1-2. Isiyaasa 65:16, 17n Yihooway yootidobay nuuni hidootaa qanxxennaadan nuna waati minttettii?

“HIDOOTAA Qanxxoppa!” giya ufayssiya huuphe yohuwan 2017n killiliyaa shiiquwaa shiiqida. Nuna gakkiya metota nu waani genccana danddayiyaakko he shiiquwan qoncciis. Nuuni he shiiquwaa shiiqoosappe oyddu layttay aadhdhikkonne, ha iita alamiyan haˈˈikka genccana koshshees.

² Mata wode nena ayba metoy gakkidee? Intte soo asaappe woy ne laggetuppe issi uri hayqqidee? Caddi oyqqiya harggee nena sakkii? Neeni cimidoogaa gaasuwan neessi deˈoy deexoo? Meretay gattiyo daafabaa, makkalaa woy yedetaa gaasuwan qohettadii? Woy qassi ubbasaa gakkiya koronaa harggiyaa mala harggiyan qohettadii? Ha meto ubbay attin, nuuni eta dogiyo wodiyaanne zaarettidi hegaa malabay mule deˈenna wodiyaa yeemuwan naagoos!—Isiyaasa 65:16, 17 nabbaba.

3. Nuuni haˈˈi ay oottana bessii, qassi aybissi?

³ Ha iita alamiyan deˈoy metiyo gishshawu, keehi deexobaa nuuni genccana koshshennan waayi aggana. (Maa. 24:21) Yaatiyo gishshawu, loytti genccanawu nuuni ubbatoo tamaarana koshshees. Aybissi? Yesuusi genccan woy “danddayan intte intte shemppuwaa ashshana” giido gishshataassa. (Luq. 21:19) Nuugaa mala metuwaa harati waati gencciyaakko nuuni yuushshi qoppikko, loytti gencciyaageeta gidana.

4. Gencciyoogan Yihooway keehi loˈˈo leemiso nuuni giyoy aybissee?

⁴ Gencciyoogan keehi loˈˈo leemiso gidiyaagee oonee? Xoossaa Yihoowa. He zaaruwan neeni maalaalettennan waayi aggana. Hegaabaa neeni hanno gakkanawu loytta qoppennan aggakka. Ha iita alamiyaa Dabloosi haariyo gishshawu, alamiyan metoy kumiis. Ha metota awudenne xayssanawu Yihoowawu wolqqay deˈiyaaba gidikkonne, I hegaa sinttappe oottanawu naagees. (Roo. 9:22) Qassi ha iita alamiyaa xayssiyo wodee  gakkanaashin nu Xoossay ubbatoo genccees. Yihooway gencciyo uddufunbbata ane beˈoos.

5. Xoossaa sunttay bonchchettibeennay ayba ogiyaanee, hegaa xeelliyaagan neeyyo aybi siyettii?

⁵ Yihooway ba sunttaa asay boriyo wode genccees. Yihooway ba sunttaa dosiyo gishshawu, ooninne hegaa bonchchanaadan koyees. Geeshsha Maxaafay hagaadan gees: “Taani [“Yihoowa,” NW]; hegee ta sunttaa. Ta bonchchuwaa taani harau immikke; ta galataakka masettidi giigida misiletussi immikke.” (Isi. 42:8) SHin aadhdhida 6,000 layttawu, A sunttay bonchchettibeenna. (Maz. 74:10, 18, 23) Hegee doommidoy Addaameenne Hewaana ufayttanawu Xoossay etawu koshshiyaabaa diggiis giidi Dabloosi (“sunttaa mooriyaagee”) Edene ataakiltte sohuwan mootido wode. (Doo. 3:1-5) He wodeppe doommidi, Yihooway asawu tumuppe koshshiyaabaa diggiis giidi Dabloosi wordduwan mootiis. Yesuusa A Aawaa sunttay bonchchettibeennaagee qofissiis. Hegaappe denddidaagan, I bana kaalliyaageeti hagaadan woossanaadan tamaarissiis: “Saluwan de7iya nu Aawau, ne geeshsha sunttai anjjetto.”—Maa. 6:9.

6. Yihooway saluwaanne saˈaa haariyo maatay bawu deˈiyoogee qonccanaadan oottanaappe kase daro wodee aadhdhanaadan oottidoy aybissee?

⁶ Xoossaanne A haaruwaa daroti eqettiyoogaa. Saluwaanne saˈaa haariyo maatay deˈiyoy Yihoowa xalaala, qassi I haariyo ogee keehi loˈˈo. (Ajj. 4:11) SHin Dabloosi kiitanchchatanne asaa cimmanawu maliis, qassi eti Xoossawu haariyo maatay baawa giidi qoppanaadan oottiis. Haariyo maatay Yihoowawu deˈiyoogeenne A haaroy aybippenne aadhdhiyaagaa gidiyoogee qonccanawu wodiyaa koshshees. Asay Medhdhidaagee yootiyoobaa siyennan barkka bana haarana danddayennaagaa akeekana mala eti daro layttawu haaranaadan Xoossay oottiis. (Erm. 10:23) Xoossay danddayanchcha gidiyo gishshawu, saluwaanne saˈaa haariyo maatay Xoossawu deˈiyoogaa ooninne sirenna. Yihoowa haaroy aybippenne aadhdhiyoogaanne saˈan tumu sarotettaanne woppaa ehaanay A Kawotetta xalla gidiyoogaa ubbay erana.

7. Yihoowa bolli makkalidaageeti oonee, qassi I eta waatanee?

⁷ A naatuppe amaridaageeti makkaliyoogaa. Yihooway kiitanchchatanne asaa naata wottiyoobi baynnaageeta oottidi medhdhiis. SHin guyyeppe Seexaanay Yihoowa bolli makkaliis, yaatidi wottiyoobi baynna asa gidida Addaameenne Hewaanakka Yihoowa bolli makkalanaadan oottiis. Hara kiitanchchatinne asaa naatikka makkalidosona. (Yih. 6) Guyyeppe, Xoossay doorido Israaˈeela dereekka azazettennan ixxiis, yaatidi eeqa xoossatuyyo goynniyoogaa doommiis. (Isi. 63:8, 10) Eti Yihoowawu ammanettibookkona. SHin, I gencciis, qassi makkalanchchata ubbaa xayssiyo wodee gakkanaashin gencciyoogaa aggenna. Hegaappe simmin, Yihoowaynne ayyo ammanettidaageeti ha alamiyan deˈiya iitabaa genccana koshshenna gishshawu ufayttana!

8-9. Yihoowa xeelliyaagan odettiya worddoti aybee? Yaatin hegaa xeelliyaagan nuuni waatana danddayiyoo?

⁸ Dabloosa wordduwaa. Iyyoobinne hara ammanettida Yihoowa ashkkarati ubbay bantta goˈˈaa xallawu Xoossawu goynnoosona giidi Seexaanay mootiis. (Iyy. 1:8-11; 2:3-5) Dabloosi ha wodiyaa gakkanaashin asaa mootiyoogaa aggibeenna. (Ajj. 12:10) Nuuni Yihoowa siiqiyo gishshawu awu ammanettidi deˈiyoogaaninne nuna gakkiya metuwaa gencciyoogan Seexaanay worddanchcha gidiyoogee qonccanaadan oottana danddayoos. Yihooway Iyyooba anjjiis, qassi nuuni genccikko I nunakka anjjana.—Yaaq. 5:11.

⁹ Yihooway meqettaa iitanne asay waayettanaadan oottees giidi Seexaanay yootanawu  worddo haymaanootiyaa kaalettiyaageeta goˈettees. Ubba qassi amaridaageeti, naati hayqqiyo wode, saluwan Xoossawu hara kiitanchchati koshshido gishshawu I eta efiis yaagoosona. Hegee Xoossaa keehi kariyoogaa bessiyaaba! SHin Yihooway siiqiya Xoossaa gidiyoogaa nuuni eroos. Nuna wolqqaama harggee sakkiyo wode woy nu siiqiyoogeeti hayqqiyo wode, nuuni Xoossan mule gaasoyokko. Qassi, issi galla ubbabaa I giigissanaagaa ammanoos. Xoossaa Yihooway siiqiyaagaa gidiyoogaa nu yootiyoobaa siyiya ubbawu yootana danddayoos. Yaatiyo wode Yihooway bana boriyaageetuyyo zaarees.—Lee. 27:11.

10. Mazamure 22:23, 24y Yihoowabaa ay yootii?

¹⁰ I siiqiyo ashkkarati waayettiyoogaa. Yihooway qarettiya Xoossaa. Nuuni yedetaa, harggiyaa woy nagaranchcha gidiyoogaa gaasuwan waayettiyoogaa I beˈiyo wode, keehi azzanees. (Mazamure 22:23, 24 nabbaba.) Yihooway nu waayiyaa akeekees, I hegaa xayssanawu koyees, qassi xayssana. (Kessaabaa 3:7, 8⁠raanne Isiyaasa 63:9⁠ra gatta xeella.) ‘Xoossay nu ayfiyaappe afutta ubbaa qucciyo wodeenne hagaappe sinttanawu hayqoynne kayyoy woy waasoynne sahoy deˈenna’ wodee yaana.—Ajj. 21:4.

11. Hayqqida ba ashkkarata xeelliyaagan Yihoowawu aybi siyettii?

¹¹ A dabboti hayqqiyoogaa. Ammanettidi hayqqida attumaageetanne maccaageeta xeelliyaagan Yihoowawu aybi siyettii? I eta zaarettidi beˈanawu keehi laamotees! (Iyy. 14:15) Yihooway ba dabbuwaa Abrahaama beˈanawu ay keena laamotiyaakko qoppa. (Yaaq. 2:23) Woy qassi Yihooway “sinttan eqqidi” haasayissido Muuseera zaarettidi haasayanawu ay keena laamotiyaakko qoppa. (Kes. 33:11) Qassi Daawitinne hara mazamuraaweti sabbanawu ufayssiya mazamuriyaa yexxiyoogaa siyanawu I yeemuwan naagees! (Maz. 104:33) Xoossaa  dabbo gidida he asati hayqqidaba gidikkonne, Yihooway eta dogibeenna. (Isi. 49:15) I etabaa ubbabaa hassayees. Geeshsha Maxaafay “eti ubbay A xeelan paxa deˈiyoogaa” yootees. (Luq. 20:38, NW; tohossa qofaa) Issi gallassi, I eta hayquwaappe denttana, qassi eti wozanappe woossiyoogaa zaarettidi siyananne eta goynuwaa ekkana. Ne siiqiyo uri hayqqidaba gidikko, ha qofay nena minttettana danddayees.

12. Ha wurssetta gallassatun Yihooway keehi azzananaadan oottiyaabati aybee?

¹² Iita asati harata qohiyoogaa. Edenen doommida makkalay giiganaappe kase yaa iiti iiti baanaagaa Yihooway erees. Yihooway ha wodiyan alamiyan deˈiya iitatettaa, naaquwaanne makkalaa ixxees. Aaya aawu baynna naatunne amˈˈetu mala naagiyaabi baynnaageetussi, leemisuwawu, daafuranchchatuyyoonne banttana qohuwaappe teqqana danddayennaageetuyyo ubbatoo I keehi qoppees. (Zak. 7:9, 10) Yihooway ammanettida ba ashkkarata asay naaqqiyoogaanne qachchiyoogaa beˈiyo wode keehi unˈˈettees. I banaara gencciya inttena ubbaa siiqiyoogaa ammanettana danddayeeta.

13. Xoossaa xeelan asay ay keena yeellayiyaabaa oottii, qassi hegaa I waatanee?

¹³ Asay kaseegaappe aaruwan pokkobaa oottiyoogaa. Asay Xoossaa leemisuwan merettidaba gidikkonne, Seexaanay eti pokkobaa oottanaadan denttettiyoogaa dosees. Nohe wode ‘saˈaa bollan deˈiya asaa iitatettay daridoogaa’ Xoossaa Yihooway beˈido wode, “asaa ha sa7aa bollan medhdhidoogau azzaniis; ba wozanan keehippe seelettiis.” (Doo. 6:5, 6, 11) He wodeppe haa simmin alamiyaa hanotay giigidee? Aybanne giigibeenna! Mattuman dummatiyaageetinne issi mala gididaageeti pokkobaa oottiyoogaa gujjin, daro qommo pokkobay keehi daridoogan Dabloosi keehi ufayttees! (Efi. 4:18, 19) Yihoowawu goynniyaageeti wolqqaama nagaraa oottiyo wode Seexaanay keehi ufayttees. Yihooway laamettennan ixxida kandduwan iita gidida asa ubbaa danddayiyoogaa aggiyo wode xayssiyoogan I pokkobaa ixxiyoogaa bessana.

14. Asay saˈaanne mehiyaa doˈaa waatiiddi deˈii?

¹⁴ Xoossay medhdhido saˈaa asay mooriyoogaa. Asay “haariyo maataa hara asa qohanau go7ettiyoogaa” xalla gidennan, Yihooway eti naaganaadan etawu immido saˈaanne mehiyaa doˈaa bessenna ogiyan oyqqoosona. (Era. 8:9; Doo. 1:28) Asay oottiyoobaa gaasuwan mehiyaa doˈaa qommotuppe issi miiloone gidiyaagee kaalliya amarida layttatun xayana danddayiyoogaa saynisiyaa eranchchati amaridaageeti yootoosona. Meretay moorettiyoogaa eti yootiyoogee garamissenna! Yihooway ‘saˈaa xayssiyaageeta xayssanawunne’ saˈaa gannate oottanawu qaalaa gelidoogee ufayssiyaaba.—Ajj. 11:18; Isi. 35:1.

15-16. Yihoowaagaadan genccanaadan nuna aybi denttettana koshshii? Leemisuwaa yoota.

¹⁵ Saluwan deˈiya nu Aaway shaˈan qoodettiya layttawu genccido unˈˈettanaadan oottiya meto ubbaa qoppa. (“ Yihooway Aybaa Genccii?” giya saaxiniyaa xeella.) Ha iita alamiyaa Yihooway awudenne xayssana danddayees. SHin A danddayay nuna keehi maaddiis! Ha leemisuwaa qoppa. Issi bitaniyawunne A machcheeyyo biron yelettibeenna eta naˈawu bollay sila gidiyoogeenne I yeletti simmin awu deˈoy keehi deexo gidanaagee, qassi naatettan I hayqqanaagee odettiis gaada qoppa. SHin he naˈaa xeellanaagee yelidaageetuyyo keehi deexo gidikkonne, eti naˈay yelettiyo wode ufayttoosona. Yelidaageeti bantta naˈaa siiqiyo gishshawu, ayyo deˈoy loˈˈo gidanaadan maaddanawu eti ayba metonne genccana.

¹⁶ Hegaadankka, Addaameenne Hewaani zareti  ubbay yelettiyo wode nagaranchcha. Gidikkonne, Yihooway eta siiqeesinne etawu koshshiyaabaa kunttees. (1 Yoh. 4:19) Leemisuwan odettida yelidaageetuppe dumma ogiyan, Yihooway ba naati waayettanaadan oottiyaabaa xayssana danddayees. I asay waayettanaadan oottiya ubbabaa xayssana wodiyaa keeri wottiis. (Maa. 24:36) He wodee gakkanaashin genccanaadan nunakka Yihoowa siiqoy denttettana koshshees.

17. Yesuusabaa yootiya Ibraawe 12:2, 3n deˈiya qofay aggennan genccanaadan nuna minttettiyoy aybissee?

¹⁷ Gencciyoogan Yihooway keehi loˈˈo leemiso. Gencciyoogan Yesuusi ba Aawaa leemisuwaa kaalliis. Yesuusi saˈan deˈiyo wode, nu gishshawu iita haasayaa, cashshaanne mittaa bolli barchchetidi hayqqiyoogaa gencciis. (Ibraawe 12:2, 3 nabbaba.) Gencciyoogan Yihooway leemiso gididoogee genccanaadan Yesuusa minttidoogee qoncce. Hegee nunakka minttana danddayees.

18. Yihooway keehi genccidoogaa gaasuwan hanidabaa nuuni akeekanaadan 2 PHeexiroosa 3:9y nuna waati maaddii?

¹⁸ Naaˈˈantto PHeexiroosa 3:9 nabbaba. Ha iita alamiyaa xayssanawu loˈˈo wodiyaa Yihooway erees. A danddayaa gaasuwan, daro asay A eriis, qassi miilooniyan qoodettiya keehi cora asay haˈˈi awu goynnees. Eti yelettidi A siiqiyoogaa tamaarananne banttana ayyo sheedhdhana gakkanaashin Yihooway daro wodiyawu genccido gishshawu ubbay ufayttoosona. Yihooway genccanawu kuuyidoogee likke gidiyoogee, wurssettay gakkanawu genccida miilooniyan qoodettiya asaa I woytiyo wode loytti qonccana!

19. Nuuni waatanawu murttana koshshii, qassi ayba woytuwaa demmanee?

¹⁹ Ufayttiiddi gencciyo ogiyaa nuuni Yihoowappe tamaaroos. Seexaanaa gaasuwan gakkiya azzanttiyaabaynne waaye ubbay deˈishinkka, Yihooway ubbatoo “ufayttiya Xoossa.” (1 Xim. 1:11, NW) Yihooway ba sunttaa geeshshiyo, I ubbabaa haariyo ogee suure gidiyoogaa qonccissiyo, iitatetta ubbaanne haˈˈi nuna gakkiya meto ubbaa xayssiyo wodiyaa danddayan naagikko, nuunikka ubbatoo ufayttana danddayoos. Saluwan deˈiya nu Aawaykka gencciyoogaa eriyoogan nuuni genccanawunne minettanawu murttidaageeta gidoos. Yaatikko, ha qofay nu ubbaa bolli polettana: “Waayiyan gencciya urai anjjettidaagaa; aissi giikko, he waayiyaa xoonidoogaappe guyyiyan, Xoossai bana siiqiyaageetuyyo immana giido de7uwaa akiliiliyaa i ekkana.”—Yaaq. 1:12.