1. Yesuusi erissiyo ashkkarati keehi cora asay waatanaadan odidonaa?

KEEHI cora attumaageetinne maccaageeti Yerusalaame biidosona. Eti dumma dumma gidida daro biittaa asanne dumma dumma daro doonaa haasayoosona. He gallassi maalaalissiyaabay haniis. Amarida Ayhudati qoppennan hara biittaappe yiidaageetu doonaa haasayidosona! Hegee shiiqida cora asay maalaalettanaadan oottikkonne, Ayhudatinne kiitettida PHeexiroosi asa ubbawu yootidobay hegaappe aaruwan maalaaliyaaba. He cora asay Yesuus Kiristtoosan ammaniyoogaa bessikko eti attana danddayiyoogaa tamaaridosona. Siyidobay eta wozanaa keehi denttettiis. Hegaa gishshawu asay hagaadan oychchiis: “Yaanin nuuni ai oottanee?” PHeexiroosi hagaadan giidi zaariis: “Intte huuphiyan huuphiyan . . . xammaqettite.”—Oos. 2:37, 38.

2. Ha huuphe yohuwan ay xannaˈanee? (Koyro sinttan deˈiya misiliyaa xeella.)

² Kaallidi hanidabay keehi maalaalissiyaaba. He galla 3,000 gidiya asay xammaqettidi Kiristtoosi erissiyo ashkkara gidiis. Hegee Yesuusi bana kaalliyaageeti oottanaadan azazido erissiyo ashkkara oottiyo gita oosuwawu doometta. A kaalliyaageeti ha wodiyankka he oosuwaa oottoosona. Ha wodiyan, nuuni issi ura amarida saatiyawu haasayissidi I xammaqettanaadan maaddana danddayokko. Issi xinaatee xammaqettanaadan oottiyoogee aginata woy qassi laytta woy hegaappe daro wodiyaa ekkana danddayees. Neeni issi uraa Geeshsha Maxaafaa xannaˈissaydda deˈiyaaba gidikko, issi uri Kiristtoosi erissiyo ashkkara gidanaadan maaddanawu oottiyo oosoy minnidi oottiyoobaa gidiyoogaa neeni loytta eraasa. Nuuni Geeshsha Maxaafaa xannaˈissiyo uri xammaqettanaadan maaddanawu nu waatana danddayiyaakko ha huuphe yohuwan xannaˈana.

3. Maatiyoosa 28:19, 20n odettidaagaadan, xinaateti xammaqettanawu waatana bessii?

³ Geeshsha Maxaafaa xinaatee xammaqettanaappe kase, Geeshsha Maxaafay tamaarissiyoobaa oosuwan peeshshana koshshees. (Maatiyoosa 28:19, 20 nabbaba.) Xinaateti tamaariyoobaa oosuwan peeshshiyo wode, Yesuusi leemisuwan yootido, ba keettaa shuchchaa bolli keexxanawu loytti bookkida “wozannaama asa” mala gidoosona. (Maa. 7:24, 25; Luq. 6:47, 48) Xinaateti tamaariyoobaa oosuwan peeshshanaadan waati maaddana danddayiyoo? Nuuni oottana danddayiyo heezzubaa ane beˈoos.

4. Xinaateti xammaqettanawu minni oottana mala nuuni waati maaddana danddayiyoo? (“ Ne Xinaatee Halchchanaadaaninne Hegaa Polanaadan Maadda” giya saaxiniyaakka xeella.)

⁴ Ne xinaatee halchchuwaa kessanaadan maadda. Neeni hegaadan oottana koshshiyoy aybissee? Ha leemisuwaa qoppa: Neeni haaho sohuwaa gediyan manddaraydda deˈiyaaba gidikko, shaafati woy dereti deˈiyo keehi loˈˈiyaasan takki gaanawu kuuyana danddayaasa. He wode, ogee ay keena haahokko akeekakka. Hegaadan, ne xinaatee mata wode gakkana danddayiyo halchchota halchchiyo wode, I xammaqettanawu halchchidoogaa polana danddayiyaakkonne akeekana. Ne xinaatee halchchanaadan maaddanawu Merinawu Ufayttada Deˈa! giya maxaafan “Halchchanabaa” giya saaxiniyaa goˈetta. Halchchiyoogee ne xinaatee tamaariyoobaa oosuwan peeshshanaadan waati maaddiyaakko issi issi timirttiyaa wurssiyo wode tobbite. Ne xinaatee halchchanaadan neeni koyiyo hara halchchoy deˈikko, “Harabaa” giya sohuwan xaafana danddayaasa. Ne xinaatiyaara I mata wode gakkana danddayiyoonne hegaappe takkidi gakkana danddayiyo halchchota tobbiyo wode he saaxiniyaa ubbatoo goˈetta.

5. Marqqoosa 10:17-22y yootiyoogaadan, issi dure bitanee ay oottanaadan Yesuusi odidee, qassi aybissi?

⁵ Ne xinaatee ba deˈuwan gitabaa laammanaadan maadda. (Marqqoosa 10:17-22 nabbaba.)  Issi dure bitanee ba aqo ubbaa bayzziyoogee ayyo deexxiyaaba gidiyoogaa Yesuusi erees. (Mar. 10:23) SHin, Yesuusi he bitanee ba deˈuwan gitabaa laammanaadan yootiis. Aybissi? Yesuusi A siiqido gishshaassa. Xinaatee koshshiyaaban laamettana danddayenna giidi nuuni qoppiyo gishshawu, tamaariyoobaa I oosuwan peeshshanaadan issi issitoo A minttettennan aggana danddayoos. Asay ceega asatettaa laammiyoogeenne ooratta asatettaa maayiyoogee wode ekkiyaaba gidana danddayees. (Qol. 3:9, 10) SHin xinaatee laammana koshshiyaabaa neeni sohuwaara aara haasayikko, I laammiyoogaa sohuwaara doommana danddayees. Hegaadan haasayiyoogee neeni awu qoppiyoogaa bessees.—Maz. 141:5; Lee. 27:17.

6. Nu xinaatee ba qofaa yootanaadan nuuni oychchana koshshiyoy aybissee?

⁶ Issibaa xeelliyaagan nu xinaatee ba qofaa yootanaadan nuuni A oychchiyoogee keehi koshshiyaaba. Yaatiyoogee ne xinaatiyawu siyettiyaabaanne I ammaniyoobaa eranaadan maaddees. Neeni hegaadan ubbatoo oottiyoogee, ammananawu awu deexxana danddayiyaabaa metootennan tobbanaadan maaddees. Merinawu Ufayttada Deˈa! giya maxaafan xinaatee ba qofaa qonccissanaadan maaddiya daro oyshati deˈoosona. Leemisuwawu, timirtte 04n hagaadan gees: “Neeni Yihoowa sunttaa xeesiyo wode awu aybi siyettees gaada qoppay?” Timirtte 09n hagaadan gees: “Neeni woossanawu koyiyo amaridabati aybee?” Ha oyshata zaariyoogee ne xinaatiyaa koyro heeran metana danddayees. Maxaafan deˈiya xiqisetubaanne misiletubaa I yuushshi qoppanaadan loohissiyoogan A maaddana danddayaasa.

7. Nuuni haratu deˈuwan hanida tumubaa waati loytti goˈettana danddayiyoo?

⁷ Ne xinaatee waatana koshshiyaakko akeekiyo wode, I hegaa oottanaadan A minttettanawu deˈuwan hanida tumubaa yoota. Leemisuwawu, ne xinaatee shiiqota shiiqanawu metootikko, timirtte 14n “Pilgga” giya shaahuwan Yihooway Tana Maaddiis giya biiduwaa A bessana danddayaasa. Merinawu Ufayttada Deˈa! giya maxaafan daro timirttetun, “Loytta Akeeka” woy “Pilgga” giya shaahuwan deˈuwan hanida hegaa malabay deˈees. * “I hegaa oottana danddayikko neenikka oottana danddayaasa” giyoogan ne xinaatiyaa hara uraara geeddarissenna mala naagetta. Xinaatee hegaa bawu kuuyana koshshees. Geeshsha Maxaafay tamaarissiyoobaa oosuwan peeshshanaadan biiduwan beˈido ura maaddidabaa yoota. Geella neeni keehi koshshiya xiqisiyaa qonccissana woy A maaddidabaa yootana danddayaasa. Yihooway A waati maaddidaakko danddayettida ubban qonccissa.

8. Nu xinaatee Yihoowa siiqanaadan waati maaddana danddayiyoo?

⁸ Ne xinaatee Yihoowa siiqanaadan maadda. Waatada? Yihoowa eeshshatubaa ne xinaatee loytti eranaadan maaddana danddayiyo ogiyaa koya. Yihooway bana siiqiyaageeta maaddiya ufayttiya Xoossaa gidiyoogaa ne xinaatee akeekanaadan maadda. (1 Xim. 1:11; Ibr. 11:6) Xinaatee Yihoowa azazota azazettiyoogee A goˈˈanaagaa yoota, qassi hegee Yihooway A siiqiyoogaa bessiyaaba gidiyoogaa awu qonccissa. (Isi. 48:17, 18) Ne xinaatee Yihoowa kaseegaappe aaruwan siiqiyo wode, koshshiyaaban laamettanawu I keehi koyana.—1 Yoh. 5:3.

9. Marqqoosa 10:29, 30 maaran, issi uri xammaqettidi erissiyo ashkkara gidanawu issi issibaa aggibayanaadan aybi maaddana danddayii?

⁹ Nuuni Geeshsha Maxaafaa xannaˈissiyo uri xammaqettanawu ba goˈˈaa aggibayana koshshees. Qommoora abaa denttido dure bitaniyaagaadan, amarida xinaateti bantta aquwaa  aggibayiyoogee koshshana danddayees. Eti oottiyo oosoy Geeshsha Maxaafay yootiyo maaratuura maayettennaba gidikko, eti oosuwaa laammiyoogee koshshana danddayees. Yihoowa siiqennaageetuura laggetiyoogaa aggiyoogee darotussi koshshana danddayees. Harati qassi Yihoowa Markkata ixxiya eta soo asay aggibayidoogeeta gidana danddayoosona. Hegaadan aggibayiyoogee issi issi asawu deexxana danddayiyoogaa Yesuusi yootiis. SHin I bana kaalliyaageeti azzanana koshshennaagaa yootiis. Yihooway ayyaanaaban so asaa gidida siiqiyaageeta immiyoogan eta woytana. (Marqqoosa 10:29, 30 nabbaba.) He loˈˈo imotan ne xinaatee goˈettanaadan waata maaddana danddayay?

10. Manweli yootidobaappe neeni ay tamaaray?

¹⁰ Ne xinaatiyawu mata lagge gida. Neeni ne xinaatiyawu qoppiyoogaa bessiyoogee keehi koshshiyaaba. Aybissi? Mekisiiko biittan deˈiya Manweli giidobaa akeeka. Geeshsha Maxaafaa I xannaˈiyo wode, A xannaˈissiyaagee waati maaddidaakko yootiis. I hagaadan giis: “Nuuni xinaatiyaa doommanaappe kase, ubba galla I ta hanotaabaa tana oychchees. Taani yayyennan aybanne aara haasayanaadan I maaddiis. I tawu wozanappe qoppiyoogaa akeekaas.”

11. Nu xinaateti nunaara wodiyaa aattiyoogan waati goˈettana danddayiyoonaa?

¹¹ Yesuusi bana kaalliyaageetuura wodiyaa aattidoogaadan, ne xinaatetuura wodiyaa aatta. (Yoh. 3:22) Ne xinaatee ba deˈuwan issi issiban laamettiyoogaa doommikko, ne son tukkiyaa uyanaadan woy qumaa maanaadan woy aginan aginan kiyiya brodkasttingiyaappe issuwaa beˈanaadan shoobbana danddayaasa. Ne xinaatiyaa laggetinne eta soo asay worddo haymaanootiyaara gayttida baalata bonchchiyo wode, I boorasana danddayiyo gishshawu neeni he galla A shoobbiyaakko keehi ufayttana danddayees. Uugandda biittan deˈiya Kazibewi hagaadan giis: “Taani xannaˈiyo wode Yihoowabaa eridoogaappe aaruwan tana xannaˈissiyaagaara wodiyaa aattiyoogan loyttada eraas gaada qoppays. Yihooway ba asawu keehi qoppiyoogaanne eti keehi ufayttiyoogaa taani akeekaas. Taanikka ta deˈuwan hegaadan ufayttanawu koyays.”

12. Xannaˈissiyo wode dumma dumma aassiyaageeta efaana koshshiyoy aybissee?

 ¹² Xannaˈissiyo wode dumma dumma aassiyaageeta shoobba. Xannaˈissanawu biyo wode nuuni nurkka biyoogee woy ubbatoo issi ura xallaa efiyoogee metennaba giidi issi issitoo qoppana danddayoos. Yaatiyoogee metennaba gidikkonne, dumma dumma aassiyaageeta nunaara issi issitoo efiyoogee nu xinaatiyaa keehi maaddana. Moldova biittan deˈiya Dimitri hagaadan giis: “Ta xannaˈiyo wode tana xannaˈissanawu yiida aassiyaageeti ubbay issibaa keehi dumma dumma ogiyan qonccissoosona. Hegee taani tamaariyoobaa oosuwan peeshshana danddayiyo hara ogeta akeekanaadan maaddiis. Taani daro ishanttuuranne michchonttuura gayttido gishshawu, shiiquwaa koyro biido wode daro yayyabeykke.”

13. Nu xinaatee shiiqota shiiqanaadan nuuni maaddana bessiyoy aybissee?

¹³ Ne xinaatee shiiqota shiiqanaadan maadda. Aybissi? Yihooway baassi goynniyaageeti issippe shiiqanaadan azazido gishshataassa; qassi hegee nu goynuwaa shaaho. (Ibr. 10:24, 25) Hegaa bollikka, gubaaˈiyan deˈiya nu ishanttinne michchontti nuuyyo so asa mala. Nuuni etaara shiiqiyoogee keehi malˈˈiya qumaa issippe miyoogaa mala. Neeni ne xinaatee shiiqota shiiqanaadan maaddikko, xammaqettanaadan maaddana danddayiya keehi koshshiyaabaa I oottanaadan maaddaasa. SHin I shiiqota shiiqiyoogaa doommanawu metootana danddayees. Ne xinaatee shiiqota shiiqennaadan diggiya ay metonne xoonanaadan Merinawu Ufayttada Deˈa! giya maxaafay A waati maaddana danddayii?

14. Nu xinaatee shiiqota shiiqanaadan waati denttettana danddayiyoo?

¹⁴ Ne xinaatiyaa maaddanawu Merinawu Ufayttada Deˈa! giya maxaafan timirtte 10 goˈetta. He maxaafay kiyanaappe kase, amarida aassiyaageeti ha timirttiyaa bantta xinaatetuura tobbanaadan oychchida. Eti bantta xinaateti shiiqota shiiqanaadan keehi maaddiya loˈˈo maxaafa gidiyoogaa yootidosona. Ne xinaatiyaa shiiqota shoobbanawu timirtte 10 gakkanaashin naagana koshshennaagee qoncce. I sohuwaara shiiqota shiiqanaadan shoobba, qassi ubbatoo aggennan shiiqanaadan minttetta. Ubba xinaatetu metoy issi mala gidenna. Yaatiyo gishshawu, ne xinaatiyawu koshshiyaabaa akeeka, yaatada neeni A maaddana danddayiyoobi deˈiyaakkonne qoppa. I shiiqiyoogaa doommanaashin guuttaa takkikko hidootaa qanxxoppa. Danddayanchcha gidada A ubbatoo shoobba.

15. Nu xinaatiyaa aybi yashshana danddayii?

¹⁵ Yihoowa Markka gidiyoogee nena guuttaa yashshidoogaa hassayay? Neeni sooppe soo baada sabbakanawu mule danddayennabadan qoppennan waayi aggana. Woy qassi ne soo asay woy laggeti nena eqettana gaada ne yayyennan waayi aggana. Yaatikko, neeni Geeshsha Maxaafaa xannaˈissiyo urawu siyettiyaabaa akeekana danddayaasa. Yesuusi amarida asay hegaadan yayyana danddayiyoogaa yootiis. SHin, I bana kaalliyaageeti yayyiyoogaa gaasuwan Yihoowawu haggaaziyoogaa aggennaadan minttettiis. (Maa. 10:16, 17, 27, 28) Yesuusi bana kaalliyaageeti yayyiyoogaa agganaadan waati maaddidee? Qassi neeni hegaadan waata oottana danddayay?

16. Nu xinaatee tamaariyoobaa haratussi yootanaadan waati loohissana danddayiyoo?

¹⁶ Ne xinaatee ba ammaniyoobaa haratussi yootanaadan loddan loddan loohissa. Bana kaalliyaageeti sabbakanaadan Yesuusi kiittido wode eti yayyennan waayi aggana. SHin Yesuusi eti sabbakiyo sohuwaanne sabbakanabaa etassi yootiyoogan eta maaddiis. (Maa. 10:5-7) Neeni Yesuusa leemisuwaa waata kaallana danddayay? Ne xinaatee awude sabbakana danddayiyaakko eranaadan maadda. Leemisuwawu, Geeshsha Maxaafaa tumaa tamaariyoogan goˈettana danddayiya ura I eriyaakkonne oychcha. Yaatada I he tumaa haratuyyo waatidi yootana danddayiyaakko  bessiyoogan giigettanaadan maadda. Koshshikko, Merinawu Ufayttada Deˈa! giya maxaafan “Issi Issi Asay Hagaadan Gees” giyaagaaninne “Issi Uri Hagaadan Oychchana Danddayees” giyaagan odettida qofaa tobbana danddayeeta. Neeni yaatiyo wode, ne xinaatee Geeshsha Maxaafaa goˈettidi akeekanawu metenna ogiyaaninne hiillan zaaranaadan loohissa.

17. Nu xinaatee Yihoowan ammanettanaadan nuuni maaddiyo wode Maatiyoosa 10:19, 20, 29-31 waati goˈettana danddayiyoo?

¹⁷ Ne xinaatee Yihoowan ammanettanaadan maadda. Yesuusi bana kaalliyaageeta Yihooway siiqiyo gishshawu, eta maaddanaagaa yootiis. (Maatiyoosa 10:19, 20, 29-31 nabbaba.) Yihooway ne xinaatiyaakka maaddanaagaa hassayissa. Neeni I kessido halchchuwaabaa aara woossiyoogan Yihoowan I ammanettanaadan maaddana danddayaasa. Poolandde biittan deˈiya Fransisekoy hagaadan giis: “Tana xannaˈissiyaagee woossiyo wode ubbatoo ta halchchuwaabaa woossees. Tana xannaˈissiyaagaa woosaa Yihooway zaaridoogaa akeekido wode, taanikka woossiyoogaa sohuwaara doommaas. Taani gubaaˈe shiiqotanne gita shiiqota shiiqanawu piqaadiyaa immanaadan ta ooratta ooso keettaa ta oychchiyo wode Yihooway tana maaddana gaada qoppaas.”

18. Kiristtaaneti tamaarissiyo oosuwaa xeelliyaagan Yihoowawu aybi siyettii?

¹⁸ Nuuni Geeshsha Maxaafaa xannaˈissiyoogeetussi Yihooway wozanappe qoppees. Asay A dabbo gidanaadan maaddanawu Kiristtaaneti ay keena minnidi tamaarissiyaakko I erees, qassi eti hegaadan oottiyo gishshawu I eta siiqees. (Isi. 52:7) Haˈˈi neeni Geeshsha Maxaafaa xannaˈissiyo uri baynnaba gidikkokka, hara aassiyaageetuura eta xinaateta issippe xannaˈissiyoogan Geeshsha Maxaafaa xannaˈiyaageeti xammaqettanaadan maaddana danddayaasa.