“Iitati maataadan diccikkokka, iita oottiya ubbati daayikkokka, eti merinaayyo xayana.”—MAZAMURE 92:7.

Iitabay gujji gujji biidoogaa hagaappe kasetiya huuphe yohuwan beˈida. Hegan nuuni maalaalettokko, ayssi giikko, ‘wurssettaa gallassan’ deˈiya asay keehi iita gidanaagaa Geeshsha Maxaafay 2 Ximootiyoosa 3:1-5n kasetidi yootiis. ‘Wurssettaa gallassaa’ giyoogee woygiyoogee? Hegaa giyoogee Xoossawu azazettanawu koyenna ha alamiyaa giyoogaa. Bantta iita oosuwaa aggennan ixxidaageeta Xoossay mata wode xayssana. Hegaappe simmin, Xoossawu azazettiya loˈˈo asa xallay attana. “Xilloti biittaa laattananne yan merinau de7ana.”—Mazamure 37:29.

“Sarotettaa Xoossai Seexaanaa . . . gaacci qolana.”—ROOME 16:20.

Seexaanay, daydanttatinne iita asay ubbay xayiyo wode saˈan sarotettay deˈana. “Ai asinne [nena] yashissenna” giidi nuna Medhdhidaagee qaalaa geliis.—Mikiyaasa 4:4.

“Xoossaa keettai asaara de7ees; . . . Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna.”—AJJUUTAA 21:3, 4.

Seexaanay, Addaameenne Hewaana oottidobaa, qassi nu nagaraa gaasuwan yiida waayiyaanne harggiyaa Xoossay xayssana. Hegaappe simmin, ‘hayqoykka’ deˈenna. Medhdhidaagaa siiqiyaanne awu azazettiya asay merinawu deˈana. SHin eti deˈanay awaanee?

“Bazzoinne mela biittai ufaittana; bazzoi ufaissaa poocu giiddi, ciishshaa ciyyana.”—ISIYAASA 35:1.

Xoossay iitatettaa xayssiyo wode saˈay gannate gidana! Keehi loˈˈiya daro ataakiltte sohotinne gidi palahiya qumay deˈana. (Mazamure 72:16) Ano abbay, abbaynne shaafay xillana, qassi deˈuwan deˈiyaabati yan kumana. He wode “hambbalaashiyoogaa” giya qaalaa asay mule hassayenna! Asay baayyo keettata keexxidi etan deˈana. Qassi keetti baynna asi, namisettidaagee woy hiyyeesi mule deˈenna.—Isiyaasa 65:21, 22.

“Haiquwaappe denddana.”—OOSUWAA 24:15.

Ne siiqiyo hayqqidaageeta zaarettada beˈanawu yeemottay? Ubbaa danddayiya Xoossay Gannate gidida saˈan hayquwaappe eta denttiyo wode, neeni eta erana, etikka nena erana. Intte ay keena ufayttanaakko qoppite! He hidootay polettanaagaa nuuni ammanettana danddayiyoy aybissee? Xoossay hayquwaappe denttin daro asay beˈidonne zaarettidi bantta soo asaara gayttida gita asaabaanne naatubaa Geeshsha Maxaafay yootiyo gishshataassa. Qassi Yesuusi daro asay beˈishin hayqqidaageeta denttiis.—Luqaasa 8:49-56; Yohaannisa 11:11-14, 38-44.