YELIDAAGEETA MAADDIYAABAA
6: Seeraa
HEGEE AYBEE?
Seeriyoogaa giyoogee kaalettiyoogaa woy tamaarissiyoogaa gidana danddayees. Issi issitoo, moorida naꞌaa suurissiyoogaa gidana danddayees. SHin hegee darotoo, naꞌay qohettennaadan loꞌꞌobaa doorana mala maaddiya kandduwaa maaraa tamaarissiyoogaa bessiyaaba.
SEERIYOOGEE KOSHSHIYO GAASUWAA
Mata wodeppe haa simmin, naati banttanan ammanettiyoogaa aggana gi yayyidi yelidaageeti seeriyoogaa aggiiddi deꞌoosona. SHin akeekanchcha aawatinne aayoti bessiya maaraa kessidi, bantta naati hegawu azazettanaadan eta loohissoosona.
“Naati dicciyo wode kayma gidanaadan eti oottana bessiyaabaanne bessennabaa yootidi dichchana koshshees. Seerenna naati laaggiyo mittay baynna markkabe mala; he markkabee wora biyoogee woy aadhdhi wodhdhiyoogee attenna.”—Paamelo.
AY OOTTANA DANDDAYAY?
Intte hanotaa laammoppite. Intte naꞌay intte kessido maaraa kaallennaba gidikko, hegee kaalettiyoobaa akeekanaadan oottite. Qassi, I he maaraa kaalliyo wode galatite.
“Daroti azazettenna ha alamiyan ta naati azazettiyo gishshawu darotoo eta galatays. Galatiyoogee zoree koshshiyo wode eti hegaa metootennan siyanaadan oottees.”—Kiristtiino.
GEESHSHA MAXAAFAY YOOTIYO MAARAA: “Asi ba zeriyoogaa zaarettidi cakkana.”—Galaatiyaa 6:7.
Bessiyaabaa oottite. Intte naꞌaa seeriyo wode, A layttaa, eraanne I oottido balay ay keena wolqqaamakko akeekite. Oottido mooruwawu bessiyaagaa keenaa qaxxayiyoogee maaddees; leemisuwawu, silkkiyaa maara goꞌettennan aggiyo wode amarida wodiyawu naꞌaappe ekkiyoogee woy kaseegaa keenaa goꞌettennaadan diggiyoogee bessiyaaba gidana danddayees. SHin intte dosibeenna gishsha xallawu, guutta balan yiillotoppite.
“Taani ta naꞌay eriiddi azazettennan ixxidaakko woy I akeekennan mooridaakko eranawu malays. Eeshshaara gayttidaagan giigissana koshshiyaabay zaari zaaridi balabaa oottiyoogaappe dummatees.”—Wendela.
GEESHSHA MAXAAFAY YOOTIYO MAARAA: “Intte naati wozanaa bayenna mala, eta yiilloyoppite.”—Qolasiyaasa 3:21.
Siiqite. Naati yelidaageeti eta seeriyoy siiqoy denttettiina gidiyoogaa erikko hegaa ekkanawunne oosuwan peeshshanawu metootokkona.
“Nu naꞌay mooriyo wode, I kase oottido loꞌꞌoban nuuni keehi ufayttiyoogaa ayyo yootoos. I ba mooruwaa giigissikko, he mooroy A sunttaa moorennaagaanne nuuni A maaddanawu koyiyoogaa yootoos.”—Daaneela.
GEESHSHA MAXAAFAY YOOTIYO MAARAA: “Siiqoi danddayanchcha. Siiqoi kehees.”—1 Qoronttoosa 13:4.
