Taani Amarkkan Shikaago matan deꞌiya Illinoy giyo guutta kataman 1927n yelettaas. Ta aawaynne ta aayyiya ichchashu naata yelidosona; hegeetikka Jeeto, Doona, tana, Karllanne Joyo. Nuuni ubbaykka kumetta wozanan Yihoowawu haggaazanawu murttida. Ta michchiya Jeeta 1943n Giiliyaden naaꞌꞌantto kayan tamaaraasu. Dooni 1944n, Karlli 1947n, qassi Joya 1951n, Niyorkke Beeteelen haggaaziyogaa doommidosona. Etinne tana yelidaageeti loꞌꞌo leemiso gididoogee Yihoowawu minnada oottanaadan tana maaddiis.

Ta aawaynne ta aayyiya Geeshsha Maxaafaa nabbaboosonanne Xoossaa siiqoosona; qassi nuunikka A siiqanaadan tamaarissidosona. Shin ta aaway Koyro Alamiya Olaa wode Awurooppan wotaaddara gididi ootti simmidi woosa keettaa biyogaa aggiis. Ta aaway olaappe saro soo simmido gishshawu, ta aayyiya Xoossaa galatada ayyo hagaadan gaasu: “Adamsaa, nuuni kaseegaadan woosa keettaa ane boos.” Yaatin ta aaway iyyo hagaadan giis: “Taani nena woosa keettaa moyissana, shin giddo gelikke.” Yaatin A, “Ayssi gelikkii?” gaada oychchaasu. Yaagin I, “Olaa wode, issi mala haymaanootiya kaalettiyageeti issoy issuwara olettiya wotaaddarata anjjiyogaa beꞌaas! Naaꞌꞌu baggaarakka deꞌiya wotaaddarata Xoossay maaddii?”

Hara galla ta aayyiya woosa keettaa biidaashin naaꞌꞌu Yihoowa Markkati nu soo yiidosona. Eti Geeshsha Maxaafaa xannaꞌanawu maaddiya, Pooꞌuwa giya Ajjuutaa maxaafan deꞌiyabaa qonccissiya naaꞌꞌu shaahoy deꞌiyo maxaafata ta aawaassi immidosona. Yaatin, ta aaway ufayttidi he maxaafata ekkiis. Ta aayyiya he maxaafata beꞌosaara nabbabiyogaa doommaasu. Hegaappe simmin issi galla Pooꞌuwa giya maxaafata goꞌettidi Geeshsha Maxaafaa xannaꞌana danddayiyogaa gaazeexan kiyida erissuwan beꞌaasu. Yaatada A xannaꞌiyo sohuwa baanawu kuuyaasu. A yaa gakkin issi cima maccaasiya kariya dooyaasu. Yaatin ta aayyiya maxaafatuppe issuwa O bessaydda, “Neeni hagan ha maxaafaa xannaꞌissay?” yaagaasu. Maccaasiya, “Ee, ta naꞌee gela” yaagaasu. Kaalliya saaminttan nu aayyiya nuna he sohuwa ekkada baasu; qassi hegaappe simmin nuuni saaminttan saaminttan ubbatoo biyoga doommida.

Shiiqotuppe issuwan, shiiquwa kaalettiya ishay Yihoowawu goynniyageeti anjjettidaageeta woy ufayttiyageeta giya Mazamure 144:15, nabbabanaadan tana  shoobbiis. Taani ha xiqisiya dosaas; hegaa bollikka, Yihooway ‘ufayttiya Xoossaa’ yaagiya 1 Ximootiyoosa 1: 11, (NW) qassi nuuni ‘Xoossaa milatanaadan’ minttettiya Efisoona 5:1kka dosays. Taani tana Medhdhidaagawu haggaaziyogan ufayttana koshshiyogaanne he maataa demmido gishshawu A galatana bessiyogaa akeekaas. He naaꞌꞌubati taani ta deꞌuwan ubbatoo oottanawu baaxetiyobata.

Nuussi mata galchchay nu sooppe 32 kilo meetiriya haakkiya Shikaagon deꞌiyagaa. Gidikkokka, nuuni yan shiiqota shiiqoos; qassi Geeshsha Maxaafaa loytta eraas. Issi galla shiiquwa kaalettiya ishay Jeeta qofaa yootanaadan oychchidoogaa hassayays. A zaariyogaa siyada, hagaadan gaada qoppaas: ‘Taanikka hegaa erays. Taanikka qofaa yootanawu kushiya denttana danddayays.’ Yaatada giigettiyogaanne qofaa yootiyogaa doommaas. Ubbaappe aaruwan, ta ishanttunne michchonttuugaadan taanikka Yihoowara dabbotaa minttaas. Taani 1941n haattan muukettaas.

Taani 1942n Ohayon, Kilivlande kataman shiiqido gita shiiquwa dumma hanotan hassayays. Amarkkan 50​ppe dariya sohuwan deꞌiya asay he shiiquwa prograamiya silkkiyan siyiis. Nu soo asay he gita shiiquwayyo mata sohuwan hara daro soo asaara dunkkaanetu giddon uttidi he shiiquwa siyiis. He wode Naaꞌꞌantto Alamiya Olay suulliis; qassi Yihoowa Markkatu bolli gakkiya yedetay yaa gujji gujji biis. Qammi qammi daro ishantti bantta kaamiya xomppiya he kambbiyappe gaxaa zaaridi eqqidoogaa beꞌaas. Ishantti issi issi kaamiyan uttidi qamma kumettaa naaganawu maayettidosona. Iitabay gakkana haniyogaa eti akeekiyo wode qohanawu yiyageetuussi aybinne beettennaadan ishantti bantta kaamiya xomppiya eta bolli xomppoosonanne xurumbboosona. Yaatin harati eta maaddanawu sohuwara gakkoosona. ‘Yihoowa asay ubbabawu loytti giigettidaageeta!’ gidiyogaa akeekaas. Iitabi aybinne gakkibeenna. Qassi hegaappe dendidaagan taani woppu gaada xiskkaas.

Daro layttaappe guyyiyan, taani he gita shiiquwa loytta qoppiyo wode, ta aayyiya aynne unꞌꞌettabeennaagaa woy yayyabeennaagaa hassayays. A Yihoowaninne A dirijjitiyan kumetta wozanan ammanettaasu. Taani I loꞌꞌo leemisuwa mulekka dogikke.

He gita shiiquwappe guuttaa kasetada ta aayyiya ubba wode aqinye gidaasu. Yaatiyo gishshawu, A ubba wode haggaazuwabaa qonccissiya haasayata loytta ezggaasu. Nuuni soo simmiyo wode, “Taani ubba wode haggaazuwa aggana koyikke; shin ta soo asaa maaddiyo aawatettaara hegaa oottana danddayikke” yaagaasu. Yaatada nuuni O maaddana danddayiyakkonne nuna oychchaasu. Nuuni hegan maayettin, qanꞌꞌiyappe kase nu ubbaykka issi woy naaꞌꞌu kifiliya geeshshanaadan nuussi yootaasu. Nuuni timirtte keetti bi simmin, keettay loytti geeyidaakkonne xeella simmada haggaazuwawu bawusu. Iyyo oosoy darikkonne, nuna mule sheneho ga erukku. Nuuni timirtte keettaappe simmin laaxawu soo yiyo wode, A ubbatoo nu gishshawu gaada soo yawusu. Nuuni timirtte keettaappe simmiyo wode issi issitoo iira haggaazuwa kiyoos; hegee aqinye gididi haggaaziyogaa giyogee aybakko nuuni akeekanaadan maaddiis.

Taani aqinye gidiyo wode, tawu layttay 16. He wode ta aaway Yihoowa Markka gidibeenna; shin ta haggaazuwan ufayttees. Taani loytta baaxetikkokka, Geeshsha Maxaafaa xannaꞌanawu koyiya ura demmabeennaagaa issi galla omarssi awu yootaas. Takki ga  simmada taani A, “Neeni tanaara Geeshsha Maxaafaa xannaꞌanawu koyay?” gaada oychchaas. I guuttaa qoppidi, “Xannaꞌennaadan tana diggiyabi baawa” yaagiis. Hegaa gishshawu taani Geeshsha Maxaafaa xannaꞌissido koyro uri ta aawaa. Hegee gita maata!

“Tumay Nena Laꞌa Kessana” giya maxaafaa A xannaꞌissaas. Taani gooba tamaarenne asttamaare gidanaadan ta aaway tana maaddiiddi deꞌiyogaa amarida wodiyappe simmin akeekaas. Leemisuwawu, issi galla omarssi issi menttuwa nabbabi simmin I hagaadan giis: “Ha maxaafay yootiyobaa akeekaas. Shin ha maxaafay yootiyobay likke gidiyogaa ne aybin eray?” Taani A oyshaa zaaranawu giigettabeenna gishshawu hagaadan gaas, “Taani hegaa haꞌꞌi neessi qonccissana danddayikke; shin hegaa zaaruwa kaalliya xinaatiya wodiyan yootana.” Qassi hegaadan oottaas. Nuuni tobbiiddi deꞌiyobaa qonccissiya xiqiseta demmaas. Hegaappe simmin, nu xinaatiyawu loytta giigettanawu pilggana koshshiyogaa akeekaas. Hegee taanikka ta aawaykka ayyaanaaban diccanaadan maaddiis. I tamaaridobaa oosuwan peeshshidi 1952n haattan muukettiis.

Tawu layttay 17 gidido wode sooppe kiyaas. Jeeta misoonaawe gidaasu, qassi Dooni Beeteele geliis. Eti bantta haggaazuwa dosidoogee tana keehi minttettiis. Yaaniyo gishshawu, taani Beeteele gelanawunne Giiliyaden tamaaranawu qitsiya kunttada ta haggaazanasaa Yihooway kuuyanaashin danddayan A naagaas. Yaanin aybi hanidee? Taani 1946n Beeteele shoobettaas.

Unddenna layttawu, taani Beeteelen dumma dummabaa oottido gishshawu darobaa tamaaraas. Taani Beeteelen haggaazido 75 layttatun, maxaafata attamiyo ogiyabaanne hisaabiyara gayttidabaa oottiyo ogiya eraas. Hegaa bollikka, taani Beeteelessi koshshiya issi issibaa waati shammanaakko, qassi keehi koshshiya issi issibata harasaa waati yeddanaakko tamaaraas. Shin ubbaappe aaruwan, maallado goynuwa baggaaranne hara haasayatu baggaara Beeteelen tamaariyo ayyaanaabaa timirtte ubbaa keehi dosaas.

Ta kaalo ishay Karlli 1947n Beeteele gelin appekka tamaaraas. I Geeshsha Maxaafaa xannaꞌiyogaaninne tamaarissiyogan keehi gooba. Taani haasayaa haasayanaadan maddabettido wode, I tana maaddanaadan oychchaas. Taani ta haasayawu maaddiya keehi daro xuufeta shiishshaas; shin hegaa waata goꞌettanaakko erennaagaa Karllawu yootaas. I tana, “Joꞌela, ne haasayaa cuccumay aybee?” yaagidi oychchiis; he oyshay taani waatanaakko akeekanaadan maaddiis. I gaana koyidobaa sohuwara akeekaas. Ta haasayaa cuccumaa qonccissanawu maaddiyaba xalaala goꞌettada hara ubbaa aggaagana koshshiis. Taani hegaa mule dogikke.

Beeteele oosuwan ufayttanawu nuuni sabbakiyo oosuwan nuussi danddayettida ubbabaa oottana koshshees; nuuni yaatikko loꞌꞌo ayfiya demmana danddayoos.  Issi galla omarssi Niwu York Sitin hanidabaa ta loytta hassayays. Issi ishaynne taani Wochchiyo Keelaanne Beegottite! maxeetiya kase ekkida issi maccaaseekko biida. Nuuni O saroti simmidi hagaadan giida, “Ha omarssan, nuuni asay Geeshsha Maxaafaappe minttettiyabaa tamaaranaadan maaddiiddi deꞌoos.” A zaarada, “Geeshsha Maxaafaabaa gidikko ero” yaagaasu. Nuuni Xoossaa Kawotettaabaanne sinttappe yaana ooratta alamiyabaa yootiya daro xiqiseta nabbabidi tobbida. A hegan ufayttidoogee qoncce; ayssi giikko, kaalliya saaminttan A ba laggetuppe daroti nunaara gayttanaadan shoobbaasu. Guyyeppe anne I azinay ammanettida Yihoowa ashkkara gididosona.

Taani aqo lagge koyaydda 10 layttawu takka simmada tawu haniya michchiyo demmaas. Loꞌꞌo machcho demmanawu tana aybi maaddidee? Taani hegaabaa Yihoowa woossaas; qassi aqo oyqqa simmada ta machcheera ay oottanaakko qoppaydda takkaas.

Yankki Isttaademiyan 1953n shiiqido gita shiiquwan Meeri Aniyol giyo michcheera gayttaas. Meeranne ta michchiya Jeeta Giiliyade timirtte keettan naaꞌꞌantto kayan tamaaridosona; qassi misoonaawe gididikka issippe haggaazidosona. Meera Karibiyane haruuruwan misoonaawe gidada haggaazido haggaazuwabaanne unddenna layttawu Geeshsha Maxaafaa xannaꞌissido asatubaa ufayttaydda tawu yootaasu. Nuuni issoy issuwara loytti erettido wode nu naaꞌꞌawukka ayyaanaaban issi mala halchchoti deꞌiyogaa akeekida. Nuuni issoy issuwara loytti siiqettido gishshawu Hosppune 1955n aqo oyqqida. Meera Yihooway tawu immido imota gidiyogaanne tawu loꞌꞌo leemiso gidiyogaa daro ogetun bessaasu. Meera bawu imettiya ay oosuwankka ufayttawusu. A minna oottiya, haratuyyo wozanappe qoppiyanne ubbatoo Xoossaa Kawotettaabaa kaseyiya asa. (Mat. 6:33) Nuuni heezzu layttawu woradaa oosuwa ootti simmidi, Beeteelen haggaazanaadan 1958n shoobettida.

Meerippe taani darobaa tamaaraas. Leemisuwawu, nuuni aqo oyqqido heeran, Geeshsha Maxaafaappe 15 paydota issippe nabbabanawu kuuyida. Nuuppe issi uri amarida paydota nabbabi simmin, he xiqisetu qofaa haasayoos; qassi nu deꞌuwan waati oosuwan peeshshanaakkokka tobboos. Meera Giiliyaden tamaaridobaa woy misoonaawe gidada haggaazaydda demmidobaa darotoo tawu yootawusu. Taani ippe tamaaridobay haasayata loytta haasayanaadaaninne michchontta waata minttettanaakko eranaadan maaddiis.—Lee. 25:11.

Ta siiqo machchiya Meera 2013n hayqqaasu. Taani iira ooratta alamiyan gayttanawu yeemottays! Hegee gakkanaashin taani ubbatoo tamaaranawunne kumetta wozanan Yihoowan ammanettanawu murttaas. (Lee. 3:5, 6) Taani Yihoowa asay ooratta alamiyan oottanabaa qoppiyogan minettaysinne ufayttays. He wode nuuni nu Gita Asttamaariyabaanne I nuna tamaarissiyo oorattabaa tamaaranaagee qoncce! Ee, Yihooway hanno gakkanawu tana tamaarissido ubbabaa gishshawunne I bessido laggetiyabi baynna kehatettaa gishshawu taani A keehi galatays.