Yesuusi bana kaalliyaageetuura Galiila biittan gayttiis. I, ‘Biidi biitta ubban asaa erissiyo ashkkara oottite. Taani inttena tamaarissidobaa eta tamaarissidi xammaqite’ yaagidi keehi koshshiya azazuwaa etawu immiis. He wode i, ‘Taani ubba wode inttenaara deˈiyoogaa hassayite’ yaagidi qaalaa geliis.

Yesuusi hayquwaappe denddi simmidi 40 gallassan, ba erissiyo ashkkaratuppe xeetan qoodettiyaageetussi Galiilaaninne Yerusalaamen beettiis. I keehi koshshiya timirttiyaa eta tamaarissiis; qassi maalaaliya darobaa oottiis. Hegaappe guyyiyan, i kiitettidaageetuura wurssetta gaytettaa Dabira Zayte deriyan gayttiis. I, ‘Yerusalaameppe kiyoppite. Ta Aaway inttessi immana giidoogaa naagite’ yaagiis.

I giidobay kiittidoogeetussi gelibeenna. Eti a, ‘Neeni haˈˈi Israaˈeela Kawo gidanee?’ yaagidi oychidosona. Yesuusi hagaadan giis: ‘Taani Kawo gidanaadan Yihooway keerido wodee gakkibeenna. Mata wode geeshsha ayyaanay intte bolli wodhiyo wode intte wolqqaa ekkana, yaatidi taassi markkattiyaageeta gidana. Yerusalaame, Yihudaa, Samaariyaanne saˈaa gaxaa gakkanaashin biidi sabbakite.’

Hegaappe guyyiyan, Yesuusi xoqqu xoqqu giiddi, saluwaa bin, shaaray a genttiis. I erissiyo ashkkarati a xeelliyoogaa aggibookkona; shin i biichiis.

Erissiyo ashkkarati Dabira Zayte Deriyaappe Yerusalaame biidosona. Eti pooqiyan deˈiya kifiliyan ubba wode issippe gayttidi woossoosona. Eti Yesuusi banttawu hara kaaletuwaa immana gakkanaassi naagoosona.