HA ASATI tookkido teera ayfiyaa xeella. Woyne teeraa wurccoy ay keena gitakko xeella. Hegaa kasuwan aattidi tookkanau naaˈˈu asa koshshiis. Balasiyaanne roomaaniyaa geetettiyaa hara mitta ayfetakka xeella. Ha loˈˈo teera ayfee auppe yiidee? Kanaane biittaappe yiis. Kanaanee issi wode Abrahaamee, Yisaaqinne Yaaqoobi deˈidosaa gidiyoogaa hassaya. SHin he sohuwan koshay denddido gishshau, Yaaqoobi ba soo asaara Gibxxen deˈanau biis. Haˈˈi 216 gidiya layttay aadhdhi simmin, Muusee Israaˈeeleta zaaridi Kanaane biitti kaaletti efiiddi deˈees. Eti Bazzon Qaadeesa geetettiya sohuwaa gakkidosona.

Kanaane biittan iita asati deˈoosona. Yaatiyo gishshau, Muusee 12⁠u xomoosiyaa asata kiittiiddi etassi: ‘He biittan deˈiya asay ay keena corakkonne qassi etu minotaykka ay keenakko xomoosite. Biittaykka katta loytti mokkiyakkonne xomoosite. Qassi yan mokkida teera ayfiyaappe amaridaagaa ehennan aggoppite’ yaagidi yootiis.

Xomoosiya asati Qaadeesa simmi yiidi Muusessi: ‘Biittay tumuppe loˈˈo’ yaagidi yootidosona. Hegaa qonccisanau, eti Muusa yaappe ehiido teeraappe amaridaagaa bessidosona. SHin xomoosiyaageetuppe 10⁠ti: ‘Yan deˈiya asay adussanne mino. Eta biittaa ekkanau nuuni malikko, eti nuna worana’ yaagidosona.

Israaˈeeleti hegaa siyidi yayyidosona. Eti: ‘Nuuni Gibxxe biittan woykko ha bazzuwan haiqqidabaa gidiyaakko loˈˈo shin’ yaagidosona. ‘Nuuni olan hayqqana; nu maccaasatinne nu naatikka oomooddettana. Muuse sohuwan kaalettiya ura dooridi, Gibxxe guyye simmoos!’ yaagidosona.

SHin xomoosiyaageetuppe naaˈˈati Yihoowan ammanettidi, asay yayyennadaan oottanau baaxetidosona. Eta sunttay Yaasanne Kaaleeba. Eti: ‘Yayyoppite. Yihooway nunaara deˈees. He biittaa nu ekkanaagee metenna’ yaagidosona. SHin asay siyibeenna. Eti ubba Yaasanne Kaaleeba worana koyidosona.

Yihooway hegan daro yiillotidi Muusessi hagaadan yaagiis: ‘Layttay 20 woy appe bolla gidido asaappe issoynne Kanaane biitti gelenna. Taani Gibxxe biittaaninne bazzuwan oottido maalaalissiyaabaa beˈidosonashin, yaatidikka tanan ammanettibookona. Hegaa gishshau, etappe issoynne attennan hayqqana gakkanaashin, eti 40⁠u layttaayyo bazzuwan toylattana. Yaasunne Kaaleeba xallay Kanaane biitti gelana’ yaagiis.