1. Geeshsha Maxaafay yootiyo loˈˈo zoriyaa daroti waati xeelliyoonaa? (Leemiso 1:20, 21)

 DARO biittatun asay corattiyoosan ufayttiiddi nu ishanttinne michchontti asawu xuufiyaa immiyoogaa beˈiyoogee meeze gididaba. Neenikka hegaadan oottennan aggakka. Qassi, asay maaddiya zoriya siyana mala dabaaban ba qaalaa xoqqu oottidi xeesiya aadhdhida eratettaabaa yootiya, Leemiso maxaafan deˈiya xiqisiyaabaa neeni qoppanaadan hagee oottennan aggenna. (Leemiso 1:20, 21 nabbaba.) Geeshsha Maxaafaynne nu xuufeti ‘aadhdhida eratettaabaa,’ hegeekka Yihoowa aadhdhida eratettaabaa yootoosona. Asay merinaa deˈuwaa demmana mala ha aadhdhida eratettay keehi koshshiyaaba. Issi uri nu xuufetuppe issuwaa ekkiyo wode keehi ufayttoos. SHin ekkiyay ubba asaa gidenna. Amaridaageeti Geeshsha Maxaafay yootiyoobaa siyanawu koyokkona. Harati qassi nu bolli miiccoosona. Eti Geeshsha Maxaafay ha wodiyawu hanennaba giidi qoppoosona. Geeshsha Maxaafaa zoriyaa kaalliyaageeta meqetti baynnaageeta woy haratu bolli pirddiyaageeta giidi eti qoppoosona. Gidikkonne, Yihooway ba aadhdhida eratettaa asa ubbawu siiquwan yootiyoogaa aggibeenna. I hegaadan waati oottii?

2. Nuuni ha wodiyan aadhdhida eratettaa awuppe demmana danddayiyoo, shin daro asay dooriyoobay aybee?

² Issi ogee, Yihooway ba Qaalaa, Geeshsha Maxaafaa ubba asay demmanaadan oottiyoogaana. Geeshsha Maxaafaa qofay deˈiyo nu xuufetubaa shin? Nu xuufeti 1,000ppe dariya qaalan deˈiyo gishshawu nuuni Yihoowa galatoos. Hegaa siyiyaageeti, nabbabiyaageetinne oosuwan peeshshiyaageeti goˈettana. Gidikkonne, daro asay Yihooway yootiyoobaa siyennan agganawu  kuuyiis. Eti issibaa kuuyiyo wode, banttanan ammanettoosona woy bantta mala asay yootiyoobaa siyoosona. Nuuni Geeshsha Maxaafay yootiyoobaa kaalliyo gishshawu eti nuna toochchoosona. Asay nuna hegaadan xeelliyo aybissakko ha huuphe yohoy qonccissana. SHin nuuni aadhdhida eratettaa Yihoowappe waatidi demmana danddayiyaakko ane koyro beˈoos.

3. Nuuni aadhdhida eratettay deˈiyoogeeta gidanawu waatana koshshii?

³ Aadhdhida eratettay nuuni loˈˈobaa kuuyanawu nu eridobaa goˈettiyoogaa qonccissiyaaba. SHin tumu aadhdhida eratettay hegaappe aadhdhiyaabaa qonccissees. Geeshsha Maxaafay hagaadan gees: “Aadhdhida eratettaassi doomettai GODAASSI yayyiyoogaa; Geeshsha GODAA eriyoogee akeekiyoogaa.” (Lee. 9:10) Yaatiyo gishshawu, nuuni keehi koshshiya issibaa kuuyiyo wode hegaa xeelliyaagan Yihoowa qofay aybakko akeekana koshshees. Nuuni Geeshsha Maxaafaanne nu xuufeta nabbabiyo wode hegaadan oottana danddayoos. Yaatiyo wode, aadhdhida eratettay deˈiyoogeeta gidiyoogaa bessoos.—Lee. 2:5-7.

4. Nuuni aadhdhida eratettaa demmana danddayiyoy Yihoowa xalaalaappe gididoy aybissee?

⁴ Nuussi aadhdhida eratettaa immana danddayiyay Yihoowa xalaala. (Roo. 16:27) Aadhdhida eratettay Yihoowappe yees giyoy aybissee? Koyruwan, Yihooway nuna Medhdhidaagaa gidiyo gishshawu, ba medhdhidobaa xeelliyaagan ubbabaa erees. (Maz. 104:24) Naaˈˈanttuwan, Yihooway ubbabaa aadhdhida eratettan oottees. (Roo. 11:33) Heezzanttuwan, Yihooway aadhdhida eratettan zoriyoobay hegaa oosuwan peeshshiyaageeta awudenne maaddees. (Lee. 2:10-12) Nuuni aadhdhida eranchcha gidanawu koyikko, he heezzubata ammanananne nuuni kuuyiyoobaaninne oottiyooban hegeeta kaallanawu eeno gaana koshshees.

5. Aadhdhida eratettaa demmana danddayiyoy Yihoowa xallaappe gidiyoogaa asay ammanennaagee ay kaalettidee?

⁵ Haggaazuwan nunaara gayttiya daroti maalaalissiya meretati makkisettidi giigidoogaa ammanikkonne, eti medhdhidaagee baawa yaagoosona. Nunaara gayttiya harati Xoossay deˈiyoogaa ammanoosona, shin eti Geeshsha Maxaafay tamaarissiyoobaa wodee aadhdhichchidobadan qoppoosonanne bantta shenedan deˈanawu koyoosona. Hegee ay kaalettidee? Asay Xoossan gidennan, bantta eratettan ammanettiyo gishshawu ha alamee giiga soho gididee? Eti tumu ufayssaa demmidonaa woy ammanttiya hidootay etawu deˈii? Nuuni beˈiyo hanotati ha tumaa akeekanaadan oottoosona: “Asi ba aadhdhida eratettan, akeekaaninne zoriyan GODAARA eqettanau danddayenna.” (Lee. 21:30) Yihooway nuussi aadhdhida eratettaa immana mala nuuni ubbatoo oychchanaadan hegee nuna denttettees! Azzanttiyaabay, daro asay hegaadan oottenna. Aybissi?

6. Leemiso 1:22-25y yootiyoogaadan, Yihooway yootiyo aadhdhida eratettaa siyanawu koyennaageeti oonee?

⁶ Daroti aadhdhida eratettiyaa ‘ogiyan xeesiyoogaa’ siyanawu koyokkona. Geeshsha Maxaafay yootiyoogaadan aadhdhida eratettaa ixxiya heezzu citati deˈoosona: ‘Akeekay paccidoogeeta,’ ‘qilliicciyaageeta,’ qassi ‘eeyyata.’ (Leemiso 1:22-25 nabbaba.) He asati Xoossaa aadhdhida eratettaa ixxiyoy aybissakko, qassi nuuni waanidi eta mala gidennan aggana danddayiyaakko ane loyttidi beˈoos.

7. Issoti issoti ‘akeekay paccidoogeeta’ gididi deˈanawu kuuyidoy aybissee?

⁷ ‘Akeekay paccidoogeeti’ siyido ubbabaa ammanoosonanne sohuwaara cimettoosona.  (Lee. 14:15) Nuuni darotoo hegaa mala asatuura haggaazuwan gayttoos. Leemisuwawu, daro miiloone asay haymaanootiyaa kaalettiyaageetun woy polotika asatun cimettiyoogaa qoppa. Amaridaageeti banttana kaalettiyaageetun cimettidoogaa eriyo wode keehi dagammoosona. SHin, Leemiso 1:22n odettida akeekay paccido asati hegaadan deˈanawu dooriyo gishshawu laamettennan agganawu kuuyoosona. (Erm. 5:31) Eti banttana ufayssiyaabaa xallaa oottoosona. Qassi Geeshsha Maxaafay yootiyoobaa tamaaranawu woy an deˈiya higgetuyyo azazettanawu koyokkona. Kanaadan, Kiyubeeken deˈiya haymaanootiyaa mintta kaalliya issi maccaaseegaadan daro asawu siyettees; A issi Yihoowa Markkawu hagaadan gaasu: “Nu qeesee nuna cimmikko mooroy aagaappe attin nuugaa gidenna!” Nuuni eriiddi sheneho giya asatu mala gidanawu koyokko.—Lee. 1:32; 27:12.

8. Aadhdhida eratettaa demmanawu nuna aybi maaddanee?

⁸ Nuuni akeekay paccidoogeeta gidennan, “wozannaamata” gidanaadan Geeshsha Maxaafay minttettiyo loˈˈo gaasoy deˈees. (1 Qor. 14:20) Nuuni nu deˈuwan Geeshsha Maxaafay yootiyo maarata oosuwan peeshshiyoogan aadhdhida eratettaa demmoos. Nuuni yaatiyo wode, metuwan gelennaadaaninne loˈˈobaa kuuyanaadan Geeshsha Maxaafay nuna keehi maaddiyoogaa akeekana. Hegaara gayttidaagan nuuni laamettiiddi deˈiyaakkonne nuna qoriyoogee loˈˈo. Leemisuwawu, neeni Geeshsha Maxaafaa xannaˈaasanne shiiqota shiiqaasa, shin nena Yihoowawu sheedhdhada xammaqettabeennaba gidikko, neeni hanno gakkanawu xammaqettabeennay aybissakko qoppana bessees. Neeni xammaqettidaba gidikko, mishiraachchuwaa sabbakiyoogaaninne tamaarissiyoogan kaseegaappe aaruwan qara gidaydda deˈay? Neeni kuuyiyoobay Geeshsha Maxaafaappe neeni tamaaridobaa oosuwan peeshshiyoogaa bessii? Yesuusaagaadan harata bonchchay? Neeni giigissana koshshiyaabay deˈikko, ‘akeekay paccidoogeetussi eratettaa immiya,’ Yihoowa hassayissuwaa loytta qoppana koshshees.—Maz. 19:7.

9. ‘Qilliicciyaageeti’ aadhdhida eratettaa ixxiyoogaa waati bessiyoonaa?

⁹ Xoossaappe yiya aadhdhida eratettaa eqettiya, naaˈˈantto citan deˈiyaageeti ‘qilliicciyaageeta.’ Nuuni sabbakiyo wode, hegaa mala asatuura issi issitoo gayttoos. Eti harata qilliicciyoogan ufayttoosona. (Maz. 123:4) Wurssetta gallassatun daro asati qilliicciyaageeta gidanaagaa Geeshsha Maxaafay yootees. (2 PHe. 3:3, 4) Looxe macca naata giigissidaageetudan, ha wodiyan deˈiya amarida asay Xoossaa akeekissuwaa siyanawu koyenna. (Doo. 19:14) Geeshsha Maxaafay yootiyoobaa azazettiyaageetu bolli daroti miiccoosona. ‘Bantta Xoossi baynna amuwaa’ eti kaallanawu koyiyo gishshawu hegaadan oottoosona. (Yih. 7, 17, 18) Qilliicciyaageeti kaddidaageetunne Yihoowa aggida haratu mala gidiyoogaa Geeshsha Maxaafay loytti yootees!

10. Mazamure 1:1 yootiyoogaadan, nuuni qilliicciyaageeta gidennaadan waani naagettana danddayiyoo?

¹⁰ Nuuni qilliicciyaageeta gidennaadan waani naagettana danddayiyoo? Issi ogee boriyaageetuura laggetennan aggiyoogaana. (Mazamure 1:1 nabbaba.) Hegaa giyoogee kaddidaageeti yootiyoobaa siyana woy etabaa aybanne nabbabana koshshenna giyoogaa. Nuuni boriyoogaappe qassi Yihoowappenne A dirijjitiyaappe imettiya kaaletuwaa siriyoogaappe naagettana koshshees. Yaatiyo gishshawu, nuna hagaadan oychchana koshshees: ‘Ooratta kaaletoy imettiyo wode, woy kase akeekidobay laamettiyo wode taani ubbatoo amassaliyaanaa? Taani aawatettay deˈiyoogeetun balaa koyiyaanaa?’ Nuuni yaatiyoogaa sohuwaara aggiyo wode Yihooway nunan ufayttana.—Lee. 3:34, 35.

11. Yihooway kessido kandduwaa maaraa ‘eeyyati’ waati xeelliyoonaa?

 ¹¹ Heezzantto citan deˈiyaageeti aadhdhida eratettaa ixxiya ‘eeyyata.’ Eti Xoossay kessido kandduwaa maaraadan deˈanawu koyenna gishshawu eeyyata geetettidosona. Eti banttawu loˈˈo milatidabaa oottoosona. (Lee. 12:15) Hegaa mala asati aadhdhida eratettawu Pultto gidida Yihoowa ixxoosona. (Maz. 53:1) Nuuni haggaazuwan etaara gayttiyo wode, Geeshsha Maxaafay yootiyo maaraa kaalliyo gishshawu eti nuna darotoo keehi boroosona. SHin eti nuussi kehabaa aybanne oottana danddayokkona. Geeshsha Maxaafay hagaadan gees: “Eeyyai aadhdhida eratettaa akeekanau danddayenna; au yaa7ankka odiyoobi aibinne baawa.” (Lee. 24:7) Eeyya uri zorana danddayiyo loˈˈobi aybinne baawa. “Eeyya asappe haakka” giidi Yihooway yootidoy hegaassa!—Lee. 14:7.

12. Nuuni eeyyatu mala gidennaadan nuna aybi maaddanee?

¹² Nuuni Xoossaa zoriyaa ixxiya asatu mala gidokko. Xoossaa higgiyaa ubbaa gujjin, Xoossay qoppiyo ogiyaa nuuni tamaariyoogaa dosoos. Azazettiyaageetinne azazettennaageeti demmiyoobaa geeddarssiyoogan he siiquwaa minttana danddayoos. Asay eeyyatettan Yihooway zoriyo loˈˈo zoriyaa ixxiyo gishshawu daro metuwan geliyoogaa akeeka. Yaatada, neeni Xoossawu azazettiyo gishshawu ne deˈoy ay keena giiga gididaakko qoppa.—Maz. 32:8, 10.

13. Yihooway nuuni A loˈˈo zoriya siyanaadan wolqqanttii?

¹³ Yihooway ba aadhdhida eratettaa ubbawu immees, shin hegaa ekkanaadan I oonanne wolqqanttenna. Gidikkonne, Yihooway I yootiyo aadhdhida eratettaa siyennaageetu bolli gakkanabaa yootiis. (Lee. 1:29-32) Yihoowawu azazettennaageeti “bantta oottido oosuwaa aifiyaa maana.” Guyyeppe, eti bantta deˈido ogiyaa gaasuwan keehi azzanananne waayettana; qassi wurssettan Yihooway eta xayssana. Hara baggaara qassi Yihooway zoriyo loˈˈo zoriya siyiyaageetanne hegaa oosuwan peeshshiyaageeta xeelliyaagan I hagaadan giis: “Taani odiyoogaa siyiyaageeti ubbai woppu giidi, saro de7ana; metuwaa hirggaappekka shemppana.”—Lee. 1:33.

14-15. Leemiso 4:23ppe nuuni ay tamaariyoo?

¹⁴ Xoossaappe yiya aadhdhida eratettaa nuuni oosuwan peeshshiyo wode ubbatoo goˈettoos. Nuuni beˈidoogaadan, Yihooway ooninne metootennan loˈˈo zoriya demmanaadan oottees. Leemisuwawu, nuuni oosuwan peeshshiyaaba gidikko nu deˈoy giiga gidanaadan maaddiya loˈˈo zoriya Leemiso maxaafaa baggaara I nuna zorees. He loˈˈo zoretuppe oyddatu xallaa ane beˈoos.

¹⁵ Ne wozanaa naaga. Geeshsha Maxaafay hagaadan gees: “Ubbabaappekka ne wozanaa minttada naaga; aissi giikko, de7oi appe pulttees.” (Lee. 4:23) Nuuni nu wozanaa naaganawu oottana koshshiyaabata ane qoppa. Nuuni bollawu maaddiya qumaa maana, ispporttiyaa  oottananne iita meezetuppe haakkana koshshees. Nu leemiso wozanaa naaganawukka hegaara issi malabaa oottanawu koshshees. Nuuni ubba galla Xoossaa Qaalaa nabbabana koshshees. SHiiqota shiiqanawunne shiiqotun qofaa yootanawu giigettana koshshees. Nuuni ubbatoo haggaazanawu baaxetiyoogan minnidi deˈana koshshees. Qassi pokkoban allaxxiyoogaanne iita laggetuura zuppetiyoogaa mala nu qofaa moorana danddayiya aybippenne haakkiyoogan, iita meezetuppe naagettana danddayoos.

16. Leemiso 23:4, 5y ha wodiyan nuna keehi maaddiyoy aybissee?

¹⁶ Neessi deˈiyaaban ufayttada deˈa. Geeshsha Maxaafay hagaadan zorees: “Duretanau daafuroppa. . . . Hegaa mala duretettai neeni xeellishin xayana; qefiyaa kessidi argganttaagaadan, saluwaa paallana.” (Lee. 23:4, 5) Miishshaynne aqoy qoppennan xayana danddayees. Gidikkonne, ha wodiyan duretikka hiyyeesatikka miishshaa demmanawu bichchaaroosona. Eti ubbatoo bantta sunttaanne bantta dabbotaa mooriyaabaa, ubba qassi bantta payyatettaa qohiyaabaa oottiyoy hegaassa. (Lee. 28:20; 1 Xim. 6:9, 10) Hara baggaara qassi, aadhdhida eratettay nuuni miishshaa xeelliyaagan keehi hirggennaadan maaddees. Qassi hegee, yaaretennan nuussi deˈiyaabay gidana giidi ufayttidi deˈanaadan maaddana.—Era. 7:12.

17. Leemiso 12:18n qonccidaagaadan, nuuni “aadhdhida eranchchaa inxxarssai” deˈiyoogeeta waani gidana danddayiyoo?

¹⁷ Haasayanaappe kasetada qoppa. Nuuni naagettana xayikko, haasayiyooban harata keehi qohana danddayoos. Geeshsha Maxaafay hagaadan gees: “Akeekennan haasayiyo haasayai cu[b]edan caddees; shin aadhdhida eranchchaa inxxarssai pattees.” (Lee. 12:18) Haratu balaa denttidi haasayiyoogaappe naagettiyoogan sarotettay deˈanaadan oottana danddayoos. (Lee. 20:19) Nu haasayiyoobay asaa qohiyaaba gidennan minttettiyaaba gidanaadan koyikko, nuuni Xoossaa Qaalaa nabbabananne hegaa wotti dentti qoppana koshshees. (Luq. 6:45) Geeshsha Maxaafay yootiyoobaa nuuni wotti dentti qoppiyo wode, nu haasayiyoobay harata minttettiya “aadhdhida eratettaa [pulttuwaa] mala” gidana.—Lee. 18:4.

18. Leemiso 24:6 oosuwan peeshshiyoogee haggaazuwan nuna waati maaddana danddayii?

 ¹⁸ Kaaletuwaa kaalla. Geeshsha Maxaafay hagaadan giidi loˈˈo zoriyaa zorees: “Neeni olau kiyanaappe kasetada halchchuwaa halchchana koshshees; daro zoriyaageetu zoriyan xoonoi beettees.” (Lee. 24:6) Nuuni sabbakiyoogaaninne tamaarissiyoogan qara gidanaadan ha xiqisiyan deˈiya maaraa oosuwan peeshshiyoogee waati maaddii? Nu koyiyoogaadan sabbakiyoogaappenne tamaarissiyoogaappe nuussi imettiya kaaletuwaa kaallanawu baaxetana koshshees. Zoriyoogan meezee deˈiyoogeeti Geeshsha Maxaafaappe haasayaa haasayiyoonne kifileta shiishshiyoogan nuna loohissiyo, Kiristtaane shiiqotuppe loˈˈo kaaletuwaa demmoos. Qassi, nuuni Geeshsha Maxaafaa akeekanaadan maaddiya xuufetanne biidota Yihoowa dirijjitee nuussi giigissees. Neeni hegeeta loytta goˈettanawu baaxetana koshshees.

19. Yihoowappe yiya aadhdhida eratettaa neeni waata xeellay? (Leemiso 3:13-18)

¹⁹ Leemiso 3:13-18 nabbaba. Xoossaa Qaalan deˈiya keehi loˈˈo zoriyaa gishshawu, Yihoowa keehi galatoos! Hegee baynnaakko woni nuuni waananee! Leemiso maxaafan deˈiya loˈˈo zoretuppe amaridaageeta ha huuphe yohuwan beˈida. Kumetta Geeshsha Maxaafan Yihooway yootiyo loˈˈo zoree deˈiyoogee qoncce. Nuuni nu deˈo ubban ha zoriyaa oosuwan peeshshana koshshees. Daro asay Xoossaappe yiya aadhdhida eratettaa nashshenna; shin nuuni “[aadhdhida eratettaa] mintti oiqqiya ubbatikka anjjettidaageeta” woy ufayttiyaageeta gidiyoogaa ammanoos.