TIMIRTTE 15
Yesuusi Oonee?
Yesuusi asi deꞌido wode ubban keehi erettida asatuppe issuwaa. Daro asay Yesuusa sunttaa eriyaaba gidikkonne, abaa darobaa erenna, qassi Yesuusi tumuppe oonakko daroti qoppiyoobay dumma dumma. Geeshsha Maxaafay abaa yootiyoobay aybee?
1. Yesuusi oonee?
Yesuusi saluwan deꞌiya wolqqaama ayyaana mereta. Xoossaa Yihooway ubbabaappe koyro A medhdhiis. Hegaa gishshawu, I “merettidabaa ubbaappe aadhdhiya baira Na7a” geetettees. (Qolasiyaasa 1:15) Yihooway barkka medhdhidoogee Yesuusa xalla gidiyo gishshawu, I Geeshsha Maxaafan Xoossawu “mexi issi Na7aa” geetettiis. (Yohaannisa 3:16) Yesuusi ba Aaway Yihooway ubbabaa medhdhiyo wode maaddiyoogan aara issippe oottiis. (Leemiso 8:30 nabbaba.) Yesuusi awudekka Yihoowawu mata dabbo gididi deꞌees. I Xoossay kiittidobaanne azazidobaa yootiyoogan A gishshaa haasayiya ‘Qaalaa’ gididi ammanettidi oottees.—Yohaannisa 1:14.
2. Yesuusi saꞌaa yiidoy aybissee?
Yihooway 2,000 gidiya layttappe kase maalaalissiyaabaa oottiis. I ba geeshsha ayyaanan Yesuusa deꞌuwaa saluwaappe ehiidi Mayraamo giyo geelaꞌee uluwan wottiis. Yaatin, Yesuusi asa gididi yelettiis. (Luqaasa 1:34, 35 nabbaba.) Yesuusi qaalaa gelido Masiyaa woy Kiristtoosa gidanaadaaninne I asaa ashshanaadan Yihooway A saꞌaa kiittiis. a Geeshsha Maxaafay Masiyaabaa yootiyo hiraagati ubbay A bolli polettidosona; hegaappe denddidaagan, Yesuusi “de7o Xoossaa Na7aa Kiristtoosa” gidiyoogaa asay eriis.—Maatiyoosa 16:16.
3. Yesuusi haꞌꞌi awan deꞌii?
Yesuusi asa gididi deꞌidi hayqqi simmin, Xoossay A kiitanchcha oottidi denttin, I saluwaa biis. Yan ‘Xoossay A keehi xoqqu xoqqu oottiis.’ (Piliphphisiyuusa 2:9) Yesuusi haꞌꞌi keehi wolqqaama kiitanchcha. Wolqqan appe aadhdhiyay Yihoowa xalla.
LOYTTA AKEEKA
Yesuusi tumuppe oonakko, qassi abaa nuuni tamaariyoogee keehi koshshiyoy aybissakko loytta akeeka.
4. Yesuusi Ubbaa Danddayiya Xoossaa gidenna
Yesuusi saluwan deꞌiya wolqqaama ayyaana mereta gidikkonne, ba Xoossawunne ba Aawawu, Yihoowawu azazettiyoogaa Geeshsha Maxaafay yootees. Nuuni hegaadan gaana danddayiyoy aybissee? Yesuusi Xoossaappe aybin dummatiyaakko Geeshsha Maxaafay tamaarissiyooba eranawu BIIDUWAA beꞌite.
Kaallidi deꞌiya xiqiseti Yihooway Yesuusappe dummatiyoogaa nuuni akeekanaadan maaddoosona. Xiqiseta huuphiyan huuphiyan nabbabidi kaallidi deꞌiya oyshata tobbite.
Luqaasa 1:30-32 nabbabite.
-
Yesuusi “Ubbaappe Bolla Xoossaa” Yihoowappe dummatiyoogaa kiitanchchay yootidobay waati bessii?
Maatiyoosa 3:16, 17 nabbabite.
-
Yesuusi haattan muukettiyo wode saluwaappe woygiya cenggurssay siyettidee?
-
He cenggurssay oogaa gaada qoppay?
Yohaannisa 14:28 nabbabite.
-
Daro wodiyaa deꞌidaynne maatan xoqqay oonee, aawayiyye naꞌay?
-
Yesuusi Yihoowa ba Aawaa giis. Hegaappe nu ay tamaariyoo?
Yohaannisa 12:49 nabbabite.
-
Yesuusi taani ta Aawaappe aynne dummatikke giidi qoppii? Ne qofay aybee?
5. Yesuusi Mase gidiyoogaa bessiyaabay aybee?
Geeshsha Maxaafan Masiyaabaa, woykko Xoossay asaa ashshanawu dooridoogaabaa yootiya daro hiraagati deꞌoosona. He hiraagati Masee oonakko asay eranaadan maaddidosona. Yesuusi saꞌaa yiidi polido amarida hiraagata eranawu BIIDUWAA beꞌite.
Geeshsha Maxaafan deꞌiya ha hiraagata nabbabite; yaatidi kaallidi deꞌiya oyshata tobbite:
Masee awan yelettanaagee odettidaakko eranawu Mikiyaasa 5:2 nabbabite. b
-
Yesuusi yelettidoogan ha hiraagay polettidee?—Maatiyoosa 2:1.
Masiyaa hayquwaabaa Geeshsha Maxaafay kasetidi yootidobaa eranawu Mazamure 34:20nne Zakkaariyaasa 12:10 nabbabite.
-
Ha hiraagati polettidonaa?—Yohaannisa 19:33-37.
-
Yesuusi hageeti polettanaadan oottana danddayees gaada qoppay?
-
Hegee Yesuusabaa ay qonccissii?
6. Nuuni Yesuusabaa eriyoogan goꞌettoos
Yesuusabaanne I oottanaadan Xoossay koyiyoobaa eriyoogee keehi koshshiyaaba gidiyoogaa Geeshsha Maxaafay yootees. Yohaannisa 14:6nne 17:3 nabbabite; yaatidi ha oyshaa tobbite:
-
Yesuusabaa eriyoogee keehi koshshiyoy aybissee?
Xoossaara dabbotanawu nuuyyo Yesuusi ogiyaa giigissiis. I Yihoowabaa tumaa tamaarissiis; qassi nuuni A baggaara merinaa deꞌuwaa demmoos
ISSI ISSI ASAY HAGAADAN GEES: “Yihoowa Markkati Yesuusa ammanokkona.”
-
Woyga zaaruutee?
AY AKEEKADII?
Yesuusi wolqqaama kiitanchcha. I Xoossaa Naꞌaanne Masiyaa.
Zaaretuwaa
-
Yesuusi “merettidabaa ubbaappe aadhdhiya baira Na7a” geetettiyoy aybissee?
-
Yesuusi saꞌaa yaanaappe kase ay oottidee?
-
Yesuusi Mase gaanaadan oottiya gaasoti aybee?
PILGGA
Yesuusi Mase gidiyoogaa nuuni aybin eriyaakko loytta akeeka.
“Masiyaabaa Yootiya Hiraagati Yesuusi Mase Gidiyoogaa Bessiyoonaa?” (Nu websaytiyan deꞌiyaaba)
Geeshsha Maxaafay Xoossay Yesuusawu Aawa giyoy asi ba naatussi aawa giyoogaa malakkonne akeeka.
“Yesuusi Xoossaa Naꞌaa Geetettiyoy Aybissee?” (Nu websaytiyan deꞌiyaaba)
Sillaasee Geeshsha Maxaafaa timirtte gidennay aybissakko akeeka.
Issi maccaasiyaa Geeshsha Maxaafay Yesuusabaa ay yootiyaakko erido wode I deꞌoy waani laamettidaakko nabbaba.
“Ayhuda Maccaasiyaa A Ammaniyoobaa Yiggidoy Aybissakko Yootaasu” (Beegottite! huuphe yohuwaa)
a Asawu atotettay koshshiyoy aybissakko, qassi Yesuusi nuna waati ashshiyaakko timirtte 26ninne 27n beꞌana.
b Masee saꞌaa awude yaanaakko kasetidi odettida hiraagawu Wurssetta Qofaa 2 xeella.
Hageeta Beꞌadii?
ASAY DAROTOO OYCHIYO OYSHATA
Yihoowa Markkati Geeshsha Maxaafaa Xannaꞌissiyoy Ayba Ogiyaanee?
Yihoowa Markkati miishsha qanxxissennan xannaꞌissiyo prograamiyan, Geeshsha Maxaafaa birshshettaa awugaakka goꞌettana danddayaasa. Ne so asa ubbaynne ne laggetikka nenaara xannaꞌanaadan shoobbana danddayaasa.
