Neeni “Aminˈˈi” Giyoogaa Yihooway Nashshees
YIHOOWAY nu goynuwaa nashshees. I ba ashkkarati haasayiyoobaa ‘ezggidi siyees;’ qassi ay keena guuttaba gidikkonne, nuuni A sabbanawu oottiyo ubbabaa I nashshees. (Mil. 3:16) Leemisuwawu, nuuni geella darotoo giyo issi qaalaa qoppa. He qaalay “aminˈˈi” giyoogaa. Yihooway ha qaalaakka nashshii? Ee, nashshees! Aybissakko akeekanawu, “aminˈˈi” giyoogee woygiyoogaakko, qassi Geeshsha Maxaafan he qaalay gelido ogiyaa ane pilggoos.
“ASAI UBBAI, ‘AMIN77I!’ YAAGO
“Aminˈˈi” giyoogee “hano,” woy “gido” giyoogaa. He qaalay “ammanettiyaagaa gida,” “tumanchcha gida” giya birshshettay deˈiyo Ibraawetto qaalaappe yiis. He qaalay issi issitoo pirddaara gayttidaban geliis. Issi uri caaqqi simmidi, I giidobay tuma gidiyoogaa qonccissanawunne hegee kaalettiyoobaa ekkanawu “amin77i” yaagees. (Qoo. 5:22) I asaa sinttan “amin77i” giyo wode, gelido qaalaa naaganawu hegee awu mino gaaso gidees.—Nah. 5:13.
“Amin77i” giyo qaalaa goˈˈawu keehi loˈˈo leemisoy Zaarettido Wogaa shemppo 27n deˈiyaagaa. Israaˈeelati Hidootaa Biittaa geli simmidi, Higgiyaa zaarettiyo wode siyanawu Eebaala Deriyaappenne Gariizaana Deriyaappe gidduwan shiiqidosona. Eti yootiyoobaa siyana xallawu gidennan, eti Higgiyaa ekkidoogaa yootanawu yan shiiqidosona. Eti yaatidoy, azazettennan aggiyo wode gakkiyaabay nabbabettido wode “amin77i!” giyoogaana. (Zaa. 27:15-26) Daro shaˈan qoodettiya attumaasay, maccaasaynne naati bantta qaalaa xoqqu oottidi zaariyoogaa qoppa! (Yaas. 8:30-35) Eti he gallassi haasayido qaalata mule dogibeennaagee qoncce. Qassi eti bantta qaalaa naagidosona; ayssi giikko, Geeshsha Maxaafay hagaadan gees: “Yaasu paxa de7ido wode ubbaaninneYaasuppe simmin de7idi, Xoossai Israa7eelatussi oottido ooso ubbaa erida cimatu wode ubban Israa7eelati GODAASSI goinnidosona.”—Yaas. 24:31.
Yesuusikka odettidabay tuma gidiyoogaa qonccissanawu “aminˈˈi” giis; shin I yaagidoy dumma ogiyaana. Yesuusi odidobaassi zaaranaassa gidennan, tumabaa yootiyoogaa erissanawu ‘aminˈˈi’ yaagiis (Leemisuwawu, Maatiyoosa 5:18n he qaalay Wolayttattuwan “tumaa” geetettidi birshshettiis). Issi issitoo, “aminˈˈi aminˈˈi” giyoogan he qaalaa I zaari zaaridi odiis. (Maa. 5:18; Yoh. 1:51) I yaatiyoogan, I yootiyoobay tuma gididoogaa hegaa siyiyaageeti ammananaadan oottiis. Yesuusi Xoossay qaalaa gelidobaa ubbaa polanaadan sunttettiday A gidiyo gishshawu, hegaadan ammanettidi haasayiis.—2 Qor. 1:20; Ajj. 3:14.
“ASAI UBBAI, ‘AMIN77I’ GIIDI, GODAA GALATIIS”
Israaˈeelatikka Yihoowa sabbiyoonne woossiyo wode “aminˈˈi” giidosona. (Nah. 8:6; Maz. 41:13) Woosaa siyiyaageeti woosay wuriyo wode “aminˈˈi” giyoogan odettidabaa maayiyoogaa bessoosona. Yaatiyoogan, shiiqida ubbay issippe goynnoosona, qassi hegaadan Yihoowawu goynniyoogan ufayttidosona. Kawuwaa Daawiti Yihoowa TaabootaaYerusalaameppe ehiido wode hanidabay hegaa. Hegaappe simmin bonchchido baalan, 1 Hanidabaa Odiya 16:8-36n deˈiya, mazamure meran giigida woosaa I wozanappe woossiis. SHiiqidaageeta he qaalay denttettin, “Asai ubbai, ‘Amin77i’ giidi, GODAA galatiis.” Ee, eti issippe Yihoowawu goynniyoogan ufayttidosona.
Koyro xeetu layttan deˈida Kiristtaanetikka Yihoowa sabbiiddi “aminˈˈi” giidosona. Geeshsha Maxaafaa xaafidaageetikka bantta dabddaabbiyan he qaalaa darotoo xaafidosona. (Roo. 1:25; 16:27; 1 PHe. 4:11) Saluwan deˈiya meretati Yihoowa bonchchanawu, “Amin77i. Xoossaa galatai gakko” giyoogaa Ajjuutaa maxaafaykka yootees. (Ajj. 19:1, 4) Beni Kiristtaaneti darotoo bantta shiiqotun woosaappe simmin “aminˈˈi” goosona. (1 Qor. 14:16) SHin, he qaalay aybakko eti qoppennan coo zaari zaaidi giyooba gidenna. Eti wozanappe “aminˈˈi” gaanawu woosaa siyananne akeekana koshshees.
NEENI “AMINˈˈI” GAANA KOSHSHIYOY AYBISSEE?
Yihoowa ashkkarati “aminˈˈi” waati giidaakko nuuni tamaari simmidi, woosaa wurssettan hegaadan giyoogee aybissi koshshiyaakko akeekana danddayoos. Nuuni nu buzo woosaa wurssettan “aminˈˈi” giyoogee, nu woosay wozanappe gidiyoogaa bessees. Qassi issi uri daro asaa sinttan woossiyo wode nuuni cenggurssaa sissennankka “aminˈˈi” giyoogee, geetettidabaa maayiyoogaa bessees. Nuuni “aminˈˈi” gaana koshshiyoy aybissakko hara ginata ane beˈoos.
Nuuni minnidinne beegottidi goynnoos. Nuuni woossiyo wode nu giyoobaa xallan gidennan, nu hanotankka Yihoowawu goynnoos. Nuuni “aminˈˈi” giyo wode wozanappe gidanaadan koyiyo gishshawu, hegee nuuni nu qofaa naagidi loytti ezgganaadan nuna maaddees.
Hegee ayyo goynniyaageeta issuwaa oottees. Daro asaa sinttan woossiyo woosay nuuni kumetta gubaaˈee siyiyoobaa loytti ezgganaadan maaddees. (Oos. 1:14; 12:5) Nu ishanttuuranne nu michchonttuura issippe “aminˈˈi” giyo wode, nuuni kaseegaappe aaruwan issuwaa gidoos. Nuuni cenggurssaa sissidi woy sissennan issippe “aminˈˈi” giyo wode, nuuni oychchidobaa Yihooway nuussi oottanaadan nu woosay A denttettana danddayees.
“Aminˈˈi”giyoogee Yihooway sabettanaadan oottees
Nuuni Yihoowa sabboos. Yihooway nuuni awu goynnanawu oottiyo ubbabaa loytti akeekees. (Luq. 21:2, 3) I issibawu nuna denttettidabaanne nu wozanaabaa beˈees. Nuuni shiiquwaa silkkiyan kaallana koshshiyo wodekka, “aminˈˈi” giyoogaa Yihooway xoqqu ootti xeelliyoogaa ammanettana danddayoos. Nuuni “aminˈˈi giyo wode, shiiquwan deˈiyaageetuura issippe Yihoowa sabboos.
Nuuni “aminˈˈi” giyoogaa goˈˈay guutta milatana danddayees, shin hegee goˈˈennaba gidenna. Geeshsha Maxaafaa qofaa yootiya issi Insaykilopidee Xoossaa ashkkarati “ha issi qaalaa goˈettiyoogan, ammanettiyoogaa, loytti nashshiyoogaa, qassi bantta wozanan deˈiya hidootaabaa” yootana danddayiyoogaa qonccissees. Nuuni “aminˈˈi” giyo wode ubban Yihooway ufayttanaadan amottoos.—Maz. 19:14.
