1. Nuuni cimiyo wode halchchana loꞌꞌobay aybee?

 NUUNI cimiyo wode, yelagatettaagaadan Yihoowawu darin maaddokko giidi hirggennan waayi aggana. Nuuni yelagatettan deꞌiyo wodiyaagaadan asatettan mino gidana xayikkonne, yelagati Yihoowa dirijjitiyaa maaddanaadaaninne gujjo aawatettaa ekkanaadan nuussi deꞌiya aadhdhida eratettaanne nu eraa goꞌettidi eta tamaarissana danddayoos. Cimida issi ishay hagaadan giis: “Cimatettaa gaasuwan taani kaseegaa keena oottana danddayenna wode, oosuwaa oottana danddayiya yelaga ishantti deꞌiyo gishshawu taani Yihoowa galatays.”

2. Ha huuphe yohuwan ay beꞌanee?

² Yelagati cimidaageetuura laggetiyo wode ay keena goꞌettiyaakko hagaappe kasetiya huuphe yohuwan beꞌida. Cimidaageeti bana ziqqi oottiyoogaa, ashkke gidiyoogaa, galatiyoogaanne kehiyoogaa mala eeshshati deꞌiyoogeeta gidiyoogan yelagatuura issippe oottiyoogee kumetta gubaaꞌiyaa waati maaddana danddayiyaakko ha huuphe yohuwan beꞌana.

NENA ZIQQI OOTTA

3. Bana ziqqi oottiya Kiristtaanee oottanabaa Piliphphisiyuusa 2:3, 4y ay yootii, qassi hegee A waati maaddii?

³ Cimidaageeti yelagata maaddanawu koyikko, banttana ziqqi oottana koshshees. Bana ziqqi oottiya uri harati baappe aadhdhoosona giidi qoppees. (Piliphphisiyuusa 2:3, 4 nabbaba.) Ha eeshshay deꞌiyo cimati neeni Geeshsha Maxaafay yootiyoogaadaaninne he oosuwaa hanotaadan issibaa daro ogiyan oottana danddayiyoogaa ubbatoo akeekoosona. Yaatiyo gishshawu, issibaa ubba asay kase eti oottiyoogaadan  oottana giidi qoppokkona. (Era. 7:10) Eti eriyoobaa yelagatussi yootiyoogan yelagata maaddana danddayoosona. SHin “ha sa7aa merai attiyaagaa” woy laamettiyaagaa gidiyoogaanne issibaa ooratta ogiyan oottiyoogaa meezetana koshshiyoogaakka akeekana danddayoosona.—1 Qor. 7:31.

4. Woradaa xomoosiyaageeti Leewatuugaa mala eeshshaa waati bessiyoonaa?

⁴ Banttana ziqqi oottiya cimidaageeti kaseegaadan oottana danddayennaagaa eroosona. Leemisuwawu, woradaa xomoosiyaageetubaa qoppa. Etayyo layttay 70 gidiyo wode, hara oosuwaa oottanaadan oyshettoosona. Hegee etayyo deexxiyaaba gidana danddayees. Eti bantta ishantta maaddiyoogan keehi ufayttoosona. Hegee eti keehi dosiyo ooso; qassi eti haꞌꞌikka he oosuwaa oottanawu keehi koyoosona. Gidoppe attin, yelaga ishantti he oosuwaa loytti oottanaagaa eti eroosona. Hegaa gishshawu, beni Israaꞌeelan deꞌiya banttawu layttay 50 gidiyo wode Xoossaa dunkkaaniyan oottiyo oosuwaa aggiya, Leewatuugaa mala eeshshaa eti bessoosona. Cimida Leewatussi imettiya oosoy ayba gidikkonne eti ufayttoosona. Eti danddayiyoobaa minni oottoosonanne yelagata maaddoosona. (Qoo. 8:25, 26) Ha wodiyan, woradaa xomoosiyaageetussi layttay 70 gidiyo wode, daro gubaaꞌeta xomoosiyoogaa aggiyaaba gidikkonne, eti maddabettido gubaaꞌiyaa daroban maaddoosonanne minttettoosona.

5. Daananne Keeti hanotaappe ay tamaarana danddayay?

 ⁵ Woradaa xomoosiyaagaa gididi 23 layttawu oottida Daana hanotaa qoppa. Daanayyo layttay 70 gidido wode, inne A keettaayyiyaa Keeta dumma aqinye gididi sunttettidosona. Eti bantta ooratta oosuwan ay keenaa ufayttiyoonaa? Daani bawu awudeegaappenne aaruwan oosoy dariyoogaa yootiis! I gubaaꞌiyan imettida aawatettan minni oottees, ishantti gubaaꞌiyawu oottiyaageeta gidanaadan maaddeesinne harati katamaaninne qasho keettan markkattanaadan loohissees. Cimidaageetoo, intte ubba wode haggaaziyaageeta gidin aggin, harata loytti maaddana danddayeeta. Waatidi? Intte ooratta hanotaa meezetite, ooratta halchchuwaa kessite, intte oottana danddayennabaa qoppiyoogaa aggidi oottana danddayiyoobaa qoppite.

ASHKKETETTAA

6. Ashkketettay loꞌꞌo gidiyoy aybissee? Leemisuwaa yoota.

⁶ Ashkke asi ba abbiyaa pacaa erees. (Lee. 11:2) I ashkke gidiyo gishshawu, oottana danddayiyoogaappe aaruwaa baappe naagenna. Hegaappe denddidaagan, I ufayttidi deꞌeesinne ubbatoo minni oottees. Ashkke uraa bishkkiliitiyaa toggidi biiddi adussa zarphphiyaa gakkida uraara geeddarssana danddayoos. Bishkkiliitiyaa toggidaagee shaafaa pinnanawu bishkkiliitiyaappe wodhdhana koshshees. I loddan biyaabaa gidikkonne aggennan sinttawu bees. Hegaadan, ashkke uri aggennan Yihoowawu haggaazanawunne harata maaddanawu laamettiyoonne loddu giyo wodee deꞌiyoogaa erees.—Pili. 4:5.

7. Barzzillaayi ashkke gidiyoogaa bessiyaabay aybee?

⁷ Barzzillaaya hanotaa qoppa; Kawuwaa Daawiti Barzzillaayi kawo keetta asa gidanaadan shoobbido wode awu layttay 80. Ashkke gidida Barzzillaayi kawuwaa shoobiyaa ixxiis. Barzzillaayi cimatettaa gaasuwan darobaa oottana danddayennaagaa eriyo gishshawu, ba gishshaa Kimihaama giyo yelagay baanaadan yootiis. (2 Sam. 19:35-37) Barzzillaayaagaadan, oosuwaa yelagati oottanaadan immiyoogan cimidaageeti ufayttoosona.

8. Kawuwaa Daawiti beeta maqidasiyaa keexxanawu koyido wode ashkketettaa waati bessidee?

⁸ Ashkke gidiyoogan Kawuwaa Daawitikka loꞌꞌo leemiso gidees. I Yihoowawu keettaa keexxanawu wozanappe koyiis. SHin, keettaa keexxiyo aawatettay yelaga Solomonawu imettanaagaa Yihooway Daawitawu yootido wode, Daawiti Yihooway kuuyidobaa maayettiisinne keexuwaa oosuwaa wozanappe maaddiis. (1 Odi. 17:4; 22:5) Solomoni “yelaganne oosuwaayyookka lammachcha” gidiyo gishshawu beeta maqidasiyaa taani keexxiyaakko loꞌꞌo giidi Daawiti qoppibeenna. (1 Odi. 29:1) Beeta maqidasiyaa keexxiyo oosoy Yihooway anjjiyo gishshawu oosettiyoogaappe attin layttan cima gidiyoogan woy oosuwaa meezee deꞌiyo gishshawu oosettiyaaba gidennaagaa Daawiti erees. Ha wodiyan deꞌiya cimidaageeti oottiyoobay laamettikkonne, Daawitaagaadan ubbatoo Yihoowawu minni oottoosona. Qassi cimidaageeti kase eti oottiyoobaa oottiya yelagata Yihooway anjjanaagaa eroosona.

9. Macara Biiruwaa Konttiyaa yara gidida ishay ashkke gidiyoogaa waati bessidee?

⁹ SHigeꞌo giyo ishay ashkke gidiyoogaa ha wodiyan bessiis. Awu layttay 1976n 30 gidido wode, Macara Biiruwaa Konttiyaa yara gididi oottanaadan sunttettiis. I 2004n Macara Biiruwaa Konttiyaa shiishshiyaagaa gidiis. I kaseegaadan mino gidennaagaanne oosuwaa polanawu daro wodiyaa wurssiyoogaa  guyyeppe akeekiis. I hegaabaa woossiis; qassi yelaga ishay shiishshiyaagaa gidiyaakko loꞌꞌo giidi qoppiis. SHigeꞌoy Macara Biiruwaa Konttiyaa shiishshiyaagaa gidana xayikkonne, konttiyaa yaratuura issippe oottiyoogaa aggibeenna. Barzzillaaya, Kawuwaa Daawitanne SHigeꞌo hanotaappe beꞌidoogaadan, bana ziqqi oottiyaanne ashkke uri yelagatussi oosuwaa meezee baynnaagaa gidennan, etawu deꞌiya wolqqaa qoppees. I eta banaara keesettiya asadan gidennan, issippe oottiya asadan xeellees.—Lee. 20:29.

GALATIYOOGAA

10. Cimidaageeti gubaaꞌiyan deꞌiya yelagata xeelliyaagan ay qoppana koshshii?

¹⁰ Cimidaageeti yelagata Yihoowa imotadan qoppoosonanne eti oottiyoobaa gishshawu eta galatoosona. Cimidaageetussi wolqqay wuriyo wode, yelagatettaa wolqqay deꞌiyoogeeti oosuwaa oottanawunne gubaaꞌiyaa maaddanawu eeno giyo gishshawu eti galatoosona.

11. Uruto 4:13-16y cimidaageeti yelagatuppe maaduwaa ekkiyo wode goꞌettiyoogaa waati qonccissii?

¹¹ Geeshsha Maxaafan ibay odettido Naaꞌooma yelaga uraappe maaduwaa ufayttada ekkiyoogan cima urawu loꞌꞌo leemiso gidawusu. Naaꞌooma ba naꞌay hayqqi simmin, ba naꞌaa machchiyaa Uruta bantta soo asaakko simmanaadan yootaasu. Gidoppe attin, Uruta Naaꞌoomippe shaahettennan ixxada iira Beetaliheeme baasu. Naaꞌooma Uruta banaara biido gishshawunne bana maaddido gishshawu keehi ufayttaasu. (Uru. 1:7, 8, 18) Hegee etawu naaꞌꞌawukka keehi loꞌꞌo! (Uruto 4:13-16 nabbaba.) Banttana ziqqi oottiya cimidaageeti Naaꞌoomi leemisuwaa kaalloosona.

12. Kiitettida PHawuloosi galatiyoogaa waati bessidee?

¹² Kiitettida PHawuloosi ishantti A maaddido gishshawu galatiis. Leemisuwawu,  Piliphphisiyuusan deꞌiya Kiristtaaneti awu koshshiyaabaa immido gishshawu I eta galatiis. (Pili. 4:16) I Ximootiyoosi bana maaddido gishshawu A galatiis. (Pili. 2:19-22) Qassi I qashuwaasa gididi Roome biido wode asay A minttettanawu yiido gishshawu Xoossaa galatiis. (Oos. 28:15) Daro shaꞌu kilo meetiriyaa hemettidi sabbakiyoogaaninne gubaaꞌeta minttettiyoogan PHawuloosi gooba asa. SHin I bana ziqqi oottidi ishanttinne michchontti immiyo maaduwaa ekkiis.

13. Cimidaageeti yelagata galatiyoogaa waati bessana danddayiyoonaa?

¹³ Cimidaageetoo, intte gubaaꞌiyan yelagata galatiyoogaa daro ogetun bessana danddayeeta. Eti transpporttiyaa giigissiyoogan, giyaappe issi issibaa shammiyoogan woy koshshiya haraban inttena maaddana koyikko, ufayttidi eta maaduwaa ekkite. Eti inttena maaddiyoogee Yihooway inttena siiqiyoogaa bessiyo ogetuppe issuwaa gidiyoogaa hassayite. Inttena maaddiyaageetuura mata lagge gidana danddayeeta. Intte yelaga laggeti Yihoowaara dabbotaa minttanaadan maaddanawu malite, qassi yelagati gubaaꞌiyaa maaddanawu loytti oottiyoogaa beꞌiyoogee inttena keehi ufayssiyoogaa etawu yootite. Qassi etaara wodiyaa aattiyoogan intte deꞌuwan hanidabaa etawu yootite. Intte yaatiyo wode, Yihooway yelagata gubaaꞌiyaa ehiido gishshawu A ‘galateta.’—Qol. 3:15; Yoh. 6:44; 1 Tas. 5:18.

KEHIYOOGAA

14. Kawuwaa Daawiti keha gidiyoogaa waati bessidee?

¹⁴ Cimati bessana koshshiyo hara eeshshaa, hegeekka kehatettaa Kawuwaa Daawita hanotaappe akeekoos. Beeta maqidasiyaa keexxiyoogan maaddanawu keehi daro miishshaanne bawu deꞌiya aquwaappe keehi alꞌꞌobaa immiis. (1 Odi. 22:11-16; 29:3, 4) Asay beeta maqidasiyaa Solomonaagaa giidi xeesanaba gidikkonne I hegaa oottiis. Yihoowa dirijjitee keexxiyo oosuwaa oottanawu nuussi wolqqay baynnaba gidikko, nu danddayettida keenan miishshaa immiyoogan ubbatoo maaddana danddayoos. Qassi nuuni daro layttan demmidobaappe yelagati goꞌettanaadan maaddana danddayoos.

15. PHawuloosi Ximootiyoosawu immido alꞌꞌo imotay aybee?

¹⁵ Kiitettida PHawuloosi kehiyoogan leemiso gidiyoogaa qoppa. I misoonaawe oosuwawu biyo wode Ximootiyoosi banaara baanaadan shoobbiis, qassi PHawuloosi sabbakiyoonnne tamaarissiyo hiillata ha yelagaa kehatettan tamaarissiis. (Oos. 16:1-3) Ximootiyoosi mishiraachchuwaa sabbakiyoogaaninne tamaarissiyoogan gooba gidanaadan PHawuloosi loohissiis. (1 Qor. 4:17) Ximootiyoosi PHawuloosappe tamaaridoogaadan, sabbakanaadaaninne tamaarissanaadan guyyeppe harata loohissiis.

16. SHigeꞌoy harata loohissidoy aybissee?

¹⁶ Cimidaageeti gubaaꞌiyan kase oottiyo oosuwaa yelagati oottanaadan loohissikko, eti ha wodiyan kaseegaadan maaddokko giidi hirggana koshshenna. Leemisuwawu, qommoora abaa denttido SHigeꞌoy Macara Biiruwaa Konttiyaa yara gidida yelagata maaddiyaabaa daro layttawu loohissiis. I haggaaziyo biittan Kawotettaa oosuwaa maaddanawu hegaadan oottiis. Yaatiyo gishshawu, I shiishshiyaagaa gididi oottana danddayibeenna wode, issi loohida ishay A sohuwan oottiis. SHigeꞌoy 45 layttappe daruwaa Macara Biiruwaa Konttiyaa yara gididi oottiis; qassi yelaga ishantta maaddanawu I eriyoobaa ubbatoo goꞌettees. SHigeꞌo mala ishantti Xoossaa asaa tumuppe maaddoosona!

17. Luqaasa 6:38 maaran, cimidaageeti haratuyyo ay immana danddayiyoonaa?

 ¹⁷ Cimida ishanttoonne michchonttoo, ammanettidi suuretettan Yihoowawu haggaaziyoogee aybippenne aadhdhiya deꞌo gidiyoogawu intte loꞌꞌo leemiso. Geeshsha Maxaafay yootiyo maarata tamaariyoogeenne hegeeta oosuwan peeshshiyoogee nuuyyo loꞌꞌo gidiyoogaa intte deꞌoy qonccissees. Issibay waani oosettiyaakko intte kase beꞌidobaappe ereeta; shin ooratta hanotaara meezetana koshshiyoogaakka intte akeekeeta. Cimidaageetoo, mati xammaqettidaageetikka harata daro ogiyan maaddana danddayoosona. Intte Yihoowa eridoogee ha wodiyan intte deꞌuwan ufayttanaadan waati maaddidaakko etawu yootana danddayeeta. Yelagati intte deꞌuwan hanidabaa siyiyoogaaninne intte eridobaappe tamaariyoogan ufayttoosona. Intte intte deꞌuwan erido darobaa harata loohissanawu ‘immikko,’ Yihooway inttena keehi anjjana.—Luqaasa 6:38 nabbaba.

18. Cimidaageetinne yelagati issoy issuwaa waati maaddana danddayiyoonaa?

¹⁸ Cimidaageetoo, yelagatuura intte keehi dabbotiyo wode inttekka yelagatikka goꞌettana. (Roo. 1:12) Haratussi baynna maaddiyaabay inttessi ubbawu deꞌees. Cimidaageetussi eti bantta deꞌuwan demmido aadhdhida eratettaynne meezee deꞌees. Yelagatussi wolqqaynne minotettay deꞌees. Yelaga uraynne cima uray lagge gididi issippe oottiyo wode, saluwan deꞌiya siiqo Aaway sabettanaadaaninne gubaaꞌiyan deꞌiya ubbay anjjettanaadan oottoosona.