Naˈi yeletti simmin, laamettida hanotaara maayiyaaba koyro issi saatiyan oottiyoogee keehi koshshiyaaba. Aybissi? Aayoti biron yelettida bantta naata ha keehi koshshiya wodiyan siiqiyoogee naatu dichchawu keehi maaddiyo gishshataassa. *

Aayyiyaa biron yelido ba naˈaassi qarettanaadan oottiyaabi aybee? Janet Krensho giyo eranchchiyaa okstosin giyo hormonee dariyoogee “aayyiyaa biron yelido naˈaa bochchiyo wode, xeelliyo wodenne xanttiyo wode aayo gidiyoogee iyyo siyettanaadan” oottiyoogaa Ze Jornal of Perinetal Ejukeshin giyo xuufiyan qonccissaasu. He wode xiiˈiyaappe kiyiya hara hormonee “aayyiyaa gacino naˈaassi koshshiyaabaa kunttanaadan maaddees,” qassi A ba gacino naˈay koyiyoobaa loytta akeekanaadan oottees. Hegee keehi maaddiyoy aybissee?

Nuna Medhdhida, siiqiya Xoossaa Yihooway aayyiyaanne gacino naˈay keehi siiqettanaadan oottidi medhdhiis. * Kawuwaa Daawiti Xoossay A ‘aayee uluwaappe’ yeletissido gishshawunne I ba aayee siiquwan woppu gaanaadan oottido gishshawu A sabbiis. I, “Taani yelettoosappe doommada nenan diccaas; ta aayee uluwaappe doommadakka, neeni ta Xoossaa” yaagidi woossiis.—Mazamure 22:9, 10.

HAGAA QOPPA: Aayyiyaa ba gacino naˈaa siiquwan xeellanaadaaninne ayyo koshshiyaabaa kunttanaadan Xoossay hegaa mala muttumurettidabaa medhdhikko, Xoossay nuussi ‘ba naatussi’ qoppees giyoogee bessiyaaba gidennee?—Oosuwaa 17:29.

Ooppenne aaruwan Medhdhidaagaa loytti eriya Yesuus Kiristtoosi hagaadan tamaarissiis: “Naa77u siine kafoti bakkannan baizettokkonaayye? Intte Aawai gaana xayikko, he siine kafotuppe issinniyaakka sa7an wodhdhukku. SHin harai atto, intte huuphiyan de7iya binnaana ubbaikka qoodan de7ees. Simmi yayyoppite; daro siine kafotuppe intte aadhdheeta.”—Maatiyoosa 10:29-31.

Nuuni beˈiyo guutta kafotuppe issoy saˈan wodhdhiyo wode loytti xeelliyoogee attoshin, eta ubbaa akeekiyaageeti nu giddon guutta. SHin saluwan deˈiya nu Aaway eta ubbaa loytti xeellees! Qassi kafoti, haray atto daro kafotikka ayyo issi urappe mule aadhdhokkona. Yaatiyo gishshawu, hegaappe tamaariyoobay qoncce: Xoossay nena loytti xeellenna gaada neeni ‘yayyana’ koshshenna. Ubbakka, I neessi keehi qoppees!

 Geeshsha Maxaafay nuna minttettiyoobaa

• “GODAA aifeti ubbasaa xeelloosona; iitaa oottiyaageetakka lo77uwaa oottiyaageetakka be7oosona.”—LEEMISO 15:3.

• “GODAA aifee xillotukko xeellees; qassi i ubba wode eta waasuwaa ezggees.”—MAZAMURE 34:15.

• “Ta metuwaa neeni be7ido gishshaunne ta tuggaa neeni erido gishshau, taani aggenna ne siiquwan ufaittananne ufaissau poocu gaana.”—MAZAMURE 31:7.

Xoossay nuuyyo loˈˈobaa qoppiyoogaanne siiquwan nuna xeelliyoogaa eriyoogee nu deˈuwan nuna maaddana danddayii? Inggilize biittan deˈiya Haanna * kaallada yootiyoogaadan hegee maaddana danddayiyoogee qoncce:

“Yihooway tana siiqennabadaaninne I ta woosaa zaaribeennabadan darotoo tawu siyettiis. Hegee taayyo ammanoy paaccido gishshataassa gaada taani qoppaas. Taani qaxxayettiyoy woy shenehoo geetettiyoy pattenna asa gidiyo gishshataassa gaada qoppaas. Xoossay taayyo qoppennabadan tawu siyettiis.”

SHin, Haanna Yihooway O loytti akeekiyoogaanne siiqiyoogaa siriyoogaa aggaasu. Iyyo siyettiyaabay laamettanaadan oottidabay aybee? A hagaadan gaasu: “Hegee loddan loddan laamettiis. Daro layttappe kase Yesuusa wozuwaa yarshshuwaabaa Geeshsha Maxaafaappe haasayido haasayaa taani hassayays; qassi hegee Yihooway tana siiqiyoogaa loytta ammananaadan keehi maaddiis. Qassi ta woosaa Yihooway zaariyo wode, tana I siiqiyoogaa akeekiyo gishshawu taani darotoo yeekkays. Hegaa bollikka, Geeshsha Maxaafaa xannaˈiyoogeenne gubaaˈe shiiqota shiiqiyoogee taani Yihoowabaa, A eeshshaabaanne I nuussi waati qoppiyaakko loyttada tamaaranaadan oottiis. Yihooway nuna ubbaa maaddiyoogaanne siiqiyoogaa, qassi nuussi huuphiyan huuphiyan koshshiyaabaa kunttanawu koyiyoogaa taani haˈˈi loytta akeekaas.”

Haanna yootidobay minttettiyaaba. SHin Xoossay neessi siyettiyaabaa akeekiyoogaanne hassayiyoogaa waana ammanettana danddayay? Kaalliya huuphe yohoy ha oyshaa zaaruwaa qonccissees.