AAWITI Yerusalaamen uttidi haariyoogaa doommi simmin, Yihooway Daawita olanchchati bantta morkketa darotoo xoonanaadan oottiis. Yihooway Kanaane biittaa Israaˈeeletussi immanau qaalaa geli uttiis. Haˈˈi wurssettan Yihooway maaddin, etau immanau i qaalaa gelido biittay ubbay etassa gidiis.

Daawiti loˈˈo kawo. I Yihoowa siiqees. Yerusalaame katamaa oyqqoogaappe guyyiyan, koyro i oottidobatupppe issoy, Yihoowa maachchaa taabootaa yaa efiyoogaa. Daawiti hegaa wottanau beeta maqidasiyaa keexanau koyiis.

Daawiti gastta asa gidido wode, issi iita moorobaa oottiis. Asaba gididabaa ekkiyoogee bala gidiyoogaa Daawiti erees. SHin issi gallassi omarssan i ba kawo keettaa bolli dembbayidi keexxido sohuwan deˈiiddi, duge xeelliyo wode issi daro loˈˈiya maccaasiyo beˈiis. I sunttay Berssaabo; qassi i azinaa sunttay Ooriyoona; i Daawita wotaaddaratuppe issuwaa.

Daawiti Berssaabo amottidi koyido gishshau, o ba kawo keettaa ehiissiis. I azinay haahosan olettiiddi deˈees. Hegaappe, Daawiti iira zinˈˈin, guyyeppe a shahaaridoogaa eraasu. Daawiti keehippe unˈˈettidi, Ooriyooni hayqqanaadan olaayyo sintta xeeran a essana mala ba olanchchatu halaqaa Yooˈaabassi kiittiis. Ooriyooni hayqqin, Daawiti Berssaabo machchiis.

Yihooway Daawita bolli keehi yiillotiis. Yaatiyo gishshau, a nagaraa ayyo yootana mala ba ashkkaraa Naataana Daawitakko kiittiis. Naataani Daawita haasayissiyaagaa hagan beˈana danddayaasa. Daawiti ba oottidoban daro azzanido gishshau, Yihooway a woribeenna. SHin Yihooway: ‘Neeni ha iita oosota oottido gishshau, ne son daro metoy kiyana’ yaagiis. Daawita son kiyida metoy aybee?

Koyruwan, Berssaabi naˈay hayqqiis. Hegaappe Daawita bayra naˈay Aminooni, ba michchee Taamaariira wolqqan zinˈˈiis. Daawita naˈaa Abeseloomi hegan keehi yiillotidi Aminoona woriis. Takkidi, Abeseloomi daro asaa labidi, eti bana kawoyanaadan oottiis. Wurssettan, Daawiti Abeseloomaara olettidi xoonin, Abeseloomi hayqqiis. Ee, Daawiti daro metuwan geliis.

Hegee hegaadan deˈishin, Berssaaba Solomona geetettiya naˈaa yelaasu. Daawiti cimidi sahettido wode, a naˈay Adoonee bana barkka kawoyanau maliis. He wode Daawiti Xaadooqa giyo qeesee, Solomoni kawo gidanaagaa bessanau a huuphiyan zayitiyaa tiganaadan oottiis. Hegaappe ­gamˈˈennan Daawiti 70u layttan hayqqiis. I 40u laytta haariis; shin haˈˈi Israaˈeele kawoy Solomona.