1. Addaameenne Hewaana, qassi eta naati Edene gannatiyaa gelennaadan diggidabay aybee, qassi Aabeela daro qofissidabay aybee?

 AABEELI ba dorssati deriyaa doonan woppu giidi maataa miyaageeta xeellees. I ba dorssati deꞌiyoosaappe haahuwan deꞌiya, issi phooliyaabaakka beꞌees. I he sohuwan Edene gannatiyaa asi gelennaadan teqqiya, aadhi aadhi wodhiya tama laco bisoy deꞌiyoogaa erees. A aawaynne a aayyiyaa issi wode yan deꞌoosona; shin haꞌꞌi eta gidin eta naati yaa gelana danddayokkona. Omarssa heeran Aabeeli pude xoqqu gi xeelliiddi bana Medhidaagaabaa yereriyoogaa qoppa. Asay zaarettidi Xoossaara dabbotanee? Aabeela hegaabay daro qofissees.

2-4. Aabeeli nuussi ayba ogiyan haasayii?

² Aabeeli ha wodiyan haasayiiddi deꞌees. I yootiyoobaa siyay? Neeni, i haasayana danddayennabadan qoppana danddayaasa. Addaameyyo kaalo naꞌa gidida Aabeeli hayqqidi biitta gidoosappe 6,000 laytta heera. Geeshsha Maxaafay, “Haiqqidaageeti aibanne erokkona” yaagees. (Era. 9:5, 10) Hegaa bollikka, Aabeeli haasayido issibinne Geeshsha Maxaafan xaafettibeenna. Yaatin, i nuussi waani haasayana danddayii?

³ Geeshsha ayyaanay denttettin kiitettida PHawuloosi, “Aabeeli harai atto haiqqidikka, ba ammanuwan ha77i gakkanaassi haasayees” yaagiis. (Ibraawe 11:4 nabbaba.) Ee, Aabeeli nuussi ba ammanuwan haasayees. Xoossaa ammanida koyro asi Aabeela. I mino ammanoy deꞌiyo asa gidiyo gishshawu, nuuni a leemisuwaa kaallana danddayoos. Nuuni Aabeela ammanuwaabaa eridi, a leemisuwaa kaallikko, a xeelliyaagan xaafettidabay nuussi haasayiiddi deꞌees giyoogaa mala.

⁴ SHin, Aabeelanne a ammanuwaa xeelliyaagan Geeshsha Maxaafan xaafettidabi keehi guutta gidikkokka, abaa ay tamaarana danddayiyoo? Ane beꞌoos.

5. Yesuusi Aabeelabaa ‘alamee merettido’ wodiyaara gatti yootido wode woygana koyidee? (Tohossa qofaakka xeella.)

⁵ Aabeeli asaa naati meretti simmin daro takkennan yelettiis.  Yesuusi guyyeppe, Aabeelabaa alamee woy ‘saꞌay merettido’ wodiyaara gatti yootiis. (Luqaasa 11:50, 51 nabbaba.) Yesuusi yootido alamee, nagaraappe wozettana danddayiya asaa naata gidiyoogee qoncce. Aabeeli alamiyan oyddantta asa gidikkonne, Xoossaa xeelan wozettana danddayiya koyro asi a gidennan aggenna. a Qassi i loꞌꞌo asa gidanaadan a minttettiya asi baawa.

6. Aabeela aawaynne aayyiyaa ay mala asee?

⁶ Asay saꞌan deꞌiyoogaa doommosaara eta bolli metoy gakkiis. Aabeela aaway Addaameenne a aayyiyaa Hewaana keehi loꞌꞌiyaanne loytti qoppiya asa gidiyoogee qoncce. SHin eti eriiddi wolqqaama nagaraa oottidosona. Issi wode, eti merinaa deꞌuwaa hidootay deꞌiyo nagari baynna asa. SHin eti Xoossaa Yihoowa bolli makkalido gishshawu, bantta deꞌiyo Edene gannatiyaappe yedetettidosona. Eti bantta amottidobaa hara ubbabaappe, ubba bantta naatussi koshshiyaabaappekka kaseyido gishshawu, nagaraa oottin merinaa deꞌuwaa hidootay etappe haliis.—Doo. 2:15–3:24.

7, 8. Hewaana Qaayeela yelido wode woygadee, a hegaadan qoppidoy aybisseeshsha?

⁷ Addaameenne Hewaana gannatiyaappe yedetettidi barchetidosona. SHin eti bayra naꞌaa yelido wode, a sunttaa Qaayeela giidi sunttidosona; hegawu birshshettay “Ayfidabaa” giyoogaa. He wode Hewaana, “GODAI tana maaddin, attuma na7a demmaas” yaagaasu. Issi maccaasee ‘zerettay’ Addaamanne Hewaano balettida, iita uraa issi wode xayssanaagaa Yihooway gannattiyan kasetidi yootiis; Hewaana  hegaa hassayada ba naꞌaa sunttennan aggukku. (Doo. 3:15; 4:1) Hewaana bana he hiraagan odettida maccaasiyo, Qaayeeli qassi “zerettaa” gaada qoppadeeshsha?

⁸ A hegaadan qoppikko, balaasu. Qassi Addaameenne Hewaana hegaa yootiiddi Qaayeela dichidaba gidikko, i nagarancha gidiyoogaa bolli ubba otorettanaadan oottidosona. Guyyeppe, Hewaana naaꞌꞌantto naꞌaa yelaasu; shin Qaayeelabaa qoppidoogaadan abaa waaya qoppana. Eti a Aabeela giidi sunttidosona; hegee “shemppiyo carkko” woy “hada” giyoogaa. (Doo. 4:2) Eti bantta naꞌaa hegaadan sunttidoy Aabeela baggaara gidennan, Qaayeela baggaara anjjettana giidi qoppido gishshataasseeshsha? Hegaassa gidana danddayees.

9. Yelidaageeti Addaameppenne Hewaanippe ay tamaarana danddayiyoonaa?

⁹ Yelidaageetoo, Addaameppenne Hewaanippe darobaa tamaarana danddayeeta. Intte haasayiyoobaaninne oottiyooban intte naati otorettanaadan, gitabaa amottanaadaaninne bantta xallaa siiqanaadan ootteetiiyye, eti Yihoowa siiqanaadaaninne aara dabbotanawu koyanaadan tamaarisseetii? Koyro aawaynne aayyiyaa bantta aawatettaa maara goꞌettibookkona. Gidikkokka, eta naꞌay suure asa gididi dicciis.

10, 11. Qaayeela oosoy aybee, Aabeela oosoy shin, qassi Aabeeli ay mala eeshshay deꞌiyo asee?

¹⁰ Addaamee ba naaꞌꞌu naata so asawu koshshiyaabaa oottanaadan loohissidi dichennan aggenna. Qaayeeli goshshancha, Aabeeli qassi dorssaa henttancha gidiis.

¹¹ Aabeeli issi gitabaakka oottiis. Aabeela ammanoy wodiyaappe wodiyan minniis; guyyeppe PHawuloosi he loꞌꞌo eeshshaa xeelliyaagan xaafiis. Ane abaa qoppa! Aabeelawu loꞌꞌo leemiso gidiya asi he wode baawa. Yaatin, i Xoossaa Yihoowa ammananaadan maaddidabay aybee? A ammanoy minnanaadan maaddiday hagaappe kaallidi beꞌana heezzubaa gidennan aggenna.

12, 13. Aabeeli Yihooway medhidobaa beꞌiyoogee a ammanoy minnanaadan waati maaddana danddayii?

¹² Yihooway medhidobaa. Yihooway biittaa qanggido gishshawu, agunttaynne kinddiichoy mokkiis; hegaappe denddidaagan gadiyaa oosoy wayssidoogee tuma. Gidikkokka, biittay Aabeelantta soo asawu gididi palahiya kattaa mokkiyoogaa aggibeenna. Hegaadankka, kafuwaanne moliyaa gujjin mehee doꞌay, qassi dereti, abbati, shaafati, ano abbati, saloy, shaaray, awa ayfee, aginaynne xoolintteti qanggettibookkona. Aabeeli beꞌiyo ubbabay, mulebaa medhida Xoossaa Yihoowa gita siiquwaa, aadhida eratettaanne loꞌꞌotettaa akeekanaadan oottiyaaba. (Roome 1:20 nabbaba.) I hegaa  nashshiyoogeenne wotti dentti qoppiyoogee a ammanoy minnanaadan oottidoogee qoncce.

¹³ Aabeeli ayyaanaabaa wotti dentti qoppanawu wodiyaa bazzennan aggenna. Ane Aabeeli wudiyaa heemmanawu oottiyoobaa qoppa. Dorssaa heemmiya uri haahosaa bees. I he aada meretata laaggiiddi, loꞌꞌo maatay, pulttoynne kuway deꞌiyoosaa koyiiddi, deriyaa, zanggaaraanne shaafaa kanttidi bees. Xoossay medhido hara mereta ubbaappe maaddananne heemmana koshshiyo meretay dorssa gidennan aggenna. Aabeeli aadhida eranchanne wolqqaama gidida Xoossay hegaadan bana naagananne heemmana koshshiyoogaa akeekideeshsha? I ba woosan hegaa mala qofaa darotoo yootennan aggenna; hegaappe denddidaagan a ammanoy minniis.

14, 15. Hanana giidi Yihooway yootidobay Aabeeli wotti denttidi qoppiyo darobay deꞌanaadan waati maaddidee?

¹⁴ Hanana giidi Yihooway yootidobaa. Addaameenne Hewaana Edene gannatiyaappe ayssi yedetettidaakko bantta naatussi yootennan aggokkona. Hegaa gishshawu, Aabeeli hegaara gayttida darobaa wotti denttidi qoppana danddayees.

¹⁵ Yihooway biittay qanggettanaagaa yootiis. Agunttaynne kinddiichoy mokkido gishshawu, Aabeeli hegee polettidoogaa akeekana danddayees. Qassi Yihooway Hewaana abbe ixeta gidiyo wodenne yeliyo wode keehi tuggatanaagaa yootiis. Aabeeli ba kaaloti yelettiyo wode, hegeekka polettidoogaa akeekidoogee qoncce. Hewaana ba azinaara deꞌanawu keehi amottanaagaa, qassi Addaamee o haaranaagaa Yihooway kasetidi yootiis. Aabeeli hegeekka polettishin beꞌiis. Hanana giidi Yihooway yootido ubbabay polettiyoogaa Aabeeli akeekiis. Hegaa gishshawu, Edenen moorettidabaa giigissiya ‘zerettay’ yaanaagaa Yihooway yootidobay polettanaagaa Aabeeli wozanappe ammaniis.—Doo. 3:15-19.

16, 17. Aabeeli kiruubetuppe ay tamaarana danddayii?

¹⁶ Yihoowa ashkkarata. Aabeelawu leemiso gidiya asi baawa; shin awu leemiso gidiya kiitanchati he wode saꞌan deꞌoosona. Addaameenne Hewaana Gannatiyaappe yedetetti simmin, etikka eta naatikka yaa gelennaadan Yihooway diggiis. Gannatiyawu efiya ogiyaa  naagana mala, Yihooway kiruubeta giyo wolqqaama kiitanchatanne aadhi aadhi wodhiya tama laco bisuwaa he sohuwan wottiis.—Doomettaabaa 3:24 nabbaba.

¹⁷ Aabeeli naatettan he kiruubeta beꞌiyo wode ayyo aybi siyettiyaakko qoppa. He kiitanchati ashuwaa maayido gishshawu, eti keehi wolqqaama mereta gidiyoogaa i akeekana danddayees. Qassi ubbatoo aadhi aadhi wodhiya, tama laco “bisuwaa” beꞌidi i keehi maalaalettennan aggenna. Aabeeli gitatiyo wode, he kiruubeti salettidi bantta oosuwaa aggin beꞌidee? CHiikka. Eranchanne wolqqaama gidida he meretati, keehi daro wodiyawu qamminne gallassi bantta sohuwaappe qaaxxennan deꞌidosona. Yaatiyo gishshawu, Aabeeli Xoossaa Yihoowayyo xillonne ammanettida ashkkarati deꞌiyoogaa akeekiis. Aabeeli bantta soo asay Yihoowayyo ammanettennabanne azazettennaba gidikkokka, he kiruubeti ammanettiyoogaanne azazettiyoogaa eriis. He kiitanchatu leemisoy a ammanuwaa minttidoogee erettidaagaa.

18. Ha wodiyan nuuyyo mino ammanoy deꞌanaadan oottiyaabay aybee?

¹⁸ Yihooway ba medhidobaa baggaara, hanana giidi i yootidobaa baggaaranne a kiitanchatu leemisuwaa baggaara babaa qonccissido ubbabaa wotti denttidi qoppido gishshawu, Aabeela ammanoy keehi minniis. Nuunikka a leemisuwaappe darobaa tamaaroos. Ubba qassi yelagati, so asay etawu leemiso gidana xayikkokka, Xoossaa Yihoowa wozanappe ammanana danddayiyoogaa eriyoogan minettana danddayoosona. Nu yuushuwan maalaalissiya meretay deꞌiyo gishshawu, qassi kumetta Geeshsha Maxaafaynne ammanuwan leemiso gidiya daro asay deꞌiyo gishshawu, ha wodiyan nu ammanoy minnanaadan oottiya darobay deꞌees.

19. Aabeeli ay akeekidee?

¹⁹ Aabeeli Yihoowa mintti ammanido gishshawu, ba ammanuwaa oosuwan bessana koyiis. SHin, saluwaa saꞌaa Medhida Xoossawu asi ay immana danddayii? Xoossay asappe imota woy maado koyennaagee qoncce. Aabeeli bawu deꞌiyaabaappe murutabaa, wozanappe koyidi, Yihoowayyo immiyaaba gidikko, saluwan deꞌiya siiqiya Aaway ufayttanaagaa akeekiis.

20, 21. Qaayeeli Yihoowawu ay yarshshidee, Aabeeli shin, qassi Yihoowawu aybi siyettidee?

²⁰ Aabeeli ba wudiyaappe amarida dorssaa yarshshanawu koyiis. I ba wudiyaa giddon bayra yelettida maratuppe keehi anqqaraa doori shukkidi, ashuwaappe muruta giidi qoppidoogaa yarshshiis. Qaayeelikka, Xoossaa ufayssanawunne a anjjuwaa demmanawu koyidi, ba kattaappe yarshshiis. SHin a wozanan deꞌiyaabay Aabeelaagaappe dumma. Eta qofay issuwaagee haraagaappe dummatiyoogee eti bantta yarshshuwaa shiishshido wode erettiis.

²¹ Addaame naati naaꞌꞌay geella yarshshiyoosaa gimbbidi bantta yarshuwaa taman yarshshennan aggokkona; eti hegaa he wode saꞌan Yihoowayyo ammanettida ashkkara gidida kiruubeti beꞌiyoosan yarshshennan waayi aggana. Yihooway eta yarshshuwaa beꞌiis! Geeshsha Maxaafay, “GODAI Aabeelanne a yarshshuwaa ekkiis” yaagees. (Doo. 4:4) Xoossay hegan ufayttidoogaa ayba ogiyan bessidaakko Geeshsha Maxaafay yootenna.

22, 23. Yihooway Aabeela yarshshuwaa ekkidoy aybissee?

²² Xoossay Aabeela yarshshuwaa ekkidoy aybissee? I ufayttidoy yarshshuwaa qommuwaanee? Aabeeli paxa deꞌiyaabaa suuttaa gussidi yarshshiis. I hegaa mala yarshshoy koshshiyoogaa eridi yarshshidee? Aabeeli deꞌido wodiyaappe daro xeetu layttay aadhi simmin, Yihooway ‘Xoossaa dorssaa’ geetettida, ayba nagarinne baynna ba Naꞌay yarshsho gididi gussana suuttawu leemiso gidanaadan tilla bollaara deꞌiya dorssaa asay yarshshanaadan azaziis. (Yoh. 1:29; Kes. 12:5-7) Gidikkokka, Aabeeli he ubbabaa erees giidi qoppana danddayokko.

²³ Aabeeli bawu deꞌiyaabaappe muruta gididabaa yarshshidoogee qoncce. Yihooway he yarshsho xallaana gidennan, yarshshuwaa yarshshida Aabeelankka ufayttiis. Aabeeli Yihoowa siiqiyoonne wozanappe ammaniyo gishshawu, he yarshshuwaa yarshshin Yihooway ufayttiis.

24. (a) Balay deꞌiyoy Qaayeela yarshshuwaana gidennay aybissee? (b) Qaayeeli ha wodiyan deꞌiya daro asatu mala gididoy aybiinee?

²⁴ SHin Qaayeelabay hegaappe dumma. Yihooway, “Qaayeelanne a yarshshuwaa ekkibeenna.” (Doo. 4:5) Balay deꞌiyoy Qaayeela  yarshshuwaana gidenna; ubba guyyeppe asay kattaa yarshshuwaa yarshshanaadan Xoossaa Higgiyan odettiis. (Wog. 6:14, 15) SHin Geeshsha Maxaafay Qaayeeli “oottido oosoi iita” gidiyoogaa yootees. (1 Yohaannisa 3:12 nabbaba.) Ha wodiyan deꞌiya daro asaagaadan, Qaayeeli Xoossaayyo aqidaba milatiyoogaa xallay gidana giidi qoppennan aggenna. Qaayeeli hegaappe simmin oottidobay i Yihoowa ammanennaagaanne siiqennaagaa bessees.

25, 26. Yihooway Qaayeela woygi zoridee, shin Qaayeeli waatidee?

²⁵ Qaayeeli Yihooway banan ufayttibeennaagaa akeekidi, Aabeelappe loꞌꞌobaa tamaaranawu koyidee? Koyibeenna. Ubba, i ba ishaa morkkiis. Yihooway Qaayeela wozanan deꞌiyaabaa beꞌidi, a siiquwan zoriis. Yihooway Qaayeeli ba iita qofaa aggana xayikko, wolqqaama nagaraa oottanaagaa yootiis; shin i ba iita qofaa aggikko Qaayeela ‘somꞌꞌoy pashkkanaagaa’ yootiis.—Doo. 4:6, 7.

²⁶ Qaayeeli Xoossay yootidobaa siyibeenna. Yaatidi, ‘tana qohana’ giidi qoppibeenna ba kaalo ishaa dembbaa ekkidi biis. Efiidi, Aabeela shocidi wori aggiis. (Doo. 4:8) Hegaa gishshawu, Aabeeli ba ammanuwaa gishshawu yedetettidanne hayqqida koyro asa gidiis. I hayqqidaba gidikkokka, Yihooway a dogibeenna.

27. (a) Aabeeli hayquwaappe denddanaagaa nuuni ammanettana danddayiyoy aybissee? (b) Nuuni aara gayttanawu ay oottana koshshii?

²⁷ Leemiso hanotan, Aabeela suuttay Xoossaa Yihooway haluwaa kiyanaadan akko waassees. Qassi Xoossay iitabaa oottida Qaayeela qaxxayiis; yaatiyoogan suure pirddaa pirddiis. (Doo. 4:9-12) Ubbaappe aaruwan, Aabeela ammanuwaa xeelliyaagan xaafettidabay ha wodiyan nuussi haasayees. Aabeeli issi xeeta gidiya layttaa deꞌennan aggenna; hegee he wode deꞌida asaa bariyaappe qantta gidikkokka, i Xoossaa ufayssiya ogiyan deꞌiis. Aabeeli saluwan deꞌiya ba Aawaa Yihooway a siiqiyoogaanne an ufayttiyoogaa eridi hayqqiis. (Ibr. 11:4) Yaatiyo gishshawu, Yihooway a hassayiyoogaanne saꞌan gannatiyan deꞌanaadan a hayquwaappe denttanaagaa ammanettoos. (Yoh. 5:28, 29) Neeni aara yan gayttaneeshsha? Aabeeli yootiyoobaa siyanawunne aagaadan minttada ammananawu wozanappe murttiyaaba gidikko, aara gayttana danddayaasa.