AATTA giddon deˈiya bitaniyaa beˈa. I daro metuwan geli uttiis; gidenee? He molee a mittana hanees! Ha bitanee oonakko eray? A sunttay Yoonaasa. I hagaa mala deexo metuwan waanidi gelidaakko ane beˈoos.

Yoonaasi Yihooway kiittin hananabaa yootiyaagaa. Hananabaa yootiya Elssaaˈi hayqqi simmin, daronne takkennan Yihooway Yoonaasa: ‘Gita katamaa Nanawe ba. Yan deˈiya asaa iitatettay keehin dariis; ta qassi ne etayyo hegaa yootanaadan koyayis’ yaagiis.

SHin Yoonaasi baanau koyibeenna. Yaatiyo gishshau, Yoonaasi Nanawe biyoogaappe harasaa haakkidi baanau markkabiyan geliis. Yoonaasi baqatidoogan Yihooway ufayttibeenna. Yaatiyo gishshau, Yihooway wolqqaama carkkuwa denttiis. Carkkoy keehippe wolqqaamido gishshau, markkabee haattan muukettana haniis. Markkabiyaa laaggiyaageeti keehippe yayyidi, maaduwau bantta xoossatukko waassidosona.

Wurssettan Yoonaasi etassi: ‘Taani saluwaanne saˈaa medhdhida Xoossaa Yihoowassi goynnayis. Taani Yihooway tana ootta giido oosuwaa aggada baqataydda deˈayis’ yaagiis. Yaagin markkabiyaa laaggiyaageeti: ‘Abbay woppu gaana mala, nena nuuni waatana bessii?’ yaagidi oychchidosona.

Yoonaasi, ‘Tana abban olite; yaatikko abbay woppu gaana’ yaagiis. Markkabiyaa laaggiyaageeti hegaadan oottanau koyibookkona, shin carkkoy yaa wolqqaamin wurssettan Yoonaasa markkabiyaappe abban olidosona. Yaatin sohuwaarakka carkkoy carkkiyoogaa aggin, abbay zaarettidi woppu giis.

Yoonaasi abban muukettiiddi biishin, he gita molee a mitti aggiis. SHin i hayqqibeenna. Heezzu gallassaanne heezzu qammaa i he moliyaa uluwan takkiis. Yoonaasi Yihoowassi azazettennan ixxidi Nanawe bibeennaagau, keehippe azzaniis. Yaatiyo gishshau, i waatidaakko eray?

Yoonaasi Yihooway maaddanaadan woossiis. Hegaappe, Yihooway Yoonaasa, molee mela biittan cooyanaadan oottiis. Hegaappe guyyiyan Yoonaasi Nanawe biis. Hagee, nuuni oottanaadan Yihooway yootiyo ubbabaa oottiyoogee ay keena koshshiyaabakko tamaarissennee?