1. Nu ufayssay nuussi ‘ayyaanaaban koshshiyaabaara’ waani gayttii?

 WOZANAPPE ufayttiyoogaa giyoogee haꞌꞌissa xallawu siyettiyaabaa bessiyaaba gidenna. Hegee issi uri paxa deꞌido wode ubban ufayttiyoogaa bessiyaaba gidana danddayees. Waanidi? Yesuusi Maatiyoosa shemppo 5ppe 7 gakkanaashin tamaarissidoban hagaadan giis: “Bantta ayyaanan hiyyeesa gididoogaa eriyaageeti anjjettidaageeta.” (Maa. 5:3) Asay banttana Medhdhida Xoossaa Yihoowa eranawu woy ayyo goynnanawu koshshay deꞌanaadan oottidi Xoossay medhdhidoogaa Yesuusi erees. Hegee nuuni ayyaanaaban hiyyeesa gidiyoogaa bessiyaaba. Yihooway ‘ufayttiya Xoossaa’ gidiyo gishshawu, ayyo goynniyaageeti ufayttana danddayoosona.—1 Xim. 1:11, NW.

2-3. (a) Yesuusi yootidoogaadan, ufayttana danddayiyaageeti oonee? (b) Ha huuphe yohuwan nuuni beꞌanabay aybee, qassi hegee koshshiyoy aybissee?

² Nuuni ufayttana danddayiyoy metoy baynna wode xallaanee? CHii. Yesuusi Maatiyoosa 5-7 gakkanaashin tamaarissidoban issi maalaaliyaabaa yootiis. Nagaraa oottido gishshawu woy banttana metoy gakkido gishshawu “kayyottiyaageeti” ufayttana danddayoosona. “Xillotettaa gishshau yedetettiyaageeti” woy Kiristtoosa kaalliyo gishshawu harati ‘borishin’ gencciyaageetikka ufayttana danddayiyoogaa Yesuusi yootiis. (Maa. 5:4, 10, 11) SHin hegaa mala hanotatun waanidi wozanappe ufayttana danddayettii?

 ³ Nuuni ufayttiyoy nuna metoy gakkenna gishshawu gidennan, ayyaanaaban nuussi koshshiyaabaa demmiyoonne Xoossaakko loytti shiiqiyo gishshawu gidiyoogaa Yesuusi tamaarissiis. (Yaaq. 4:8) Yaatin nuuni waanidi wozanappe ufayttana danddayiyoo? Nuuni wozanappe ufayttanawu oottana koshshiya heezzubata ha huuphe yohuwan beꞌana.

4. Wozanappe ufayttanawu nuuni oottana koshshiya koyrobay aybee? (Mazamure 1:1-3)

⁴ KOYROOGEE: Nuuni wozanappe ufayttanawu Xoossaa Qaalaa nabbabananne xannaꞌana koshshees. Yesuusi Xoossaa Qaalaa qumaara geeddarssiis. Asaykka meheekka paxa deꞌanawu maana koshshees. SHin Xoossaa Qaalaa nabbabana danddayiyay asa xalla; qassi nuuni yaatana koshshees. Yesuusi, “Asi Xoossai haasayiyo qaala ubban de7anaappe attin, oitta xalaalan de7enna” yaagidoy hegaassa. (Maa. 4:4) Yaatiyo gishshawu alꞌꞌo gidida Xoossaa Qaalaa, Geeshsha Maxaafaa nabbabennan issi gallassaynne aadhdhana bessenna. Mazamuraawee hagaadan giis: ‘GODAA higgiyan ufayttiyaanne A higgiyaa gallassinne qammi qoppiya asi ufayttees.’—Mazamure 1:1-3 nabbaba.

5-6. (a) Nuuni Geeshsha Maxaafaappe tamaarana danddayiyoobay aybee? (b) Geeshsha Maxaafaa nabbabiyoogee nuna ayba ogetun maaddana danddayii?

⁵ Yihooway nuna siiqiyo gishshawu, nuuni ufayttidi deꞌanawu ay oottana koshshiyaakko Geeshsha Maxaafaa baggaara nuussi yootiis. I nu deꞌuwawu halchchidobi aybakko erida. Nuuni akko shiiqanawu waatana danddayiyaakko, qassi I nu nagaraa atto gaanaadan nuuni ay oottana koshshiyaakko erida. (Erm. 29:11)  Nuuni Geeshsha Maxaafaa xannaꞌiyoogan erido tumay nu keehi ufayttanaadan oottiis!

⁶ Ubba galla nuna maaddiya zoree Geeshsha Maxaafan deꞌiyoogaa eroos. Nuuni he zoriyaa oosuwan peeshshiyo wode ufayttana danddayoos. Nena gakkiya metuwaa gaasuwan neeni hidootaa qanxxiyo wode ubban Yihoowa Qaalaa kaseegaappe aaruwan nabbabanne wotta dentta qoppa. Yesuusi, “Anjjettidaageeti Xoossaa qaalaa siyidi, he qaalai azaziyoogaadan oottiyaageeta” yaagiis.—Luq. 11:28.

7. Neeni Xoossaa Qaalaa nabbabiyo wode loytta goꞌettanawu aybi maaddana danddayii?

⁷ Neeni Geeshsha Maxaafaa nabbabiyo wode, nabbabidobaa takki gaada qoppa. Leemisuwau, neeni hagaa malabaa ootta eray? Neeni dosiyo qumaa issi uri kattiis. SHin maanawu gidiya wodee neessi xayido woy harabaa qoppiyoogan ne qofay shaahettido gishshawu, baariyo wode ubban malꞌꞌuwaa masuhaa shaakkennan aggana danddayaasa. Neeni ma wurssa simmada eesuwan miidoogaa akeekaasa, yaatada malꞌꞌuwaa shaakkaydda leddan miidaba gidarkkinaashsha gaasa. Nuuni Geeshsha Maxaafaa nabbabiyo wodekka hanotay hegaa mala gidana danddayees. Issi issitoo, nuuni Geeshsha Maxaafan deꞌiyaabaa loytti akeekennan eesuwan nabbaboos. Xoossaa Qaalaa nabbabiyo wode takki gaada qoppa. Taarikiyaa beꞌiyaabadaaninne he taarikiyan deꞌiya asati haasayiyo cenggurssaa siyiyaabadan qoppa. Qassi neeni nabbabiyoobaa loytta qoppa. Yaatiyo wode, neeni keehi ufayttana.

8. ‘Ammanettida wozannaama ashkkaray’ ba aawatettaa waati poliiddi deꞌii? (Tohossa qofaakka xeella.)

⁸ Ayyaanaabaa qumaa bessiya wodiyan giigissanaadan, Yesuusi ammanettida wozannaama ashkkaraa sunttiis; qassi nuuni ayyaanaabaa qumaa loytti maana danddayoos. c (Maa. 24:45) Ammanettida ashkkaray giigissiyo ubbabawu denddoy ayyaanaa kaaletuwan xaafettida Geeshsha Maxaafaa. (1 Tas. 2:13) Yaatiyo gishshawu, he ayyaanaabaa qumay Geeshsha Maxaafan qonccida Yihoowa qofaa eranaadan nuna maaddees. Nuuni Wochchiyo Keelaanne Beegottite! maxeeteta, qassi jw.org saytiyan kiyiyaabata nabbabiyoy hegaassa. Hegaa bolli, saaminttawu gidduwaaninne wurssettan shiiqiyo shiiqotuyyo giigettoos. Aginan aginan nu akeekiyo qaalan giigiya JW Brodkastingiyaa beꞌoos. Nuuni gidi palahiya ayyaanaabaa qumaa miyoogee, wozanappe ufayttanaadan maaddiya naaꞌꞌanttobaa oottanaadan nuna denttettees.

9. Nuuni wozanappe ufayttanawu maaddiya naaꞌꞌanttobay aybee?

⁹ NAAꞌꞌANTTOOGEE: Nuuni wozanappe ufayttanawu, Yihooway kessido maaratussi azazettana koshshees. Mazamuraawee hagaadan giis: “GODAASSI yayyiyaageetinne a ogiyan hemettiyaageeti ubbai anjjettidaageeta.” (Maz. 128:1) Yihoowayyo yayyiyoogaa giyoogee, A wozanappe bonchchiyo gishshawu A azzanttiya aybippenne naagettiyoogaa giyoogaa. (Lee. 16:6) Yaaniyo gishshawu, likke gididabaanne gidennabaa xeelliyaagan Geeshsha Maxaafan qonccida, Yihooway kessido maarata kaallanawu nuuyyo danddayettida ubbabaa oottoos. (2 Qor. 7:1) Nuuni Yihooway dosiyoobata oottiyaabanne I ixxiyoobata ixxiyaaba gidikko, ha wodiyan keehi ufayttana.—Maz. 37:27; 97:10; Roo. 12:9.

10. Roome 12:2y yootiyoogaadan, nuuppe koyettiyaabay aybee?

¹⁰ Roome 12:2 nabbaba. Issi uri, likkebaanne likke gidennabaa kuuyiyo maatay Yihoowawu deꞌiyoogaa erana danddayees, shin I Xoossay kessido maaraa kaallanawu murttana koshshees. Leemisuwau, issi uri kaamiyaa  ay keena eesuwan laaggana bessiyaakko higgiyaa kessiyo maatay kawuwawu deꞌiyoogaa erana danddayees. SHin I he higgiyaa azazettanawu koyennan aggana danddayees. Hegaappe denddidaagan, laagganawu paqqadettida eesuwaappe aaruwan laaggana danddayees. Nuuni Yihooway kessido maarata kaalliyoogee aybippenne aadhdhiyoogaa wozanappe ammaniyoogaa oottiyooban bessana danddayoos. (Lee. 12:28) Daawitawu hegaadan siyettido gishshawu, I Yihoowa hagaadan giis: “Neeni tana de7o ogiyaa bessaasa. Taani ne achchan de7in, ta ufaissai polettees; ne ushachcha baggaara ufaissai merinau de7ees.”—Maz. 16:11.

11-12. (a) Nuuni unꞌꞌettiyo woy hidootaa qanxxiyo wode ay oottennaadan naagettana koshshii? (b) Allaxxiyoobaa dooriyo wode, Piliphphisiyuusa 4:8n deꞌiya qofay nuna waatidi maaddana danddayii?

¹¹ Nuuni unꞌꞌettiyo woy hidootaa qanxxiyo wode nu metuwaabaa hirggiyoogaa agganawu maaddiyaabaa oottiyoogee koshshana danddayees. Gidikkonne, Yihooway ixxiyoobaa oottiyoogaappe naagettana koshshees.—Efi. 5: 10-12, 15-17.

¹² Kiitettida PHawuloosi Piliphphisiyuusan deꞌiya Kiristtaanetussi xaafido dabddaabbiyan eti ‘tumubaa, geeshshabaa, siiqobaanne loꞌꞌobaa’ ubbatoo qoppanaadan yootiis. (Piliphphisiyuusa 4:8 nabbaba.) Allaxxiyoobaara gayttidaagan PHawuloosi yaata yaatoppa giidi yootana xayikkonne, nuuni allaxxanawu dooriyoobay nuna maaddana woy qohana danddayiyoogaa yootiis. Ane hagaa mala: “Ubbaa” giya qaalay deꞌiyo sohota kaalliya qaalatun laamma. “Yettata,” “pilimeta,” “maxaafata” woy “biiduwaa kaassata.” Yaatiyoogee, Xoossaa ufayssiyaabaynne ufayssennabay awugaakko neeni eranaadan maaddana danddayees. Aybippenne aadhdhiya, Yihooway kessido maarata nuuni kaallanawu koyoos. (Maz. 119:1-3) Yaatidi, geeshsha kahan nuuni wozanappe ufayttanaadan maaddiya heezzanttobaa oottana danddayoos.—Oos. 23:1.

13. Nuuni wozanappe ufayttanaadan maaddiya heezzanttobay aybee? (Yohaannisa 4:23, 24)

¹³ HEEZZANTTOOGEE: Ne deꞌuwan Yihoowa goynuwaa kaseya. Yihooway nuna Medhidaagaa gidiyo gishshawu awu goynoy bessees. (Ajj. 4:11; 14:6, 7) Nuuni A ufayssiya ogiyan awu goynniyoogaa kaseyana koshshees; hegee “ayyaanaaninne tumatettan” awu goynniyoogaa giyoogaa. (Yohaannisa 4:23, 24 nabbaba.) Nuuni Xoossaa Qaalan deꞌiya tumaara maayettiya ogiyan awu goynnanawu Xoossaa geeshsha ayyaanay nuna kaalettanaadan koyoos. Nu oosoy teqettido woy muleera digettido heeran nuuni deꞌiyaaba gidikkokka, nu goynuwaa kaseyana koshshees. Yihoowa Markka gidido gishsha xallawu, 100ppe dariya ishanttinne michchontti ha wodiyan qashettidosona. d Gidikkonne, eti woossanawu, xannaꞌanawu, qassi Xoossaabaanne A Kawotettaabaa haratuyyo yootanawu banttawu danddayettida ubbabaa ufayttiiddi oottoosona. Asay nuna boriyo woy yedettiyo wode, hegaa nuuni genccanaadan Yihooway maaddiyo gishshawu ufayttoos; qassi Yihooway nuna woytana.—Yaaq. 1:12; 1 PHe. 4:14.

14. Tajikisttaanen deꞌiya yelaga ishaa gakkidabay aybee, qassi aybissi?

¹⁴ Nu ishanttuppenne michchonttuppe amaridaageeta wolqqaama metoy gakkiiddi deꞌiyaaba gidikkonne, nuuni beꞌido heezzubata eti oottiyo gishshawu wozanappe ufayttoosona. Tajikisttaanen deꞌiya, wotaaddara gidennan ixxida layttay 19 gidido Jovidoon Bobbojonova hanotaa ane qoppa. Xiqimita 4, 2019n  wolqqan A sooppe A efiidosona, daro aginawu qachchidosonanne danobaa oottidabadan xeellidosona. Ha pirdda pacay daro biittatun televizhiiniyaaninne eraadoone malabatun odettiis. I wotaaddara gidanawu qaalaa gelanaadaaninne wotaaddara maayuwaa maayanaadan wolqqanttanawu koyidi, A shocidoogeekka odettiis. Hegaappe simmin, pirdda keettay A mooranchcha gin, I qashuwaappe birshshettanaadan he biittaa pirezddanttee yootana gakkanaashin, wolqqa oosuwaa oottiyo kambbiyan takkiis. Jovidooni ubbatoo ammanettidi deꞌiisinne ufayttiis. Waatidi? Ubbatoo ayyaanaaban bawu koshshiyaabaa demmanawu baaxetiyoogaana.

15. Jovidooni qashuwan deꞌiyo wode Yihoowabaa waati tamaaridee?

¹⁵ Jovidooni qashuwan deꞌiyo wode, Geeshsha Maxaafay woy nu xuufetuppe aybinne awu baynnaba gidikkonne, I Yihoowaabaa tamaariyoogaa aggibeenna. Hegaadan I waati oottidee? A gubaaꞌiyan deꞌiya ishanttinne michchontti awu qumaa ehiyo, suuqiyaappe shaammiyoobaa yeggiyooban gallassaa xiqisiyaa xaafoosona. Hegaa gishshawu I galla galla Geeshsha Maxaafaa nabbabananne hegaa wotti dentti qoppana danddayiis. I qashuwaappe birshshetti simmidi, hanno gakkanawu wolqqaama metoy gakkibeennaageeta hagaadan  zoriis: “Xoossaa qaalaanne nu xuufeta nabbabiyoogan Yihoowabaa intte loytti eranawu intte laꞌatettaa goꞌettana koshshees.”

16. Jovidooni ubbatoo qoppidobay aybee?

¹⁶ Nu ishay Yihooway kessido maaraadan deꞌiis. I iita qofaanne iita oosuwaa qoppiyoogaappe Yihoowabaanne Yihooway xoqqu ootti xeelliyoobata wotti dentti qoppiis. Jovidooni Xoossay medhdhido loꞌꞌiya meretatun maalaalettiis. Ubba galla maallado kafotu yettaa siyanawu I xiskkuwaappe denddees. Omarssan aginaanne xoolintteta I loytti xeellees. I hagaadan giis: “Ha Yihoowa imotati taani ufayttanaadaaninne minnanaadan oottidosona. Yihooway ayyaanaabaaninne asatettaaban nuussi koshshiyaabaa immiyo gishshawu, nuuni A galatiyo wode ufayttoos; qassi he ufayssay nuuni genccanaadan maaddees.”

17. Jovidoonaagaa mala hanotay gakkiyo issi ura 1 PHeexiroosa 1:6, 7n deꞌiya qofay waati maaddana danddayii?

¹⁷ Jovidooni Yihoowa goynuwaa kaseyiis. Tumu Xoossawu ammanettidi deꞌiyoogee keehi koshshiyaaba gidiyoogaa I erees. Yesuusi, “Godau, ne Xoossau goinna; a xalaalau ootta” yaagiis. (Luq. 4:8) Wotaaddaratu halaqaynne hara wotaaddarati Jovidooni Yihoowa Markka gidiyoogaa agganaadan koyidosona. Gidikkonne, I ammanettidi deꞌanaadan Yihooway maaddana mala ubbatoo gallassinne qammi wozanappe woossiis. Jovidooni naaqoy A gakkishinkka ammanettidi deꞌiis. A sooppe A wolqqan efaanaappe, shocanaappenne qachchanaappe kase ayyo baynna issibay haꞌꞌi awu deꞌiyo gishshawu I keehi ufayttees. A ammanoy paacettido gishshawu, haꞌꞌi awu mino ammanoy deꞌees.—1 PHeexiroosa 1:6, 7 nabbaba.

18. Nuuni ubbatoo waani ufayttana danddayiyoo?

¹⁸ Wozanappe ufayttanawu nuussi aybi koshshiyaakko Yihooway erees. Neeni hegawu maaddiya heezzubata oottikko, wolqqaama metoy deꞌishinkka ubbatoo ufayttana danddayaasa. Neenikka hagaadan gaana danddayaasa: “Eta Xoossai GODAA gidiyo asati anjjettidaageeta.”—Maz. 144:15.