Yihooway Edene giyoosan ataakilttiyaa tokkiis. He ataakiltte sohuwan ciishshay, mittay, meheenne doꞌay kumiis. Hegaappe simmidi Xoossay koyro bitaniyaa Addaama biittaa baanaappe medhidi, a siiriyaara punniis. Aybi hanidaakko eray? He bitanee paxa deꞌiya asa gidiis! Yihooway Addaamee gannatiyaa naagana mala yan wottiis; qassi Xoossay mehiyawunne doꞌawu sunttaa sunttanaadan ayyo yootiis.

Yihooway Addaamessi gita azazuwaa immiis. I Addaama hagaadan giis: ‘Issi dumma mittaa teeraa mooppappe attin, ubba mittaa teeraappe ma. Neeni he mittaa teeraa miikko hayqqana.’

Guyyeppe, Yihooway, ‘Taani Addaama maaddiyaaro medhana’ yaagiis. Xoossay Addaamee xiskkuwaa kayranaadan oottiis; oottidi, I Addaameyyo maccaasiyo medhanawu Addaame gaylliyaa meqettaappe issuwaa goꞌettiis. I sunttay Hewaano. Koyro keetta  asa gididaageeti Addaamanne Hewaano. Ba machiyo xeelliyaagan Addaameyyo aybi siyettidee? Addaamee keehi ufayttidi hagaadan giis: ‘Yihooway ta gaylliyaappe ekkidi medhidooro! Hanna tana milatawusu.’

Yihooway Addaameenne Hewaana naata yelidi saꞌaa kumanaadan yootiis. I eti Edene ataakiltte sohuwaadan, kumetta saꞌaa gannate woy keehi loꞌꞌiya soho oottidi issippe ufayttidi deꞌanaadan koyiis. SHin hegaadan hanibeenna. Ayssi hanibeennee? Kaalliya shemppuwan nuuni hegaa loyttidi tamaarana.