Yisaaqi Irbbiqo machiyo wode ayyo layttay 40. I o keehi siiqiis. Guyyeppe, eti mentte naaˈˈu attuma naata yelidosona.

Bayra naˈay Eesawa, qassi kaaloy Yaaqooba. Eesawi karen peˈiyoogaa dosees; qassi i shankkan gooba. SHin Yaaqoobi son peˈiyoogaa dosees.

He wode, issi aaway hayqqiyo wode bayra naˈawu daro gadiyaanne miishshaa immees. Hegee laataa geetettees. Yisaaqa son he laatay Yihooway Abrahaamayyo gelido qaalaarakka gayttidaba. He qaalaabay Eesawa qofissibeenna; shin hegee keehi koshshiyaaba gidiyoogaa Yaaqoobi erees.

Issi gallassi Eesawi shankkaa biidi gallassa kumettaa gamˈˈidi soo yiyo wode keehi daafuriis. I Yaaqoobi kattiyo loˈˈo qumay sawuwaa tonggu gin, ‘Tana ha zoˈo woxiyaappe miza; tana namisay worees!’ yaagiis. Yaaqoobi, ‘Taani ne laataa ekkanaadan, ane taayyo koyro qaalaa gela’ yaagiis. Eesawi hagaadan giis: ‘Tana ta laataabay aynne qofissenna! Neeni laataa ekkana danddayaasa. Taani maana koyays.’ Eesawi hegaadan oottidoogee loˈˈo gaada qoppay? CHii, loˈˈo gidenna. Eesawi keehi alˈˈobaa issi shaate woxiyan aattidi immiis.

Yaaqoobi keehi ceeggido gishshawu, ba bayra naˈaa anjjiyo wodee gakkiis. SHin Irbbiqa kaalo naˈay Yaaqoobi anjjuwaa ekkanaadan maaddaasu. Eesawi hegaa erido  wode, keehi hanqqettidi ba mentte ishaa woranawu halchiis. Yisaaqinne Irbbiqa Yaaqoobi qohettennaadan naaganawu koyido gishshawu hagaadan giidosona: ‘Eesawi hanqquwaa agganaashin, ne aayee ishaa Laabaanakko baada a matan deˈashsha.’ Yaaqoobi ba aawaanne aayee zoriyaa siyidi ba shemppuwaa ashshanawu eesuwan biis.