Hegaara gayttidaba gidiyoogaa nuuni issi issitoo yootida. Hegee Ibraawe 12:16n deˈiya qofaara maayiyaaba milatiis. He xiqisee Eesawayyo ‘Xoossaa ayyaanay baynnaagaa’ woy i geeshsha gididaba nashshibeennaagaanne ‘issitoo miyoobawu ba bayratettaa Yaaqoobayyo bayzzidoogaa’ yootees. Hegee Yaaqoobi “bairatettaa” ekkido wode, Masiyawu mayzza aawa gididoogaakka qonccissiyaaba milatiis.—Maa. 1:2, 16; Luq. 3:23, 34.

Gidoppe attin, Geeshsha Maxaafan deˈiya qofaa pilggiyoogee issi asi Masiyaa mayzza aawa gidanawu bayra naˈa gidana koshshennaagaa bessees. Amarida naqaashaa ane beˈoos:

Yaaqoobi (Israaˈeeli) Liyippe yelido naatuppe bayray Roobeela. Guyyeppe, Yaaqoobi ba siiqiyo machee Raaheelippe yelido naatuppe bayray Yooseefa. Roobeeli moorobaa oottin, bayratettay Yooseefayyo imettiis. (Doo. 29:31-35; 30:22-25; 35:22-26; 49:22-26; 1 Odi. 5:1, 2) SHin, Roobeelikka Yooseefikka Masiyawu mayzza aawa gidibookkona. Masiyawu mayzza aawa gididay Liyiyyo  oyddantto naˈaa gidida Yihuda.—Doo. 49:10.

Luqaasa 3:32y Masiyaa mayzza aawatuppe hara ichashata yootees. Eti ubbaykka bayra naˈa gidennan aggokkona. Hegeetuppe issoy Booˈeeza; i Isseya aawaa Yoobeeda yeliis.—Uru. 4:17, 20-22; 1 Odi. 2:10-12.

SHin, Daawiti Isseyayyo bayra naˈa gidenna. I hosppun naatuppe wurssetta. Gidikkokka, Daawiti Masiyawu mayzza aawa. (1 Sam. 16:10, 11; 17:12; Maa. 1:5, 6) Hegaadan, Daawita naatuppe Masiyawu mayzza aaway Solomona; ikka bayra naˈa gidenna.—2 Sam. 3:2-5.

Hegee bayratettay aynne maaddennaagaa bessiyaaba gidenna. Bayra naˈi bonchettees; qassi darotoo so giddon aawaappe kaalliya huuphee a. Qassi i naaˈˈu kushe laataa ekkees.—Doo. 43:33; Zaa. 21:17; Yaas. 17:1.

SHin, bayratettaa maataa hara uri ekkana danddayees. Abrahaami bayratettaa maataa Isimaaˈeela diggidi Yisaaqawu immiis. (Doo. 21:14-21; 22:2) Qassi qommoora beˈidoogaadan, bayratettaa maatay Roobeelappe ekettidi Yooseefayyo imettiis.

Ane zaarettidi Ibraawe 12:16 beˈoos; xiqisee hagaadan gees: “SHaaramuxanau qaaqqatiya asi ooninne de7enna mala, woi qassi issitoo miyoobau ba bairatettaa baizzida, Xoossaa Ayyaani bainna Eesawa mala asikka de7enna mala naagettite.” Hegawu waanna qofay aybee?

Ha xiqisiyan kiitettida PHawuloosi yootidobay Masiyaa mayzza aawaara gayttidaba gidenna. I Kiristtaaneti ‘sitta ogiyan hemettanaadan’ zoriis. Yaatikko, eti ‘Xoossaa aaro kehatettaa ekkennan attokkona’; eti shaaramuxikko hegaa demmana danddayokkona. (Ibr. 12:12-16) Eti hegaadan oottikko, Eesawa mala gidoosona. An ‘Xoossaa Ayyaanay baa’ woy i geeshsha gididabaa nashshibeenna; qassi i asatettaabaa xallaa qoppiis.

Eesawi beni wode deˈiis; qassi i issi issitoo yarshshuwaa yarshshennan aggenna. (Doo. 8:20, 21; 12:7, 8; Iyy. 1:4, 5) SHin Eesawi asatettaabaa qoppiyo gishshawu, guutta misiraa woxiyawu giidi he ubba maataa aggibayiis. I Abrahaama zerettaa gakkana geetettida waayiyaappe attanawu koyennan waayi aggana. (Doo. 15:13) Qassi Eesawi eeqawu goynniya naaˈˈu maccaasata ekkidi ba aawaanne aayyiyo azzanttiyoogan, asatettaabaa dosiyoogaanne geeshsha gididabaa nashshennaagaa bessiis. (Doo. 26:34, 35) Tumu Xoossawu goynniya maccaasaa ekkida Yaaqoobappe i keehi dumma!—Doo. 28:6, 7; 29:10-12, 18.

Yaatin, Masee Yesuusi yiido zerettaabaa woygana danddayiyoo? I yiido zerettay issi issitoo bayra naˈa baggara gidikkonne, ubbatoo hegaadan gidenna. Ayhudati hegaa akeekidosonanne maayidosona; Kiristtoosi Isseyawu wurssetta naˈaa Daawita zeretta gidiyoogaa eti maayidoogee hegaa bessees.—Maa. 22:42.