HA GUUTTA naˈay oonakko eray? Ee, i Yesuusa. I mehee aqiyosan biron yeletti simmees. Mehee aqiyoosay mehe xalaalaassi giigida sohuwaa. Mayraama haretussinne hara mehetussi miyoobaa wottiyo qoriyaa giddon Yesuusa zinˈˈissaasu. SHin Mayraamanne Yooseefi mehee aqiyo ha sohuwaa ayssi yiidonaa? Hagee naˈa yeliyoosa gedenna; gidiiyye?

CHii, gidenna. Eti hagau yaana danddayidoy, Roome biittaa haariya, Augisxxoos Qeesaari, asa ubbay ba yelettido katamaa biidi mazggafan xaafettana mala azazido gishshataassa. Yooseefi hagan Beetaliheemen yelettiis. SHin inne Mayraama yaa gakkiyo wode, etau shemppanau issi kifileenne beettibeenna. Hegaa gishshau, eti mehee aqiyo ha sohuwaa yaana koshshiis. He gallassi Mayraama Yesuusa yelaasu! SHin neeni beˈiyoogaadan, i payya deˈees.

Yesuusa beˈanau yiiddi deˈiya dorssa henttanchchata beˈay? Eti qamman bantta dorssaa naagiiddi dembban de⁠ˈishin, wolqqaama pooˈoy eta yuusho ubban poo⁠ˈiis. Pooˈissidaagee issi kiitanchchaa! Dorssaa heemmiyaageeti keehippe yayyidosona. SHin kiitanchchay: ‘Yayyoppite! Taani inttessi mishiraachchuwaa yootanau yaas. Hachchi Beetaliheemen, Godaa Kiristtoosi yelettiis. I asaa ashshana! Maayuwan a xaaxidi mehee kattaa miyo qoriyan ziniˈˈissidoogaa intte demmana’ yaagiis. Qoppennan daro kiitanchchati yiidi, Xoossaa galatiyoogaa doommidosona. Hegaa gishshau, dorssaa heemmiya ha asati sohuwaara Yesuusa beˈanau eesoti biidosona; yaatidi haˈˈi a demmidosona.

Yesuusi keehi dumma asa gididoy aybissakko eray? I tumuppe oonakko eray? Ha maxaafan deˈiya koyro taarikiyan Xoossaayyo bayra Naˈaabaa tamaaridoogaa hassaya. He Naˈay Yihooway salota, saˈaanne hara ubbabaa medhdhiyo wode, aara issippe oottiis. Yesuusi hegaa!

Ee, Yihooway ba Naˈaa deˈuwaa saluwaappe ehiidi, Mayraami ulo giddon wottiis. Hara naati bantta aayee uluwan dicciyoogaadan, sohuwaara i uluwankka naˈi dicciyoogaa doommiis. SHin he naˈay Xoossaa Naˈa. Wurssettan Yesuusi Beetaliheemen, mehee aqiyo ha sohuwan yelettiis. Kiitanchchati Yesuusi yelettidoogaa asau yootana danddayidoogan hegaa keena ayssi ufayttidaakko haˈˈi akeekadii?