MANDDARANAWU PHawuloosa wode dariya baggi markkabee baawa. Markkabiyan manddaranawu, manddariyaageeti eti biyo sohuwaa biyanne eta efaanawu eeno giya zalˈˈiyaa (caanaa) markkabiyaa harati eriyaakkonne oychchana koshshees. (Oos. 21:2, 3) Issi markkabee manddariya uri baanawu koyiyo sohuwaa baana xayikkonne, he markkabee biiddi dumma dumma sohuwan eqqiyo wode, manddariya uri ba biyoosaa heeri efaana danddayiya hara markkabiyaa koyana danddayees.—Oos. 27:1-6.

Abbaa bolli asay laytta giddon amarida wodetun manddarees; qassi markkabeti baanawu kiyida prograamee baawa. Markkabiyaa laaggiyaageeti carkkoy injjetenna gishsha xallaassa gidennan, eti mala ammanuwaa ammaniyo gishshawukka haganaa sugoosona. Leemisuwawu, eti qooraasee waassiyo wode woy abbaa doonan meqqida markkabiyaa beˈiyo wode malana danddayoosona. Markkabiyaa laaggiyaageeti carkkoy loˈˈo gidiyo wodiyaa goˈettiyo gishshawu, carkkoy mankkatiyo wode, bantta eqqidosaappe boosona. Manddariya asi bana efaana markkabiyaa demmiyo wode, markkabee eqqiyo sohuwaa ba borssaa ekki biidi markkabee biyo wodee odettana gakkanaashin naagees.

Liˈanel Kasan giyo taarikiyaa eranchchay hagaadan giis: “Roome kataman asay manddaranawu markkabiyaa metootennan demmiyo gishshawu, manddariyaageeti markkabiyaa banttawu koyana koshshenna. He kataman markkabee eqqiyo sohoy Tibere SHaafaa matan deˈees. Ostiya giyo katamaa matan gita dabaabaa yuushuwan biiroti deˈoosona. Ha biirotuppe dariya baggay, dumma dumma katamatun deˈiya markkabiyaa godatuba: Narbone [ha wodiyan Paransaaye] katamaa markkabiyaa godatussi issoy deˈees, Kartteeje [ha wodiyan Tuniziyaa] katamaa markkabiyaa godatussi haray deˈees, . . . haratuugeekka hegaa mala. Markkabiyan manddaranawu koyiya ooninne bawu matattiya katamatun deˈiya biirota biidi oychchana koshshees.”

Markkabiyan biyoogee manddariyaageetussi daro wodiyaa wurssenna; shin qohiyaabaykka deˈees. PHawuloosi misoonaawe oosuwawu biyo wode darotoo markkabee meˈˈiis.—2 Qor. 11:25.