TIMIRTTE 17
Nuuni Yesuusabaa Eriyoobay Aybee?
Nuuni Yesuusi saꞌan deꞌiyo wode yootidobaanne oottidobaa loytti eriyo wode, aaranne A Aawaa Yihoowaara dabbotanawu koyanaadan oottiya eeshshata akeekoos. He ufayssiya eeshshatuppe amaridaageeti awugeetee? Qassi nu deꞌuwan Yesuusa waani milatana danddayiyoo?
1. Yesuusi ayba ogetun ba Aawaa milatii?
Yesuusi saluwan daro biiloone layttawu siiqiya ba Aaway oottiyoobaa beꞌiisinne appe tamaariis. Hegaappe denddidaagan, A qofay, A xeelaynne I oottiyoobay A Aawaagaa mala. (Yohaannisa 5:19 nabbaba.) Yesuusa eeshshay A Aawaa eeshshaa keehi milatiyo gishshawu I, “Tana be7ida urai Aawaakka be7iis” yaagiis. (Yohaannisa 14:9) Neeni Yesuusa eeshshaa eriyo wode, Yihoowa loytta erana. Leemisuwawu, Yesuusi asawu qarettiyoogee Yihooway neessi ay keena qarettiyaakko qonccissees.
2. Yesuusi Yihoowa siiqiyoogaa waati bessidee?
Yesuusi, “Taani Aawaa siiqiyoogaa sa7ai eranau bessees; qassi [“erana mala,” NW] taanikka Aawai tana azazidoogaadan oottais” yaagiis. (Yohaannisa 14:31) Yesuusi saꞌan deꞌiyo wode ba Aawawu azazettiyoogee metiyo wodekka azazettiyoogan, A keehi siiqiyoogaa bessiis. Qassi, Yesuusi ba Aawaa keehi siiqiyo gishshawu, ubbatoo Abaa yootanawunne harati aara dabbotanaadan maaddanawu koyiis.—Yohaannisa 14:23.
3. Yesuusi asaa siiqiyoogaa waati bessidee?
Yesuusi ‘asaa naatun ufayttiyoogaa’ Geeshsha Maxaafay yootees. (Leemiso 8:31) I asaa minttettiyoogaaninne kehatettan maaddiyoogan he siiquwaa bessiis. I oottido maalaalissiyaabati A wolqqaa bessiyoogaa xalla gidennan, I qarettiyoogaakka bessoosona. (Marqqoosa 1:40-42) I asa ubbawu keha, qassi asa asappe shaakkenna. I yootiyoobay wozanaa suure gidida asati ubbay hegaa siyidi minettanaadaaninne sinttanaaban hidootaa wottanaadan oottiis. Yesuusi asa ubbaa siiqiyo gishshawu, waayettanawunne hayqqanawu eeno giis. Ubba qassi I tamaarissidobaa azazettiyaageeta keehi siiqees.—Yohaannisa 15:13, 14 nabbaba.
LOYTTA AKEEKA
Yesuusa eeshshaabaa loytta era. Qassi aagaadan waata siiqananne kehana danddayiyaakko akeeka.
4. Yesuusi ba Aawaa siiqees
Yesuusi oottidobay nuuni Xoossaa waati siiqanaakko tamaarissees. Luqaasa 6:12nne Yohaannisa 15:10; 17:26 nabbabite. Xiqiseta huuphiyan huuphiyan nabbabidi ha oyshaa tobbite:
-
Yesuusa milatiyoogan Yihoowa siiqiyoogaa waati bessana danddayiyoo?
Yesuusi saluwan deꞌiya ba Aawaa siiqees; qassi woosan aara darotoo haasayiis
5. Maadoy koshshiyoogeetussi Yesuusi qarettees
Yesuusi babaappe aaruwan haratubaa qoppees. I daafurido wodekka, bawu deꞌiya wodiyaaninne wolqqan asaa maaddiis. Marqqoosa 6:30-44 nabbabite; yaatidi ha oyshata tobbite:
-
Ha taarikiyan, Yesuusi haratuyyo qoppido amarida ogeti aybee?—Paydo 31, 34, 41nne 42 xeella.
-
Asaa maaddanaadan Yesuusa denttettidabay aybee?—Paydo 34 xeella.
-
Yesuusa eeshshay Yihoowagaa mala; yaatin he ubbabaappe Yihoowabaa ay tamaaray?
-
Haratuyyo qoppiyoogan Yesuusa milatana danddayiyo amarida ogeti aybee?
6. Yesuusi keha
Yesuusawu darobay deꞌana xayikkonne, bawu deꞌiyaabaappe haratussi immiis. Nuunikka kehanaadan I minttettees. Oosuwaa 20:35 nabbabite; yaatidi ha oyshaa tobbite:
-
Yesuusi yootidoogaadan, nuuni ufayttanawu waatana danddayiyoo?
BIIDUWAA beꞌite; yaatidi kaallidi deꞌiya oyshaa tobbite.
-
Nuussi daro aqoy deꞌana xayikkonne, nuuni immana danddayiyo amarida ogeti awugeetee?
Hagaa eray?
Nuuni Yesuusa sunttan Yihoowa woossanaadan Geeshsha Maxaafay tamaarissees. (Yohaannisa 16:23, 24 nabbaba.) Nuuni hegaadan woossiyo wode, Yihoowaara dabbotanaadan nuna maaddanawu Yesuusi oottidobaa gishshawu galatiyoogaa bessoos.
ISSI ISSI ASAY HAGAADAN GEES: “Nu waayettiyoogee Xoossaa qofissenna.”
-
Yesuusa eeshshay A Aawaagaa mala gidiyo gishshawu, I oottidobati Yihooway nuussi qoppiyoogaa waati bessiyoonaa?
AY AKEEKADII?
Yesuusi Yihoowanne asaa siiqees. Yesuusi ba Aawaa mala gidiyo gishshawu, neeni Yesuusa loytta eriyo wode Yihoowakka loytta erana.
Zaaretuwaa
-
Yesuusaagaadan Yihoowa waati siiqana danddayiyoo?
-
Yesuusaagaadan asaa waati siiqana danddayiyoo?
-
Yesuusa eeshshatuppe neeni keehi dosiyoy awugee?
PILGGA
Nuuni Yesuusa milatana danddayiyo amarida eeshshata akeeka.
“Yesuusa Milatana Danddayiyo Eeshshata” (Yesuusa—Ogiyaa, Tumaa, Deꞌuwaa, sinttaa 317)
Nuuni Yesuusa sunttan woossana koshshiyoy aybissakko akeeka.
“Yesuusa Sunttan Woossana Koshshiyoy Aybissee?” (Wochchiyo Keelaa huuphe yohuwaa)
Yesuusa meraabaa Geeshsha Maxaafay yootiyoobi deꞌii?
Yesuusi macca asaa oyqqido ogiyaappe nuuni ay tamaarana danddayiyoo?
“Xoossay Maccaasaa Bonchees” (Wochchiyo Keelaa, Xiqimita 1, 2012)
Hageeta Beꞌadii?
ASAY DAROTOO OYCHIYO OYSHATA
Yihoowa Markkati Geeshsha Maxaafaa Xannaꞌissiyoy Ayba Ogiyaanee?
Yihoowa Markkati miishsha qanxxissennan xannaꞌissiyo prograamiyan, Geeshsha Maxaafaa birshshettaa awugaakka goꞌettana danddayaasa. Ne so asa ubbaynne ne laggetikka nenaara xannaꞌanaadan shoobbana danddayaasa.
