Ba huuphiyaa naagiya uri kaallidi deꞌiyaabata oottees:

• Koyiyoobaa demmanaashin takkees

• Oottanawu amottiyoobaa sohuwaara oottenna

• Ufayssenna oosuwaa ootti wurssees

• Harata sinttayees

Bantta huuphiyaa naagiya naati issibay eta ufayssiyaaba milatikkonne iitabaa chii goosona. SHin, kaallidi deꞌyaabay bantta huuphiyaa darin naagenna naati hanana danddayiyooba:

• Yiillotiyoogee

• Unꞌꞌettiyoogee

• Sijaaraa uyiyoogee woy likkiyaappe aattidi ushshaa uyiyoogee woy jallissiyaabaa goꞌettiyoogee

• Loꞌꞌobaa maanawu doorennaagee

Naatettan bantta huuphiyaa naagiya naati guyyeppe bantta deꞌuwan darin sahettennaageenne miishshaa metootennaagee, qassi haratuppe aaruwan higgiyaa naagiyoogee issi xinaatiyan qoncciis. He xinaatee Penssilveniyaa Yuniversttiyaa eranchchiyaa Anjjela Dekwerza, “Intte huuphiyaa naagiyoogee inttessi mule iita gidenna” gaanaadan oottiis.

CHii giyoogaa tamaaritenne intte giidoogaadan oottite.

GEESHSHA MAXAAFAY YOOTIYO MAARAA: “Ee woi, ‘CHii’ giite.”—Maatiyoosa 5:37.

Naati yeekkiyoogan yelidaageeti ay keena murttidaakko paaccana danddayoosona; geella asa sinttankka yaatana danddayoosona. Yelidaageeti xoonettikko, yeekkiyoogee eti chii giidoban eta ee giissiyo oge giidi naꞌi tamaarees.

Hara baggaara qassi, yelidaageeti chii giidi he giidoogaadan oottikko, nu deꞌuwan attenna issibaa, hegeekka nuuni koyiyoobaa ubbatoo demmana danddayeennaagaa naꞌi tamaarees. Dottoree Devid Wolshi koyiyo ubbabaa demmiya asati ufayttennaagaa yootiis. I gujjidi hagaadan giis: “Nu naati koyiyo ubbabaa ubbatoo demmana danddayoos giidi qoppanaadan oottidi dichchiyoogee eta siiqiyoogaa bessiyaaba gidenna.” a

 Intte naatussi intte chii giyoogee, guyyeppe leemisuwawu jallissiyaabaa goꞌettanaadan, aqo oyqqanaappe kase mattumaa gayttanaadan, woy hara qohiyaabaa oottanaadan paacettiyo wode, eti bantta huuphiyaa naaganaadan maaddees.

Loꞌꞌobaa oottiyo wodenne iitabaa oottiyo wode eta aybi gakkanaakko intte naati akeekanaadan maaddite.

GEESHSHA MAXAAFAY YOOTIYO MAARAA: “Asi ba zeriyoogaa zaarettidi cakkana.”—Galaatiyaa 6:7.

Oottiyoobay kaalettiyoobi deꞌiyoogaa, qassi ba huuphiyaa naagennan aggiyoogee qohanaagaa intte naꞌi akeekana koshshees. Leemisuwawu, intte naꞌay guuttaban yiillotiyaaba gidikko, asay appe haakkanawu koyana danddayees. Hara baggaara qassi, yiilloyiyaabay gayttiyo wode I ba huuphiyaa naagikko, woy kelttiyaa gelennan danddayan naagikko, asay A dosana. Intte naꞌi ba huuphiyaa naagiyo wode, ayyo deꞌoy keehippe loꞌꞌanaagaa I akeekanaadan maaddite.

Intte naꞌi keehi koshshiyaabaa eranaadan tamaarissite.

GEESHSHA MAXAAFAY YOOTIYO MAARAA: “Keehi koshshiyaabaa shaakki [erite].”—Piliphphisiyuusa 1:10, NW.

Nu huuphiyaa naagiyoogee bala gididabaa oottennaadan maaddees; gidoppe attin, nuuni oottanawu dosennaba gidinkka, oottana koshshiyaabaa oottanaadankka hegee nuna maaddees. Intte naꞌi keehi koshshiyay aybakko kuuyidi, hegeeta kasetidi oottiyoogaa tamaariyoogee keehi koshshiyaaba. Leemisuwawu, I kaaꞌiyoogaappe so oosuwaa sinttayana bessees.

Loꞌꞌo leemiso gidite.

GEESHSHA MAXAAFAY YOOTIYO MAARAA: “Taani intteyyo oottidoogaadan, inttekka oottana mala, intteyyo leemiso gidaas.”—Yohaannisa 13:15.

Inttena yiilloyiyaaban intte waaniyaakko intte naꞌi akeekana. Nuuni nu huuphiyaa naagiyo wode haniyaabay loꞌꞌoba gidiyoogaa intte naꞌi akeekanaadan oottite. Leemisuwawu, intte naꞌi iitabaa oottiyo wode yiilloteetiiyye, woppu geetii?