ASAY deꞌuwaanne hayquwaa xeelliyaagan keehi darobaanne dumma dummabaa gees. Issoti issoti hayqqi simmidi, haraba gidana woy hara heeran deꞌana giidi qoppoosona. Harati qassi haranttuwaa deꞌanawu zaaretti yelettana giidi qoppoosona. Hayqoy ubbabawu wurssetta giidi qoppiyaageetikka deꞌoosona.

Ha allaalliyaara gayttidaagan, neeni diccido heeraadan woy wogaadan neessikka dumma qofay deꞌana danddayees. Asi hayqqidi waaniyaakko asaa qofay issuwaagee haraagaappe keehi dummatiyo gishshawu, ha metiya oyshaa nuussi zaarana danddayiya uri woy hegawu maaddiyaabi deꞌanee?

Haymaanootiyaa kaalettiyaageeti asa shemppoy hayqqenna giidi daro layttawu tamaarissidosona. Waannatiya haymaanootiyaa, hegeekka Kiristtaane, Hindu, Ayhuda, Isilaama, qassi hara haymaanootiyaa kaalliyaageeti asa shemppoy hayqqenna woykko ashoy hayqqiyo wode asaappe kiyidi saluwaa biyaabi deꞌees giidi ammanoosona. Budistteti qassi, asi hayquwaappe simmin darotoo zaaretti zaaretti yelettidi wurssettan Nirvana giyo, ufayssan deꞌiyoosaa gakkees goosona.

Hegaa mala timirttiyaappe denddidaagan, alamiyan deꞌiya daro asay hayqoy hara alamiyawu pinttiyaabadan ammanees. Daroti hayqoy issi asa deꞌuwan keehi koshshiyaaba, qassi hayqqiyoogee Xoossaa shene giidi qoppoosona. SHin hegaa xeelliyaagan Geeshsha Maxaafay woygii? Hayyanaa kaalliya huuphe yohuwaa nabbaba. Hegaa zaaruwan neeni garamettana.