ANE Qaayeelanne Aabeela xeella. Eti naaˈˈaykka diccidi gitatidosona. Qaayeeli goshshanchcha gidiis. I kattaa, ayfiyaa miyo mittaanne ataakilttiyaa oottees.

Aabeeli ba dorssata heemmiyaagaa. I dorssa marata naagiyoogaa dosees. Eti diccidi gitatin, Aabeeli gamˈˈennan wude dorssaa heemmiyaagaa gidiis.

Issi gallassi Qaayeelinne Aabeeli Xoossaassi imotaa ehiidosona. Qaayeeli ba oottido kattaappe amaridaagaa ehiis. Aabeeli qassi ba dorssatuppe daro loˈˈuwaa ehiis. Yihooway Aabeelaaninne a imotan ufayttiis. SHin Qaayeelaaninne a imotan ufayttibeenna. Aybissakko eray?

Hegee Aabeela imotay Qaayeelaagaappe loˈˈo gido gishsha xalaalaassa gidenna. Aabeeli loˈˈo asa gidiyo gishshataassa. I Yihoowanne ba ishaa siiqees. SHin Qaayeeli iita asa; i ba ishaa siiqenna.

Yaatiyo gishshau, Qaayeeli ba qofaa laammana koshshiyoogaa Xoossay yootiis. SHin Qaayeeli siyennan ixxiis. Xoossay Aabeela appe aattidi dosido gishshau i keehippe yiillotiis. Hegaa gishshau, Qaayeeli Aabeela ‘Ane dembbaa boos’ yaagiis. Hegan banttarkka deˈishin, Qaayeeli ba ishaa Aabeela shociis. I keehippe shocido gishshau Aabeeli hayqqiis. Qaayeeli oottidobay keehippe iitaba gidennee?

Aabeeli hayqqikkokka, Xoossay hanno gakkanau a hassayees. Aabeeli loˈˈo asa; Yihooway a mala loˈˈo asaa mule dogenna. Yaatiyo gishshau, issi gallassi Xoossaa Yihooway Aabeela deˈuwau zaaridi ehaana. He wode Aabeeli mule hayqqenna. I ha saˈaa bolli merinau deˈana danddayees. Aabeela mala asatuura erettanaagee loˈˈoba gidennee?

SHin Xoossay Qaayeela mala asatun ufayttenna. Hegaa gishshau, Qaayeeli ba ishaa wori simmin, Xoossay a bantta soo asaappe haahosaa biidi deˈanaadan oottiyoogan qaxxayiis. Qaayeeli haakkidi hara heeran deˈanau biiddi ba michchotuppe issinno ekkidi biis; akka assi machcho gidaasu.

Hegaappe guyyiyan, Qaayeelinne a machchiyaa naata yelidosona. Addaamenne Hewaani naati haraatikka attumaageeti maccaageeta ekkidosona; etikka naata yelidosona. Gamˈˈennan saˈan daro asay deˈiyoogaa doommiis. Ane etappe amaridaageetubaa tamaaroos.