushshiyaabadan xeellibeenna. (1 Qor. 15:28; Pili. 2:5, 6) Hegaadankka, Yesuusa leemisuwaa kaalliya wozannaama maccaasiyaa ba azinawu haarettiyoogaa kawushshiyaabadan xeellukku. A ba azinaa maaddiyoy A siiqiyo gishsha xallaassa gidennan, waannayada Yihoowa siiqiyoonne bochchiyo gishshataassa.

16. Koyro Sameela 25:3, 23-28y yootiyoogaadan, Abigaalo gakkida paacee aybee? (Koyro sinttan deˈiya misiliyaa xeella.)

¹⁶ Abigaali azinaa sunttay Naabaala. I ba xallaa siiqiya, otorettiyaanne galatenna asa. Abigaala aara deˈanawu koyennaba gidiyaakko, Daawitinne A attuma asati I azinaa woranaadan agga bayana danddayawusu. SHin A hegaadan oottabeykku. A Naabaalanne A so asaa ubbaa ashshanawu bawu danddayettida ubbabaa oottaasu. Abigaala 400 olanchchatukko shiiqada Daawita bonchchuwan haasayissanawu ay keena xalatettay koshshidaakko qoppa. A ba azinay oottido balaa gishshawukka maarotaa oychchanawu eeno gaasu. (Koyro Sameela 25:3, 23-28 nabbaba.) Daawiti gita nagaraa oottennaadan teqqanawu Yihooway ha xala maccaasee baggaara zoridoogaa akeekiis.

17. Daawitabaanne Abigaalibaa yootiya taarikiyaappe azinati ay tamaarana danddayiyoonaa?

¹⁷ Azinati tamaarana danddayiyoobaa. Abigaala eranchcha maccaasa. Daawiti I zoriyaa siyiis. Hegaappe denddidaagan, aynne mooribeenna asata woribeenna. Hegaadankka,  akeekanchcha azinay issi gitabaa kuuyanaappe kase ba machchiyaa yootido qofaa loytti qoppees. A yootido qofay I iitabaa kuuyennaadan maaddana danddayees.

18. Machchoti Abigaala oottidobaappe ay tamaarana danddayiyoonaa?

¹⁸ Machchoti tamaarana danddayiyoobaa. Yihoowa siiqiyaanne bonchchiya issi machchiyaa I azinay Yihoowawu haggaazennaba woy I kessido maaraadan deˈennaba gidikkokka, ba so asaa maaddana danddayawusu. A appe shaahettanawu koyukku. A ba azinaa bonchchiyoogaaninne awu haarettiyoogan I Yihoowabaa tamaaranaadan A wozanaa denttettanawu malawusu. (1 PHe. 3:1, 2) SHin I azinay Yihoowawu haggaazanawu koyennaba gidikkonne, A ba azinawu haarettiyoogaanne ammanettiyoogaa Yihooway beˈiyo wode ufayttana.

19. Issi machchiyaa ba azinawu azazettennay awudee?

¹⁹ Gidoppe attin, ba azinawu haarettiya issi machchiyaa I azinay Geeshsha Maxaafay yootiyo higgeta woy maarata kanttanaadan O oychchiyo wode, aara hashetukku. Leemisuwawu, Yihoowa Markka gidenna issi michchee azinay A worddotanaadan, wuuqqanaadan woy Yihoowa ufayssenna issibaa oottanaadan yootiis gaada qoppa. Aqo oyqqida michchontta gujjin, ubba Kiristtaanetikka Xoossaa Yihoowawu azazettiyoogaa kaseyana koshshees. Issi michchiyaa Geeshsha Maxaafay yootiyo maaraa kanttanaadan azinay oychchikko, A ixxis gaana koshshees; qassi ashkketettan yootikkonne I oychchidobaa oottana danddayennay aybissakko xalada qonccissana koshshees.—Oos. 5:29.

20. Mayraama Yihoowaara dabbotaa minttada deˈidoogaa waati eriyoo?

²⁰ Mayraama Yihoowaara dabbotaa minttada deˈaasu. A Geeshsha Maxaafaa loytta eriyoogee qoncce. Mayraama Xammaqiya Yohaannisa aayee Elssaabeexiira haasayido wode, A 20ppe dariya xiqiseta Ibraawettuwan Xaafettida Geeshsha Maxaafaappe yootaasu. (Luq. 1:46-55) Qassi hagaa qoppa: Mayraama Yooseefa gelanawu giiga uttikkonne, Yihoowa kiitanchchay koyro ayyo qonccibeenna. Kiitanchchay Mayraamo koyro haasayissidi A Xoossaa Naˈaa yelanaagaa iyyo yootiis. (Luq. 1:26-33) Yihooway Mayraamo loytti eriyo gishshawu, I ba Naˈaa A siiqanaagaanne  awu koshshiyaabaa kunttanaagaa ammanettiis. Qassi Yesuusi hayqqidi saluwaa bi simminkka, Mayraama Yihoowaara dabbotaa minttada deˈidoogee qoncce.—Oos. 1:14.

21. Geeshsha Maxaafay Mayraamibaa yootiyoobaappe azinati ay tamaarana danddayiyoonaa?

²¹ Azinati tamaarana danddayiyoobaa. Issi akeekanchcha azinay ba machchiyaa Geeshsha Maxaafaa loytta eriyo wode ufayttees. I bolli yiillotenna, qassi so asawu huuphe gidanawu A koyawusu giidi qoppenna. A Geeshsha Maxaafaanne Geeshsha Maxaafay yootiyo maarata loytta erikko, A ba so asaa maaddanaagaa I akeekees. Issi machchiyaa ba azinaappe aaruwan timirttiyaa tamaaridaba gidikkonne, so asay Yihoowawu goynnanaadan maaddiyoogee leemisuwawu, so asaa goynuwaa giigissiyoogee A aawatetta gidiyoogee qoncce.—Efi. 6:4.

22. Machchoti Mayraamippe ay tamaarana danddayiyoonaa?

²² Machchoti tamaarana danddayiyoobaa. Issi maccaasiyaa ba azinawu haarettana koshshikkonne, ba ammanuwaa minttiyoogee I aawatetta. (Gal. 6:5) Hegaa gishshawu, A buzuwan xannaˈanawunne wotta dentta qoppanawu wodiyaa bazzana koshshees. Hegee A kaseegaappe aaruwan Yihoowa siiqanaadaaninne bonchchanaadan qassi ba azinawu haarettiyoogan ufayttanaadan O maaddana.

23. Bantta azinatuyyo haarettiya machchoti banttana, bantta so asaanne gubaaˈiyaa waati goˈˈiyoonaa?

²³ Son Yihooway giigissido aawatettaa shenehoo giyaageetun gidennan, siiqoy denttettin bantta azinawu azinawu haarettidi deˈiya machchotun Yihooway keehi ufayttees. Eti yelaga attumaageetussikka maccaageetussikka loˈˈo leemiso gidoosona. Qassi eti siiqoynne sarotettay so xallan gidennan, gubaaˈiyankka deˈanaadan oottoosona. (Tii. 2:3-5) Ha wodiyan, ammanettida Yihoowa ashkkaratuppe daroti maccaageeta. (Maz. 68:11) Nuuni ubbay, macca gidin attuma gidin, gubaaˈiyan ufayssay deˈanaadan oottana danddayoos. Nuuni ubbay hegaadan waati oottana danddayiyaakko kaalliya huuphe yohoy qonccissana.