1-3. (a) Mazamuraawee Daawiti denddenna gita toohuwaadan tookkidobay aybee, qassi I ba wozanaa hirggissiyaabaappe woppaa waati demmidee? (b) Nagaraa oottiyo wode, nuussi denddenna gita tooho mala gidana danddayiyaabay aybee, shin Yihooway waatanaagaa yootii?

 MAZAMURAAWEE Daawiti hagaadan giis: “Ta iitatettai di7uwaadan tana muukkiis; denddenna gita toohuwaadan taayyo deexxees. Taani hitaasinne nippi gaas.” (Mazamure 38:4, 8) Kahay zilꞌꞌiyoogee denddenna gita tooho mala gidiyoogaa Daawiti erees. SHin I ba wozanaa hirggissiyaabaappe woppu giis. Yihooway nagaraa ixxikkokka, issi uri ba nagaraappe wozanappe simmidi he iita oosuwaa aggikko, I nagaranchchaa ixxennaagaa Daawiti akeekiis. Bantta nagaraappe simmidaageeta Yihooway maaranawu koyiyoogaa Daawiti wozanappe ammanettidi, “Abeet Godau neeni . . . atto giyaagaa” yaagiis.—Mazamure 86:5.

² Nagaraa oottiyo wode, nu kahay zilꞌꞌidi gita toohodan keehi deexxishin deꞌana danddayoos. Hegaadan zilꞌꞌettiyoogee loꞌꞌo. Hegee nuuni mooridobaa giigissanawu bessiyaabaa oottanaadan denttettana danddayees. SHin, bessiyaagaappe aaruwan zilꞌꞌettiyoogee qohana danddayees. Nuuni nagaraappe simmikkokka, nu wozanay Yihooway nuuyyo atto geenna giidi ubbatoo nuna mootana danddayees. Nuuni zilꞌꞌettidi ‘keehi daro azzanikko,’ Yihooway nuna pattennabadan xeelliyaabadaaninne ayyo haggaazana danddayennabadan qoppidi, hidootaa qanxxanaadan oottanawu Seexaanay malana danddayees.—2 Qoronttoosa 2:5-11.

³ Yihooway nuna tumuppe pattennabadan xeellii? Mule hegaadan xeellenna! Atto giyoogee Yihoowa gita siiquwaa macara. Nuuni nagaraappe wozanappe simmikko, I nuna atto gaana koyiyoogaa ba Qaalan yootees. (Leemiso 28:13) Yihooway nuussi mule atto geenna giidi qoppennaadan naagettanawu, I nuuyyo atto giyo gaasuwaanne ay keena atto giyaakko ane pilggoos.

4. Yihooway nu meretaabaa ay hassayii, qassi hegee I nuna oyqqiyo hanotaara waani gayttii?

⁴ Yihooway nu abbee laafa gidiyoogaa erees. Mazamure 103:14y, “Nuuni aibippe merettidaakkonne i erees; nuuni biitta gidiyoogaa i akeekees” yaagees. Nuuni nagaraa gaasuwan shugo gidida, biittaappe merettidaageeta gidiyoogaa I hassayees. “Nuuni aibippe merettidaakkonne” I erees giya qofay Geeshsha Maxaafay Yihoowa urqqaa medhdhiyaagan, qassi nuna I medhdhiyo urqqa miishshatun leemisiyoogaa hassayissees. a (Ermmaasa 18:2-6) Urqqaa medhdhiya Yihooway nagaraa gaasuwan nuuni shugo gididobaadaaninne A kaaletuwaadan nuuni oottiyo woy oottennan aggiyo hanotaadan I nuna oyqqees.

5. Roome maxaafay nagarawu deꞌiya wolqqaa waati qonccissii?

⁵ Nagaray keehi wolqqaama gidiyoogaa Yihooway akeekees. Geeshsha Maxaafay nagaray asaa keehi qohana danddayiya wolqqaamaba gidiyoogaa yootees. Nagaray ay keena qohiyaabee? Kiitettida PHawuloosi Roome maxaafan hagaadan qonccissiis: Wotaaddarati bantta halaqaappe garssan deꞌiyoogaadan nuuni “nagaraappe garssan” deꞌoos (Roome 3:9); nagaray asaa bolli ‘kawotiis’ (Roome 5:21); nagaray nunan ‘deꞌees’ (Roome 7:17, 20); nagara ‘higgee’ ubbatoo nunan oottees, hegee nuna haaranawu baaxetees giyoogaa mala. (Roome 7:23, 25) Nagaray pacay deꞌiyo nu asatettaa haariyoogee tuma!— Roome 7:21, 24.

6, 7. (a) Wozanay meqqin maarotaa oychchiyaageeta Yihooway waati xeellii? (b) Nuuni Xoossaa maarotaa bessenna ogiyan qoppana koshshennay aybissee?

⁶ Yaatiyo gishshawu, nuuni Yihoowayyo loytti azazettanawu yeemottikkokka, hegaadan azazettana danddayennaagaa Yihooway erees. Nuuni wozanappe maarotaa oychchiyo wode, I nuuyyo atto gaanaagaa siiquwan yootiis. Mazamure 51:17y hagaadan gees: “Xoossaayyo yarshshiyo yarshshoi meqqida  wozanaa; abeet Xoossau nagaraa oottennan aggarkkinaashsha giya, meqqida wozanaa neeni karakka.” Bana mooranchcha giya “meqqida wozanaa” Yihooway mule yeggi aggenna.

⁷ Gidoppe attin, hegaa giyoogee nuuni oottiyo nagarawu Xoossaa maarotaa demmanawu, nu nagaranchcha gidiyoogaa gaasoyana danddayoos giyoogee? Gaasoyana danddayokko! Yihooway bawu siyettiyaaba xallaa kaallenna. A maarotawu zaway deꞌees. Eriiddi nagaraa oottiyoogaa aggennaageetuyyoonne bantta nagaraappe simmennaageetuyyo I atto geenna. (Ibraawe 10:26) SHin, wozanappe azzaniyaageetuyyo I ubbatoo atto gees. Yihoowa siiquwaa macaraa maalaalissiya hanotan loytti qonccissanawu Geeshsha Maxaafay goꞌettiyo amarida qaalata ane haꞌꞌi beꞌoos.

8. Yihooway nu nagaraa atto gees giyoogee woygiyoogee, qassi hegee nuuni ay ammanettanaadan oottii?

⁸ Nagaraappe simmida Daawiti hagaadan giis: “Taani ta nagaraa neessi paaxaas; ta iitatettaakka neeppe genttabeikke; . . . Yaatin neeni tana deexxida nagaraa atto yaagadasa.” (Mazamure 32:5) “Atto yaagadasa” geetettidi birshshettida Ibraawetto qaalay “denttiyoogaa” woy “tookkiyoogaa” geetettana danddayees. Hegee ha sohuwan gelidoy “balaa, nagaraanne mooruwaa” diggiyoogaa qonccissanaassa. Hegaa gishshawu, Yihooway Daawita nagaraa denttiisinne tookkidi efiis giyoogaa mala. Hegee Daawiti bana mooranchchadan xeelliyoogaa agganaadan oottidoogee qoncce. (Mazamure 32:3) Yesuusa wozuwaa yarshshuwan ammanidi bantta nagaray atto geetettanaadan koyiyaageetu nagaraa eta bollaappe diggiya Xoossan nuunikka wozanappe ammanettana danddayoos.—Maatiyoosa 20:28.

9. Yihooway nu nagaraa nuuppe ay keenaa haassii?

⁹ Yihoowa maarotaa loytti qonccissiya hara qaalaa Daawiti goꞌettiis: “Awai mokkiyoosaappe away wulliyoosai haakkiyoogaadan, hegaadankka GODAI nu mooruwaa nuuppe haassees.” (Mazamure 103:12) Away mokkiyoosaappe away wulliyoosay ay keenaa haakkii? Away mokkiyoosay away wulliyoosaappe ay  keenaa haakkiyaakko qoppanawu metiyaaba; he naaꞌꞌu ginati mule gayttana danddayokkona. Issi eranchchay ha qofay “keehi haaho, nu qoppana danddayiyoogaappekka haaho” gidiyoogaa yootiis. Yihooway atto giyo wode, nu nagaraa nuuni qoppana danddayiyoogaappe aaruwan nuuppe haassana danddayiyoogaa Daawiti ayyaanay denttettin xaafido qaalay qonccissees.

10. Yihooway nu nagaraa atto giyo wode, he nagaraa gaasuwan gakkidabaa nu deꞌo laytta ubban tookkidi deꞌiyaabadan qoppana koshshennay aybissee?

¹⁰ Bootta maayuwaappe xelequwaa yedissanawu mali ereetii? Intte keehi baaxetikkokka, xeleqoy muleera yeddennan aggana danddayees. Yihooway I atto giyoogaa waati qonccissidaakko akeekite: “Intte nagarai baaraadan zo77ikkokka, shachchaadan booxxana; sinadan zo77ikkokka, puuttodan booxxana.” (Isiyaasa 1:18) ‘Baaraa’ giya qaalay tishsha zoꞌo meraa qonccissees. b “Sinay” suutta kule meraa bessiyaaba. (Nahooma 2:3) Nuuni  nurkka baaxetidi nagaraa mule xayssana danddayokko. SHin Yihooway baaraadaaninne sinaadan zoꞌꞌida nagaraa, shachchaadan woy puuttuwaadan booxissana danddayees. Yihooway nu nagaraa atto giyo wode, he nagaraa gaasuwan gakkidabaa nu deꞌo laytta ubban tookkidi deꞌiyaabadan qoppana koshshenna.

11. Yihooway nu nagaraa baappe guyye zaaridi olees giyoogee woygiyoogee?

¹¹ Hizqqiyaasi wolqqaama harggiyaappe paxi simmidi galataa mazamuriyaa xaafiis. I Yihoowawu, “Neeni ta nagara ubbaa neeppe guyye zaarada oladasa” yaagiis. (Isiyaasa 38:17) Hagan Yihooway nagaraappe simmiya uraa nagaraa diggiyoogaadaaninne baappe guyye zaaridi oliyoogaadan odettidoogee I he nagaraa haroode beꞌennaagaa woy hassayennaagaa qonccissees. Issi xuufee ha qofay hagaadan geetettana danddayiyoogaa yootiis: “Taani [nagaraa] mule oottabeennabadan neeni xeelladasa.” Hegee minttettiyaaba gidiyoogee qoncce.

12. Yihooway atto giyo wode, nu nagaraa muleera xayssiyoogaa hananabaa yootiya Mikiyaasi odidobay waati qonccissii?

¹² Hananabaa yootiya Mikiyaasi nagaraappe simmiya ba asawu Yihooway atto gaanaagaa ammanettiyoogaa hagaadan qonccissiis: “Ba asaa atettatu makkalaa qoodennaagee ne mala Xoossai oonee? . . . Ee nu nagaraakka abbaa ciimman olana.” (Mikiyaasa 7:18, 19) Beni wode deꞌidaageetuyyo he qofay yootiyoobay woygiyoogaakko qoppite. “Abbaa ciimman” olettidabaa zaarettidi demmana danddayiyo hidooti deꞌii? Baa. Yaatiyo gishshawu, Yihooway atto giyo wode, nu nagaraa muleera xayssiyoogaa Mikiyaasi yootidobay qonccissees.

13. ‘Neeni nu acuwaa atto ga’ giidi Yesuusi yootido qaalaa birshshettay aybee?

¹³ Yihooway atto giyoogaa qonccissanawu Yesuusi talꞌꞌiya immiyaagaabaanne talꞌꞌi ekkiyaagaabaa yootiya leemisuwaa goꞌettiis. (Maatiyoosa 18:23-35) Nuuni hagaadan woossanaadan Yesuusi zoriis: ‘Neeni nu naaquwaa [“acuwaa,” NW] atto ga.’ (Maatiyoosa 6:12) Hegaa gishshawu, Yesuusi nagaraa acuwan leemisiis. Nuuni nagaraa oottiyo wode, Yihoowawu ‘acotoos.’ “Atto ga” geetettidi birshshettida Giriiketto qaalay “acuwaa aggiyoogaa  woy maariyoogaa gidiyoogaa” issi xuufee yootees. Yihooway atto giyo wode, nuuni qanxxana bessiya acuwaa aggiis giyoogaa. Yaatiyo gishshawu, ba nagaraappe simmida uri minettana danddayees. Yihooway I atto giido acuwaa qanxxanaadan nuna mule oychchenna!—Mazamure 32:1, 2.

14. “Intte nagaraa xayssanaadan” giya qofay nu ay hassayanaadan oottii?

¹⁴ Yihooway atto giyoogee Oosuwaa 3:19n gujjidi qoncciis: ‘Simi Xoossay intte nagaraa xayssanaadan, intte nagaraappe simmite.’ Xayssiyoogaa geetettidi birshshettida Giriiketto qaalay ‘qucciyoogaa woy geeshshiyoogaa’ geetettana danddayees. Issi issi eranchchati yootiyoogaadan, ha leemisoy kushiyan xaafidobaa qucciyoogaa qonccissees. Hegaadan waani hanana danddayii? Karbeniyaa giyoobaa, shidaanne haattaa walakkidi beni wode deꞌiya asay qalamiyaa giigissees. He qalamiyan xaafi simmidi takkennan, xaafidobaa issi uri irxxa ispponjjiyan quccana danddayees. Hegee Yihoowa maarotaa loytti qonccissiya leemiso. I nu nagaraa atto giyoogee, hegaa ispponjjiyan quccidi xayssees giyoogaa mala.

15. Yihooway nuuni abaa ay eranaadan koyii?

¹⁵ Nuuni he leemisota yuushshi qoppiyoogan nu nagaraappe wozanappe simmikko, Yihooway tumuppe atto giyoogaa nuuni eranaadan I koyiyoogee qoncce. He nagaraa sinttanawu I mule aggenna giidi nuuni yayyana koshshenna. Hagee Geeshsha Maxaafay Yihoowa gita maarotaabaa yootiyo sohuwan qoncciis. I atto giyo wode hegaa dogees.

16, 17. Yihooway nu nagaraa dogees giidi Geeshsha Maxaafay yootiyoogee woyganaassee, neeni hegaadan zaaridoy aybissee?

¹⁶ Yihooway ooratta maachchan deꞌiyaageeta xeelliyaagan hagaadan qaalaa geliis: “Taani eta naaquwaa atto gaana; eta nagaraakka naa77antto hassayikke.” (Ermmaasa 31:34) Hegaa giyoogee Yihooway atto giidobaa zaarettidi hassayana danddayenna giyoogee? Hegaadan gidennaagee qoncce. Daawita  gujjin, Yihooway nagaraa atto giido daro asatubaa Geeshsha Maxaafay yootees. (2 Sameela 11:1-17; 12:13) Eti oottido nagaraa Yihooway awudekka eriyoogee qoncce. Eta nagaray, qassi eti nagaraappe simmidoogeenne Xoossay etawu atto giidoogee nu goꞌꞌawu xaafetti uttiis. (Roome 15:4) Yaatikko, Geeshsha Maxaafay Yihooway atto giidoogeetu nagaraa zaarettidi “hassayenna” giidi yootiyoy woyganaassee?

¹⁷ ‘Taani hassayana’ giya Ibraawetto qaalay kasebaa hassayiyoogaa xalla gidenna. Tiꞌolojikal Wordbuuk Of Ze Old Testaament giyo maxaafay hegee “likkebaa oottiyoogaa bessiyaaba” gidiyoogaa yootees. Yaatiyo gishshawu, nagaraa ‘hassayiyoogee’ nagaranchchata qaxxayiyoogaa bessiyaaba. (Hoose7a 9:9) SHin Xoossay “taani . . . eta nagaraakka naa77antto hassayikke”  giyo wode, nagaraappe simmidaageeta I issitoo atto giikko, he nagaraa gishshawu eta sinttappe qaxxayennaagaa qonccissees. (Hizqqeela 18:21, 22) Hegaa gishshawu, Yihooway dogees giyoogee nuna zaari zaari mootanawu woy qaxxayanawu nu nagaraa darotoo hassayenna giyoogaa. Nu Xoossay atto giyoogaanne dogiyoogaa eriyoogee keehi minttettiyaaba.

18. Nagaraa oottida urawu Yihooway atto gees giyoogee he uri oottido balabaa gaasuwan gakkiyaabaappe A laꞌa kessenna giyoy aybissee?

¹⁸ Nagaraa oottida uraa Yihooway atto gees giyoogee he uri oottido balabaa gaasuwan gakkiyaabaappe A laꞌa kessees giyoogee? CHii laꞌa kessenna. Nuuni nagaraa oottikko hegaa gaasuwan gakkiyaabaappe attana giidi qoppana bessenna. PHawuloosi hagaadan giis: “Asi ba zeriyoogaa zaarettidi cakkana.” (Galaatiyaa 6:7) Nuuni oottidobaa gaasuwan issi issibay nuna gakkana danddayees. Hegee Yihooway nuuyyo atto gi simmidi nu bolli iitabay gakkanaadan oottees giyoogaa gidenna. Metoy gakkiyo wode, issi Kiristtaanee ‘Taani kase oottido nagaraa gishshawu, Yihooway tana qaxxayiiddi deꞌennan aggenna’ giidi qoppana koshshenna. (Yaaqooba 1:13) Qassi, nuuni oottido moorobaa gaasuwan nu bolli gakkiya ubbabaa Yihooway teqqenna. Paraman shaahettiyoogaa, koyennan shahaariyoogaa, mattumaa gaytettan oyqqiya harggiyaa, hara uri ammanennaagaa woy bonchchennaagaa malabati nuuni nagaraa oottidoogaa gaasuwan nu bolli gakkiya azanttiyaaba gidana danddayoosona. Daawiti Berssaabiiranne Ooriyoonaara gayttidaagan oottido nagaraa Yihooway atto gi simmidikka, he nagaraa gaasuwan Daawita bolli wolqqaama qohoy gakkennaadan teqqibeennaagaa hassaya.—2 Sameela 12:9-12.

19-21. (a) Wogaabaa 6:1-7n deꞌiya higgee qohettidaagaakka mooranchchaakka waatidi goꞌꞌii? (b) Nuuni oottido nagaran harati qohettikko, nuuni waatiyo wode Yihooway ufayttii?

¹⁹ Nuuni oottidoban harati qohettikko, nu nagaray  harabaakka kaalettana danddayees. Leemisuwawu, Wogaabaa shemppo 6​n deꞌiya taarikiyaa qoppa. Muuse Higgee he shemppuwan issi uri bonqqidi, wolqqan ekkidi woy cimmidi ba mala Israaꞌeela asabaa ekkiyoogan wolqqaama nagaraa oottiya uraabaa yootees. Nagaranchchay ba oottidobaa kaddana, ubba qassi xalidi wordduwan caaqqana danddayees. Issi uri markkatiyoobay haraagaappe phalqqettiyo wode hegaadan hanees. Gidoppe attin, moorida uraa kahay zilꞌꞌido gishshawu, I guyyeppe ba nagaraa paaxees. Xoossay A atto gaanaadan I heezzubaa oottana koshshees: I ba ekkidobaa zaarees, ba wuuqqidobaa bolli ichchashantto kushiyaa gujjidi qixaatiya qanxxees, qassi ba naaquwawu issi dorssa orggiyaa yarshshees. Gujjidi, Higgee hagaadan gees: ‘Qeesee he bitaniyaa naaquwaa atto giissees, bitaneekka ba naaquwaa ubbaappe maarettana.’—Wogaabaa 6:1-7.

²⁰ Ha higgee Xoossay kehatettan giigissidoba. Hegee qohettida uray babaa zaarettidi demmiyoogan goꞌettanaadaaninne mooranchchay wurssettan ba nagaraa ammaniyo wode I keehi woppu gaanaadan oottiyoogee qoncce. Qassi, higgee moorida ura kahay I ba mooruwaa ammanidi hegaa giigissana mala A denttettanaadan oottiyoogan maaddiis. I yaatana xayikko, Xoossay A maarenna.

²¹ Nuuni Muuse Higgiyaa garssan deꞌana xayikkonne, atto giyoogaa gujjin, Yihoowa qofaa nuuni akeekanaadan he Higgee nuna maaddees. (Qolasiyaasa 2:13, 14) Nuuni oottido nagaran harati qohettikko, hegaa giigissanawu nuuni oottana danddayiyoobaa oottiyo wode Xoossay ufayttees. (Maatiyoosa 5:23, 24) Yaatanawu nuuni nu nagaraanne nu mooruwaa ammanana, ubba qassi qohettida urawu atto gaana koshshees. Yaatidi Yesuusa yarshshuwaa baggaara Yihoowa woossananne I nuuyyo atto gaanaagaa ammanettana danddayoos.—Ibraawe 10:21, 22.

22. Yihooway atto giyoogee ay gujjana danddayii?

²² Siiqiya aawaagaadan, Yihooway nuuyyo atto gaananne issi issiban nuna seerana danddayees. (Leemiso 3:11, 12) Nagaraappe  simmida Kiristtaanee gubaaꞌe cima, gubaaꞌiyawu oottiyaagaa woy ubba wode mishiraachchuwaa yootiyaagaa gididi oottiyo maataa aggiyoogee koshshana danddayees. I xoqqu ootti xeelliyo maataa amarida wodiyawu aggiyoogee A azanttiyaaba gidana danddayees. SHin, he seeray Yihooway ayyo atto gibeennaagaa bessiyaaba gidenna. Yihoowa seeray I nuna siiqiyoogaa qonccissiyoogaa nuuni hassayana bessees. Hegaa ekkiyoogeenne oosuwan peeshshiyoogee nuna keehi maaddees.—Ibraawe 12:5-11.

23. Yihooway nuna maarenna giidi nuuni mule qoppana koshshennay aybissee, qassi atto giyoogan nuuni A milatana koshshiyoy aybissee?

²³ Xoossay ‘atto giyoogaa’ eriyoogee keehi minttettiyaaba! Nuuni mooriyaaba gidikkonne, Yihooway nuna maarenna giidi mule qoppana koshshenna. Nuuni nagaraappe simmikko, oottido moorobaa giigissanawu issi issibaa oottikko, qassi Yesuusa wozuwaa yarshshuwaa baggaara maarotaa demmanawu wozanappe woossikko, Yihooway nuna maaranaagaa ammanettana danddayoos. (1 Yohaannisa 1:9) Nuuni issoy issuwaa oyqqiyo ogiyan maariyaageeta gidiyoogan, Yihoowa milatiyaageeta gidoos. Nagaraa oottenna Yihooway nuuyyo siiquwan atto giikko, nagaranchcha gidida nuuni issoy issuwawu atto gaanawu nuussi danddayettida ubbabaa oottiyoogee bessiyaaba gidiyoogee qoncce.