1. Yihooway ammanettida ba ashkkaratu ubbawu ay immidee?

YIHOOWAY ammanettida ba ashkkarata ubbaa siiqidi eti ba gubaaˈiyaa yara gidanaadan oottiis. Nuuni ubbay gubaaˈiyan oottiyoobay dumma dummaba gidikkonne, nuuni ubbay alˈˈo; qassi nuuni ubbay issoy issuwawu koshshoos. Ha keehi koshshiya timirttiyaa akeekanaadan kiitettida PHawuloosi nuna maaddees. Waatidi?

2. Efisoona 4:16y yootiyoogaadan, nuuni issoy issuwaa bonchchananne hashetidi issippe oottana koshshiyoy aybissee?

² Nuuppe ooninne Yihoowa ashkkara gidida ura, “Neeni tana koshshakka” gaana danddayennaagaa, ha huuphe yohuwaa denddo gidida xiqisiyan PHawuloosi yootiis. (1 Qor. 12:21) Nuuni gubaaˈiyan sarotettay deˈanaadan koyikko, issoy issuwaa bonchchananne hashetidi issippe oottana koshshees. (Efisoona 4:16 nabbaba.) Nuuni hashetidi issippetettan oottiyo wode, gubaaˈiyan deˈiya ubbay bana harati siiqiyoogaa akeekana; qassi gubaaˈee minnana.

3. Ha huuphe yohuwan nuuni ay xannaˈanee?

³ Nuuni gubaaˈiyan deˈiya hara Kiristtaaneta bonchchiyoogaa bessana danddayiyo issi issi ogeti awugeetee? Ha huuphe yohuwan, cimati banttanaara oottiya hara cimata bonchchiyoogaa waati bessana danddayiyaakko nuuni pilggana. Kaallidi, nuuni ubbay aqo oyqqibeenna ishanttanne michchontta bonchchiyoogaa waati bessana danddayiyaakko xannaˈana. Qassi wurssettan, nu qaalaa loyttidi haasayennaageeta bonchchiyoogaa nuuni waati bessana danddayiyaakko tamaarana.

4. Cimati ubbay oosuwan peeshshana koshshiyo, Roome 12:10n PHawuloosi zorido zoree aybee?

⁴ Gubaaˈiyan deˈiya ubba cimati Yihoowa geeshsha ayyaanan sunttettidosona. SHin eta ubbawu dumma dumma imotay deˈees. (1 Qor. 12:17, 18) Amaridaageeti mati cima gidido gishshawu, oosuwaa hara cimatuugaa keena meezetennan aggana danddayoosona. Harati qassi cimatettaa woy payyatettaa gaasuwan darobaa oottana danddayokkona. SHin issi cimay hara ay cimanne qoppidi, “Neeni tana koshshakka” gaana bessenna. PHawuloosi Roome 12:10n zoridobaa cimati ubbay oosuwan peeshshana koshshees.—Nabbaba.

5. Cimati hara cimata bonchchiyoogaa waati bessiyoonaa, qassi eti yaatiyoogee keehi koshshiyoy aybissee?

⁵ Cimati hara cimati haasayiyo wode loytti ezggiyoogan eta bonchchiyoogaa bessoosona. Cimati issi gita allaalliyaa tobbanawu shiiqiyo wode yaatiyoogee keehi koshshiyaaba. Aybissi? Xiqimitaa 1, 1988 Wochiyo Keelay (Inggilizettuwaa) hagaadan gees: “Issi hanotan ay oottanaakko woy keehi koshshiya issiban ay kuuyanaakko maaddiya maaraa Geeshsha Maxaafaappe yootana mala gubaaˈiyaa cimatu giddoppe issoy qoppanaadan Kiristtoosi geeshsha ayyaanaa baggaara kaalettana danddayiyoogaa cimati akeekana.” (Oos. 15:6-15) Gubaaˈiyan deˈiya issi cima xallaa gidennan, ubba cimata geeshshaa ayyaanay maaddees.

6. Cimati hashetidi issippe oottanawu maaddiyaabay aybee, qassi eti hegaadan oottiyo wode gubaaˈee waani goˈettii?

⁶ Hara cimata bochchiya issi cimay cimatu shiiquwan ubbatoo koyro haasayanawu malenna. I haasayaa darissenna; qassi I ba qofay ubbatoo likke giidi qoppenna. SHin, I qoppidobaa bonchchuwan yootees. I harati yootiyo qofaa loytti ezggees. Ubbappe aaruwan, I Geeshsha Maxaafan deˈiya zoriyaa yootanawunne ‘ammanettida wozannaama ashkkaray’ immiyo kaaletuwaa kaallanawu koyees. (Maa. 24:45-47) Cimati issi allaalliyaa haasayiiddi issoy issuwaa siiqiyoogaanne bonchchiyoogaa bessiyo wode, Xoossaa ayyaanay etaara gidana; qassi he ayyaanay gubaaˈiyaa minttettiyaabaa kuuyanaadan eta kaalettana.—Yaaq. 3:17, 18.

7. Aqo oyqqibeennaageeta Yesuusi waati xeellidee?

⁷ Ha wodiyan gubaaˈiyan deˈiya amaridaageeti aqo oyqqidaageetanne naati deˈiyoogeeta. SHin, aqo oyqqibeenna daro ishanttinne michchonttikka gubaaˈiyan deˈoosona. Aqo oyqqibeennaageeta nuuni waati xeellana koshshii? Yesuusi aqo oyqqibeennaageeta waati xeellidaakko beˈa. Yesuusi saˈan haggaaziyo wode aqo oyqqibeenna. I aqo oyqqennan deˈidi kumetta wozanan ba oosuwaa wudidi oottiis. Aqo oyqqiyoogee woy oyqqennan aggiyoogee issi Kiristtaaniyaappe koyettiyaaba giidi Yesuusi mule tamaarissibeenna. SHin, amarida Kiristtaaneti aqo oyqqennan deˈanawu dooriyoogaa Yesuusi yootiis. (Maa. 19:11, 12) Yesuusi aqo oyqqibeennaageeta bonchchiis. I aqo oyqqibeennaageeti haratuppe guuxxiyaabadan woy etawu issibay pacciyaabadan qoppibeenna.

8. Koyro Qoronttoosa 7:7-9y yootiyoogaadan, PHawuloosi Kiristtaaneti qoppanaadan minttettidobay aybee?

⁸ Yesuusaagaadan, kiitettida PHawuloosi haggaaziyo wode aqo oyqqennan deˈiis. PHawuloosi issi Kiristtaanee aqo oyqqiyoogee bala giidi mule tamaarissibeenna. I hegee issi uri bawu kuuyiyooba gidiyoogaa akeekiis. Gidikkokka, Kiristtaaneti aqo oyqqennan Yihoowawu haggaazana danddayiyaakkonne qoppanaadan PHawuloosi minttettiis. (1 Qoronttoosa 7:7-9 nabbaba.) PHawuloosi aqo oyqqibeenna Kiristtaaneti aqo oyqqidaageetuppe laafa giidi qoppibeennaagee qoncce. Aqo oyqqibeenna yelaga Ximootiyoosi Yihoowa haggaazuwan gitabaa oottanaadan I dooriis. * (Pili. 2:19-22) Aqo oyqqiyoogaa woy oyqqennaagaa xallaappe denddidi, issi ishay loytti oottana danddayees woy danddayenna giidi qoppiyoogee bala gidiyoogee qoncce.—1 Qor. 7:32-35, 38.

9. Aqo oyqqiyoogaabaa woy oyqqennan aggiyoogaabaa woygana danddayiyoo?

⁹ Yesuusikka PHawuloosikka Kiristtaaneti aqo oyqqana woy oyqqennan aggana bessees giidi tamaarissibookkona. Yaatin, aqo oyqqiyoogaa woy oyqqennan aggiyoogaa woygana danddayiyoo? Xiqimitaa 1, 2012n kiyida Wochiyo Keelay (Amaarattuwaa) he oyshawu loˈˈo zaaruwaa yootees. Hagaadan gees: “Naaˈˈaykka, [aqo oyqqiyoogeenne oyqqennan aggiyoogee] Xoossay immido imota gaana danddayoos. . . . Aqo oyqqennan deˈiyoogee yeellatanaadan woy azzananaadan oottiyaabadan Yihooway xeellenna.” Hegaa gishshawu, nuuni gubaaˈiyan deˈiya aqo oyqqibeenna ishanttanne michchontta bonchchana bessees.

10. Aqo oyqqibeenna ishanttanne michchontta bonchchiyoogaa waati bessana danddayiyoo?

 ¹⁰ Nuuni aqo oyqqibeenna ishanttussinne michchonttussi siyettiyaabaa bonchchiyoogaa waati bessana danddayiyoo? Ishanttinne michchontti dumma dumma gaasuwan aqo oyqqennan deˈiyoogaa nuuni hassayana koshshees. Leemisuwawu, aqo oyqqibeenna issi issi Kiristtaaneti aqo oyqqennan deˈanawu halchchidosona. Aqo oyqqibeenna harati qassi aqo oyqqanawu koyikkonne, banttawu haniya ura demmibookkona. Harati qassi eta aqo laggeti hayqqidoogeeta gidana danddayoosona. Gaasoy ayba gidikkonne, Kiristtaane ishay woy michchiyaa aqo oyqqibeennay aybissakko woy eti aqo lagge demmanaadan maaddanawu gubaaˈiyan deˈiyaageeti oychchiyoogee bessiyaabee? Hegaadan maaddanaadan aqo oyqqibeenna issi issi Kiristtaaneti oychchana danddayiyoogee qoncce. SHin, eti maaduwaa oychchennan, aqo lagge demmanaadan maaddanawu eta oychchiyoogee aqo oyqqibeenna ishawu woy michcheeyyo aybi siyettanaadan oottana danddayii? (1 Tas. 4:11; 1 Xim. 5:13) Aqo oyqqibeenna ammanettida ishanttinne michchontti yootido qofaa ane beˈoos.

11-12. Nuuni aqo oyqqibeennaageeti azzananaadan waati oottana danddayiyoo?

¹¹ Woradaa xomoosiyaanne ba oosuwaa loytti oottiya, aqo oyqqibeenna ishay aqo oyqqennan deˈiyoogee daro goˈˈaa demissees giidi qoppees. SHin, ishanttinne michchontti maaddanawu giidi, “Neeni machchabeennay aybissee?” giidi A oychchiyoogee azzanttiyoogaa yootiis. Macara biiruwan oottiya aqo oyqqibeenna issi ishay hagaadan giis: “Issi issitoo, ishanttinne michchontti aqo oyqqibeennaageetussi qarettana koshshees giidi qoppiyoogaa taani akeekaas.” Hegee aqo oyqqennan aggiyoogee imota gidennan, meto milatanaadan oottees.

¹² Beeteelen haggaaziya aqo oyqqabeenna issi michchiyaa hagaadan gaasu: “Issi issi ishanttinne michchontti aqo oyqqibeenna ubbati aqo lagge koyoosona woy eti ubbay haratuura shiiqiyo wode ubban aqo lagge demmanawu maaddiyaabadan xeelloosona giidi qoppoosona. Issitoo taani Beeteele oosuwawu hara biitti biido wode, gubaaˈe shiiqoy deˈiyo omarssi yaa gakkaas. Taani I matan shemppido michchiyaa layttan ta lagge gidida naaˈˈu ishantti gubaaˈiyan deˈiyoogaa tawu yootaasu. Taani aqo lagge demmanaadan maaddanawu A malennaagaa tawu minttada A yootaasu. SHin SHiiquwaa Addaraashaa gelin sohuwaara A taani he naaˈˈu ishanttuura gayttanaadan eti deˈiyoosaa tana efaasu. Hegee tanakka he naaˈˈu ishanttakka keehi yeellayiyaaba gidiyoogee qoncce.”

13. Aqo oyqqabeenna issi michchiyo minttettida hanotati awugeetee?

¹³ Beeteelen oottiya hara michchiyaa, “Aqo oyqqibeennanne yuushshi qoppiya, qonccebaa halchchiya, harata maaddanawu koyiyaanne ufayttiya daro layttawu haggaazida aqinyeta taani erays. Eti gubaaˈiyaa keehi maaddoosona” yaagasu. Aqo oyqqennan deˈiyoogaa eti xeelliyo ogee loˈˈo. Eti aqo oyqqibeenna gishshawu haratuppe aadhdhoos giidi qoppokkona woy aqo laggeenne naati baynna gishshawu ufayttana danddayokko giidi qoppokkona. Ubbay asay issoy issuwaa bonchchiyoonne siiqiyo gubaaˈiyan deˈiyoogee ufayssiyoy hegaassa. Ishanttinne michchontti intte aqo oyqqibeenna gishshawu intteyyo qarettennaagaa woy inttena qanaatennaagaa, inttena xaasayi xeellennaagaa woy intte hanotay etaagaappe kehiyaabadan qoppennaagaa intte ereeta. Qassi eti inttena siiqiyoogaa ereeta.

14. Aqo oyqqibeennaageeta bonchchiyoogaa waati bessana danddayiyoo?

¹⁴ Aqo oyqqibeenna ishanttussinne michchonttussi eti aqo oyqqibeenna gishshawu etawu qarettiyoogaana gidennan, eta loˈˈo eeshshaa gishshawu eta bonchchikko, eti  nashshana. Etawu qarettiyoogaappe eti ammanettidi deˈido gishshawu, nuuni eta bonchchana bessees. Yaatikko, aqo oyqqibeenna ishanttinne michchontti nuuni eta, “Neeni tana koshshakka” giyoobadan mule qoppokkona. (1 Qor. 12:21) SHin, nuuni eta bonchchiyoogaanne eti gubaaˈiyan deˈiyo gishshawu ufayttiyoogaa eti akeekana.

15. Kaseegaappe aaruwan haggaazanawu issoti issoti laammido issi issibay aybee?

¹⁵ Mata wodeppe haa simmin, aassiyaageetuppe daroti kaseegaappe aaruwan haggaazanawu hara qaalaa tamaaranawu halchchidosona. Yaatanawu, eti bantta deˈuwan issi issibaa laammana koshshiis. He ishanttinne michchontti aassiyaageeti keehi koshshiyoosan asay hara qaalaa haasayiyo gubaaˈiyan haggaazanawu bantta qaalaa goˈettiya gubaaˈiyaa aggidi boosona. (Oos. 16:9) Hegee issi uri Yihoowawu kaseegaappe aaruwan haggaazanawu bawu kuuyiyooba. Eti he ooratta qaalaa loytti haasayana gakkanaashin daro layttay aadhdhikkonne, eti gubaaˈiyaa daro ogiyan maaddoosona. Eta loˈˈo eeshshaynne eta deˈuwan hanidabay gubaaˈiyan deˈiya ishanttanne michchontta minttettees. Bantta goˈˈaa aggi bayiya he ishanttanne michchontta bonchchoos.

16. Issi ishay gubaaˈe cima woy gubaaˈiyawu oottiyaagaa gidanaakkonne shaakki eranaadan oottiyaabay aybee?

¹⁶ Issi ishay gubaaˈee goˈettiyo qaalaa loytti haasayenna gishsha xallawu I gubaaˈe cima woy gubaaˈiyawu oottiyaagaa gidennaadan Gubaaˈe cimati kuuyana bessenna. Cimati issi ishay gubaaˈee goˈettiyo qaalaa ay keena loytti haasayiyaakko qoppidi gidennan, cimatinne gubaaˈiyawu oottiyaageeti ay mala gidana bessiyaakko Geeshsha Maxaafay yootiyooban he ishaa hanotaa yiggana.—1 Xim. 3:1-10, 12, 13; Tii. 1:5-9.

17. So asay hara biitti biyo wode yelidaageeti ay kuuyana koshshii?

¹⁷ Kiristtaane gidida amarida so asay bantta biittan merettida metuwaa woy oosuwaa gaasuwan hara biitti boosona. Hegaa gishshawu, eta naati haˈˈi tamaariyoy eti biido biittaa qaalaana gidana danddayees. Yelidaageetikka oosuwaa demmanawu he qaalaa tamaariyoogee koshshana danddayees. Eti deˈiyoosan eta qaalaa goˈettiya gubaaˈee woy citay deˈikko shin? So asay shiiqana koshshiya gubaaˈee awugee? Eti he biittaa qaalaa haasayiyo gubaaˈiyan shiiqana koshshiiyye bantta biittaa qaalaa haasayiyo gubaaˈiyan shiiqana koshshii?

18. Galaatiyaa 6:5y yootiyoogaadan, so asawu huuphe gididaageeti kuuyiyoobaa nuuni bonchchiyoogaa waati bessana danddayiyoo?

¹⁸ So asawu huuphe gidida uri ba so asay ay gubaaˈiyan shiiqanaakko kuuyana koshshees. He izaawu allaallee gidiyo gishshawu, ba so asawu koshshiya loˈˈobay aybakko I kuuyana bessees. (Galaatiyaa 6:5 nabbaba.) So asawu huuphe gididaagee kuuyidobaa nuuni bonchchana koshshees. I kuuyidobay ayba gidikkonne, he so asaa mokki ekkiyoogaaninne siiqiyoogan eti kuuyidobaa maayettiyoogaa bessoos.—Roo. 15:7.

19. So asawu huuphe gididaageeti loytti qoppananne woossana koshshiyaabay aybee?

 ¹⁹ Amarida so asati azinaynne machchiyaa haasayiyo qaalaa goˈettiya gubaaˈiyan haggaazana danddayoosona; shin he qaalaa naati loytti haasayennan aggana danddayoosona. So asay deˈiyo gubaaˈee eti biido biittaa qaalaa haasayiyo heeran deˈikko, hegee naati gubaaˈe shiiquwan tamaariyoobaa loytti akeekennaadaaninne Yihoowakko shiiqennaadan oottana danddayees. Aybissi? Naati bantta so asay haasayiyo qaalaa gidennan, so asay biido biittaa qaalaa goˈettiyo timirtte keettan tamaariyo gishshataassa. Hegaa malabay merettiyo wode, so asawu huuphe gididaageeti bantta naati kaseegaappe aaruwan Yihoowakkonne A asaakko shiiqanawu waatana koshshiyaakko kuuyanawu maaddanaadan aadhdhida eratettaa demmanawu loytti qoppananne woossana bessees. Yelidaageeti naata bantta qaalaa loytti tamaarissana woy bantta naati loytti akeekiyo qaalaa goˈettiyo gubaaˈiyaa baana koshshees. So asawu huuphe gididaagee kuuyiyoobay ayba gidikkonne, I haggaazanawu doorido gubaaˈee anne A so asaa bonchchananne siiqana koshshees.

20. Oorattaa qaalaa tamaariiddi deˈiya ishanttanne michchontta bonchchiyoogaa waati bessana danddayiyoo?

²⁰ Nuuni beˈido gaasotuppe denddidaagan, ooratta qaalaa tamaaranawu baaxetiya ishanttinne michchontti daro gubaaˈetun deˈoosona. Eti qoppiyoobaa yootanawu metootana danddayoosona. SHin, nuuni eti ooratta qaalaa haasayiyo oge xallaa qoppana xayikko, eti Yihoowa siiqiyoogaanne awu haggaazanawu koyiyoogaa akeekana. Nuuni he loˈˈo eeshshata akeekiyo wode, he ishanttanne michchontta wozanappe siiqananne bonchchana. Nuuni eti nu qaalaa loytti haasayenna gishsha xallawu ‘intte nuussi koshshekketa’ gookko.

21-22. Nuussi deˈiya gita maatay aybee?

²¹ Gubaaˈiyan gitabaa oottiyo maataa nuuyyo ubbawu Yihooway immido gishshawu keehi galatoos. Nuuni attuma gidin macca gidin, aqo oyqqidaageeta gidin oyqqibeenaageeta gidin, cima gidin yelaga gidin woy issi qaalaa loytti haasayiyaageeta gidin loytti haasayenaageta gidin, nuuni ubbay Yihoowayyonne nu ishanttuyyo alˈˈo.—Roo. 12:4, 5; Qol. 3:10, 11.

²² PHawuloosi asaa bollaa goˈettidi maaddiya darobaa tamaarissido leemisuwaappe nuuni tamaaridobaa ubbatoo oosuwan peeshshiyaageeta gidoos. Hegee nuuni nu ishanttanne michchontta minttettanawu ay oottana danddayiyaakko akeekanaadan nuna maaddana. Qassi hegee nuuni eta ubbatoo siiqanaadaaninne bonchchanaadan maaddana.