1-2. Hananabaa yootiya Haggee nu wodiyan aybi qaaxxanaagaa odidee?

“DAQIIQATU giddon suuqetinne ceega pooqeti kunddiyoogaa doommidosona.” “Asa ubbay shabbirettiis, . . . Biittay naaˈˈu daqiiqa gidiyaagaa qaaxxidoogaa daro asay yootees. Hegee tawu adussa wode milatiis.” He qofay Neppalen 2015n biittay qaaxxin qohettennan attida amaridaageeti yootidoba. Hegaadan keehi yashshiyaabay nena gakkidaba gidiyaakko, hegaa neeni mule waaya dogana.

² SHin, issi katama woy issi biitta xallan gidennan, darosan ha wodiyan dumma dummabay qaaxxees. Yihooway alamiyan deˈiya kawotettata ubbaa qaattiiddi deˈees, qassi I hegaa daro layttawu oottiis. Hananabaa yootiya Haggee ha qaattaabaa kasetidi yootiis. I hagaadan giis: “Taani Ubbaappe Wolqqaama GODAI hagaa odais. ‘Taani qantta wodiyan issitoo gujjada, salotanne sa7aa, abbaanne mela biittaakka qaattana.’”—Hag. 2:6.

3. Haggee yootido qaattay biittaa qaattaappe waani dummatii?

³ Haggee yootido qaattay issi heera xallaa qohiya biittaa qaattaa mala gidenna. Haggee yootido qaattay loˈˈobay hananaadan oottees. Yihooway nuussi hagaadan giis: “Kawotettata ubbaakka qaattana; qaattada kawotettatu ubban de7iya aqoi haa yaanaadan oottana. Taani . . . ha Beeta Maqidasiyaa bonchchuwan kunttana.” (Hag. 2:7) Ha hiraagay Hagge wodiyan deˈida asaa waati maaddidee? Qassi ha wodiyan nuna waati maaddii? Nuuni ha oyshatu zaaruwaa beˈana, qassi ha wodiyan kawotettaa qaattiya oosuwaa waati oottana danddayiyaakkokka tamaarana.

4. Yihooway hananabaa yootiya Hagga Ba asaakko kiittidoy aybissee?

⁴ Hananabaa yootiya Haggee gita oosuwaa oottanaadan Yihooway yootiis. Hegaappe kase hanidabaa ane qoppa. Haggee Baabiloone omooduwaappe 537 K. K. Yerusalaame simmida asaara deˈennan waayi aggana. Eti Yerusalaame gakkidi daro takkennan, ammanettidi Yihoowawu goynniyaageeti Yihoowa keettaa woy beeta maqidasiyaa keexxiyoogaa doommidosona. (Izi. 3:8, 10) SHin, takkennan azzanttiyaabay haniis. Heeran deˈiya hara asay eta eqettido gishshawu eti hidootaa qanxxidosonanne beeta maqidasiyaa keexxiyoogaa aggidosona. (Izi. 4:4; Hag. 1:1, 2) Yaatiyo gishshawu, asay zaarettidi minni oottanaadaaninne beeta maqidasiyaa oosuwaa polanaadan eta minttettana mala Yihooway Hagga 520 K.K., kiittiis. *—Izi. 6:14, 15.

5. Haggee yootiyoobay Xoossaa asaa minttettana koshshiyoy aybissee?

⁵ Haggee yootiyoobaa halchchoy Ayhudati Yihoowa mintti ammananaadan maaddanaassa. Hananabaa yootiyaagee hidootaa qanxxida Ayhudatussi hagaadan giis: “Taani GODAI hagaa odais. . . .‘Biittan de7iya asa ubbau, inttekka minnite! Minnidi oottite; aissi giikko, taani inttenaara de7ais.’” (Hag. 2:4) Hagee keehi minttettiyaaba. Yihoowawu keehi daro kiitanchchatu bolli maatay deˈiyo gishshawu Ayhudati keexxiyoogaa polanawu koyikko, Yihoowan ammanettana koshshees.

6. Haggee kasetidi odido qaattaa gaasuwan hanidabay aybee?

⁶ Yihooway kawotettata ubbaa qaattanaagaa Ayhudatussi yootanaadan Hagga kiittiis. Hidootaa qanxxidanne beeta maqidasiyaa keexxiyoogaa aggida Ayhudata ha ajjuutay minttettiis. Alamiyan he wode keehi wolqqaama kawotetta gidida Parsse kawotetta Yihooway qaattanaagaa he ajjuutay qonccissiis. Qassi he qaattay ay kaalettanee? Koyruwan, Xoossaa asay beeta maqidasiyaa keexxidi wurssanaadan oottana. Kaallidi, zaarettidi keexxido beeta maqidasiyan Ayhuda gidennaageeti Ayhudatuura Yihoowawu goynnanaadan oottana. I yootidobay Xoossaa asaa keehi minttettiis!—Zak. 8:9.

7. Oottiyoogan nuuni maaddana danddayiyo qaattiya oosoy aybee? Qonccissa.

⁷ Haggee yootido hiraagay ha wodiyan nuna waati maaddii? Kawotettaa ubbaa Yihooway haranttuwaa qaattiiddi deˈees; qassi nuuni he oosuwaa oottiyoogan ha wodiyan maaddoos. Ane hagaa qoppa: Yihooway 1914n Yesuus Kiristtoosi saluwaa Kawotettan Kawo gidanaadan sunttiis. (Maz. 2:6) He Kawotettay haariyoogaa doommidoogee alamiyaa haariyaageeta ufayssenna odo. Hegaa giyoogee ‘Ayhuda gidenna asaa wodee’ polettiis giyoogaa. Qassi Yihooway sunttennan haariya asaa wodee wuriis. (Luq. 21:24) Hegaappe denddidaagan, ubba asay hidootan naagana koshshiyoy Xoossaa Kawotetta xallaa gidiyoogaa 1919ppe doommidi Yihoowa asay yootees. ‘Kawotettaa wonggeliyaa mishiraachchuwaa’ sabbakiyoogee kumetta alamiyaa qaattiis.—Maa. 24:14.

8. Mazamure 2:1-3y yootiyoogaadan, daro kawotettati mishiraachchuwaa waati xeelliyoonaa?

⁸ Nu yootiyo mishiraachchuwaa asay siyii? Daroti siyokkona. (Mazamure 2:1-3 nabbaba.) Kawotettati yiillotidosona. Yihooway sunttido Kawuwaa ekkennan ixxidosona.  Nuuni yootiyo Kawotettaa mishiraachchuwaa eti ‘mishiraachchodan’ xeellokkona. Ubba qassi issi issi kawotettati sabbakiyo oosuwaa teqqidosona! Ha kawotettatun haariyaageetuppe daroti Xoossawu oottays giyaaba gidikkonne, bantta maataa agganawu koyokkona. Yaatiyo gishshawu, Yesuusa wode haaridaageetuugaadan, ha wodiyan haariyaageeti Yihooway tiyidoogaa ammanettidi kaalliyaageeta qohiyoogan A eqettoosona.—Oos. 4:25-28.

9. Kawotettati mishiraachchuwaa siyennan ixxiyo wode Yihooway eta maaddanawu waatii?

⁹ Kawotettati mishiraachchuwaa siyennan ixxiyo wode Yihooway waatii? Mazamure 2:10-12y hagaadan gees: “Hegaa gishshau, inttenoo kawotoo, eeyyoppite; ha sa7aa haariyaageetoo, inttena ye77e! GODAAYYO bonchcho yashshatettan oottite; yashshaa kokkoriyoogan ufaittite. GODAI hanqqettin, ogiyan intte xayennaadan na7aa yerite; aissi giikko, hanqquwaa eesuwan i eexxi kiyana. Akko baqati attiya ubbati anjjettidaageeta.” Yihooway keha gidiyo gishshawu eti likkebaa kuuyanaadan etawu wodiyaa immiis. Eti haˈˈi laamettananne Yihoowa Kawotettawu haarettanawu doorana danddayoosona. SHin wodee wuriiddi deˈees. Nuuni ha alamiyaa ‘wurssetta gallassan’ deˈoos. (2 Xim. 3:1; Isi. 61:2) Tumaa eriyoogaappenne Yihoowawu haggaaziyoogaappe aaruwan asaa eesoyiyaabi mule baawa.

10. Hagga 2:7-9n odettida qaaxxanaadan oottiya oosoy demissido loˈˈobay aybee?

¹⁰ Haggee kaseti yootido qaattaabaa issi issi asay ufayttidi siyees. He qaattaappe denddidaagan ‘kawotettatu ubban deˈiya aqoy [wozanaa suure asay] haa yiidi’ Yihoowawu goynnanaagaa I yootiis. * (Hagga 2:7-9 nabbaba.) Isiyaasikka Mikiyaasikka “wurssetta gallassatun” hagee hananaagaa yootidosona.—Isi. 2:2-4; Mik. 4:1, 2.

11. Issi ishay Kawotettaa mishiraachchuwaa koyro siyido wode waatidee?

 ¹¹ Ha wodiyan waanna biiruwan oottiya Keena giyo issi ishay keehi ufayssiyaabaa siyido wode waatidaakko qoppa. I 40 layttappe kase Kawotettaabaa koyro siyido wodiyaabaa haˈˈikka loytti hassayees. Keeni hagaadan giis: “Xoossaa Qaalaappe tumaa taani koyro siyido wode, nuuni ha alamiyaa wurssetta gallassan deˈiyoogaa eridoogan taani ufayttaas. Taani Xoossan sabettanawunne merinaa deˈuwaa demmanawu, laamettiya ha alamiyaa bagga gidana bessennaagaanne Yihoowawu exatada minna deˈana koshshiyoogaa akeekaas. Taani yaatanawu sohuwaara murttaasinne hegaa Yihoowawu woosan yootaas. Taani ha alamiyawu exatiyoogaa aggaas, qassi awudenne xayana danddayenna Xoossaa Kawotettaa naaguwaa sohuwaara demmaas.”

12. Ha wurssetta gallassatun Yihoowa ayyaana beeta maqidasee bonchchuwan waani kumidee?

¹² Yihooway ba asaa anjjidoogee qoncce. Ha wurssetta gallassatun, daro asay awu goynniyoogaa doommiis. Nu qooday 1914n amarida shaˈa xalla. SHin, ha wodiyan tumuppe Xoossawu goynniyaageeti hosppun miilooneppe daro, qassi miilooniyan qoodettiyaageeti layttan layttan Godaa Kahuwaa nunaara bonchchoosona. Hagaadan, Yihoowa ayyaana beeta maqidasiyan saˈaa dabaaban, hegeekka I tumu goynuwawu giigissido giigissuwan “kawotettatu ubban de7iya aqoi” kumiis. Eti laamettiyoogan ooratta asatettaa maayin Yihoowa sunttaykka bonchchettiis.—Efi. 4:22-24.

13. Yihoowawu goynniyaageetu qooday gujjidoogee hara ayba hiraagati polettanaadan oottidee? (Koyro sinttan deˈiya misiliyaa xeella.)

¹³ Ha ufayssiya hanotay Isiyaasa shemppo 60n deˈiyaagaa mala hara hiraagati polettanaadan oottiis. He shemppuwan paydo 22y hagaadan gees: “Intte giddon issi keettan de7iya qoodan guutta asata taani sha7issana; ubbaappe qoodan guuxxiyaageetakka gita kawotetta oottana. Taani GODAA; wodee gakkiyo wode, taani hagaa eesuwan polana.” Keehi daro asay Yihoowawu goynniyoogaa doommido gishshawu, maalaaliyaabay hanees. Ha alˈˈo “aqoi” woy asay dumma dumma eray deˈiyoogaanne ‘Kawotettaa wonggeliyaa mishiraachchuwaa’ yootanawu eeno  giyaagaa. Hegaappe denddidaagan, Yihoowa asay he eraa goˈettana danddayees; hegee Isiyaasi “kawotettatu maattaa” giidi yootidoba. (Isi. 60:5, 16) Ha alˈˈo attumaageetinne maccaageeti maaddin, nuuni mishiraachchuwaa 240 biittatun yootoosinne 1,000ppe dariya doonatun xuufeta giigissoos.

14. Asay ha wodiyan ay kuuyana koshshii?

¹⁴ Ha wurssetta wodiyan, kawotettati qaaxxiyoogee asay issibaa kuuyanaadan oottees. Eti Xoossaa Kawotettawu exataneeyye, ha alamiyaa kawotettatun ammanettanee? Hagee ubba asay doorana koshshiyooba. Yihoowa asay bantta deˈiyo biittaa kawotettaa higgiyawu azazettiyaaba gidikkonne, ha alamiyaa polotikaaban eti oossinne exatennan deˈoosona. (Roo. 13:1-7) Asaa metuwaa xayssana danddayiyay Xoossaa Kawotettaa xalla gidiyoogaa eti eroosona. He Kawotettay ha alamiyaa bagga gidenna.—Yoh. 18:36, 37.

15. Xoossaa asay ammanettiyoogee paacettanaagaa Ajjuutaa maxaafay waati qonccissii?

¹⁵ Wurssetta gallassatun Xoossaa asay ammanettiyoogee paacettiyoogaa Ajjuutaa maxaafay yootees. He paacee asay nuna ubbatoo keehi eqettanaadaaninne yedettanaadan oottees. Ha alamiyaa kawotettati nuuni etawu goynnanaadan koyoosonanne banttawu exatennaageetu bolli yedetaa gattoosona. (Ajj. 13:12, 15) Eti “asai ubbai gitainne guuttai, manqqoinne duree, goqinne aillee ba ushachcha kushiyan woi ba som77uwan malaataa wottanaadan” wolqqanttana. (Ajj. 13:16) Beni wode aylleti oogeetakko bessiya malaatay eta bolli wodhdhees. Hegaadankka, ha wodiyan deˈiya asa ubbay oossi exatiyaakko bessiyo wodiyaa naagees. Eti oogeetakko, qassi polotikaara gayttidaagan oossi exatiyaakko qoppiyoobaaninne oottiyooban ubba asaa bessanawu koyoosona.

16. Nuuni ha wodiyan kaseegaappe aaruwan Yihoowawu ammanettiyoogee keehi koshshiyoy aybissee?

¹⁶ Nuuni ha leemiso malaataa wottidi polotikaa kawotettatussi exatanee? He malaataa wottennan ixxiyaageeta metoy gakkananne eti qohettana. Ajjuutaa maxaafay hagaadan gees: “He do7aa sunttai woi a sunttaa paidoi de7iyo malaati bainna asi ooninne baizzanaunne shammanau danddayenna.” (Ajj. 13:17) SHin malaatay wodhdhidoogeeta Xoossay waatanaakko A asay erees. (Ajj. 14:9, 10) He malaataa wottiyoogaappe, eti bantta kushiyaa bollan “Taani GODAAGAA” yaagidi xaafana. (Isi. 44:5) Hagee nuuni kaseegaappe aaruwan Yihoowawu ammanettiyo wode. Nuuni baageeta gidiyoogaa yootiyoogan Yihooway ufayttana!

17. Yihoowa danddayaa xeelliyaagan nuuni ay hassayana koshshii?

¹⁷ Ha wurssetta gallassatun Yihooway keehi danddayiis. I ooninne xayanaadan koyenna. (2 PHe. 3:9) I asa ubbay nagaraappe simmanaadaaninne awu haggaazanaadan wodiyaa immiis. SHin I merinawu danddayenna. Xoossaa Kawotettawu exatennaageeta Muuse wodiyan Paaroona bolli gakkida boshaa malabay gakkana. Yihooway Paaroonawu hagaadan giis: “Taani hannoode ta kushiyaa yeddada, nenanne ne asaa boshan ha sa7aa bollappe mulluccu oottargganashin. Taani nena ta wolqqaa bessanaunne ta sunttai sa7a ubbaa bollan odettanau, hegau taani nena paxa wottaas.” (Kes. 9:15, 16) Kawotettati ubbay tumanchcha Xoossay Yihoowa xalaala gidiyoogaa wurssettan erana. (Hiz. 38:23) Hegee waani hananee?

18. (a) Hagga 2:6, 20-22n qonccida hara qommo qaattay aybee? (b) Haggee yootidobay sinttappe polettanaagaa waati eriyoo?

 ¹⁸ Haggee hayqqin daro layttappe guyyiyan, kiitettida PHawuloosi Hagga 2:6, 20-22n deˈiya qofay sinttappe polettanaagaa Ibraawe Kiristtaanetussi xaafiis. (Nabbaba.) PHawuloosi hagaadan giis: “I ha77i, ‘Taani sa7aa xalaalaa gidennan, issitoo gujjada saluwaakka qaattana yaagiis.’ ‘Issitoo gujjada’ giya qaalai qaaxxennabai minnidi de7ana mala, merettidabai qaaxxanaagaanne kichchanaagaa geeshshidi bessees.” (Ibr. 12:26, 27) Ha qaattay Hagga 2:7n odettida qaattaappe dummatees. Ha qaattay Paaroonaagaadan Yihoowawu haarettanawu ixxidaageeti merinawu xayanaagaa bessiyaaba.

19. Qaaxxennabay aybee, qassi nuuni hegaa waati eriyoo?

¹⁹ Qaaxxennabay woy xayennabay aybee? PHawuloosi gujjidi hagaadan giis: “Nuuni qaaxxanau danddayenna kawotettaa ekkiyo gishshau, ane Xoossaa galatoosinne a ufaissoos; au bessiyoogaadan bonchchuwaaninne yashshatettan au goinnoos.” (Ibr. 12:28) Wurssetta qaattay qaaxxi simmin, Xoossaa Kawotettaa xallay deˈana. I merinawu eqqida daana!—Maz. 110:5, 6; Dane. 2:44.

20. Asay ay doorana koshshii, qassi nuuni eta waati maaddana danddayiyoo?

²⁰ Coo xayiya wodee baawa! Asay issibaa doorana koshshees: Eti ha alamiyawu exatidi deˈikko, xayana. Eti Yihoowawu haggaazikko, qassi A sheniyaa oottanawu bantta deˈuwan koshshiyaaban laamettikko, merinaa deˈuwaa demmana. (Ibr. 12:25) Sabbakiyo oosuwaa oottiyoogan, asay ha gitabaa kuuyanaadan maaddana danddayoos. Alˈˈo gidida daro asay Xoossaa Kawotettawu exatanaadan maaddiyaageeta gidoos. Qassi nu Godaa Yesuusi yootidobaa ubbatoo hassayiyaageeta gidoos: “Asa ubbau markka gidana mala, kawotettaa wonggeliyaa mishiraachchoi sa7a ubban odettana; hegaappe guyyiyan, wurssettai gakkana.”—Maa. 24:14.