XANNAꞌIYO HUUPHE YOHUWA 40
MAZAMURE 30 Ta Aawaa, Ta Xoossaanne Ta Miyyiyaa
Yihooway ‘Wozanay Meqqidoogeeta Pattees’
“Wozanai meqqidoogeeta i pattees; eta mazunttaakka i qachchees.”—MAZ. 147:3.
TAMAARANABAA
Yihooway wozanay meqqidoogeetussi qarettees. Ha huuphe yohoy nuuni unꞌꞌettiyo wode Yihooway nuna waati minttettiyakko, qassi harata minttettanaadan I nuna waati maaddiyakko qonccissees.
1. Yihooway ba ashkkaratu hanotan waanii?
YIHOOWAY ba ashkkaratu bolli gakkiya ubbabaa akeekees. Nu ufayttiyonne azzaniyo wode I beꞌees. (Maz. 37:18) Nuuni unꞌꞌettiyo wodekka ayyo haggaazanawu nuussi danddayettida ubbabaa oottiyogaa beꞌidi I nunan ufayttees! Hegaa bollikka, I nuna maaddanawunne minttettanawu keehi koyees.
2. Yihooway wozanay meqqidoogeeta waatii, qassi I qaretaa bessiyo ogetuppe goꞌettanawu waatana danddayiyoo?
2 Mazamure 147:3y Yihooway wozanay ‘meqqidoogeetu masunttaa’ qachchiyogaa yootees. Ha xiqisee Yihooway unꞌꞌettidaageetussi qarettidi maaddiyogaa qonccissees. Yihooway nuussi qarettiyogaa bessiyo ogetu ubban goꞌettanawu koyikko, nu waatana koshshii? Ane issi leemisuwa beꞌoos. Gooba dottoree qohettida uraa pattanawu darobaa oottana danddayees. Shin qohettida uri paxanawu dottoree yootiyo kaaletuwa loytti kaallana koshshees. Ha huuphe yohuwan Yihooway wozanay meqqidoogeetussi ba Qaalaa baggaara woygidaakko beꞌana, qassi I siiquwan yootido zoriya nuuni waati oosuwan peeshshanaakkokka beꞌana.
YIHOOWAY NUUNI A SINTTAN ALꞌꞌO GIDIYOGAA NUNA HASSAYISSEES
3. Amaridaageeti banttana pattennabadan xeelliyoy aybissee?
3 Ha wodiyan alamiyan daro asay harata siiqennaagee azzanttiyaba; hegaappe denddidaagan eti harata naaqqana danddayoosona, qassi harati banttana pattenna asadan xeellanaadan oottoosona. Heeleno a giyo michchiya hagaadan gaasu: “Tana yelidaageeti mule siiqiya asa gidokkona. Ta aaway meqetta iita, qassi I taani pattenna asa gidiyogaa ubba galla yootees.” Geella issi uri nena keehi naaqqana, ubbatoo nena cayana woy pattenna asadan neeni nena xeellanaadan oottana danddayees. Hanotay hegaadan gidikko, nena ooninne wozanappe siiqennabadan qoppana danddayaasa.
4. Mazamure 34:18n Yihooway nuussi gelido qaalay aybee?
4 Nena harati naaqqikkokka, Yihooway nena siiqiyogaanne xoqqu oottidi xeelliyogaa ammanettana danddayaasa. I “wozanai me77idoogeetussi mataana.” (Mazamure 34:18 nabbaba.) Neeni nena pattenna asadan xeellikko, Yihooway neeyyo deꞌiya loꞌꞌo eeshshata akeekiyogaanne nena baakko ehiidoogaa hassaya. (Yoh. 6:44) I nena xoqqu ootti xeelliyo gishshawu ubbatoo nena maaddanawu giigi uttiis.
5. Harati naaqqiyo asatussi Yesuusi oottidobaappe nuuni ay tamaarana danddayiyoo?
5 Yesuusabaa pilggiyogan Yihoowa qofaa erana danddayoos. Yesuusi ha saꞌan deꞌiyo wode harati naaqqidoogaa gaasuwan banttana pattenna asadan xeelliyageetuyyo kehatettaa bessiis. (Mat. 9:9-12) Issi maccaasiya wolqqaama harggiyappe paxanawu koyada Yesuusa maayuwa bochchido wode I O minttettiisinne I ammanuwa gishshawu O nashshiis. (Mar. 5:25-34) Yesuusi ba Aawaa eeshshaa wottiyobi baynna ogiyan bessiis. (Yoh. 14:9) Yaaniyo gishshawu, Yihooway ne ammanuwanne neeni A siiqiyo siiquwa gujjin, neeyyo deꞌiya loꞌꞌo eeshshata akeekiyogaanne nena xoqqu ootti xeelliyogaa ammanettana danddayaasa.
6. Neeni nena pattenna asadan xeelliyaba gidikko waatana danddayay?
6 Neeni nena ubbatoo pattenna asadan xeelliyaba gidikko waatana danddayay? Yihooway nena xoqqu ootti xeelliyogaa yootiya xiqiseta nabbaba; yaatada wotta dentta qoppa. b (Maz. 94:19) Nena haratuura geeddarssoppa; qassi neeni oottana danddayennabaa qoppoppa. Yihooway neeni danddayiyogaappe aarobaa oottanaadan koyenna. (Maz. 103:13, 14) Issi uri nena qohikko hegee ne mooro gidenna. Yihoowa sinttan oyshettiyay mooranchchatappe attin, qohettidaageeta gidennaagaa hassaya. (1 PHe. 3:12) Naatettan qohoy gakkido Sandra hagaadan gaasu: “Yihoowagaadan taani tana xeellanaadan maaddana mala A ubbatoo woossays.”
7. Nuna kase gakkidabay Yihoowa haggaazuwan nuna waati maaddana danddayii?
7 Yihooway harata maaddanawu nena goꞌettana danddayiyogaa mule siroppa. Sabbakuwa oosuwan aara oottiyo gita maataa I neeyyo immiis. (1 Qor. 3:9) Ne deꞌuwan nena gakkidabay neeni haratuyyo qarettanaadaaninne etawu siyettiyabaa akeekanaadan maaddana danddayees. Neeni eta loytta maaddana danddayaasa. Qommoora ibay odettido Heelena haratuppe maaduwa ekkaasu; qassi haꞌꞌi harata loytta maaddawusu. A hagaadan gaasu: “Taani tana kase pattenna asadan xeellays. Shin Yihooway taani tana siiqiya asi deꞌiyogaa akeekanaadan oottiisinne harata maaddanawu tana goꞌettiis.” Heelena ubba wode aqinye gidada haggaaziyogan ufayttawusu.
YIHOOWAY NUUYYO ATTO GIIDOOGAA NUUNI AMMANETTANAADAN KOYEES
8. Yihooway Isiyaasa 1:18n woygidee?
8 Yihoowa ashkkaratuppe amaridaageeti kase oottido nagaraa gaasuwan haꞌꞌikka unꞌꞌettoosona. Geella eti hegaa haattan muukettanaappe kase woy haattan muuketti simmidi oottennan aggokkona. Shin Yihooway nuna keehi siiqiyo gishshawu nu nagaraa atto gaanaayyo wozuwa giigissidoogaa nuuni mule dogana koshshenna. A imotaa nuuni ekkanaadan I koyiyogee qoncce. Yihooway nuuni aara ‘zoretti’ c simmin nuuyyo muleera atto gaanaagaa qaalaa geliis. (Isiyaasa 1:18 nabbaba.) Siiqiya nu Aawaa Yihooway nuuni kase oottido nagaraa hassayenna gishshawu nuuni A keehi galatoos! Qassi I nuuni oottido loꞌꞌobaa mule dogenna.—Maz. 103:9, 12; Ibr. 6:10.
9. Neeni kasebaa gidennan haꞌꞌi oottaydda deꞌiyobaanne sinttappe oottanabaa qoppanawu baaxetana koshshiyoy aybissee?
9 Neeni kase oottidoban zilꞌꞌettiyaba gidikko, neeni haꞌꞌi oottaydda deꞌiyobaanne sinttappe oottanabaa qoppanawu baaxeta. Kiitettida Phawuloosa taarikiya ane beꞌoos. I Kiristtaanetu bolli wolqqaama yedetaa gattidoogan zilꞌꞌettikkokka Yihooway awu atto giidoogaa eriis. (1 Xim. 1:12-15) I kase oottido nagaran ubbatoo zilꞌꞌettidee? I bonchchettida Parisaawe gidanawu oottidobata wodiya bazzidi qoppibeennaagaadan, I kase oottidoban ubbatoo zilꞌꞌettibeennaagee qoncce. (Pili. 3:4-8, 13-15) Phawuloosi minnidi haggaaziisinne sinttanaa wodiyan xeelaa wottiis. Phawuloosaagaadan neenikka kasebaa laammana danddayakka. Shin neeni haꞌꞌi Yihoowa sabbananne ufayssana danddayaasa. Qassi I qaalaa gelido sinttanaa wodiyan xeelaa wottana danddayaasa.
10. Neeni kase oottidoban harata qohidaba gidikko waatana danddayay?
10 Neeni kase oottidoban harata qohidaba gidikko unꞌꞌettana danddayaasa. Nena aybi maaddana danddayii? Hanotaa giigissanawu neessi danddayettida ubbabaa ootta. Qassi wozanappe maarotaa oychcha. (2 Qor. 7:11) Ne oottidoban qohettidaageeta Yihooway maaddanaadan woossa. Genccanaadaaninne sarotettaa demmanaadan I nenanne ne oottidoban qohettidaageeta maaddana danddayees.
11. Xoossay erissidobaa yootiya Yoonaasappe nuuni ay tamaarana danddayiyoo? (Misiliyakka xeella.)
11 Kase neeni oottido balaappe tamaara, qassi Yihooway ba koyiyo ogiyan nena goꞌettanaadan eeno ga. Xoossay erissidobaa yootiya Yoonaasabaa beꞌa. Yoonaasi Xoossay azazido sohuwa Nanawe biyogaa aggidi harasaa baqatiis. Yihooway Yoonaasa seeriis; qassi I ba mooruwappe tamaariis. (Yona. 1:1-4, 15-17; 2:7-10) Yihooway Yoonaasan hidootaa qanxxibeenna. Yoonaasi Nanawe baanaadan Xoossay zaarettidi yootiis; yaatin he wode Yoonaasi sohuwara azazettiis. Yoonaasi kase oottidoban zilꞌꞌettikkokka Yihooway azazidobaa oottiis.—Yona. 3:1-3.
Gita moliya uluwappe Yihooway Yoonaasa ashshi simmidi, I Nanawe biidi A kiitaa awaajjanaadan zaarettidi yootiis (Mentto 11 xeella)
YIHOOWAY BA GEESHSHA AYYAANAA BAGGAARA NUNA MINTTETTEES
12. Nuna unꞌꞌissiyabay gakkiyo wode Yihooway sarotettaa nuuyyo waati immii? (Piliphphisiyuusa 4:6, 7)
12 Unꞌꞌissiyabay nuna gakkiyo wode Yihooway ba geeshsha ayyaanaa baggaara nuna minttees. Runanne Karolo gakkidabaa ane beꞌoos. Eta naꞌay bana barkka woridoogee keehi azzanttiyaba. Eti hagaadan giidosona: “Kase nuna deexxiya metoti gakkikkokka, haꞌꞌiigee he ubbaappe deexxiyaba. Nuuni daro qammaa xiskkana danddayibeenna gishshawu Yihoowa woossida; qassi Piliphphisiyuusa 4:6, 7n qonccida sarotettaa tumuppe demmida.” (Nabbaba.) Iitabay ne bolli gakkido gishshawu neeni keehi unꞌꞌettikko, neeyyo siyettiya ubbabaa Yihoowawu yoota. Qassi darotoo neeni koyidoogaa keenaa A haasayissana danddayaasa. (Maz. 86:3; 88:1) Yihooway ba geeshsha ayyaanaa immanaadan zaara zaarada A oychcha. I ubbatoo nena maaddana.—Luq. 11:9-13.
13. Geeshsha ayyaanay nuuni Yihoowawu ammanettidi goynniyogaa aggennaadan nuna waati maaddana danddayii? (Efisoona 3:16)
13 Unꞌꞌissiyabay nena gakkido gishshawu aybanne oottana danddayennabadan neeyyo siyettii? Neeni ubbatoo Yihoowawu ammanettada goynnanaadan geeshsha ayyaanay neeyyo wolqqaa immana. (Efisoona 3:16 nabbaba.) Filooro giyo michchiyo gakkidabaa beꞌa. Anne I azinay misoonaawe gididi haggaazishin, I azinay O kaddido gishshawu paraman shaahettidosona. A hagaadan gaasu: “I ammanettibeenna gishshawu taani keehi azzanaas, qassi hegaappe harabaa aybanne qoppana danddayabeykke. Taani genccanawu Yihooway ba geeshsha ayyaanaa immanaadan woossaas. Yihooway tana minttettiis; qassi koyro heeran hegee danddayettennaba milatikkonne taani guyyeppe minnaasinne A maaduwan genccana danddayaas.” Filoora kaseegaappe aaruwan an ammanettanaadan Xoossay O maaddidoogaa akeekaasu; qassi gakkiya meto ubbaa genccanaadan O maaddanaagaa ammanettaasu. Filoora Mazamure 119:32y Yihooway O keehi maaddidoogaa qonccissiya xiqise gidiyogaa yootaasu. Xiqisee hagaadan gees: “Neeni tana daro wozanttido gishshau, taani ne azazuwaa ogiyan woxxais.”
14. Xoossaa ayyaanay nuna maaddanaadan nuuni waatana danddayiyoo?
14 Neeni geeshsha ayyaanaa demmanawu woossa simmada ne woosaara maayettiyabaa ay oottana danddayay? Xoossaa ayyaanaa loytta demmanaadan maaddiyabata ootta. Shiiqota shiiqiyogeenne haratussi markkatiyogee Xoossaa ayyaanaa demmanaadan maaddees. Ubba galla Yihoowa Qaalaa nabbaba. Hegee A qofaa wotta dentta qoppanaadan nena maaddana. (Pili. 4:8, 9) Neeni nabbabiyo wode Geeshsha Maxaafan etabay odettido metoy gakkidoogeeta akeeka; qassi eti genccanaadan Yihooway eta waati maaddidaakko wotta dentta qoppa. Qommoora ibay odettido Sandra daro metoy O gakkido gishshawu keehi unꞌꞌettaasu. A hagaadan gaasu: “Yooseefa taarikee tana keehi minttettiis. I ba bolli gakkida metoynne naaqoy Yihoowara dabbotido A dabbotaa shugissanaadan eeno gibeenna.”—Doo. 39:21-23.
YIHOOWAY NU MALA KIRISTTAANETU BAGGAARA NUNA MINTTETTEES
15. Nuuni minttettuwa ooppe demmana danddayiyoo, qassi eti nuna waati maaddana danddayiyonaa? (Misiliyakka xeella.)
15 Metoy nuna gakkiyo wode nu mala Kiristtaaneti loytti ‘minttettoosona.’ (Qol. 4:8) Yihooway nuna siiqiyogaa nu ishanttunne michchonttu baggaara qonccissees. Eti nunaara wodiya aattiyogaaninne nuussi siyettiyabaa nuuni yootiyo wode ezggiyogan nuna minttettana danddayoosona. Nu ishanttinne michchontti issi xiqisiya nuuyyo nabbabiyogan woy nunaara woossiyogan nuna minttettana danddayoosona. d (Roo. 15:4) Issi issitoo issi ishay woy michchiya nuuni Yihoowagaadan qoppanaadan odana danddayoosona. Qassi hegee nuuni ubbatoo genccanaadan nuna maaddana danddayees. Nu ishanttinne michchontti hara ogetunkka nuna maaddoosona; leemisuwawu, nuuni unꞌꞌettiyo wode nuna qumaa shoobboosona.
Kayma gidida ammanettiya laggeti loytti minttettananne maaddana danddayoosona (Mentto 15 xeella)
16. Haratuppe maaduwa demmanawu waatana koshshii?
16 Harati nuna maaddanaadan oychchiyogee issi issitoo koshshana danddayees. Nu ishanttinne michchontti nuna siiqoosonanne maaddanawu koyosona. (Lee. 17:17) Shin eti nuuyyo siyettiyabaa woy nuuyyo koshshiyabaa erennan aggana danddayoosona. (Lee. 14:10) Neeni unꞌꞌettiyaba gidikko, neeyyo siyettiyabaa kayma gidida ne laggetuyyo oda. Nena eti aybin maaddanaakko yoota. Neeni yayyennan haasayissiyo issi cimaara woy naaꞌꞌu cimatuura haasayana danddayaasa. Amarida michchontti kayma gidida hara michchonttuura haasayiyogan minttettuwa demmidosona.
17. Nuuni haratuppe haakkanaadan oottana danddayiya amaridabati awugeetee, qassi hegeeta waati xoonana danddayiyoo?
17 Ishanttuuranne michchonttuura wodiya aatta. Ne wozanay meqqidoogaappe denddidaagan neeni haratuura wodiya aattanawu koyennan aggana danddayaasa. Issi issitoo ne ishanttinne michchontti ne hanotaa loytti akeekennan aggana woy qohiyabaa haasayana danddayoosona. (Yaaq. 3:2) Gidikkonne, ne ishanttuppenne michchonttuppe haakkoppa. Yihooway nena minttettanawu eta goꞌettana danddayees. Guuggiya harggiyan sahettiya Gaavina giyo cimay hagaadan giis: “Darotoo taani ta laggetuura haasayanawu woy wodiya aattanawu koyikke.” Shin Gaavini ba laggetuura wodiya aattanawu baaxetiis. Qassi I yaatiyo wode darotoo ufayttees. Eemo giyo michchiya hagaadan gaasu: “Kase tana gakkidabaappe denddidaagan taani asa ammananawu metootays. Shin taani Yihoowagaadan, ta ishanttanne michchontta siiqiyogaanne etan ammanettiyogaa doommaas. Hegee taanikka Yihoowaykka ufayttanaadan oottiyogaa eraas.”
YIHOOWAY OOTTANAWU QAALAA GELIDOBATUN MINETTA
18. Nuuni yeemuwan naagana danddayiyobay aybee, qassi nuuni haꞌꞌi ay oottana danddayiyoo?
18 Nuuni unꞌꞌettanaadaaninne waayettanaadan oottiya ubbabaa Yihooway mata wode xayssanaagaa yeemuwan naagoos. (Ajj. 21:3, 4) Nuna gakkida qoho ubbay he wode ‘hassayettenna.’ (Isi. 65:17) Nuuni beꞌidoogaadan, Yihooway ha wodiyankka ‘nu masunttaa qachchees.’ Yihooway nuna minttettanawunne maaddanawu giigissido darobatun loytta goꞌetta. Awudenne ‘I neessi qoppiyogaa’ siroppa.—1 PHe. 5:7.
MAZAMURE 7 Yihooway Nuuyyo Wolqqa
a Asatu sunttay laamettiis.
b “ Yihooway Nena Xoqqu Ootti Xeellees” giya saaxiniya xeella.
c Yihoowara ‘zorettanawu’ nu nagarawu maarotaa A oychchiyogaaninne nu eeshshaa giigissiyogan zilꞌꞌettidi laamettidoogaa bessana koshshees. Nuuni gita nagaraa oottikko, galchchaa cimatu maaduwakka oychchana koshshees.—Yaaq. 5:14, 15.
d Leemisuwawu, Kiristtaanetu Duussawu Maaddiya Xiqiseta (Amaarattuwa) giya xuufiyan “Unꞌꞌuwa” qassi “Minttettuwa” giya huuphe yohotun odettida xiqiseta pilgga.
