HAˈˈI aybi haniiddi deˈiyaakko beˈa. Addaameenne Hewaana loˈˈiya Edene ataakiltte sohuwaappe yedetettiiddi deˈoosona. Aybissakko eray?

Issi keehi iitabaa oottido gishshataassa. Yaatiyo gishshau, Yihooway eta qaxxayiiddi deˈees. Addaameenne Hewaana oottido iitabay aybakko eray?

Xoossay oottoppite giido issibaa oottidosona. Xoossay ataakiltte sohuwan mokkiyaabaappe qumaa maana danddayiyoogaa etassi yootiis. SHin Xoossay, issi mittaa teeraappe meennaadan yootiis; miyaba gidikko hayqqoosona. He mittay assi buzo. Asaba gididabaa ekkiyoogee bala gidiyoogaa eroos; erokkonii? Yaatin hanidabay aybee?

Issi gallassi Hewaana ataakiltte sohuwan barkka deˈishin, issi shooshshay o haasayissiis. Ane hegaa qoppa! I, Xoossay mooppite giido mittaa teeraappe maanaadan Hewaanissi yootiis. Yihooway shooshshata medhdhido wode haasayanaadan ootti medhdhiibeenna. Yaatiyo gishshau, hagee hanana danddayidoy, issi uri shooshshay haasayanaadan oottiina xalaala. I oonee?

Addaama gidenna. Hegaa gishshau, Yihooway saˈaa medhdhanaappe daro wodiyaa kasetidi medhdhido ayyaana meretatuppe issuwaa gidana bessees. He meretati kiitanchchata; nuuni eta beˈana danddayokko. Issi kiitanchchay keehi otorettiyaagaa gidiis. I Xoossaagaadan haariyaagaa gidanau taassi bessees giidi qoppiyoogaa doommiis. Asay Yihoowayyo azazettiyoogaappe baassi azazettanaadan koyiis. Shooshshay haasayanaadan oottida kiitanchchay a.

He kiitanchchay Hewaano cimmana danddayiis. He mittaa teeraappe miyaba gidikko, a Xoossaadan hanana danddayiyoogaa yootido wode hegaa ammanaagaasu. Yaatiyo gishshau, mabeyaasu; Addaameekka miis. Addaameenne Hewaana Xoossaassi azazettibookkona; bantta deˈiyo loˈˈiya ataakiltte sohuwaappe eti kiyidoogeekka hegaassa.

Gidikkonne, sinttappe issi wode Xoossay kumetta saˈaa, Edene ataakiltte sohuwaadan loˈˈiyasa oottana. Neenikka saˈaa hegaadan oottiyo oosuwan waata maaddanaakko, deˈishshiiddi tamaarana. SHin haˈˈi, Addaameenne Hewaana waanidaakko ane beˈoos.