Yerusalaame gimbbee zaaretti keexettoosappe 400⁠ppe dariya layttay aadhi simmin, Zakkaariyaasa giyo qeeseenne a machiyaa Elssaabeexa he katamaa matan deꞌoosona. Eti azinanne macho gididi daro layttaa deꞌidosona; shin issi naꞌanne yelibookkona. Issi gallassi Zakkaariyaasi beeta maqidasiyan Geeshsha Sohuwan ixaanaa cuwayiyo wode, kiitanchay Gabreeli ayyo beettiis. Zakkaariyaasi yayyiis; shin Gabreeli hagaadan giis: ‘Yayyoppa. Taani Yihoowappe neessi mishiraachuwaa ekka yaas. Ne machiyaa Elssaabeexa attuma naꞌa yelana; a sunttay Yohaannisa geetettana. Yihooway Yohaannisa dumma oosuwawu dooriis.’ Zakkaariyaasi, ‘Taani nena waata ammanana danddayiyaanaa? Naꞌa yelanawu ta machiyaakka taanikka keehi cima’ yaagidi oychiis. Gabreeli hagaadan giis: ‘Ha mishiraachuwaa neessi odanaadan tana Xoossay neekko kiittiis. SHin ta qaalaa neeni ammanabeenna gishshawu, naꞌay yelettana gakkanaashin neeni haasayana danddayakka.’

Zakkaariyaasi beeta maqidasiyan haroodeegaappe keehi takkiis. Yaanido gishshawu, i wurssettan kiyiyo wode, karen naagiya asay aybi hanidaakko eranawu koyiis. Zakkaariyaasi haasayana danddayenna. I ba kushiyan malaata xallaa bessees. Zakkaariyaasi Xoossaappe kiitaa siyidoogaa asay he wode akeekiis.

Guyyeppe, Elssaabeexa shahaarada kiitanchay yootidoogaadan attuma naꞌa yelaasu. I laggetinne dabboti naꞌaa beꞌanawu yiidosona. Eti iira keehi ufayttidosona. Elssaabeexa, ‘A sunttay Yohaannisa gidana’ yaagaasu. Eti, ‘Ne dabboppe Yohaannisa geetettiyay issoynne baawa. A aawaa sunttan Zakkaariyaasa gaada suntta’ yaagidosona. SHin Zakkaariyaasi, ‘A sunttay Yohaannisa’ giidi xaafiis. He wode sohuwaara, zaarettidi haasayana danddayiis! He naꞌaabaa odoy Yihudaa biittaa ubbaa gakkiis; gakkin asay garamettidi, ‘Ha naꞌay wodeppe waananeeshsha?’ yaagiis.

 He wode Zakkaariyaasan geeshsha ayyaanay kumiis. I hagaadan giidi hiraagaa yootiis: ‘Yihoowawu galatay gido. I nuna ashshanawu Masiyaa kiittanawu, Abrahaamayyo qaalaa geliis. Yohaannisi hananabaa yootiyaagaa gidana; qassi i Masiyaayyo ogiyaa giigissana.’

Elssaabeexi dabbee Mayraamiyyookka issi dummabay haniis. Hegaabaa kaalliya shemppuwan beꞌana.