Nu soo asay Paransaayen huuphessa baggaara arshshokko baqqidi deꞌiya Telankore giyo heeran deꞌiis. Ta aaway Paransaaye asa, ta aayyiyaa qassi Xaaliyaa biitta asa. Tawu hosppun laytta gidiyo wode, Xaaliyan Rooma katamaappe gaxattiya heeran hiyyeesa asay deꞌiyoosan deꞌiyoogaa doommida. Yan so asaa deꞌoy keehi deexo. Ta aawaanne aayyiyo miishshay metiyo gishshawu eti darotoo keehi walaqettoosona.

Tawu 15 laytta gidiyo wode, ta aayyiyaa taani sooppe kiyada hara naatuura laggetanaadan yootaasu. Hegaappe denddidaagan, daro wodiyaa harasan deꞌiyoogaa doommaas. Sohuwaara iita naatuura zuppetiyoogaa doommaas. Issi gallassi, loꞌꞌo milatiya issi bitanee taakko yiis. I taayyo jallissiya xaliyaa immiis; taani guutta naꞌa gidennaagaa bessanawu koyido gishshawu hegaa ekkaas. Sohuwaara, jallissiya xaliyaa goꞌettiyoogaanne shori baynnabaa oottiyoogaa doommaas. Darotoo, asay tanaara wolqqan zinꞌꞌiis. Deꞌoy hada gaada qoppido gishshawu ta deꞌinkka maaddenna hayqqinkka qohenna gaada qoppaas. Tawu qoppiya ooninne baynnabadan tawu siyettiis. Tawu 16 laytta gidiyo wode, issi xaaramuse kumetta wuskkiyaa giyo ushshaa uyada, abban gelada hayqqanawu malaas. Hegaa gaasuwan, heezzu gallassaa tana erennan takkaas.

Taani deꞌuwaa xoqqu oottada xeelliyoogaa doommaas; shin makkalanchanne iitabaa oottiyaagaa gidaas. Asay tanaara asho gaytotettaa polanaadan shoobbada, eta jallettada eta son deꞌiya alꞌꞌo miishshaa wuuqqays. Makkalabaa oottiya erettida citatussi Xaaliyaa biittan jallissiyaabaa issisaappe harasaa efiyay tana. Poliseti darotoo tana oyqqanawu koyoosona. Ta deꞌoy keehi moorettiisinne shoraa xayiis. Gidikkokka, ta deꞌuwawu halchettidabi deꞌana gaada qoppaas. Taani issi layttawukkonne saruwan ufayttada deꞌanaadan maaddana mala Xoossaa woossaas.

Tawu layttay 24 gidiyo wode, Inggilize baanawu qofaa qachaas. Taani jallissiyaabaa bayzziya asaara oottiyo gishshawu ta shemppuwawu yayyaas. SHin kasetada ta aayyiyo beꞌanawu baas; baada  Anunisiyato Lagura giyo bitanee iira Geeshsha Maxaafaabaa haasayiyoogaa beꞌada keehi garamettaas. a I kase makkalabaa oottiya asa gidiyoogaa eriyo gishshawu, nu soo biidoy aybissakko oychaas. I Yihoowa Markka gidanawu ba deꞌuwan oottido gitabaa yootiis; qassi taani Inggilize biyo wode Yihoowa Markkatuura gayttanaadan hadara giis. Taanikka hegaadan oottanawu qaalaa gelaas. SHin, taani yaa gakkosaara kaseegaa mala iita deꞌuwaa deꞌiyoogaa doommaas.

Issi gallassi, issi Yihoowa Markkay Londdene kataman Wochiyo Keelaanne Beegottite! maxeetiyaa asawu immishin beꞌaas. Kase Anunisiyatoyyo qaalaa gelidobaa hassayada, tana Geeshsha Maxaafaa xannaꞌissanaadan he Yihoowa Markkaa oychaas.

Taani Geeshsha Maxaafaappe tamaaridoban keehi garamettaas. Leemisuwawu, 1 Yohaannisa 1:9y Xoossaa xeelliyaagan giyoobaa beꞌada keehi ufayttaas. Xiqisee hagaadan gees: “Nuuni Xoossau nu nagaraa paaxikko, i nu nagaraa atto gaanaunne nu mooro ooso ubbaappe nuna geeshshanau, ammanttiyaagaanne tumubaa oottiyaagaa.” Taani shori baynna deꞌo deꞌidoogaa gaasuwan keehi carqqattidabadan qoppiyo gishshawu, he xiqisee tana keehi minttettiis. Sohuwaara Yihoowa Markkatuura shiiqanawu Kawotettaa Addaraashaa biyoogaa doommaas. Yihoowa Markkati tana siiquwan mokki ekkidosona. Eti issoy issuwaara keehi siiqettiyoogaa beꞌada, so asaa mala gidida gubaaꞌiyaa yara gidanawu koyaas; hegaa mala siiqoy taani daro wodiyawu amottaydda takkidoba.

Taani jallissiyaabaa goꞌettiyoogaanne shori baynna deꞌo deꞌiyoogaa agganawu darin metootabeykke; shin ta eeshshaa laammanawu keehi metootaas. Asaa bonchananne asawu qoppana koshshiyoogaa akeekaas. Ubba, issi issi iita eeshshaa xoonanawu haꞌꞌikka baaxetays. SHin Yihooway maaddin daroban laamettaas. Geeshsha Maxaafaa xannaꞌiyoogaa doommido usuppun agina giddon xammaqettada Yihoowa Markka gidaas. Hegee hanidoy 1997na.

Xammaqetta simmada, Barbaro giyo, matan Yihoowa Markka gidida yelagiyo machaas. Beni ta laggetuppe issoy taani ay keena laamettidaakko beꞌidi Geeshsha Maxaafaa xannaꞌiyoogaa doommiis. Amarida wodeppe guyyiyan, ikka a michiyaakka Yihoowa Markka gididosona. Qassi layttay 80ppe dariyo, ta aayee aayee michiyaa, Geeshsha Maxaafaa xannaꞌiyoogaa doommada, xammaqettada hayqqaasu.

Haꞌꞌi gubaaꞌe cima gidada oottays; qassi taanne ta machiyaa Londdenen deꞌiya Xaalettuwaa haasayiya asaa maaddanawu kumetta wodiyaa haggaazoos. Issi issitoo, ta kase deꞌuwaa qoppada unꞌꞌettays; shin Barbara tana keehi minttettawusu. Haꞌꞌi ta soo asay taani amottaydda takkidoogaa mala ufayssiyaagaa; qassi kaseesappe koyido siiqiya Aawaa demmaas. Taani saruwan ufayttada issi layttawu deꞌanaadan maaddana mala Xoossaa woossaas; shin i keehi dariya wodiyawu tana hegaadan maaddiis!