1, 2. (a) Markka giyoobi aybee, qassi televizhiinenne gaazeexa malabati asawu yootennabay aybee? (b) Yihooway televizhiinenne gaazeexa malabati babaa yootana giidi qoppennay aybissee?

MARKKA giyoobi aybee? Issi qaalaa kochay, “Hanida issibaa beˈidi hegaabaa yootiyaagaa” yaagidi birshshees. Leemisuwawu, Tohossa Afirkkan 160 layttappe dariya wodiyawu attamettiiddi takkida issi gaazeexay Zi Witnnes (markka) geetettees. He gaazeexay alamiyan hanettiyaabaa suure yootiyo gishshawu, he sunttay awu bessiyaaba. Zi Witnnes gaazeexaa giigissiyoogaa doommida bitanee, ha gaazeexay “tumaa, gujobi baynna tumaa, qassi tumaa xalla” yootanaagaa odiis.

² SHin alamiyan deˈiya televizhiine, eraadoonenne gaazeexa malabati darobaa suure yootokkona. Hegaa malabati Xoossaanne i oottidobaa xeelliyaagan tumaa yootokkona. SHin saluwaa saˈaa Haariya, ubbaa danddayiya Goday, Yihooway babaa eti yootana giidi qoppenna. Hananabaa yootiya Hizqqeela baggaara Xoossay, “Kawotettati taani Yihoowa gidiyoogaa erana” yaagiis. (Hiz. 39:7, NW) I asaa naatuyyo kase oottidobaanne haˈˈi oottiiddi deˈiyoobaa ubba biittan deˈiya asawu yootiya hosppun miiloone gidiya Markkati awu deˈoosona. Eti Xoossay asaa naata sinttappe anjjanawu qaalaa gelidoogaakka yootoosona. Hegaadan markkattiyoogaa nu deˈuwan kaseyiyoogan, Yihooway Isiyaasa 43:10n, “Intte ta markkata,” qassi “taani  doorido ta ashkkarati inttena” yaagidi yootidoogaadan, nuuni a Markkata gidiyoogaa bessoos.

3, 4. (a) Geeshsha Maxaafaa Tamaareti ooratta sunttan xeegettiyoogaa doommidoy awudee, qassi hegan etawu aybi siyettidee? (Ha huuphe yohuwaa doomettan deˈiya misiliyaa xeella.) (b) Kaallidi beˈana oyshati awugeetee?

³ “Hagee yeletaappe yeletaa gakkanau taani hassayettanau merinau ta suntta” yaagida Yihooway “merinaa [Kawo]” gidiyo gishshawu, nuuni a sunttan xeegettiyoogee gita maata! (1 Xim. 1:17; Kes. 3:15; Eranchchaa 2:16⁠ra gatta xeella.) Geeshsha Maxaafaa Tamaareti 1931ppe doommidi Yihoowa Markkata geetettoosona. Hegaappe simmin, daroti hegaa nashshidi dabddaabbiyan xaafido qofay Wochiyo Keelan kiyiis. Kanaadan deˈiya issi gubaaˈee, “Nuuni ‘Yihoowa Markkata’ geetettidi xeegettiyoogaa doommido gishshawu keehi ufayttida; qassi hegee nuuni he ooratta sunttan xeegettanawu keehi murttanaadan denttettiis” yaagiis.

⁴ Nuuni Yihoowa sunttan xeegettiyoogaa xoqqu oottidi xeelliyoogaa waati bessana danddayiyoo? Qassi Yihoowa Markkata giyo nu sunttay ekettido Geeshsha Maxaafaa qofaa qonccissana danddayay?

5, 6. (a) Naati deˈiyo Israaˈeelati Yihoowabaa waati markkattidonaa? (b) Eti harabaa ay oottanaadan azazettidonaa, qassi ha wodiyan naati deˈiyo Kiristtaanetikka hegaadan oottana bessiyoy aybissee?

⁵ Isiyaasa wode deˈiya Israaˈeelati huuphiyan huuphiyan Yihoowa “markkata,” qassi kumetta deree Xoossaa ‘ashkkara.’ (Isi. 43:10) Israaˈeelati markka gidido issi ogee Xoossay bantta mayzza aawatuyyo oottidobaa bantta naatuyyo tamaarissiyoogaa. Leemisuwawu, Israaˈeelati layttan layttan Paasikaa baalaa bonchanaadan Xoossay azazido wode hagaadan giis: “Intte naati inttena, ‘Ha bonchcho baalaa birshshettai aibee?’ yaagidi oichchiyo wode, intte eta, ‘Hagee GODAA bonchchanau yarshshiyo Paasikaa yarshshuwaa; aissi  giikko, GODAI Gibxxe biittan Israa7eela asaa keettaa aggi aadhdhidi biidi, Gibxxeta woriiddi, nuna ashshido gishshataassa’ yaagite.” (Kes. 12:26, 27) Muusee Gibxxe kawuwaakko koyro biidi Israaˈeelati Xoossaayyo bazzon baalaa bonchana mala yeddanaadan oychin, Paarooni, “Taani ayyo azazettada Israa7eela yeddanau he GODAI [“Yihooway,” NW] oonee?” yaagidoogaakka eti bantta naatuyyo yootennan aggokkona. (Kes. 5:2) Gibxxen tammu boshay gakkin, qassi Zoˈo Abban Israaˈeelati Gibxxetu kushiyaappe attin, Paarooni oychido oyshaayyo imettida qoncce zaaruwaa ubba asay akeekidoogaakka eti yootennan aggokkona. Yihooway he wodekka haˈˈikka Ubbaappe Wolqqaama. Israaˈeela deree Yihooway tumu Xoossaanne ba gelido qaalaa Poliyaagaa gidiyoogawu markka.

⁶ Yihoowa sunttan xeegettiyoogaa xoqqu oottidi xeelliya Israaˈeelati he maalaalissiyaabata bantta naatu xallaassa gidennan, bantta son ashkkara gididi deˈiya kare biittaa asatuyyookka yootidoogee qoncce. Israaˈeelati Xoossay kessido geeshshatettaa maaraa bantta naata tamaarissanaadankka azazettidosona. Yihooway, “Taani GODAI, intte Xoossai geeshsha gidiyo gishshau, inttekka geeshsha gidite” yaagiis. (Wog. 19:2; Zaa. 6:6, 7) Hagee, Xoossaa gita sunttaa bonchissiya ogiyan deˈanaadan bantta naata geeshshatettaa maaraa tamaarissana bessiya, ha wodiyan deˈiya Kiristtaanetuyyo loˈˈo leemiso!—Leemiso 1:8; Efisoona 6:4 nabbaba.

7. (a) Israaˈeelati Yihoowayyo ammanettidi deˈiyo wode eta yuushuwan deˈiya dereti waaniyoonaa? (b) Xoossaa sunttan xeegettiya ubbay ay oottana koshshii?

⁷ Israaˈeelati ammanettidaageeta gidiyo wode Xoossaa sunttaayyo loˈˈo markka gididosona. Xoossay eta, “Biittan de7iya asai ubbai GODAA sunttai nenan xeegettidoogaa be7idi yayyana” yaagiis. (Zaa. 28:10) SHin Israaˈeelati darotoo ammanettidi deˈibeennaagee azzanttiyaaba. Eti darotoo asi medhido eeqawu goynnidosona. Qassi eti goynniyo Kanaane xoossatudan meqettaa iita gididi, bantta naata yarshshidosonanne hiyyeesata huqqunnidosona. A sunttan xeegettiyo Geeshsha Xoossaa leemisuwaa kaallanawu ubba wode baaxetiya nuuni hagaappe gitabaa tamaaroos!

8. Yihooway Isiyaasi waatanaadan azazidee, qassi Isiyaasayyo aybi siyettidee?

⁸ Yihooway Israaˈeelata omooduwaappe maalaalissiya ogiyan kessanaagaa kasetidi yootiis. (Isi. 43:19) Isiyaasa maxaafan deˈiya koyro usuppun shemppoti Yerusalaameeninne a yuushuwan deˈiya katamatun wolqqaama bashshay gakkanaagaa yootoosona. Asaa wozanaa beˈiya Yihooway, Isiyaasi yootiyoobaa asay siyennaagaa erees; gidikkokka, i hegaa yootiyoogaa aggennaadan azaziis. Yaatin, Isiyaasi dagammiis; qassi Xoossaa deree awude gakkanawu ba nagaraappe simmennan ixxanaakko erana koyiis. Xoossay ayyo, “Katamati de7iya asaa xayidi, qolettana gakkanaashiina, keettatikka onana gakkanaashiinanne biittaikka muleera baisa gidana gakkanaashiina” yaagidi zaariis.—Isiyaasa 6:8-11 nabbaba.

9. (a) Isiyaasi Yerusalaamebaa yootido hiraagay polettidoy awudee? (b) Nuuni ha wodiyan siyana koshshiya akeekissoy awugee?

⁹ Isiyaasayyo ha azazoy imettidoy Kawuwaa Ooziyaana haaruwaa wurssettaana woykko 778 K.K. heeraana. I he wodeppe doommidi, 732 K.K., Kawuwaa Hizqqiyaasi haarido wode gakkanaashin, 46 laytta gidiyaagaa hananabaa yootiis. Hegee Yerusalaamee 607n K.K. xayanaappe 125 layttappe kase. Xoossay kasetidi hegaadan yootiyoogan sinttappe hananabaa ba deriyaa akeekissiis. Ha wodiyankka Yihooway sinttappe hananabaa ba asaa akeekissees.  Wochiyo Keelay attamettiyoogaa doommoosappe doommidi, Seexaanaa iita haaroy mata wode xayanaagaanne Yesuus Kiristtoosa SHaˈu Layttaa Haaroy doommanaagaa aadhida 135 layttawu asaa akeekissiiddi takkiis.—Ajj. 20:1-3, 6.

10, 11. Baabiloonen deˈida Israaˈeelati Isiyaasi yootido ay hiraagay polettishin beˈidonaa?

¹⁰ Baabiloonetuyyo haarettanawu eeno giida, ammanettida Ayhudati Yerusalaame katamay xayiyo wode bashshaappe attidi, omooduwan Baabiloone biidosona. (Erm. 27:11, 12) Hegaappe 70 layttay aadhi simmin, “GODAI, inttena Woziyaagee, Israa7eela Geeshshai hagaadan yaagees; ‘Intte gishshau, Baabiloone kiittada eta gordde mittaa menttana’” yaagiya hiraagay polettishin Xoossaa asay beˈiis.—Isi. 43:14.

¹¹ Yihooway he hiraagaa maalaalissiya ogiyan poliis. Xiqimita 539n K.K. issi galla qammi, Yerusalaame beeta maqidasiyaappe omooddido boncho miishshan Baabiloone kawoynne halaqati woyne eessaa uyiiddi eeqatuyyo goynnishin, Meedoonanne Parsse olanchati Baabiloone katamaa olidosona. Baabiloona xooni oyqqida Qiiroosi 538n woy 537n K.K., Ayhudati bantta biitti simmanaadaaninne Xoossaa beeta maqidasiyaa Yerusalaamen zaaretti keexxanaadan azaziis. Bantta nagaraappe simmiya asaayyo koshshiyaabaa kunttanawunne Yerusalaame simmiyo wode eta naaganawu Yihooway qaalaa gelidobaa gujjin, ha ubbabay Isiyaasi kasetidi yootidoba. Xoossay, “Ta galataa awaajjana mala, ta giigissidonne doorido ta [asaa]” yaagidi etabaa yootiis. (Isi. 43:21; 44:26-28) Omooduwaappe simmidi Yerusalaamen Yihoowayyo beeta maqidasiyaa zaaretti keexxidi, eti tumu Xoossaa Yihooway ba gelido qaalaa ubba wode poliyaagaa gidiyoogawu markka gididosona.

12, 13. (a) Israaˈeelati Yihoowayyo zaarettidi goynniyoogaa doommido wode etaara goynnidaageeti oonee? (b) ‘Hara dorssati’ “Xoossaa Israaˈeela” gididaageeta maaddiyo wode etappe koyettiyaabay aybee, qassi etawu deˈiya hidootay aybee?

¹² Israaˈeelati beeta maqidasiyaa zaaretti keexxanawu bantta biitti simmido wode, shaˈan qoodettiya kare biittaa asay etaara Yihoowayyo goynniyoogaa doommiis. Hegaappe simmin, hara darotikka etaara goynniyoogaa doommidosona. (Izi. 2:58, 64, 65; Ast. 8:17) Ha wodiyan, “zawai bainna daro asaa” gidida Yesuusa ‘hara dorssati’ “Xoossaa Israaˈeela” gidida, ayyaanan tiyettida Kiristtaaneta maaddoosona. (Ajj. 7:9, 10; Yoh. 10:16; Gal. 6:16, NW) Zawi baynna daro asatikka Yihoowa Markkata geetettoosona.

 ¹³ Kiristtoosa SHaˈu Layttaa Haaruwaa wode, zawi baynna daro asati ha alamiyaa wurssetta gallassatun Yihoowa Markka gididi waani deˈidaakko hayquwaappe denddiyaageetuyyo yootiyoogan keehi ufayttana. SHin hegaadan oottanawu haˈˈi nu sunttaara maayiya ogiyan deˈana koshshees; qassi geeshsha gididi deˈanawu baaxetana bessees. Nuuni hegaadan deˈanawu keehi baaxetiyaaba gidikkokka, ubba galla baliyo gishshawu, Yihooway nu balaa atto gaanaadan galla galla a maarotaa oychana koshshees. Geeshsha gididi deˈiyoogee, Yihooway nuuni a sunttan xeegettanaadan paqqadido gishshawu galatiyoogaa bessiyaaba.—1 Yohaannisa 1:8, 9 nabbaba.

14. Yihoowa giyo sunttawu birshshettay aybee?

¹⁴ Xoossaa sunttan xeegettiyoogee gita boncho gidiyoogaa akeekanawu, he sunttaa birshshettaa erana koshshees. Yihoowa giyo sunttay “haniyoogaa” geetettidi birshshettana danddayiyaanne oottiyoogaa qonccissana danddayiya Ibraawetto peeshuwaappe yiis. Yaatiyo gishshawu, Yihoowa giyo sunttay “Hananaadan Oottees” geetettana danddayees. Ha birshshettay ubbabaa Medhidanne ba halchidobaa Poliya Yihoowa loytti qonccissees. Qassi Yihooway issibaa oottanaagaa yootikko, Seexaanaa gidin hara oonikka i hegaa polennaadan diggana danddayenna.

15. Ba sunttaa xeelliyaagan Yihooway Muuseyyo yootidobaappe ay akeekiyoo? (“ Gita Birshshettay Deˈiyo Sunttaa” giya saaxiniyaa xeella.)

¹⁵ Yihooway ba sunttaa birshshettaa Muuseyyo loytti qonccissiis. Yihooway ba asaa Gibxxeppe kessanaadan Muusa azazido wode, i ayyo hagaadan giis: “‘Taani Hanana Koyiyoobaa Hanana.’ Gujjidikka, ‘Neeni Israaˈeela naatuyyo, “Taani Hanana tana inttekko kiittiis” yaaga’ yaagiis.” (Kes. 3:14, NW) Hegaa gishshawu, Yihooway ba halchuwaa polanawu hanana koshshiya ubbabaa hanana. Yihooway Ashshiyaagaa, Naagiyaagaa, Kaalettiyaagaanne etawu asatettaaninne ayyaanaaban koshshiyaabaa Kunttiyaagaa gidiyoogaa Israaˈeelata bessiis.

16, 17. (a) Nuuni Xoossaa sunttan xeegettiyoogaa nashshiyaageeta gidiyoogaa waati bessana danddayiyoo? (b) Kaalliya huuphe yohuwan ay tobbanee?

¹⁶ Ha wodiyankka, Yihooway nuuyyo ayyaanaabaaninne asatettan koshshiya ubbabaa kunttiyoogan ba sunttaa birshshettaadan deˈees. SHin Xoossaa sunttaa birshshettay i hanana koyiyoobaa haniyoogaa xallaa bessiyaaba gidenna. Hegee a Markkati a halchuwaara gayttidaagan oottiyoobay polettanaadan i oottiyoobaakka bessees. Hegaa wotti dentti qoppiyoogee nuuni a sunttaara maayiya ogiyan deˈanaadan denttettees. Norwey biittan aadhida 70 layttawu mishettidi haggaazida, layttay 84 gidido Koree hagaadan giis: “Merinaa Kawuwaa Yihoowayyo oottiyoogeenne a geeshsha sunttan xeegettiya asaa yara gidiyoogee keehi gita boncho. Geeshsha Maxaafaa tumaa asawu yootiyoogeenne asay hegaa akeekidi ufayttiyoogaa beˈiyoogee gita maata. Leemisuwawu, Kiristtoosa yarshshoy keehi goˈˈiyoogaa, qassi he wozoy eti ooratta alamiyan sarotettaaninne xillotettan merinawu deˈanaadan oottanaagaa tamaarissiyoogee tana keehi ufayssees.”

¹⁷ SHin issi issi heeran daro asay Xoossaabaa tamaaranawu koyennaagee qoncce. Gidoppe attin, nuuni yootiyoobaa siyiya asa demmidi Yihoowa sunttaa tamaarissiyo wode Koreegaadan keehi ufayttoos. SHin nuuni Yihoowa Markkatanne Yesuusa markkata waanidi gidana danddayiyoo? Ha oyshaa kaalliya huuphe yohuwan tobbana.