1-2. Cimati oottiyo ‘loꞌꞌo’ oosoti awugeetee?

 INTTE haꞌꞌi galchchawu oottiyageeta gidikko, cima gidanawu koshshiyabata oottanawu baaxetiiddi deꞌennan aggekketa. Intte cimati oottiyo ‘loꞌꞌobata’ oottanawu koyeetii?—1 Xim. 3:1.

² Issi cimay oottiyobati awugeetee? I galchchaara minnidi haggaazees, ishanttanne michchontta minttettanawunne tamaarissanawu baaxetees, qassi eti Yihoowa mintti ammananaadan haasayiyobaaninne oottiyoban maaddees. Geeshsha Maxaafay minni oottiya cimata “imota” gidida asata giyo daro gaasoy deꞌees.—Efi. 4:8.

3. Intte cima gidanawu waatana danddayeetii? (1 Ximootiyoosa 3:1-7; Tiitu 1:5-9)

³ Intte cima gidanawu waatana danddayeetii? Issi uri cima gidanawu kunttana koshshiyabay oosuwa qaxarettanawu kunttana koshshiyabaappe dummatees. Ha alamiyan darotoo, oosuwa qaxariyagee koyiyo hiillati intteyyo deꞌikko, oosuwa demmana danddayeeta. Hegaappe dumma hanotan, intte cima gididi sunttettanawu koyikko, sabbakkiyonne tamaarissiyo hiillay intteyyo deꞌiyogaa xalaalay gidenna. Intte 1 Ximootiyoosa 3:1-7​ninne Tiitu 1:5-9n odettidaagaa mala asa gidanakka koshshees. (Nabbaba.) Ha huuphe yohuwan he xiqisetun odettidabata beꞌana. Issi ishay bawu loꞌꞌo sunttay deꞌanaadan waatana danddayiyakko, so asaa loytti ayssiyagaa gidanawu waatana danddayiyakko, qassi galchchaa ufayttiiddi haggaazanaadan A aybi maaddana danddayiyakko nuuni beꞌana.

LOꞌꞌO SUNTTAY DEꞌIYOGEETA GIDITE

4. ‘Borettennaageeta’ giyogee woygiyogee?

⁴ Cima gidanawu intte ‘borettennaageeta’ gidana bessees; hegaa  giyogee intteyyo loꞌꞌo eeshshay deꞌiyo gishshawu galchchan deꞌiya harati inttebaa loꞌꞌobaa qoppoosonanne ooninne inttena iitaban amassalanaadan oottiya gaasoy baawa giyogaa. Hegaa bollikka, intte galchchaappe ‘kareera deꞌiya asankka nashettiyageeta’ gidana koshshees. Yihoowawu haggaazenna asay intte ammaniyoban maayettennan aggiyogee tuma. Shin eti intte tumanchchanne loꞌꞌo asa gidiyogaa siranaadan oottiya ayba gaasoynne deꞌana bessenna. (Dane. 6:4, 5) Inttena hagaadan oychchite, ‘Galchchaaninne galchchaappe kareera taayyo loꞌꞌo sunttay deꞌii?’

5. Intte ‘loꞌꞌobaa dosiyageeta’ gidiyogaa waati bessana danddayeetii?

⁵ Intte ‘loꞌꞌobaa dosiyageeta’ gidikko, haratuyyo deꞌiya loꞌꞌo eeshshata akeekeetanne hegawu eta galateeta. Intte haratuyyo loꞌꞌobaa oottanawu, ubba koshshiyagaappe aarobaa oottanawu keehi koyeeta. (1 Tas. 2:8; Tii. 1:8) Cimati loꞌꞌobaa dosiyogee keehi koshshiyoy aybissee? Eti galchchan deꞌiyageeta minttettanawunne bantta aawatettaa polanawu bantta alꞌꞌo wodiyappe dariya baggaa goꞌettiyo gishshataassa. (1 PHe. 5:1-3) Eti darobaa oottana koshshikkokka, harata maaddiyogan keehi ufayttoosona.—Oos. 20:35.

6. Imattaa mokkiyo amarida ogeti awugeetee? (Ibraawe 13:2, 16; misiliyakka xeella.)

⁶ Intte mata laggetuyyo xalaala gidennan, haratuyyokka loꞌꞌobaa oottiyo wode ‘imattaa mokkiyageeta’ gidiyogaa besseeta. (1 PHe. 4:9) Geeshsha Maxaafaabaa qonccissiya issi xuufee yootiyogaadan, “imattaa mokkiya uri erenna asaayyokka keheesinne eta ba soo shobbiyogan ufayttees.” Inttena hagaadan oychchite, ‘Imattaa mokkiyogaara gayttidaagan tawu ay mala sunttay deꞌii?’ (Ibraawe 13:2, 16 nabbaba.) Imattaa mokkiya uri ubba asawu kehees. Leemisuwawu, hiyyeesatuyyo, haasayawu shoobettidi yiyageetuyyo, qassi ishanttanne michchontta minttettanawu minnidi oottiya woradaa xomoosiyageetuyyonne haratuyyo kehees.—Doo. 18:2-8; Lee. 3:27; Luq. 14:13, 14; Oos. 16:15; Roo. 12:13.

7. Issi cimay “miishsha siiqennaagaa” waati bessana danddayii?

⁷ ‘Miishsha siiqennaageeta.’ Hegaa giyogee intte miishshaanne aquwa xoqqu ootti xeellekketa giyogaa. Intte dure woy hiyyeesa gidin, intte deꞌo macara ubban Xoossaa Kawotettaa kaseyeeta. (Mat. 6:33) Intte wodiya, wolqqaanne intteyyo deꞌiyabaa Yihoowawu goynnanawu, so asawu koshshiyabaa kunttanawunne  galchchaa maaddanawu goꞌetteeta. (Mat. 6:24; 1 Yoh. 2:15-17) Inttena hagaadan oychchite: ‘Taani miishshaa waata xeelliyanaa? Tawu deꞌiyabay tawu gidana giyanaayye, daro miishshaanne aquwa shiishshanawu bichchaariyanaa?’—1 Xim. 6:6, 17-19.

8. ‘Kiphatanchchanne inttena naagiyageeta’ gidiyogaa waati bessana danddayeetii?

⁸ Intte ‘kiphatanchchatanne inttena naagiyageeta’ gidikko, intte deꞌo macara ubban bessiyagadan haneeta. Leemisuwawu, likkiyappe aaruwan meekketa woy uyekketa; qassi maayiyobaa, puulattiyobaanne allaxxiyobaa akeekan dooreeta. Yihoowawu goynnennaageeti oottiyo shori baynnabaa intte oottekketa. (Luq. 21:34; Yaaq. 4:4) Harati intteyyo meqettaa iitiyo wodekka woppu geeta. Intte ‘mattottekketa’; woy asay inttena ushshanchchadan xeellenna. Inttena hagaadan oychchite, ‘Ta deꞌoy taani kiphatanchchanne tana naagiya asa gidiyogaa bessii?’

9. Intte ‘akeekanchchanne bessiyabaa oottiyageeta’ waani gidana danddayeetii?

⁹ Intte “akeekanchcha” gidikko, waayissiyabay inttena gakkiyo wode hegaara gayttidaagan Geeshsha Maxaafay yootiyo maarata loytti qoppeeta. He hanotaara gayttidaagan Geeshsha Maxaafay yootiyo zoriya intte waati oosuwan peeshshana danddayiyakko qoppiyo gishshawu hanotaa loytti akeekidi loꞌꞌobaa kuuyeeta. Issibaa kuuyanawu dirbboppite. Yaatiyogaappe he allaalliyara gayttida ubbabaa eranawu baaxetite. (Lee. 18:13) Yaatikko Yihoowa qofaara maayettiya loꞌꞌobaa intte kuuyeeta. Intte ‘bessiyabaa oottiyageeta’ gidikko, darajjayettidanne pooꞌissenna asata gideeta. Qassi intte ammanettiyanne kaaletuwa kaalliya asa gidiyogan eretteeta. Ha ubba eeshshati intteyyo loꞌꞌo sunttay deꞌanaadan oottoosona. Issi cimay so asaa loytti ayssanawu awu deꞌana bessiya, Geeshsha Maxaafan odettidabata ane beꞌoos.

INTTE SOO ASAA LOYTTI AYSSITE

10. Issi asi ba keettaa waati loytti ayssana danddayii?

¹⁰ Intte azina gidiiddi cima gidanawu koyikko, intte soo asawukka loꞌꞌo sunttay deꞌana koshshees. Hegaa gishshawu, intte ‘intte keettaa asaa loytti ayssiyageeta’ gidana koshshees. Hegaa giyogee intte soo asawu koshshiyabaa siiquwan kunttananne soo asawu loꞌꞌobaa kuuyana koshshees giyogaa. Intte so asaa goynuwa kaaletteeta, eti Kiristtaane shiiqota shiiqanaadan ootteeta, qassi eti haggaazuwan banttawu danddayettida ubbabaa oottanaadan maaddeeta. Hegaadan oottiyogee keehi koshshiyoy aybissee? Kiitettida Phawuloosi hagaadan giis: “Issi urai ba keettaa aissanau danddayennaagaa gidikko, Xoossaa [galchchaa, NW] waati aissanau danddayii?”—1 Xim. 3:5.

11-12. Issi ishay cima gidanawu koyikko, A naatu eeshshaykka xeelettiyoy aybissee? (Misiliyakka xeella.)

¹¹ Intte aawa gidikko, layttay 18 gakkibeenna intte naati intteyyo ‘azazettiyageetanne bonchchiyageeta’ gidana koshshees. Intte eta siiquwan tamaarissananne loohissana koshshees. Intte eti ufayttanaadan, qassi hara naatuugaadan miiccanaadaaninne kaaꞌanaadan koyiyogee qoncce. Shin eti intteyyo azazettiyageeta, harata bonchchiyageetanne loꞌꞌo eeshshay deꞌiyogeeta gidanaadankka intte eta tamaarissana koshshees. Hegaa bollikka, intte intte naati Yihoowara loytti dabbotanaadan, Geeshsha Maxaafay yootiyo maarata oosuwan peeshshanaadaaninne haattan muukettanawu baaxetanaadan inttessi danddayettida ubbabaa oottana koshshees.

¹² ‘Shori baynnabaa oottiyogaaninne azazettennan ixxiyoban asi amassalenna, ammaniya naati deꞌiyogaa.’ Son deꞌiya ammaniya naꞌi gita nagaraa oottikko, hegee aawaara waani gayttii? He aawi ba naꞌa loohissibeennabanne seeribeennaba gidikko, cima gididi haggaazanawu waayi danddayana.—Xiqimita 15, 1996, Wochchiyo  Keelan sinttaa 21, mentto 6-7 (Amaarattuwa) xeella.

GALCHCHAA MAADDITE

13. Intte ‘ashkkenne intte qofaa xalaalaa kaallennaageeta’ waani gidana danddayeetii?

¹³ Xoossaa ufayssiya eeshshati deꞌiyo ishantti galchchaa keehi maaddoosona. ‘Ashkke’ uri sarotettay deꞌanaadan oottees. Qassi ashkke asi harati yootiyobaa ezggeesinne etayyo siyettiyabaa akeekanawu baaxetees. Intte cima gididabadan qoppite. Cimatu shiiquwan, Geeshsha Maxaafay yootiyo higgiyara woy maaraara phalqqettennabaa cimatuppe daroti kuuyiyo wode, hegaa kaafeetii? ‘Otorettekketa’ woy intte qofaa xalaalaa kaallekketa giyogee harati intte koyiyogaadan oottanaadan iisettekketa giyogaa. Haratu qofaa siyiyogee keehi koshshiyogaa ereeta. (Doo. 13:8, 9; Lee. 5:22) Intte ‘palamettekketa’ woy ‘elle hanqqettekketa.’ Hegee intte harata karekketa woy etaara ooyettekketa giyogaa; ubba intte etawu keheeta. Waayissiya hanotatunkka haratuura sarotettaa medhdhanawu baaxeteeta. (Yaaq. 3:17, 18) Intte kehatettan haasayiyobay inttena eqettiyageeta gujjin, haratikka woppu gaanaadan maaddees.—Daan. 8:1-3; Lee. 20:3; 25:15; Mat. 5:23, 24.

14. “Ooratta ammanida asa” giyogeenne ‘geeshsha’ giyogee woygiyogee?

¹⁴ Cima gidiya ishay “ooratta ammanida asa gidanau bessenna.” Intte haattan muukettidosaappe daro layttay aadhdhana koshshees giyogaa gidana xayikkonne, intte kayma Kiristtaane gidanawu wodee koshshees. Intte cima gididi sunttettanaappe kase Yesuusaagaadan inttena ziqqi oottiyogaa bessananne intteyyo aawatettay imettana gakkanawu Yihoowa danddayan naagana koshshees. (Mat. 20:23; Pili. 2:5-8) Intte Yihooway koyiyogaadan deꞌiyogaaninne A dirijjitee immiyo kaaletuwa kaalliyogan ubbatoo Yihoowawu ammanettikko, ‘geeshsha’ gidiyogaa bessana danddayeeta.—1 Xim. 4:15.

15. Issi cimay haasayaa haasayiyogan keehi gooba gidana koshshii? Qonccissa.

¹⁵ Cimati ‘tamaarissanawu danddayiyageeta’  gidana bessiyogaa Geeshsha Maxaafay qonccissidi yootees. Intte haasayaa haasayiyogan keehi gooba gidana koshshees giyogee? Chii. Cimati ubbay haasayaa haasayiyogan keehi gooba gidennan aggana danddayoosona. Shin eti sabbakiyo wodenne ishanttanne michchontta minttettiyo wode Geeshsha Maxaafaa loytti tamaarissiyageeta gidana koshshees. (1 Xim. 3:2; 1 Qoronttoosa 12:28, 29​ranne Efisoona 4:11​ra gatta xeella.) Intte haasayaa haasayiyogan keehi gooba gidana xayikkokka, tamaarissiyogan qara gidanawu ubbatoo baaxetana koshshees. Intte loꞌꞌo asttamaare gidanawu waatana danddayeetii?

16. Tamaarissiyogan intte waani qara gidana danddayeetii? (Misiliyakka xeella.)

¹⁶ ‘Ammanettiya qaalaa intte mintti oyqqite.’ Intte loꞌꞌo asttamaare gidanawu ishanttanne michchontta tamaarissiyo wodenne zoriyo wode ubbatoo Geeshsha Maxaafaa goꞌettite. Yaatanawu intte Geeshsha Maxaafaanne nu xuufeta loytti xannaꞌana koshshees. (Lee. 15:28; 16:23; Tii. 1:9) Intte xannaꞌiyo wode Geeshsha Maxaafay yootiyobaa oosuwan peeshshana danddayiyo likke ogiya loytti akeekite. Qassi tamaarissiyo wode ezggiyageeti Yihoowa loytti siiqanaadan maaddanawunne eti eridobaa oosuwan peeshshanaadan denttettanawu baaxetite. Meezee deꞌiyo cimata zoriya oychchikko, qassi eti yootiyobaa oosuwan peeshshikko, tamaarissiyogan qara gidana danddayeeta. (1 Xim. 5:17) Cimati ishanttanne michchontta ‘minttettanawu danddayiyageeta’ gidana koshshees; shin cimati issi issitoo eta “zoranau” woy seeranawukka koshshees. He hanotatun cimati ubbatoo keha gidana koshshees. Intte qarettiyageetanne siiqiyageeta, qassi Xoossaa Qaalaa goꞌettidi tamaarissiyageeta gidikko Gita Asttamaariya, Yesuusa leemisuwa kaalliyo gishshawu loꞌꞌo asttamaare gideeta.—Mat. 11:28-30; 2 Xim. 2:24.

BAAXETIYOGAA AGGOPPITE

17. (a) Galchchawu oottiyageeti baaxetiyogaa aggennaadan aybi maaddana danddayii? (b) Cimati ishantti sunttettanaadan yiggiyo wode ay qoppana koshshii? (“ Harata Yiggiyo Wode Bessiyagaadan Qoppite” giya saaxiniya xeella.)

¹⁷ Galchchawu oottiya amaridaageeti cima gidanawu  etappe koyettiya darobay deꞌiyo gishshawu, cima gidanawu mule danddayokko giidi qoppana danddayoosona. Shin Yihoowaykka woy A dirijjiteekka intte wottiyobi baynnaageeta gidanaadan naagennaagaa hassayite. (Yaaq. 3:2) Qassi wolqqaama gidida Yihoowa ayyaanay intteppe koyettiyabata kunttanaadan inttena maaddana. (Pili. 2:13) Intte loytti bessana koyiyo issi eeshshay deꞌii? Hegaabaa Yihoowa woossite. He eeshshaabaa pilggite; qassi he eeshshaa loytti bessana danddayiyo ogiya yootanaadan issi cimaa oychchite.

18. Galchchawu oottiyageeti ubbay waatanaadan zoree imettidee?

¹⁸ Haꞌꞌi cima gididi haggaaziiddi deꞌiyageeta gujjin, ishantti ubbay ha huuphe yohuwan pilggido eeshshata aggennan bessanawu murttidaageeta gidite. (Pili. 3:16) Intte galchchawu oottiyageetee? Yaanikko baaxetiyogaa aggoppite! Intte kaseegaappe aaruwan Yihoowawu haggaazanaadaaninne galchchaa maaddanaadan inttena loohissana mala A woossite. (Isi. 64:8) Intte cima gidanawu baaxetiyo baaxiya Yihooway darissidi anjjanaadan amottoos.