1, 2. Seexaanaanne daydanttata xeelliyaagan nuuni akeekana koshshiyaabay aybee?

 YIHOOWAY ehiyo ooratta alamiyan deꞌoy keehi loꞌꞌo gidana. Wurssettan, nuuni deꞌanaadan Xoossay halchchidoogaadan nu deꞌana. SHin ha wodiyan nuuni Seexaanaynne daydanttati haariyo alamiyan deꞌoos. (2 Qoronttoosa 4:4) Nuuni eta beꞌana xayikkonne, eti deꞌoosona; qassi eti keehi wolqqaama.

² Ha shemppuwan, nuuni Yihoowakko waani shiiqana danddayiyaakko, qassi Seexaanaappe nuna waati naagana danddayiyaakko pilggana. Yihooway nuna maaddanawu qaalaa geliis. SHin Seexaanaynne daydanttati nuna cimmanawunne qohanawu goꞌettiyo hiillata nuuni akeekana koshshees.

3. Dabloosi nuna waatana koyii?

³ Asay ba goꞌꞌaa xallaa qoppiyo gishshawu Yihoowayyo goynnees, qassi hanotay keehi deexxikko, ayyo goynniyoogaa aggees giidi Seexaanay yootees. (Iyyooba 2:4, 5 nabbaba.) Issi uri Yihoowabaa tamaaranawu koyiyo wode, Seexaanaynne daydanttati akeekoosona, qassi eti I tamaarennaadan digganawu maloosona. Issi uri bana Yihoowayyo sheedhdhidi xammaqettiyo wode eti hanqqettoosona. Geeshsha Maxaafay Dabloosa ‘mittiyo uraa koyidi gudiya gaammuwaara’ geeddarssees.  (1 PHeexiroosa 5:8) Yihoowaara nuuyyo dabbotay duuxxanaadan Seexaanay koyees.—Mazamure 7:1, 2; 2 Ximootiyoosa 3:12.

4, 5. (a) Seexaanay oottana danddayennabi aybee? (b) “Xalahe halaqaa teqqite” giyoogee woygiyoogee?

⁴ SHin nuuni Seexaanaanne daydanttata yayyana koshshenna. Eti nu bolli issi issibaa oottennaadan Yihooway teqqiis. ‘Zaway baynna daro asa’ gidida tumu Kiristtaaneti ‘daro waayiyaappe’ attanaagaa Yihooway yootiis. (Ajjuutaa 7:9, 14) Yihooway Ba asaa naagiyo gishshawu,  Dabloosi hegee hanennaadan teqqanawu aynne oottana danddayenna.

⁵ Nuuni Yihoowakko shiiqidi deꞌikko, aara nu dabbotido dabbotaa Seexaanay moorana danddayenna. Xoossaa Qaalay hagaadan gees: “Intte GODAARA issippe de7iyo keena ubban ikka inttenaara de7ees.” (2 Hanidabaa Odiya 15:2; 1 Qoronttoosa 10:13 nabbaba.) Aabeela, Heenooka, Noha, Saarinne Muuse mala beni deꞌida ammanettida daro attuma asatinne macca asati Yihoowakko shiiqidi deꞌiyoogan Dabloosa eqettidosona. (Ibraawe 11:4-40) Nuunikka hegaadan oottana danddayoos. Xoossaa Qaalay, “Xalahe halaqaa teqqite; i intteppe baqatana” yaagees.—Yaaqooba 4:7.

6. Seexaanay nuna waati qohii?

⁶ Seexaanay nu bolli oottana danddayiyoobaa Yihooway teqqidoogaa erikkokka, Xoossaara nuuyyo dabbotay moorettanaadan haꞌꞌikka baaxetees. Ha wodiyan, Dabloosi daro ogiyan qohees; qassi I daro shaꞌu layttawu goꞌettido hiillata goꞌettees. Hegeetuppe amaridaageeti aybee?

7. Seexaanay Yihoowa asaa qohiyoy aybissee?

⁷ Kiitettida Yohaannisi, ‘Ha mule saꞌay xalahe halaqan haarettees’ yaagiis. (1 Yohaannisa 5:19) Seexaanay ha iita alamiyaa haarees; qassi Yihoowa asaakka haaranawu koyees. (Mikiyaasa 4:1; Yohaannisa 15:19; Ajjuutaa 12:12, 17) Dabloosi bawu guutta wodee attidoogaa eriyo gishshawu, Xoossaayyo nuuni ubbay ammanettennaadan oottanawu keehi baaxetees. Dabloosi issi issitoo qoncciyan qohees; qassi hara wode geeman qohees.

8. Ubba Kiristtaaneti ay akeekana koshshii?

⁸ Efisoona 6:12y hagaadan gees: ‘Nuuni saluwaa  sohuwan deꞌiya iita ayyaana wolqqatuura baaxetoos.’ Ubba Kiristtaaneti Dabloosaaranne daydanttatuura baaxetoosona. Banttana Yihoowawu sheedhdhida ubbay he baaxiyaa baaxetiyoogaa nuuni akeekana koshshees. Efisoonan deꞌiyaageetussi xaafido ha dabddaabbiyan kiitettida PHawuloosi Kiristtaaneta ‘minni eqqite’ giidi darotoo zoriis.—Efisoona 6:11, 13, 14.

9. Seexaanaynne daydanttati nu bolli ay oottanawu maliyoonaa?

⁹ Seexaanaynne daydanttati nuna dumma dumma ogiyan cimmanawu maloosona. Nuuni Seexaanaa issi ogiyan eqettido gishshawu nuuni an hara ogiyan xoonettana danddayokko giyoogaa gidenna. Dabloosi nuna oyqqanawu piriyaa dooranawu nuuni shugo gididobaa eranawu malees. SHin Dabloosa piriyaa xeelliyaagan Geeshsha Maxaafay nuna tamaarissiyo gishshawu, nuuni piriyan oyqettana bessenna. (2 Qoronttoosa 2:11; Wurssetta Qofaa 31 xeella.) Hegaappe issoy iita ayyaana ooso.

10. (a) Iita ayyaana oosoy aybee? (b) Iita ayyaana oosuwaa Yihooway waati xeellii?

¹⁰ Iita ayyaana oosoy issi uri daydanttatuura gayttanaadan oottees; hegee shareechchiyoogaa, kaayiyoogaa, bitiyoogaa woy hayqqida asa ayyaanaa xeegiyoogaa malabaara gayttidaba. Geeshsha Maxaafay iita ayyaana oosoy ‘tunaba’ gidiyoogaa yootees; qassi nuuni Yihoowayyo goynniiddi iita ayyaana oosuwaa oottana danddayokko. (Zaarettido Wogaa 18:10-12; Ajjuutaa 21:8) Kiristtaaneti iita ayyaana ooso ubbaappe muleera haakkana koshshees.—Roome 12:9.

11. Maalaalissiyaabaa eranawu amottiyoogee ay kaalettana danddayii?

¹¹ Nuuni maalaalissiyaabaa dosikko, Seexaanay hegan  nuna iita ayyaana oosuwaa ootissana danddayiyoogaa erees. Iita ayyaana oosoy ubbay Yihoowaara nu dabbotay duuxxanaadan oottees.

12. Seexaanay nu qofaa waati laammana koyii?

¹² Seexaanay asaa qofaa laammanawu baaxetees. I asay loddan loddan siranaadan oottiyoogan, eti “iitaa lo77o lo77uwaa iita” giidi qoppanaadan oottees. (Isiyaasa 5:20) Geeshsha Maxaafaa zoree maaddennaba giyo qofaanne nuuni Xoossay kessido maarata xaasayi xeellikko ufayttana giyo qofaa Dabloosi minttettees.

13. Siranaadan oottanawu Seexaanay waati baaxetidee?

¹³ Seexaanay goꞌettiyo hiillatuppe issoy siranaadan oottiyaabaa aassiyoogaa. I hegaa keehi daro layttawu goꞌettiiddi takkiis. Edene ataakiltte sohuwan, “Xoossai tumu inttena, Gannatiyan de7iya mitta teeraa ubbaappekka mooppite giidee?” giidi, I Hewaano oychchido wode, siranaadan oottanawu maliis. (Doomettaabaa 3:1) Guyyeppe, Iyyooba wode, Seexaanay kiitanchchatu sinttan Yihoowa hagaadan oychchiis: “Tumu Iyyoobi neeyyo coo yayyii?” (Iyyooba 1:9) Yesuusi xammaqetti simmin, Seexaanay hagaadan giidi A paacciis: “Neeni Xoossaa Na7a gidikko, ane ha shuchchati oitta gidana mala azaza.”—Maatiyoosa 4:3.

14. Iita ayyaana oosoy qohiyoogaa asay siranaadan Seexaanay waati oottana danddayii?

¹⁴ Ha wodiyankka, Dabloosi asay siranaadan oottiyoogaa aggibeenna. I iita ayyaana oosuwaappe amaridaagee qohennaba milatanaadan oottiyoogan, asay iita ayyaana oosoy hegaa keeni iita gidenna giidi siranaadan oottanawu baaxetees. Ubba qassi amarida Kiristtaaneti iita ayyaana oosoy qohiyoogaa akeekokkona. (2 Qoronttoosa  11:3) Hegaa gishshawu, nuuni nuna naaganawu ay oottana danddayiyoo? Nuuni Seexaanaa cimuwan cimettibeennaagaa aybin erana danddayiyoo? Nuuni cimettana danddayiyo naaꞌꞌubata ane pilggoos: wodiyaa aattiyoobaanne akkamuwaa.

15. Nuuni wodiyaa aattiyoobay daydanttatuura gayttanaadan waati oottii?

¹⁵ Ha wodiyan daro pilimeti, biidoti, televizhiiniyaa prograameti, kompputeriyan kaaꞌiyoobatinne Interneettiyaa sayteti daydanttatubaa, kaayuwaabaanne iita ayyaana oosuwaabaa bessoosona. Daroti hegaa qohenna kaassadan xeelloosona; qassi eti daydanttatuura gayttidabaa oottiyoogee qohiyoogaa akeekokkona. Issi uri qaadaa odiyoogaa, shuchchaa qoriyoogaa, mehiyaa maracciyaa xeelliyoogaa, kafuwaa qaalaa siyiyoogaanne hegaa mala hara iita ayyaana oosuwaakka oottees. Dabloosi hegee qohiyaabaa gidiyoogaa genttees; qassi hegaa malabay xuurabaa, ufayssiyaabaanne kaassa milatanaadan oottanawu baaxetees. Ubba qassi issi uri iita ayyaana ooso oottana xayikkonne, daydanttatubaa woy iita ayyaana oosuwaabaa beꞌiyoogee qohennaba giidi qoppana danddayees. Hegaadan qoppiyoogee qohiyaaba gidiyoy aybissee?—1 Qoronttoosa 10:12.

16. Iita ayyaana oosuwaa bessiya, wodiyaa aattiyoobaa nuuni eqettana koshshiyoy aybissee?

¹⁶ Seexaanaynne daydanttati nu qofaa akeekana danddayokkona. SHin wodiyaa aattanawu nuuni dooriyoobaa gujjin, nuuni nuussinne nu soo asaassi dooriyoobaa beꞌiyoogan, nuuni koyiyoobaanne qoppiyoobaa eti erana danddayoosona. Iita ayyaanatuura gayttiyoogaa,  daggamiyoogaa, daydanttay oyqqiyo hanotaabaa, shareechchiyoogaa woy hegaa mala iita ayyaana oosotubaa bessiya pilimeta, muuziqata woy maxaafata nuuni doorikko, Seexaanaynne daydanttati nuuni etabaa eranawu keehi koyiyoogaa akeekana. Qassi nuuni iita ayyaana oosuwaa oottanaadan eti baaxetana danddayoosona.—Galaatiyaa 6:7 nabbaba.

17. Seexaanay nuuni paxanawu koyiyoogaa waati goꞌettana danddayii?

¹⁷ Seexaanay nuuni paxanawu koyiyoogaakka goꞌettana danddayees. Ha wodiyan, daro asay sahettees. Issi uri dumma dumma akkamuwaa akkamettikkokka,  paxennan aggana danddayees. (Marqqoosa 5:25, 26) I paxanawu keehi koyiyo gishshawu aybakka malanawu eeno gaana danddayees. SHin nuuni Kiristtaane gidiyo gishshawu, ‘shareechchiyoogaara’ gayttida akkamuwaa doorennaadan naagettana bessees.—Wogaabaa 19:26.

18. Issi Kiristtaanee ayba akkamuwaappe naagettana bessii?

¹⁸ Beni Israaꞌeelan, ‘shareechchiya’ amarida asay deꞌees. Yihooway etawu hagaadan giis: “Intte kushiyaa miccidi, intte woossiyo wode, taani ta aifiyaa intteppe genttana; intte daro woosaa woossikkokka, taani siyikke.” (Isiyaasa 1:15) Yihooway eta woosaakka siyenna! Nuuni sahettiyo wodekka, Yihoowaara nuuyyo dabbotay moorettanaadaaninne Yihooway nuna maaddennaadan oottiyaabaa oottana koyokko. (Mazamure 41:3) Hegaa gishshawu, nuuni akkamettanawu qoppiyo akkamoy iita ayyaana oosuwaara gayttidabakkonne erana koshshees. (Maatiyoosa 6:13) He akkamoy iita ayyaana oosuwaara gayttikko, nuuni hegaappe naagettana bessees!—Wurssetta Qofaa 32 xeella.

19. Dabloosa daro asay yayyanaadan oottiyaabay aybee?

¹⁹ Issi issi asay Dabloosinne daydanttati deꞌennabadan qoppikkokka, harati banttana gakkidabaappe eti deꞌiyoogaa eroosona. Daro asay iita ayyaanata yayyiiddi deꞌees; qassi mala ammanuwaa meezetussi haarettees. Harati daydanttati asaa bolli gattido iitabaa yootiyoogan asay eta keehi yayyanaadan oottoosona. Asay darotoo he taariketa dosees; qassi hegaa haratuyyo yootiyoogee eta ufayssees. He taariketi darotoo asay Dabloosa yayyanaadan oottoosona.

20. Nuuni Seexaanaa wordduwaa waati aassana danddayiyoo?

²⁰ Ane hagaa qoppa: Seexaanay asay A yayyanaadan  koyees. (2 Tasalonqqe 2:9, 10) I iita ayyaana oosuwaa oottiyaageetu qofaa waati mooranaakko, qassi tuma gidennabaa eti ammananaadan waati oottiyaakko eriya worddanchchaa. He asati eti beꞌidobadaaninne siyidobadan qoppiyo taariketa yootana danddayoosona. He asati he taariketa zaaretti zaarettidi yootiyo payduwan, he taariketubaa baynnabaa keehi gujjoosona. Nuuni he taariketa zaaretti zaarettidi yootiyoogan Seexaanay yashshaa aassanaadan maaddana koyokko.—Yohaannisa 8:44; 2 Ximootiyoosa 2:16.

21. Nuuni daydanttatu taarikiyaa yootiyoogaappe, ay yootana danddayiyoo?

²¹ Yihoowa asaappe issi uri daydanttatuura gayttidaba erikko, I harata ufayssanawu he taarikiyaa zaaretti yootana koshshenna. Yihoowa asay Dabloosinne daydanttati oottana danddayiyo aybanne yayyana koshshenna. Nuuni Yesuusaaninne Yihooway ayyo immido wolqqan xeelaa wottana bessees. (Ibraawe 12:2) Yesuusi ba erissiyo ashkkarata ufayssanawu daydanttatu taarikiyaabaa yootibeenna. I Kawotettaa mishiraachchuwaanne “Xoossai oottido gita oosuwaa” yootiis.—Oosuwaa 2:11; Luqaasa 8:1; Roome 1:11, 12.

22. Neeni waatanawu murttadii?

²² Seexaanay nuussi Yihoowaara dabbotaa duuttanawu halchchiyoogaa dogennaageeta gidoos. I yaatanawu aybakka oottanawu baaxetees. SHin nuuni Seexaanaa hiillata eroos; qassi iita ayyaana ooso ubbaa eqettanawu murttida. Nuuni murttido murttiyaa shugissanaadan ‘xalahe halaqaayyo soho immokko.’ (Efisoona 4:27 nabbaba.) Ee, nuuni Dabloosa eqettikko, A piretuppe naagettoos; qassi Yihoowa naaguwan woppu giidi deꞌoos.—Efisoona 6:11.