1-2. Zoriyoogaa xeelliyaagan issi ishay ay akeekidee?

 DARO layttappe kase, shiiqota issi issitoo shiiqenna issi michchiyo oychchanawu naaꞌꞌu cimati biidosona. SHiiquwaa shiiqiyoogaabaa yootiya amarida xiqiseta cimatuppe issoy he michchiyo bessiis. Biiddi oychchidoogan michchiyaa minettaasu giidi I qoppiis, shin inne hara cimay I achchappe biishin michchiyaa hagaadan gaasu, “Ishanttoo intte ta metuwaabaa aybanne akeekibeekketa.” Ishantti michchiyo gakkiya metuwaabaa eranawu aybanne malennan O zoridosona. Hegaappe denddidaagan, A eta zoree maaddees gaada qoppabeykku.

² O xiqiseta bessida cimay hagaadan giis: “He wode he michchiyaa nuna bonchchabeykku gaada taani qoppaas. SHin taani koyro ta michcheebaa qoppennan aggada goꞌettiyo xiqisetubaa qoppidoogaa guyyeppe akeekaas. Taani O gakkiiddi deꞌiyaabaanne O waata maaddana danddayiyaakko eranawu malana koshshees.” He hanotaappe he cimay keehi koshshiyaabaa tamaariis. I ha wodiyan qarettiyaanne keha henttanchcha.

3. Gubaaꞌiyan zorana danddayiyay oonee?

 ³ Cimati henttanchcha gidiyo gishshawu zorana koshshiyo wode zoriyo aawatettay etayyo deꞌees. SHin, gubaaꞌiyan deꞌiya harati zoriyoogee koshshana danddayiyo wodeti deꞌoosona. Leemisuwawu, issi ishay woy issi michchiyaa issi laggiyaa Geeshsha Maxaafaappe zorana danddayoosona. (Maz. 141:5;  Lee. 25:12) Woy qassi gastta michchiyaa Tiitu 2:3-5n odettidaagaa mala allaalleta xeelliyaagan ‘yelaga maccaasaa tamaarissana’ woy zorana danddayawusu. Qassi yelidaageeti bantta naata ubbatoo zorana koshshees. Ha huuphe yohoy giigidoy gubaaꞌe cimatussa gidikkonne, nuuni maaddiyaanne oosuwawu denttettiya, qassi ‘ufayssiya’ ogiyan waati zoranaakko xannaꞌiyoogan nu ubbay goꞌettana danddayoos.—Lee. 27:9.

4. Nuuni ha huuphe yohuwan ay beꞌanee?

⁴ Zoriyoogaa xeelliyaagan ha huuphe yohuwan oyddu oyshata pilggana: (1) Zoranaadan oottiya gaasoy aybee? (2) Ha zoree tumuppe koshshiyaabee? (3) Zorana koshshiyay oonee? (4) Neeni maaddiya zoriyaa waata zorana danddayay?

5. Issi cimay siiquwan zoriyo zoriyaa siyanawu asay metoottennay aybissee? (1 Qoronttoosa 13:4, 7)

⁵ Cimati bantta ishanttanne michchontta siiqoosona. Issi issitoo, eti bala ogiyan biya uraa zoriyoogan he siiquwaa bessoosona. (Gal. 6:1) SHin he uraara haasayanaappe kase, issi cimay PHawuloosi siiquwaa xeelliyaagan yootidobaappe amaridabaa loytti qoppiyoogee loꞌꞌo. “Siiqoi danddayanchcha. Siiqoi kehees. . . . Siiqoi ubbabaa danddayees. Ubbabaikka hanana giidi, ufaissan naagees. Ubbabaa genccees.” (1 Qoronttoosa 13:4, 7 nabbaba.) Issi cimay he Geeshsha Maxaafaa xiqiseta loytti qoppiyoogee I siiquwan zoriyaakkonne akeekanaadan maaddana. Zoree imettiyo uri he cimay ayyo qoppiyoogaa akeekikko, zoriyaa siyana danddayees.—Roo. 12:10.

6. Kiitettida PHawuloosi loꞌꞌo leemiso gididoy aybiinee?

⁶ Kiitettida PHawuloosi cimatuyyo loꞌꞌo leemiso gidiis. Leemisuwawu, Tasalonqqen deꞌiya ishanttuyyo zoree koshshido wode PHawuloosi zoranawu mammottibeenna. SHin, PHawuloosi eti ammanuwan oottido oosuwaa, eta siiquwaanne genccaa gishshawu eta koyro galatiis. Hegaa bollikka I eta deꞌuwaa xeelliyaagan qoppiis; qassi eti metootidoogaanne ammanettidi yedetaa gencciiddi deꞌiyoogaa eriyoogaa yootiis. (1 Tas. 1:3; 2 Tas. 1:4) I he ishantti hara Kiristtaanetuyyo leemiso gidiyoogaakka etawu yootiis. (1 Tas. 1:8, 9) PHawuloosi wozanappe galatido gishshawu eti keehi ufayttidosona! PHawuloosi ba ishantta keehi siiqiyoogee qoncce. I Tasalonqqe Kiristtaanetuyyo xaafido naaꞌꞌu dabddaabbetunkka loꞌꞌo zoriyaa zoridoy hegaassa.—1 Tas. 4:1, 3-5, 11; 2 Tas. 3:11, 12.

7. Issi uri zoriyaa siyennan ixxiyoy aybissa gidana danddayii?

⁷ Nuuni likke ogiyan zorana xayikko aybi hanana danddayii? Meezee deꞌiyo cimay hagaadan giis, “Amaridaageeti zoriyaa siyennan ixxiyoy zoree likke gidenna gishshataassa gidennan, zoree siiquwan imettibeenna gishshataassa.” Nuuni hagaappe ay tamaarana danddayiyoo? Yiillotidi gidennan, siiquwan zoriyo wode zoree siyanawu metenna.

8. Issi cimay issi uraa zorana koshshiya koshshennaakko kuuyiyo wode bana ay oychchana bessii?

⁸ Cimati zoranawu eesotana koshshenna. Zoranaappe kase, issi cimay bana hagaadan oychchana koshshees: ‘Taani zoriyoogee tumuppe koshshiyaabee? He uri balabaa oottiyoogaa taani tumuppe eriyaanaa? I oottiyoobay bala gidiyoogaa Geeshsha Maxaafay yootii? Woy I oottiyoobay taani oottiyoobaappe dummatiyo gishsha xallaassee?’ Cimati ‘eesuwan eesuwan haasayennaadan’  naagettiyoogee loꞌꞌo. (Lee. 29:20) Issi cimay issi uraa zorana koshshiyoogaa sirikko, I hara cimaykka he ishay Geeshsha Maxaafay yootiyoobaara maayettennabaa ootteesinne awu zoree koshshees giidi qoppiyaakkonne oychchana danddayees.—2 Xim. 3:16, 17.

9. Maayiyoobaanne alleeqettiyoobaa xeelliyaagan waati zoranaakko PHawuloosappe ay tamaariyoo? (1 Ximootiyoosa 2:9, 10)

⁹ Issi leemisuwaa ane beꞌa. Issi Kiristtaanee maayiyo maayoy woy alleeqettiyoobay issi cima qofissiis gaada qoppa. Issi cimay bana hagaadan oychchana danddayees: ‘Zoranaadan oottiya Geeshsha Maxaafay yootiyo gaasoy deꞌii?’ He cimay ba qofaa yootanawu koyenna gishshawu, hara cimaa woy aassiya kayma uraa he qofaa xeelliyaagan oychchana danddayees. Maayiyoobaanne alleeqettiyoobaa xeelliyaagan PHawuloosi zoridobaa eti issippe pilggana danddayoosona. (1 Ximootiyoosa 2:9, 10 nabbaba.) PHawuloosi issi Kiristtaanee maayiyo maayiyoy bessiyaagaanne giiga gidana koshshiyoogaa xeelliyaagan amarida maarata yootiis. SHin PHawuloosi issi uri maayana danddayiyoobaa woy danddayennabaa xeelliyaagan higgiyaa kessibeenna. Ishanttinne michchontti dooriyo maayoy Geeshsha Maxaafay yootiyoobaa phalqqennaba gidikko, eti hegaa maayana danddayiyoogaa I erees. Hegaa gishshawu cimati zoree koshshiya koshshennaakko kuuyanawu, issi uri bessiyaanne giiga maayuwaa dooridaakkonne qoppana koshshees.

10. Harati kuuyiyoobaa xeelliyaagan nuuni ay hassayana koshshii?

¹⁰ Naaꞌꞌu ishantti dumma dummabaa kuuyana danddayiyoogaa hassayiyoogee keehi koshshiyaaba, shin hegaa giyoogee issoy likke hankkoy bala giyoogaa gidenna. Likkenne likke gidennabaa xeelliyaagan nu mala Kiristtaaneti nu qofaa kaallanaadan wolqqanttana koshshenna.—Roo. 14:10.

11-12. Zoree koshshiyaaba gidikko, issi cimay bana oychchana koshshiyo oyshati awugeetee, qassi aybissi?

¹¹ Zoree koshshiyoogee qoncce gidikko, Zorana koshshiyay oonee? giya oyshay kaallidi denddees. Aqo oyqqida michchiyo woy guutta naꞌaa zoranaappe kase, issi cimay so asawu huuphe gidida uraa haasayissana koshshees. So asawu huuphe gidida uri he allaalliyaa ba huuphe giigissanawu doorana danddayees. b Woy he cimay zoriyo wode, so asawu huuphe gidida uri aara issippe uttanawu oychchana danddayees. Qassi,  mentto 3n qonccidaagaadan, gastta michchiyaa yelaga michchiyo zoriyoogee loꞌꞌo gidiyo wodee deꞌana danddayees.

 ¹² Qoppana koshshiya harabaykka deꞌees. Issi cimay bana hagaadan oychchana danddayees: ‘He zoriyaa taani zoriyaakko loꞌꞌooyye, hara asi zoriyaakko I siyanee?’ Leemisuwawu, bana pattennabadan xeelliya uri kase hegaadan awu siyettido cimay zoriyo wode zoriyaa siyana danddayees. Hegaadan kase siyettido cimay keehi qarettana danddayees; qassi I yootiyoobaa hara uri siyana danddayees. SHin ubba cimatussi bantta ishanttanne michchontta minttettiyoonne Geeshsha Maxaafay yootiyoogaadan laamettanaadan zoriyo aawatettay deꞌees. Zoriyaa cimaa kase hegaa malabay gakkana xayikkonne, zoriyoogee keehi koshshiyaaba.

13-14. Issi cimay siyoogee keehi koshshiyoy aybissee?

¹³ Ezgga. Issi cimay zoranawu giigettiyo wode bana hagaadan oychchana koshshees: ‘Ta ishaa hanotaa taani eriyoobay aybee? A gakkiiddi deꞌiyaabay aybee? Taani erenna metoy A gakkiiddi deꞌii? Haꞌꞌi awu koshshiyaabay aybee?’

¹⁴ Yaaqooba 1:19n deꞌiya maaray zoriyaageetuyyookka hanees. Yaaqoobi hagaadan giis: “Asai ubbai siyanau eesoto; shin haasayanaunne hanqqettanau eesotoppo.” Issi cimay ubbabaa eriyaabadan qoppana danddayees, shin I tumuppe erii? Leemiso 18:13y hagaadan gees: “Siyennan de7iiddi zaariyoogee, hegee he uraayyo eeyyatettanne yeella.” Hanotaa yootanaadan he uraa oychchiyoogee loꞌꞌo. Hegaa gishshawu, issi cimay haasayanaappe kase siyana koshshees. Ha huuphe yohuwaa doomettan, abay odettido cimay yootidobaappe tamaariyoobaa hassaya. I he michchiyo oychchanawu biido wode ba giigettidobaa haasayiyoogaa doommiyoogaa aggidi, I hagaa mala oyshata O oychchana koshshiyoogaa akeekiis: “Ne ay malee?” “Taani nena ay maaddana danddayiyaanaa?” Cimati takki giidi hanotaa oychchikko, eti bantta ishanttanne michchontta kaseppe aaruwan maaddananne minttettana danddayoosona.

15. Leemiso 27:23n deꞌiya maaraa cimati waatidi oosuwan peeshshana danddayiyoonaa?

¹⁵ Wudiyaa era. Qommoora beꞌidoogaadan, maaddiya zoriyaa zoriyoogee amarida xiqiseta nabbabiyoogaa woykko issi woy naaꞌꞌu qofaa yootiyoogaa xalla gidenna. Nuuni nu ishanttuyyoonne michchonttuyyo qoppiyoogaa, eta hanotaa akeekiyoogaanne eta maaddanawu koyiyoogaa eti erana koshshees. (Leemiso 27:23 nabbaba.) Cimati bantta ishanttuuranne michchonttuura dabbotaa minttanawu banttawu danddayettida ubbabaa oottana koshshees.

16. Goꞌꞌiya zoriyaa zoranaadan cimata aybi maaddanee?

¹⁶ Cimati bantta ishantta zoriyo wode xallan haasayissiyaabadan eti qoppanaadan koyokkona. Eti bantta ishanttanne michchontta metoy gakkiyo wode etawu qoppiyoogaa  bessanawu etaara ubbatoo haasayoosona. “Intte yaatikko, etaara loytti laggetana. Qassi intte zorana koshshiyo wode, metoottennan zorana” giidi meeze deꞌiyo issi cimay yootiis. Zoree imettiyo urikka metoottennan zoriyaa siyana.

17. Issi cimay danddayanchchanne keha gidiyoogee koshshiyoy awudee?

¹⁷ Danddayanchchanne keha gida. Geeshsha Maxaafay yootiyoobaa issi uri koyro heeran oosuwan peeshshanawu koyana xayikko, danddayanchchanne keha gidiyoogee keehi koshshiyaaba. Zoree imettido ishay woy michchiyaa zoriyaa siyana woy oosuwan peeshshana xayikko, issi cimay hanqqettana koshshenna. Geeshsha Maxaafay Yesuusabaa hagaadan gees: “Dinccettida shombboquwaa menttenna; qassi cuwattiya muqaaddaakka i toissenna.” (Maa. 12:20) Yaatiyo gishshawu, issi cimay ba buzo woosaa woossiyo wode, zoree koshshiyo uraa Yihooway maaddanaadaaninne he uri zoree imettiyo gaasuwaa akeekanaadan, qassi zoriyaa oosuwan peeshshanaadan Yihooway maaddana mala oychchana danddayees. Zoree imettiyo ishay he zoriyaabaa qoppanawu wodee koshshana danddayees. Cimay danddayidi kehatettan haasayiyoogee he ishay zoriyaa metoottennan siyanaadan oottees. Zoree ubbatoo Xoossaa Qaalaappe imettana koshshees.

18. (a) Zoriyo wode nuuni ay hassayana koshshii? (b) Misiliyaaninne saaxiniyan qonccidaagaadan, yelidaageeti ay haasayiyoonaa?

¹⁸ Ne mooruwaappe tamaara. Nuuni nagaranchcha gidiyo gishshawu, ha huuphe yohuwan odettida zoriyaa wottiyoobi baynna hanotan oosuwan peeshshennan aggana danddayoos. (Yaaq. 3:2) Nuuni moorobaa oottoos, shin nu mooriyo wode, appe tamaaranawu malana koshshees. Nu ishanttinne michchontti nuuni eta siiqiyoogaa akeekikko, nuuni haasayiyooban woy oottiyooban eta yiilloyiyo wode eti nuussi atto gaanawu metootokkona.—“ Yelidaageeta Maaddiya Hassayissuwaa” giya saaxiniyaakka xeella.

19. Nu ishanttanne michchontta waati ufayssana danddayiyoo?

¹⁹ Nuuni beꞌidoogaadan, maaddiya zoriyaa zoriyoogee metiyaaba gidana danddayees. Nuunikka nu zoriyoogeetikka nagaranchcha. Nuuni ha huuphe yohuwan xannaꞌido maarata hassaya. Zoree imettanaadan oottida gaasuwaa akeeka. Qassi, ha zoree tumuppe koshshiyaakkonne, qassi zorana bessiyay nenakkonne shaakka. Zoranaappe kase, he uraa gakkiiddi deꞌiyaabaa akeekanawu oyshata oychchada I yootiyoobaa loytta ezgga. A qofaa akeekanawu mala. Keha gida, qassi ne ishanttuuranne michchonttuura dabbotaa mintta. Halchchuwaa hassaya: Nu zoree maaddiyaagaa xalla gidennan, ‘ufayssiyaagaa’ gidanaadankka koyoos.—Lee. 27:9.