Yesuusi Oottido Maalaalissiyaabaappe​—Ay Tamaarana Danddayay?

YESUUSA saˈaa deˈuwaabaa yootiya Geeshsha Maxaafaa kifilee I oottidobaa qonccissiyoy “maalaalissiyaabaa” geetettidi birshshettida Giriiketto qaalaana gidennaagaa erada neeni garamettana. Issi issitoo “maalaalissiyaabaa” geetettidi birshshettida qaalaa (dyʹna·mis) sitta birshshettay “wolqqaa” giyoogaa. (Luqaasa 8:46) Qassi ‘malaataa’ geetettidikka birshshettiis. (Maatiyoosa 11:20; 25:15) Issi eranchchay giidoogaadan, he Giriiketto qaalay “oosettida gitabaa, ubba qassi hegee hananaadan oottida wolqqaa bessiyaaba. Hegee Xoossaa wolqqan oosettidabaa qonccissiyaaba.”

Hegaara gayttida haray Giriiketto qaalay (teʹras) qassi, darotoo “garamissiyaabaa” woy “malaataa” geetettidi birshshettees. (Yohaannisa 4:48; Oosuwaa 2:19) Ha qofay qassi hanidabaa beˈiya asawu siyettiyaabaa qonccissees. Yesuusa kaalliya daro asaynne I kiittidoogeeti Yesuusi oottido wolqqaamaban darotoo garamettidosona.—Marqqoosa 2:12; 4:41; 6:51; Luqaasa 9:43.

Yesuusi oottido maalaalissiyaabaa qonccissiya heezzantto Giriiketto qaalay (se·meiʹon) “malaataa” bessiyaaba. Robert Definbawu geetettiya issi eranchchay hegee “hanida maalaalissiyaabawu deˈiya ciimma birshshettaara” gayttidaba gidiyoogaa qonccissiis. I gujjidikka, “Malaatay nu Godaa Yesuusabaa tumaa yootiya maalaalissiyaaba” yaagiis.

Baletooyye Xoossay Immido Wolqqan Oosettidabee?

Geeshsha Maxaafay Yesuusi maalaalissiyaabaa oottidoy asaa cimmanaassa woy balettanaassa gidennaagaa yootees. Hegee iita ayyaanay oyqqido naˈaa Yesuusi pattido wode hanidaagaadan, “Xoossaa gita wolqqan” hanidaba. (Luqaasa 9:37-43) ‘Mino wolqqay’ deˈiyo, Ubbaa Danddayiya Xoossawu hegaa mala gitabaa oottiyoogee metanee? (Isiyaasa 40:26) CHii, mulekka metenna!

Yesuusi oottido 35 gidiya maalaalissiyaabati wonggeletun odettidosona. SHin Yesuusi oottido maalaalissiyaabati hegeetu xalla gidokkona. Leemisuwawu, Maatiyoosa 14:14y, “Yesuusi . . . daro asaa be7idi, he asau qarettiis; yaatidi etaara de7iya hargganchchata pattiis” yaagees. SHin Yesuusi aappun asaa pattidaakko he xiqisiyan odettibeenna.

Hegaa mala gita oosoti Yesuusi Xoossaa Naˈaanne yaana geetettida Masiyaa gidiyoogawu naqaasha. Yesuusi maalaalissiyaabaa oottidoy Xoossaappe demmido wolqqaana gidiyoogaa Geeshsha Maxaafay geeshshidi yootees. Kiitettida PHeexiroosi Yesuusabaa hagaadan giis: “Yesuusi intte giddon Xoossai banan oottido wolqqaama oosuwan, oorattabaaninne malaatan intteyyo qonccissido asa: hegaa inttekka ereeta.” (Oosuwaa 2:22) Hara wodiyan qassi PHeexiroosi, “Xoossai Naazireeta Yesuusa Geeshsha Ayyaanaaninne wolqqan tiyiis; Xoossai aara de7iyo gishshau, lo77obaa i oottiiddinne xalahe halaqaassi haarettida ubbaa pattiiddi yuuyiis.”—Oosuwaa 10:37, 38.

Yesuusi oottido malaalissiyaabay I tamaarissidobaara gayttidaba. Marqqoosa 1:21-27y Yesuusi tamaarissidobaappenne I oottido issi maalaalissiyaabaappe denddidaagan shiiqida asawu siyettidabaa qonccissees. Marqqoosa 1:22y, “Asai a timirttiyan garamettiis” yaagees; paydo 27y qassi I iita ayyaanaa kessiyoogaa beˈidi ‘garamettidoogaa’ yootees. Ee, Yesuusi oottido malaalissiyaabaykka I tamaarissidobaykka yaana geetettida Masee A gidiyoogawu naqaasha.

Yesuusi I Mase gidiyoogaa odiis; shin hegee coo mela haasaya gidenna. I oottidonne haasayido ubbabay, qassi Xoossay immido wolqqan oottido maalaalissiyaabay I tumukka yaana geetettida Masiyaa gidiyoogawu gita naqaasha. A oonatettaanne ayyo deˈiya maataa xeelliyaagan asay oyshaa denttido wode I aynne yayyennan hagaadan giis: “Tawu [Xammaqiya] Yohaannisaagaappe aadhdhiya markkatettai de7ees; aissi giikko, taani wurssanau Aawai taayyo immido oosoi, ha taani oottiyoogee, Aawai tana kiittidoogaa tabaa markkatees.”—Yohaannisa 5:36.

Naqaashaa

Yesuusi oottido maalaalissiyaabay tumukka hanidaba gidiyoogaa waati erana danddayiyoo? Hegawu naqaasha gidiya amarida qofaa ane beˈoos.

Yesuusi maalaalissiyaabaa oottidoy asay an xeelaa wottanaadan oottanaassa gidenna. I oottido maalaalissiyaaba ubban Xoossay sabettanaadaaninne bonchchettanaadan oottiis. Leemisuwawu, Yesuusi qooqe gidida issi bitaniyaa pattanaappe kasetidi, I he bitaniyaa pattiyoy “Xoossaa oosoi a bollan qonccana mala” gidiyoogaa yootiis.—Yohaannisa 9:1-3; 11:1-4.

Kaayiyaageeti, dammettiyaageetinne ammanuwan pattoos giyaageeti oottiyoogaadan, Yesuusi maalaaliyaabaa oottidoy asaa dammettidi, cimmidi, jallissidi, woy harabaa ootti simmidi gidenna. Qassi I asaa pattanawu kaayuwan woy asay geeshsha giidi qoppiyo miishsha goˈettibeenna. Yesuusi ashkketettan naaˈˈu qooqe asata pattido hanotaa ane qoppa. Xiqisee hagaadan gees: “Yesuusi etau qarettidi, eta aifiyaa bochchiis; sohuwaarakka eta aifee xeelli aggin, a kaalli bayidosona.” (Maatiyoosa 20:29-34) Yesuusi eta pattanawu haymaanoote wogaanne siraataa woy asi beˈo giyooba oottibeenna. Yesuusi maalaalissiyaabaa oottidoy darotoo keehi daro asay deˈiyo sohuwaana. I hegawu dumma xomppiyaa, madirakiyaa woy hara miishshaa goˈettibeenna. SHin ha wodiyan oosettiis giyo maalaalissiya darobawu naqaashi baawa.—Marqqoosa 5:24-29; Luqaasa 7:11-15.

Yesuusi, I oottido maalaalissiyaaban goˈettidaageetu ammanuwaabaa issi issitoo yootiis. SHin banan ammaniyaageeta pattidaba gidikkonne, banan ammanennaageetakka pattiis. Yesuusi Galiilan deˈiya Qifirinaahooman kataman deˈishin, “Asai xalaheti oyqqido daro asaa Yesuusakko ehiis; . . . Yesuusi tuna ayyaanata ba qaalan kessidi, harggida asa ubbaakka pattiis.”—Maatiyoosa 8:16.

Yesuusi maalaalissiyaabaa oottidoy koshshiyaaban asaa maaddanaassappe attin, sirida asaa ba wolqqaa bessanaassa gidenna. (Marqqoosa 10:46-52; Luqaasa 23:8) Qassi Yesuusi bawu maadettanawu giidi maalaalissiyaabaa mule oottibeenna.—Maatiyoosa 4:2-4; 10:8.

Wonggeletun Xaafettidabata Ammanana Danddayiyoo?

Yesuusi oottido maalaalissiyaabaara gayttida tumaa nuuni eridoy hegee Wonggeletun xaafetti uttido gishshataassa. He taariketun deˈiya qofaa maaran, Yesuusi oottido maalaalissiyaabati tumuppe hanidaba gaana danddayiyoo? Ee, danddayoos.

Qommoora qonccidaagaadan, Yesuusi maalaalissiyaabaa oottidoy hegawu markka gidiya daro asay deˈiyo sohuwaana. Ubba, koyro heeran xaafettida amarida Wonggeleti, hegaa beˈidaageetuppe daroti paxa deˈishin xaafettidosona. Wonggeliyaa xaafeti ammanettiya asata gidiyoogaa xeelliyaagan Zi Mirakils end zi Rizarekshin giyo maxaafay hagaadan gees: “Wonggeliyaa xaafeti bantta haymaanootiyaa qofaa aassanawu medhdhi ekkidi maalaaliya darobay oosettidabadan qonccissoosona giyoobay hanana danddayennaba. . . . Eti tuma gididabaa xaafidosona.”

Kiristtaanetu morkke gidida Ayhudati, Wonggeliyan xaafettida maalaaliyaabati polettidoogaa siribookkona. Eti he maalaaliyaabay O wolqqan polettidee giyoogaa xallaa siridosona. (Marqqoosa 3:22-26) Hegaappe simmin eqettidaageetikka, Yesuusi maalaaliyaabaa oottidoogaa muleera kaddibookkona. Ubba, koyronne naaˈˈantto xeetu layttaa M.Ln, xaafettida naqaashati Yesuusi maalaaliyaabaa oottidoogaa yootoosona. Yaatiyo gishshawu, I maalaaliyaabaa oottidoogaa yootiya Wonggeliyan qonccida qofay tuma gidiyoogee erettidaagaa.

Maalaaliyaabaa Oottiday Oonee?

Yesuusi oottido maalaaliyaabati tumuppe polettidaakkonne pilggiyoogaa xallay gidenna. Yesuusi oottido maalaaliyaabaa qonccissiya Wonggeleti, Yesuusi asawu wozanappe qarettiyoogaanne asaa payyatettawu keehi qoppiya asa gidiyoogaa yootoosona.

Yesuusakko shiiqidi, “Neeni koyikko, tana pattanau danddayaasa” yaagidi minttidi woossida, inchchirichchay oyqqido bitaniyaabaa qoppa. Yesuusi “ayyo qarettidi” ba kushiyaa yeddidi A bochchiis; yaatidi, “Taani koyais; paxa!” yaagiis. Yaagin, bitanee sohuwaara paxi aggiis. (Marqqoosa 1:40-42) Yaatiyo gishshawu, Yesuusi qarettiyoogaappe denddidaagan, Xoossay awu immido wolqqan maalaaliyaabaa oottiis.

Nayna katamaappe kiyidi anhaa mooganawu biya asaa Yesuusi demmido wode aybi hanidee? Hayqqida yelagay issi amˈˈee naˈaa; qassi iyyo appe hara naˈi baawa. Yesuusi maccaaseekko shiiqidi, iyyo “qarettidi, ‘Yeekkoppa’” yaagiis. Yaatidi, I naˈaa hayquwaappe denttiis.—Luqaasa 7:11-15.

Yesuusi oottido maalaalissiyaabaappe tamaariyo minttettiya qofay, I “qarettidi” asaa maaddiyaabaa oottiyoogaa. SHin he maalaaliya oosoti issi wode polettida taarike xalla gidokkona. Ibraawe 13:8y, “Yesuus Kiristtoosi zinekka hachchikka merinaukka laamettenna” gees. I haˈˈi saluwan Kawo gididi haarees; maalaaliyaabaa oottanaadan Xoossay awu immido wolqqaa, I saˈan deˈiyo wode goˈettidoogaappe aaruwan goˈettana. Mata wode, Yesuusi azazettiya asaa pattanawu he wolqqaa goˈettana. Sinttappe demmana ha ufayssiya hidootaabaa gujjada erana mala Yihoowa Markkati nena maaddana.

[Misiliyaa]

Yesuusi oottido maalaaliyaabay “Xoossaa gita wolqqan” hanidaba

[Misiliyaa]

Yesuusi wozanappe qarettiyaagaa